Wednesday, November 21, 2007

Lamka Post | November 21, 2007 "Mautaam kialpi kipanta"

MHJU Team Mautaam toh kisai a singtang bial enkhia a ni 5 sung a khualzin nung un hong tung; Mautaam kialpi kipanta hi’n puang

Lamka, Nov-19: Manipur Hills Journalist Union (MHJU) in kal paita November 14, 2007 a Mautaam kialpi thuakte a mun mahmah a enkhe di’n Tedim Road tawn in kuankhia ua Singngat sub-division, Thanlon Sub-Division, Tipaimukh Sub-Division pha in Henglep Sub-Division tawn kual in singtang khua 40 sang a tamzaw a phakzoh nung un zan sunnung dak 3:30 in Lamka hong tung uhi.

MHJU team in Nov 14, zinglam dak 10 in Lamka apan kipankhia in sunnung dak 3 vel in Singngat tung in nitak dak 6 in Tuivel khua ah lut in tua ah Maukot leh Mongken khuate samkhawm in hiai toh kisai houlimna nei uhi. Hiai khuate a buh la hoihpen in tin 400 la zou a, a hoihloupen in tin 6 tuhna ah 120 la zou lel ahihdan uh gen uhi. Mongken khua mipite’n kum 1 sung in tin 3000 val kham zou ding uh himahleh tin 1500 lel kaikhawm zou uh ahih dan gen uhi. Hiai khua apan nitak nung a kipan khia in Suangdoh, Pumlong, Lungthul tawn in nitak dak 10:30 in Tuima ah giak ua, kho sung mi tuamtuam kimuhpih in tin khat tuhten tin 1 mah la, 2 tuhte’n tin 20/30 la ahihdan mukhia uhi. Hiai khuate’n bel hun dang sang a FCS antang mu hoihzaw ahihdan uh gen uhi.

MHJU team a khualzinna uh a ni 2na in zing ann nek khit in Mualnuam manoh in Tuima apan masawn nawn ua, tua ah Thuangtam ah Mr. Ginlian in tin 1 a tuhna ah tin 1 mah la a, Mualnuam ah inn 220 om ah 90% vel in buh tin 20/30 lel nei ua, tuate lak a inn Mr. Pumsiam tel in inkuan tamtak in tin khat leng la zoulou ua, Songtal, Khuanggin leh Sinjawl khuate’n 50% in buh lak ding neilou uhi. Siing lei bawlte apan kiza dan in siing leng kum dang toh kibanglou in taam gai hi’n gen lai uhi.

MHJU Team in maban sawnzel in Phaitong, Khajang tawn in Sumtuk ah giak uhi. Phaitong khua ah a tangpi in buh inn khat in tin 10/20/30 piangsak ua, a tampen in tin 60 piangsak ua, tuamah bang in Khajang khua leng hiai toh kibang in buh piang hi’n kho mite’n a kimuhpihna uah khomite’n gen uhi.

MHJU team in a khualzinna uh ni 3na ding in Sumtuk apan in Mualpheng, Dialkhai, Joutung, Bukpi, Pherjawl leh Lawibual pha in nitak 10 in Bukpi ah giak suk nawn uhi. Mualpheng inn 35 vel omna ah buh tin 3 tuhte’n tin 50/60/70, tin 1-2 tuh ten tin 20/30 lel la ua, tuamahbang in Dialkhai ah leng hi a, hiai khua a buh haupen in tin 70 nei a, tin 2 tuhte’n tin 2 mah la uh ahihdan hausa upa leh inn tuamtuam vehna ah muhkhia ua, haichi tuamtuam dangte leng a hoih om tuanlou hi’n leng mukhia uhi.

Dialkhai apan bukpi ah zing an sunnung dak 2 vel a ne in Pherjawl zuan in paisuak ua nitak dak 7 vel in Pherjawl tung ua tua ah hausa leh mi tuamtuam kimuhpih in Pherjawl kho sung a buh pian dan leh Tipaimukh bial om dan kichiantak in kan uhi. Tipaimukh bial ah mun dangteng sang in buh hihsia huihsia, zusa leh ganhing chi tuamtuam tamtuanse hi’n mukhia uhi.

