FAQs about ZOD

Bang e ZOD/ Koi e ZOD ?

ZOD ahile ZOU ORGANIZATION DELHI china ahia, Delhi/NCR (National Capital Region ) a um Zou/Zo tate shini manni a ki etkolna nading a kiphut khie ahia, non-political leh non-religion body ahi. Manipur a UZO bang a Delhi/NCR sung a Zou/Zo Apex body ahi.

Memorandum of Association(MOA) Section 4 (i) & (ii) dungjui in mi koijong Zou/Zo kahi kichi a, Pawlpi dân leh kivaipuohna te apom leh ZOD member khat ahithei a, tuachi’n membership form leh fee apeding hi. Tualeh koijong Zou/Zo tate Delhi/NCR a ahingtung tha leh haguh (6 months) sung in ZOD ah registration kibawl in member ahiding hi.

ZOD koi phukhieh ahiei/ bang hing chi pien ahiei ?

Lungsim jawngkhal pawlkhat te’n ZOD khu ZSP against leh Personal interest a kiphut ahi chi sah leh hang ah agen ua, amau mimal lungsim tuotna maimai ahi. ZOD ahile Dated 28th Sept. 2005 nitah nai 6:00 in ZSP Head Office 48, Delhi Govt. Officers Flat, GK- I, New Delhi mun a GBM ah ana kiphut ta hi. Amin ding min tuomtuom proposed kibawlte lah a Dr. S. Robert proposed ‘ZOU ORGANIZATION DELHI’ pen mipi tamjaw’n hoi asa a ana pom ta uhi.

ZOD leh ZSP bang e akikhiehna?

ZSP sang in ZOD ahuop lienjaw chilei achithei ding hi. ZSP ichi chieng in amin apat sangnaupangte (students) kivaipuona ahi chi imuthei mabang in sangnaupang tawh kisaideu ahia, ZOD ichi chieng in sangnaupangte maimai hilou in Delhi/NCR a Zou/Zo um jousie ahuop hi. Nasep lam ah – ZSP in sangnaupang tawh kisai deu college admission, career, educational tour, seminars, students census leh adang dang asai a, ZOD in ahile shini manni chieng in mawpuohna ala a, buoina tuomtuomte nam level ah asai ding hi. Tuamabang in membership fee jong student te’n ZSP leh ZOD ah registration abawl ding ua, Family te’n ahile ZOD ah abawl ding uhi. Ahivang in family te ZSP hilou china ahituom sih uhi.

ZOD Aims & Objectives bang e?

ZOD tup leh ngim ahile igensa bang in Delhi/NCR sung a shini manni vaihawm ding ahia, inampi muolphou louna ding a panlah ding ahi. Tuaban ah mailam hun a registration bawl fund akimuthei leh students’ Hostel vel jong bawl aki lunglut mama hi. Aims & Objectives detail a na thei nuom leh Gen. Secretary, ZOD kung apat MOA copy nala thei ding hi.

ZOD kichi NGO abou vele chipawl a umkia jel a, bangchi dan e?

NGO kichi Non Governmental Organization china ahi. ZOD jong Government a ahisih a ei Zou/Zo te a ahibou hi. A tunglam a igensa bang in khovel ahoitoujel leh mailam hun ah aims & objects/ other aims & objects te suhpiching hing ki ut ding ahia, tuate pichin sah nading in sum apoimaw ding hi. Fund delthei na ding a registration bawl ding jong guot ahia, tuami jieh in Memorandum of Association ana kichi hi.

MOA chi vang in automatically NGO ahithei na ding thu a umsih a, Registration kibawl vang a NGO hiding jong ahi laijang sih hi. NGO category a registration ikibawl leh NGO kihipan ding ahi. UZO, ZSP te jong registration ana kibawl chiet a, NGO ahiei leh?

[Alangkhat ah, NGO hilei hoijaw leh kilawm. Fund tampi ineithei ding ua, tunia lamkai utlou te a utpen te ahing himaithei ding a, lamkai ut in chairman post ikitu sausau ta ding ua, mipi te’n idei penpen uh itel jiajia thei ding uhi. Tuachi’n sum dong nonlou in Meet ineithei ding ua,mipi te ibuoi nonsih ding uhi.] Random Ideas in Italics by News Editor, ZKT.

Bang dia ZOD against khenkhat um adiei?

Khovel a silk hat photphot ah “For’ leh ‘Against’ a um chiet hi. Parliament ajong ‘Ruling Party’ leh ‘Opposition Party’ a um hi. Hinanle eilawi pi milah a vakihel lou, meeting jong panglou, theilou chu hisam lou, innbang ningli sung apat mithugen teng nielkai (Four Corners’ Critics) itam ua ikangtou sih uhi. Meeting telkim chiet in deikhop in kiniel in ahoi ding pen lajel lei khantouna umjaw ding ahi. Meeting thupuohna sang a Four Corners’ Critics te thugen mipi te’n ilah laisie inaptol deudeu ding ua, agen tute jong Zou agente ujong Zou hiveve hilou i.

[These FAQs are meant only for general information of the people. It does not mean to propagate or hurt the sentiments of any person living or dead. ZKT ]