Zou Youth Organisation Silver Jubilee lop hiding

Kum 1983 kum a nopni, dani, shini-manni a tawmngaisuo a kipei ding poimaw ahina toh ana kiphut - ZOMI YOUTH ORGANISATION (ZYO) pen tukum in kum 25 chingta hi.

Silver Jubilee lopna December 19, 2008 chiengin Lamka khopi ah zah hi ding hi. Kum 25 chintoh kitua in Block leh unit ana kiphutsa ana function nawnlou khenkhat umte suhhing kia sawm in lamkaiten pan la panta uhi.

November 9, 2008 chiengin Singngat Block suhhingna pen Singngat khopi ah nei hiding a, tuoni ma in Hauopi Block zong Lunmuol ah suh hingna um ding hi.
November 15, 2008 chiengin Shillong khopi ah ZYO Unit phuna lamkai ten va nei ding uhi.
November 23, 2008 chiengin Tuining Block suhhingna Tuining khopi ah nei in umkia ding hi.

Tualeh, ZYO Silver Jubilee suong phuna zong um ding hi. Tua suong pen mi tawmngai leh nam ngaina mama Pu Hauminlien in tuoding chi ahita hi. Tam toh kisai in Souvenir zong bawl hiding. Article leh bangkim pen a peding in ana man chiet lei dei huoi mama hi. Tualeh sum-le-pai a i pan khawm uh hing ngaikia ding ahiman in michin i nei kham kham uh tuokhawm ding in zong kiman san umlei chi iki matheisah uh ahi.

ZYO Thusim tomkim

Zomi Youth Organisation (ZYO) khu Zou sung a hatlaite Kum 14-50 kikal sung a mite (abihtah a Nungah leh Tangvalte) Phattuomngai Pawl (Philanthropic Organisation) kilawikhawmna, (Apex Body of the Zou Youth) ahi. Kum 1983 in azatat-huoi Pu T. Gouzadou, Ex-Minister, Founder President hina nuoi ah ana kiphutkhie hi.

I chi-le- nam a diing a sil hoi leh phattuom diing tampi Zomi Youth Organisation (ZYO) in tup-le- ngim (aims and objects) a nei a, apoimaw tangpite i tahlang ding uhi:

* Chi-le-nam khantouna ding in Nampi khut leh keng ahi ding hi.
* Chi-le-nam tawisangtu hi ding in si lhoi bawl a, Pupa tawndân leh ngainate, thu-le-la, ham-le-pau kembittu ahi ding hi.
* Panpitu ding neilou, Genthei, liengvai, meithai, taga, Sietna tuohte panpi ding leh kem a, enkawltu (kalsangtawi) ahiding hi.
* Khotâng sietna leh sil hoiloute (Social-evils) doudâl leh siemphat ngaite siempha a, Khotâng hoina dîng, sienthouna leh damtheina dîng a panlatu ahi dîng hi.

I society sung ah ZYO a manphatna leh a poimawdan i thei zounai tadisih ua, i zat na ding amun leh ahuntah ah aphatuomna ding bang in i zang thei nai sih uhi. Azal i zou ding bangtah a, i zoutheinailou jieh un i nampi adia vangsietna chi khat ahi hi. Zou khosuonna/Zou hausatna khuo leh UZO unit dintheina khuo khat a ZYO unit dintheilouna khuo khu Zou khosuon dihtah a chingthei sih (bukimlou) chi ding ahi mai hi. I Zou hina dihtah, i hoina leh phatna (i giel) i suhlat theina ding lampi um sun khu ZYO ahia, i pibawl a i ngaisang/tawisang ding u khu poimaw-le-kul ahita hi. Hun hingpeitou zel ding ah i nampi in ZYO a poimawna hing lien deudeu ding a, sa-le-gal, shi-le-man, siet-le-khat i tuoh chieng a, i nampin a masawt ding leh i thatang a, i nampi vanzat poimaw ding khu ZYO hing hiding ahi. Tuajieh in Zou umna taphot ah ZYO Unit a um ngeingei ding ahi.