Pathien Mi Pek

By Timothy Sakum

Khawvela a tu el khawm a chin-a-lien le pasie-a-hausa popo hai hi thil thlawn pek chu ei lawm seng ring a um. Kutdaw hai dam chengkhat inri kak in an thleng daw ah ei hang pek chu an lawmin malsawmna thu an min sam khum el anih. American President khawm sin I thaw thra em leiin tiin thil chite khawm nisien pe inla lawm hleng atih. Chuongang bawkin kei khawm ngainataka miin thil an mi pek chun ka lawm thei hle anih. Ka khawmuol hriet hlima thilthlawn pek ka dawng hai le thucha thra taktak min fuitu hai kha tu chen hin an hming lamin ka la hriet ràn anih. Anleh, ei kawl le kieng hang en vel inla Pathien thilthlawn pek tam tak tiem seng lo a um hmûng ei tih.

A naupa dittak ei suolhai intlanna dinga kross lera a mi pek el khela, ei nitin mamaw dam, ei khawsak inhawi theina ding dam, ei in pawlpui ding ruol-le-pai, lungngai le lawmna hmuna mi hnem tu ding le lawmpui tu ding, nitin fak ding thra le boruok thra le hriselna le a dang dang A mi pek anih. Hienghai popo hang ngaituo chun hla siemtu in “Lawm naw thei kâ ni naw” a ti kha an dik tak zet anih.North East a lekha inchuk ve bawk chu sin hmu dan dingin ngaituona a fang hne thei khawp el.

College ei zo tawm lem chun sawrkarna fe dan ei hung hriet chieng deu deu a, degree hmu huna sin hmu dan dingin ngaituona a hluo sip thap hlak a. Sawrkara sin beisei naw hlak chun khawpui lien anga hieng MNCs, BPOs, showrooma zuk thawkna ding um nghal lo. Sawrkar sin nilo chu “Awjapu/Awjapi” a ni deutak bawk si. Hi hlak hi hlaw tam bek lo nuhmei hai in thlathara zakuo/pheikhawk a design hieng ang deu ti nek in tuta thla chu ei in dei rek dim aw! ti ngaituona a ni bawk si.

Chu el khela nu-le-pa sin neilo an ni bawk, thrahnem an mi ngaipui bawk ngaituona chun iengtikam sin neiin ka sawk zangkhai thei ding aw! chu lai chun a ni deu tak anih. Chuonglai huna Pathien kuoma ka trawngtraina tak chu “sin nangin I mi pek ngei” ka thaw ding anih.Ka sin hi Pathien mi pek an naw ka ti thei nawh.

Ka ta dinga Ama ruot sa lieu lieu ani in ka hriet. Competitive exam ka thaw lai khan vawi tam tak exam ka pek a, sin khawm pathum lai ka hmu nghe nghe a nisienkhawm maktakin tu ta ka sin Asst Grade, Indian Coast Guard/Ministry of Defence ah ka zawm tlat el. Ka sin hi ka exama inthawka ka zawm chen ka ngaituo chang hin Pathien mi pek a ni zie ka hriet suok chieng deu deu hlak anih. Application form kha Jul 2000 khan ka thawna, Mar 2001a in exam dingin sienkhawm khanglai huna khan sawrkar sin reng reng ‘downsizing’ an thaw nasat lai tak ani leiin a hun ding an sawna, a kum nâwk Mar 2002 khan kan exam thei cho anih.

Mar 2001 khan lo exam tum reng lang khawm sawrkar kumtiem dan chun exama inthrung ding chun ka la tling naw anih. Chun a kumnawk (2003) khawm exam a um thei ta nawh, a san chu ‘downsizing’ lei bawk anih. Entirnan Mar 2001khan an lo huoihawt nisien chu exam thei naw bawk le kum thum dang vel ka la nghak veng veng ngai bawk ata. Leh prelims, mains le interview kan hang thawa, Civil Services a dingin kan puocha lai a ni bawk Pathien thrangpuina zarin ka dawn thei vawng chu tie! Danglamtakin kha trum khan 31 (Asstt Grade) cho an lak tlat chu. Ka hriet chin a chu hi post a hin vacancy a tlawm trum tak anih. Hi 31 lai hin Rank No. 05 ka nia, ka dittaka ka thlang Ministry of External Affairs kha ka chunga mi 04 an peka kei chu Ministry of Defence an mi pek lem dei an tah.

Oct 2003 thla tawp a final interview result puongin a uma, ka dossier CGHQ/MoD an hang thawn charin Pa fel em em le hmathlir thra em em nei kan Under Secy in an hma thei anga ka zawm a trul anih a mi ti pek a. Asanchu Central Govt in policy thar final revision an lo thaw lai tak ania, chu chu zuk puong el thei a ni zing ta lei anih. Lekha le thil dang a pawimaw popo chu kan hang ngaituo vat vat a zo fel naw met lang khawm ka zawm hnunga zo fel dingin 12 Dec 2003 khan ka zawm ta a. 2003 suong ngeia ka zawm lei hin ka sin hi ‘pensionable’ a nih. Central Govt zawmthar popo 01 Jan 2004 a inthawk ruok chun pension an hmu ta naw ding anih. Ka batch mate hai popo 2004 dam, 2005 dam in an zawm tawl cho anih.

Ka trawngtraina a ka hni sa lo postingna hmun sawisel bo, ralmuong le hnienghnarna hmun ah a mi sie bawk. Nu-le-pa hai hlak an lung a muong, hi cho hi nilo thlarau tienga mi chawm tu ding DHCF a um bawk, siet-le-thratni dinga nu-le-pa chan chang DHWA a um bawk le Pastors/Evans fel le thra deu deuin mi hmangaitu le lainatu an um bawk. Pathien thilthlawn pek ka ti naw thei nawh. Ofis sin reng reng khawm Asst ringawt nilang khawm sin pawimaw le kan hawkna zawng ka hni khawm nilo an mi pek chu tie! Direct in Director or Jt Director le sin kan thaw tlang chu tie! Mi hlutsak le ngainat hlaw hai khawm hi Pathien a inthawk ka ti naw thei nawh. Ka chan thratna ding le hmakhuo hi an ngai em em bawk in ka hriet anih. Vaihai hi thra tak an nih, an vênga ei um a neitu chang ei chang nawk nghal.

Thil ei hang hril reng reng chun nangin I ti chun thrang ati an hang ti thup hlak bawk. Ei pahai ruol ruol hi ei thu an awi bawk. Fiemthu deua ei hang biek chang khawmin lungsen loin ei lawm zawng ding an hung hril lem hlak dei bawk. Ei hril ta ang khan chatuon hringna Pathienin a mi pek khela damsung khawsakna ding tamtak a mi peka, chubakah nu-le-pa mi hmangai emem tu “ka nau hi inhawi naw ti pal a ti” ti inlau dawp dawp a mi enthlatu, unau ei inhnuoi-ei-insang huna mi thrangpuitu ding le lawmpuitu ding.

A tawp na tieng a dingin nuhmei ka hausak-ka-pasie lai khawma chullo a mi hmangaitu ding a mi pek bawk. Ka hang en vel le thlirvel hin Pathien mi pek vawng anih ti ka hriet chienga, ka lung a awi in thra ka ti thei em em anih. Pu L Keivom in Bible translation a Thuhriltu zieka “teplo hai teplo” ti an dik naw zie a hril le Pathienin a thil siem hai A ena thra a tiin A lung a awi hle ti kha thartakin ka hriet chu tie! Tulaia ka ngaituo rawn tak chu “Lord, what more could I ask?” anih.