Pherjawl hausapa gen dan in nitak lam a hoihtak a a nutsiat uh zingkal a a et chiang un zusa hon in zan khat thu a negai mai uh ahihdan gen a, tua lou inleng huihsia ziakin leng lou tamtak suksiat in om a, tua lou sun teng sazu’n negai nawn ahihdan gen hi. Pherjawl gamsung ah sazu tam mahmah a, MHJU team gari a apaina uah leng lampi lai a sazu tai suk-tai tou muh ding tam mahmah a, gari inleng tamtak gawilum thei hial hi. Pherjawl khua ah inn 50 vel in buh tin 1 leng la lou ua, Mr. Sieltinchung, Lalchungnung, Laringsan te ngial in tin 5 chiat a tuhna uah khat leng la lou uhi. Pherjawl hausa in a genna ah, kho sung tamtakte’n siing hoihtak a chiing uh ahihman in amaute a kinepna neuchik lel nei ahihdan gen a, bialtu MLA inleng hiai toh kisai a mipi patauhna a bil ngong bangmai a a ompen khase mahmah uh ahihdan uh gen uhi. Lawibuai khua ah inn 5 om ua, Mr. Tuanzakham in tin 2 a tuhna ah tin 3 la a, a dang inn 4te’n bel khat leng la lou uhi.

MHJU Team in hiai khuate a phak khit un nitak dak 9:30 in Bukpi a giak ding in tungsuk nawn ua, tua ah hausa upate toh houlim banah, nautang khenkhatte houlimpih uhi. Bukpi khua inn 200 omna ah inn 10 vel in buh lak ding nei hetlou ua, buh lak ding nei a tamzawte’n negaita ua, a negai nailoute’n leng 2007 sung in negai ding uhi.

A tangpi in tin 1 tuhna ah tin 10-15 piang a, Bukpi sung vuak a a ding in buh lak hun nawn tan a ding in antang 2000 quintals val poimoh ding hi’n leng gen uhi. Thanlon bial sung a kho tuamtuam phakna ah, government a palai a neihte uh tung a khase mahmah uh ahihdan leng MHJU team te kiang ah nautang tamtakte’n tun uhi. Hiai khote’n bel Sial bel hau mahmah uh ahihdan gen ua, himahleh hiaite a poimoh hun a lei ding vang mahmah ahihdan leng gen zel uhi.

MHJU team in a khualzinna uh ni 4na ding in Nov. 17 in Bukpi apan zinglam 7 in kipan khia ua, Joutung khua ah thil omdan kichiantak in enkhia ua, hiai ah leng buh lak ding nei hetlou tamtak om ua, a la tampen in tin 70 la a, a tawmpen in lawh khat la lel hi. Thanlon khua inn 102 omna ah buh tin 913 lel piang a, inn kuan khat in tin 8 vel in tangzou lel uhi. Inn 31 in buh lak ding khat leng neilou uhi. Suangpeh inn 34 omna ah inn 2 in lak ding neilou ua, a tampen in tin 70 nei; Tallian inn 15 omna ah inn 5 in lak ding neilou ua, a dangte’n tin 20/30/40 khong lel nei; Leijangphai inn 150 omna ah buh haupen Kamlianthang in tuilou pari 2 ah tin 250 la a, a dangte’n bel 20/30/40 khong lel la; Sainoujang inn 36 omna ah tin 7 tuhna ah tin 20 leh tin 4 tuhna ah tin 10 khonglel la Mr. Mangzalam in lou 2 a bawlna ah tin 40 lel la; Chongchiin inn 50 omna ah inn 40te’n lak ding khat leng neilou; Saihum inn 8 omna ah tin 3 tuh mi 1 in tin 5 la a, a dangte’n lak ding neilou ahihdan mukhiak nung un Santing a giak in hausa upate’n kikhoppihna nei in tua hausa upate’n MHJU team te mai ah buh-le-bal a Santing khua a patauh dan uh tun uhi.

Santing inn 150 omna ah buh tin 400 khong lel piang ahihdan theisak ua, patau mahmah, himahleh a thu tutna ding theituanlou a ekteh tut a tu a hihdan uh MHJU teamte theisak ua, FCS antang nelou a, cubic (singjawl genna) antang nezel ding i hi uh maw kichilel ahihdan uh leng gen uhi.

