Guite Road (Vuite Road)

By: H.N. Amzathang

Hiai lam lian British Period a A.D. 1930 ma Motor lamlian (Motorable Road) gen phak hinai deklou in khe a pai ahi lai a; Dimapur leh Imphal kikal bel Motorable Road ahi lel a, Imphal leh Moirang kikal ah leng Motor a pai ahi a, huai leng khokhaal lai khawng chian Moror apai a, tuuk lai in bel lampi tui in a tup nak ziak in mortor a pai mun kei a, a khen chiang in Lamang dong (Bishnupur) chiang khawng apai lel hi.

Manipur Sim khang lam a Vuite Road hon sial tung lai un bel kumpiten power discipline a vaihawm ahihziak un, agam mite leh hausa (chief) te dong lou in hoih asak dan dan ua paisak ahihziak un mun khenkhat ah kholai khawng ah tangtak in apai suak sak uh hi. Huchi bang in Songtal kholai a hon pai sak tung un leng insung a piallai khawng ah lampi paina ding chiamehna singsum phut in akheen puak zungzung mai ua kuamah paungam navual hilou hi. Huchi in Compensation chihte genphak vual hilou hi.

Hiai lamlian bel huai hunlai pek a pat a Vuite Road ana kichi tou den hi. Huchi bangzel in agamsung mite leh midangten zong Vuite Road ana chi den ua, huai mah bang zel in huai gam tuh Vuite kual kichi in, huai gam a hausa (chief) te leng Vuite hausate a na kichi zel hi. A nai lam in gen leng malai a 1933 vel a pat Thanlon L.P. & U.P. Hm. A ana pang masa Pu Pu-Khamkhopau (Pu-Thangzamang I.P.S. Retr. Pa) in leng a student te home task leh banglam peuh a suai a kaih na peuh ah- V. Kham chih ngen in akai/agelh a, huai V.pen bel Vuite a chihna ahihban ah amin bul toh agelh /athuah zel hi.

Huailou leng huaigam/kual sung a games & sports toh kisai a organ,(pawlpi) kiphut khia leng V.R.S.A. (Vuite Road Sporting Association) aki chi hi. Malai apat a kumpite leh agam mipi te leh kuapeuh in vuite road ana chih gige sa uh khek khia a guite road hong ki chih bel puaknat huai leh poilua hilou hiam ka chi hi.

Hiai tungtang a thei thuklua kichi khhen khatten bel malai a i kumpite British te khopi London ah leng guite road chih in a ki-record chi peuh in a pang uhi. Huchibang na hi hial kha mah leng amau gam hi zolou in, eigam sung a thil om bel, ei agam mite chih mah zat zawk ding hizaw ka sa hi.

Ei gam lam a miten a nam/beh minte malai a i pi-leh-puten vuite a na chih uh bel gam dang leh mun dang a ten amau dungzui in, i unau Thadou pau te leh Tedim (Burma) lam a ten, eilam V azatna un amauten G zang zel uh hi; eilam ten vala, vapai, vagen lawm leh vual , vualzou vual lel. Huchi bang zel in Tedim lamten- lawm leh gual, gualzou, gual lel; guah etc. a chi uhi.

Meitei ten ah thu hat uh sa-ing- A.D. 1891 a Tikendrajit hun a Sapte toh a kidou zoh ua, galven tak in sapten Manipur hon uk un, kidouna a pangpi deuh asakte uh Memorial din Imphal khopi a mun poimoh deuhte min din Mexwell Bazar, Jimson Road chihte honphuak khia uhi. Huai nung lam a India Independent hong hihtak in- Mexwell Bazar, Jimson Road kichite Thanggal Bazar, Paona Road chih a hon khengkhia in, a masang a Polo ground (Kangzeibung kichi pen leng Bir-Tikendrajit leh general Thanggal sapten a khailupna mun uh ahihna ziak in teklei khuam lianpi leh saang tak phut in Tikendrajit park hon hisakta uhi.

Huchi bangzel in kidou pi masa 1914 -18 zoh in sapte deihsakna toh in Manipur sim khanglam (southern ) venbitna munpi (S.D.O) Hq mun ding in, agam miteen Suangpi, Lungphun ana chihna mun uh, huai hun lai a lengpa Churachand Singh min pusak in SDO Gespar koih in a om a , huai mun mah va bel in NEIG Mission a General Secretary masapen HH Coleman deihna bang in huai Mission ten leng munpi in a va nei uhi.

India independent honghihtak in, Manipur gam agam miten uk in, election system zang in PB Singh CM na nuai ah, amasang a SDO te subei in (phiat in) Manipur gam circle a khengkhia in C.O.te mohpuak a om sak in, amasang a agam miten Lamka (Hiangtam Lamka) ana chih gige sa uh, huaimun tak CO Headquarter anei in N.CCPur hon hisak ua, huai New ccpur honchih uh, tuchiang in ‘New’ pen phiat in ccpur hon chi ta uhi. Huchi a Manipur ki-ukna om kimlai 15 Oct 1949 in centre Govt, C.C Himat Singh hon sawl in Chief Commissioner nuai a ki-uk na hong hihna toh kizui CO teng phiat vek a om in SDO kichiten gambung hon uk nonta uhi. Huaiban ah CC nuai a ki-uk na pen deihlou a mipiten Imphal a kiphinna nasatak hon bawl uh dungzui in 21 Jan 1972 in Manipur State hood kichi piak a om in a gamsung pumpi leng district 6 a sehkhen a om in Manipur simkhang lam pen Manipur south district (MSD) a kichi hi.

Huai pen chiklai hiam a hong kikhek in, tuchiang in Churachandpur district hong kichita zel hi. Huchidan a hongpai touhzel leh tunung lam chiang in singtang khua leh gam te leng bang hongki chita zel diam maw? Theizou ta khang maw!

Vuite Road – Hiaileng kuamah khua leh gam tot ding khual lou a alam tangzaw ding, adetdou ding leh a danger louh zok ding dan et a sial hizaw leh kuapeuh adia leng hoih pen zaw dia, (Tuivai dung houh ahitheitan zuihsak hileh asuanglak na ding lah baihlam zaw ding ahihban ah alampi mah leng phei zaw ding hi). Tua bel a theisiamlou leh lungneu thu apai ziak a hoihlou zaw leh bhara zong tamzokna phet suakzaw hi in poilua hi. British period a kisial kha hizaw leh zaw kuamah dangte thu la lou ding ua, hoihzaw mah ding hiven, poi mahmah eive. Huaiban ah malai apat Vuite Road ana kichi gige sa pen Guite Road chih khekkhiak se leng poilua ahihban ah – modern age (tulai mi) ten malai a ipu leh pate thu leh la leh chindan leh culture bangpeuh i nelhsiah uh toh kizui khom tou vek houh adiam kachi ta mai ve.

Tulam chia bel – culture, identity leh bangpeuh leng a original omsak non talou a, modify age kihisak vek ta adiam kachita mai hi.