Cabinet thupukna lungkim huai hiam?

Editorial, Manipur Express | November 07, 2008

Chief Minister Okram Ibobi Singh makaihna in zan nitaklam dak 4.00 akipan nitak dak 7.00 tan ama official bungalow ah Cabinet meeting neih in om a, huai ah Manipur khangthu adia chiamteh tham ching ding thupukna tuamtuam bawl ua, huai te i et vengveng leh lungkim huai tawk mah ding hiam chih ngaihsut theih tamtak om mawk hi.

Manipur University ah quota reservation tungtang thu ah Manipur University Tribal Students Union (MUTSU) leh All Tribal Students Union Manipur (ATSUM) te’ makaihna in kiphinna nasatak om a, mass exodus ( ahonpi apemkhiakna) tanpha tung hi. MUTSU leh ATSUM in hun sawtkuamtak nuakna aneih nung un khalui in sousang mahmah in kiphinna nasa petmah om a, student hunkhop in liamna tuak in, MUTSU leh ATSUM Executive te tanpha Police custody ah koih in om uhi. Hiai kiphinna pen singtangmi leh phaizang mi kal ah buaina tanpha tun lawhdek man hial a, Chief Minister pina nuai ah student makaite’n Delhi ah Human Resource Development Minister Arjun Singh leng bangzah vei hiam va mu uhi.

Lamka khawpi ah leng MUTSU leh ATSUM te’ thilnget gupna in CDSU makaih in public rally thupitak om a, phaizang mite’n singtangmite bangtan deidan lai ding uhiam chih tanpha poster takkhia in sinlai naupangte kikou uhi. State Cabinet in leng hiai thu ngaikhawk sim zaw ahi ding a, zan nitak cabinet meeting ah genkha nual uh bang hi. Cabinet in Indira Gandhi Tribal National University(IGTNU) nuaia Regional Centre khat Manipur adiakin singtanggam a koih din lemsa uh chih hi a, hiai pen ki naupang khemna lel adiam chih ngaihsut thamching hi. State Cabinet in hiai bang thupukna a hon lak ua leh MUTSU te bang in hostel pawtsan singtangmi naupangteng hostel ah lutnawn tak di chi a thupuan nei uh chih thuthang om zawmah a, dik bang ahih zenzen leh hungaih zek lai ahoih kei ding maw chi ut ihi.

Manipur University pen Central University status ah dopsang in ana om ta a, hamphatna (facility) tuamtuam a ngah chih pen kuapeuh theih ahi. Huchi kawm kal ah, singtangmite thil nget quota tungtang pen sukbu chin ding thil haksa lua hiding in ginhuai lou hi. Cabinet thupukna genthak lai leng, India ah University a sang a sim om a, huai lakah fake University kichi leng tamtak om in, HRD Ministry in University a za a simte blacklist a akoih uleng om zawmah hi. Tua Cabinet in Indira Gandhi Tribal National University a chih u bang kiza vang mahmah a, koi muntak a headquarter om hiam chih leng ki thei kha lawtel lou hi. Ahih kei leh, amin a Tribal University chih om ziak maimai a a hon khemna leltak uh adiam?. Indira Gandhi National Open University kichi ilak ah a thangsim mahmah a, New Delhi ah headquarter nei in, hiai pen distance learning chih in leng om hi. IGNOU in Lamka ah leng study centre nei a, huai tawh kibang maimai in IGTNU regional centre khat Manipur singtanggam a koih ding chih hilel hi.

Degree hiam ahih kei leh, graduation course tuamtuam te pursue ut ihih leh IGNOU khawng ah hih suk lele kibangthou hilou maw chih theih in om a, deemed University piching khat bek dinsuah ahih kei leh, ATSUM leh MUTSU thil nget pen bangmah lou suak ding a, full fledge University kichi tum mang tawh kibang lel ding hi. A lehlam pang ah genlai le hang, full fledge university ahih kei leh deemed university khat bek i ngah zawh keiding leh singtangmi student tamtak ading in laisinna kong ah niamkiakna hong hizaw diam chih theih in om hi. Etsakna ding in Board of Secondary Education Manipur nuai ah Pawl X tan i sin a, huai kawmkawm in National Institute of Open Schooling (NIOS) in leng centre tuamtuam hong nei in, BSEM nuai a zoulou khenkhat bang in NIOS nuai ah pawl X Ist class khawng in hon zou ua, Centre Government in recognition apiakthou ahihziak in, equivalent hiveve hi. Tuabang deuh in lehkha sim mumal khol kei leng le, IGTNU kichi nuai ah master degree lak ahaksa dia hia chih bang ngaihsut theih a, IGTNU norms leh procedure bangmah theilou (digest lou) pi a ATSUM leh MUTSU in State cabinet thupukna kipahpih mahmah ahih un chu, singtangmi student te maban ding bang hongsuak ding hiam chih theih hakpi suak hi.