MHJU team in a khualzinna uh ni 5na ding in Nov. 18 in Santing apan zinglam dak 7 a kipankhia in Henglep bial mun tuamtuam phakual nawn ua, Ainah inn 36 omna ah, buh haupen in tin 200, a hauloupen in tin 20; Lungchuong inn 20 omna ah, buh haupen in tin 120, a hauloupen in tin 16; V. Munlai inn 8 omna a ahaupen in tin 90, a hauloupen in tin 10; Dohjang, inn 12 omna a, a haupen in tin 50 a dangte’n negaivekta; D. Munlai, inn 20 omna a, a haupen in tin 40 nei, a dangte’n ne gaivekta; Munpi, inn 70 omna a, ahaupen in tin 100 nei a, Thingkeu inn 42 omna a, ahaupen in tin 300 nei a, hiai pen MHJU khualzinna a ahaupen hilai; Kholian, Tuilumjang, Kamkeilawn, leh hiai kim a te leng buh hau kuamah om tuanlou ua, himahleh sing-le-gua a tawm deuh ziakin a suse thei tawm deuh hi’n kithei hi.

Tutung MHJU team ni 5 sung a khualzinna uah, September 2007 a huihpi nung in buh naktak in susia a, tua a suaktate sazu in nuai nawn a, sazu nek louhte khaupe, bak, vasa leh ganhing chituamtuamten ne nawn uh hi’n suikhia uhi.

MHJU in hiai thil tung mulkimhuaitakte ziak in Churachandpur district a sub-division 4, Singngat, Thanlon, Tipaimukh leh Henglep ah Mautaam kialpi om ding chih hinawnlou in, kipanta hi’n thuphuan bawl in Governor of Manipur, Chief Minister of Manipur, MP (Outer), Chairman, HAC, leh CCpur district sung a Ministers leh MLAs te kiang ah hiai copy khat chiat pia uhi.


V/A Member election om ding

Lamka, Nov. 19: Thusuak kingah in a taklatdan in, a hongtung ding 22-30 November, 2007 sung in Churachandpur sub-division sung a, tax pia inn 20 leh a tunglam omna khua teng ah Village Authority Member Election neih hiding hi.SDO/CCpur S. Naba Singh in a thusuahna ah, hiai Village Authority Member Election om ding ah mipi kithuahpihna a nget banah, election chiang a Election Officer ding guanna leng nei ngal hi.


Gender Equality toh kisai workshop

Lamka, Nov. 19: Nehru Yuva Kendra, Churachandpur saina in November 20, sunma dak 11:30 in Zou Synod Hall, Zomi Colony ah “Gender Equality” chih thupi a nei in workshop neih hiding hi.Hiai hun ah Chief Guest in DSO/CCpur Michael Ginzasuan pang ding a, Functional President in Zomi Colony Hausapa Upa Chinkham pang ding hi. Huai banah, hiai hun seh ah thugenpi in Churachandpur College a Senior Lecturer Dr. Lalzagou pang ding hi.


Youth Hostel zoupah di’n ngen

Lamka, Nov. 19: Churachandpur Students’ Union (CDSU) in Lamka a Youth Hostel bawl a omlel toh kisai a, hiai hostel lamtu Manipur Police Housing Corporation (MPHC) a laikhak uh kimu in a taklatdan in, Churachandpur district sung kia hilou a mun tuamtuam apat a leng sinlai naupang, khosakna haksataktak te’n Lamka ah laizil di’n hong kuan ua, khosakna a haksat ziak mah in innluah hiam private hostel hiam a om ding haksa ahihman in, govt. in Youth Hostel a hon bawl pen kipak mahmah ahihdan uh taklang hi.Himahleh, lametdan bangloutak in, hiai Youth Hostel lamlel a ompen, deihbang a hoihzoulou leh kinlou ahihman in poisakthu taklang kawm in, mi gentheite leh sinlaite khualna a a kintheilam a, a hoihtheipen a bawl khinmeng ding in CDSU in MPHC kiang ah ngetna bawl hi. Huai banah, nasepna toh kisai a, a poimoh leh, a poimoh hunhun a kithuahpih ding ahihdan leng CDSU in MPHC zasak hi.

www.zogam.com

No comments:

Post a Comment