Buoithlak Ka Tih

By Hrangthangvung

May 2007 sung po po DHCF chawibiek inkhawm thrangve hman lo a ka um hnungin 3rd June a kan khawm nawk chun, thla khat sunga thil lo danglam hratzie ka hmuin Rip Van Winkle ang emin ka buoi nawa chu ka thil tawnhai kha ka mit, nakawr le ngaituonaah a cham zing leiin ka hung ziek ta khawng khawng a nih. Khawvel kal remin a phur suok a lo ni ta pal khawmin ei chawibiek inkhawm rihau kha hang hril met ka nuom a; Thralaihai hla sak el ti lo, anni mi thruoinain mipui hla sak khawm hlapawl deu at ngawtin ei sak a, music khawm duthusama nal tawka rem vawng a lo ni tah.

Amiruokchu a ri a mawiin ropui ka ti em leia ka bi chieng taluo khawm lo ni ta ngei a tih, lemderna hnuoia hmur inkhap hung inlang ta uoi uoi chu ka mitin a en a, ka nakawrin a ngaitlak a, ka ngaituonain mak ti in a sawi nawk nawk a ni tak!Mar Thomas chu hrillo, ei chawibiekna Biek In neituhai buotsai “Anil Das Memorial Music Competition” ah kum 1997 inthawk ta khan inphalam lek lova Choir a ngawt khawm vawi 7 ngat 1st Prize lo la tah ei thralaihai hlasak thiemzie chu ka hril rak khawm a trulin ka hriet naw a; chuong kara individual item a lawmman an lakhai lem chu hril da’l ka tih.

Ka lo suong ang hrimin 3rd June 2007 a an hlasak lem kha chu a ri a mawiin competition-a thrang nihai sien chu 1st Prize chungah prize nawk sawng um sienkhawm an la lak tho tho ka ring hiel.Hieng em ema an thiem lei hi ni ta ngei a tih tu ta DHCF Choir Music Video an siem mek khawm hi nghakhla taka ei lo thlir thrup el san. Amiruokchu Music Video siem le Pulpit hmaa perform indangzie hi threthrawp met inla chu a mawi ka ring ngei. Hi ni hin a nih ei thralai ka suong em emhai hlasak ngai ka tum leh an hla chu ni tho si, a saktuhai tak ngir thrup siin studio-a an record sa an min ngaitir a;

Delhi a ei hlasak thiemhai lai a ka lo ‘star’ em em Joseph Pakhuongte-in a hang sak nawk leh chuong tho chu! Kha ni khan chu ‘in “prepare” rak lova ko thut an ni leiin record sa an mi play-pek mei mei a ni ta awm hi’ tiin ka hriet thiem el a. Amiruokchu a Pathienni nawk chena khawm chuong tho chu an min ngaitir nawk taa leh!!! Music Video siem chun video shooting lai na na na chu “acting” met a trul hlak ti chu mi tin hriet a ni a. Amiruokchu vawikhat Music Video ei siema hieng lawma Pulpit hma chenah acting (lemderna) ei thaw el ta chun mihai angin vawi 10 vel music video ei siem ve pha chu Bollywood le Hollywood ei ngai ta awm naw de aw ti dam a min ngaituotir a. Pulpit hma chen a lemchang ei thaw tran tah chun ei hmabak ding chu ngaituo a um ta ngei maw?

A remchangna zawnga ngai ruok chun remchang tak chu a ni tho. Studio Quality sound ngatin hla mawi tak tak ei ngai thei chu thra ve tak a nih. Hieng ang ngawt hin thaw thei inla chu thuhriltu khawmin mani pindan sung ngeia inthawkin duthusama a ‘record’ sa message dam la ngai ei ta; buoithlak sak saka a hung inkhawm ve kher trul lovin a recorded message kha hung thawn hlak a ta; mipui tading khawma Biek in pan kher trul ta lovin recorded message ei la ngai sup sup thei ding hun dam, Internet khawvel hmanga khawvel ram dang danga “pathien thu” ei Monitor screen-a hai inthawka ei ngai hun ding dam, Delhi boruok lum karah ‘bahara/petrol’ seng trul der lova ‘pathien thu’ ropui tak tak ei la ngai theina hun dam chu nghakhla a um ang reng ngei! Amiruokchu vawisun nikhuo a ding chun a la buoitlak deu ka ti thu a nih.