Tutung a MU buaina genzek lai le hang, MUTSU leh ATSUM makaite a maphutu himahleh, hiai tanpha a lawhchinna a ngahna tung uah min hoihna pen piak ding hileh, singtangmite ki pumkhatna ziak liauliau ahi chih theih in om hi. MU buaina pen singtangmite adia common issue ahih ziak lel a pangkhawm i diam chih bel theikhang, bangteng hileh, hiai bang deuh in common issue te ah thukhat luang a i pankhop touh zel ua leh i maban uah lawhchinna in hon ngak ding ahi chih muhkholh theih a, huai ding in pawlpi tuamtuam makaite, student Union leader te, public leader leh mipi-lam Ai-oh Palai te i pankhop touh zel uh deih huai hi. I zawhna ding in, Manipur University tawh equivalent University dang (Hill University) i ngah zawh tuan kei ding leh MUTSU leh ATSUM makaite hong bengvak zawlai uhen la, intellectual level ah consultative meeting khat samthei le uh chih deih huai mahmah hi.

http://zogam.com/index.php?option=com_content&task=view&id=4857

==========================

IGNTU Regional Centre: Vualzawlna or Hamsiatna

Central University nuai a Manipur University a hong lut toh kiton in tribal reservation tungtang a buaina kipan ngal a, ATSUM leh MUTSU in theihtawp suah in MU a 34.2% Scheduled Tribe reservation omsak ding phu in panla uhi. A panlaknate uh a lohchinkei leh a tawp a bel singtangmite a ding lieuliau a Hill University nget ding bang ATSUM leh MUTSU in kamteh ua, a panlakna uh lohchingkei mahleh Hill University bel ngen nai tadihlou uhi. Himahleh, Manipur singtangmite a ding lieuliau Hill University ngen di’n Manipur singtangmite sinlai pawlpi tuamtuam Delhi a omte’n Manipur Hill University Demand Committee, Delhi (MHUDCD) kichi pawl thak hon phuan uhi. Manipur sorkar leh MU thuneitute apat Manipur singtangmite’n nelhsiahna, nawlkhinna leh deidanna a tuah ziak ua ut-le-utlou a Manipur singtangmite a ding liuliau ‘Hill University’ a nget uh ngai hi’n leh Manipur a om singtangmite a dia hiai lou-ngal khosuahna dia lampi dang omlou hi’n MHUDCD in gen hi. Singtangmite a ding lieuliau Hill University ngen dia hiai bang kisakkholhna a pai lai in, alehlam ah, zan a Manipur Cabinet meeting in Manipur hill district khat a Indira Gandhi National Tribal University’ regional centre hon di’n hon thupuk uhi.

Singtangmite’n higher education a neihtheihna ding uh leh tribal culture kepbitna dia singtangmite a ding bik university dinkhiak dia, UGC in a seh, D. Swaminadhan Committee in thusun a bawl pen Union Cabinet in pom a, India Innpi in leng Indira Gandhi National Tribal University Bill, 2007 namkip hi. IGNTU Bill, 2007 in “The access to educational facilities for the vast tribal population in the country is very limited and the tribal youth is at disadvantage in higher studies, leading to quite a low educational and economic status of tribal communities. There is high concentration of tribal population in the NE States, and in the area comprising parts of Madhya Pradesh, Chhattisgarh, Jharkhand, Orissa, Andhra Pradesh, Maharashtra, Rajasthan and Gujarat. While NE States have a good number of Central Universities, there is no Central University specifically catering to the population in the other tribal concentrated area. It is, therefore, proposed to establish and incorporate a teaching and affiliating University at Amarkantak in the State of Madhya Pradesh, to facilitate and promote avenues of higher education and research facilities, particularly for the tribal population in the country…” chi’n taklang hi. Hiai dungzui in, phualpi sorkar senna nuai ah singtangmite khualna in Amarkantak, MP ah Indira Gandhi National Tribal University (IGNTU) phutkhiak in hong om hi. IGNTU in a tup ahihleh “promoting studies and research in tribal art, culture, tradition, language, custom, medicinal systems, forest based economic activities, including special studies in the flora and fauna, and advancements in technologies relating to natural resources of the tribal areas” chih ahi. IGNTU college-te kiang a ‘affiliation’ a piak theih banah tribal area ah regional centre pha a sak zahzah hon theihna thuneihna nei hi.

Hiai tan lel et in leng IGNTU pen Manipur singtangmite leng lungsim a nei a kibawlkhia ahihdan chiang a, a tup-le-ngimte leng hoih petmah ahihman in Manipur Cabinet in hill district khat a IGNTU regional centre hon dia thupukna a lak uh kipahhuai mahmah hi. Regional centre i chih university piching hikei mahleh university piching neihna dia kalbi poimohtak ahihna ah kipahhuai kholdiak hi. Alehlam ah, ‘regional centre’ maimai ahi a, university piching a hong suahna ding gamla mahmah lai thei ahihman in tamtakte mitsuan Hill University toh kikhai mahmah hi. Bangteng hileh, a hoih huntawk chih leh ‘regional centre’ maimai hia maw chih sang mah in koi district in a tang dia chih thu ah (ki)buaina tamtak tung thei ding bang hi. Zan a Cabinet meeting in a koihna ding district genlou ahihman in mahni district a IGNTU regional centre koih ding kituhna nasatak a hong pian a, huaina lam a bawlkhiak ngeilouh a a om ding baihlam mahmah hi. Huchibang hun i tunsak ua leh Manipur sorkar vualzou hizel ding a, a moh leng en kikhu zomah ding ahi. Sorkar in IGNTU regional centre hon a sawm pen ei a di’n vualzawlna a hong suak diam ahihkeileh hamsiatna?

The Lamka Post | November 07, 2008