Friday, 10 August 2007
I zogam dinmun leh paitouh dan kikupna hong om zel te pansan a kana ngaihtuah chiang lungsim a om a honkam mahmah khenkhat zomi te simdin kon gelhkhe mok a, simtuten ngaihtuah khawmle bangchi isa di uam ah, mikhat munkhat apat a mundang a omna hon suan chian muhthak leh theihthak hon neizel chih dan a ngaihtuah kawm in.
I tenna zogam chia ki minvuah I etet chian hoih tuamna leh migam in a neihlouh hamphatna tampi ana tuun hi. A huih (air) te lah siang mahmah, tuivot siksek zodam siktui bangmah toh hellouh siang takmai om a, a lum leh vot (climate) lah gamdang mi hongzin khaten natural air condition hon chihsak hial ua, sing leh lou lah khang hoih mahmah a, tang leh mual ten hon uum in kilawm petmah hi. A sung a teng mite lah mel le puam a mi nuai a te hilou hial, vun (skin) hoih tak in hon tuam a, pilna siamna lam ah leng minuai ate hi non tuanlou ngen. Mundang gamdang ah va om lelah mi sang a neu zo hituan sam lou, zomi te ihi uhi.
Hina pi’n hun bangtan hiam paita apat muan na leh bitna om nonlou, numei naupang lau leh ling a omta, zalen taka nidang a kongtual a lasa a kikou te bang a om theih non louh, hiamgam na in lah gamgi nei non lou in iom ta hi. Zuun di bangtak in zuun in kemle migam te sangmah in changkang zo in kilawm dinga, midangte a bang in et ding leh cheimoina tampi omthei ding hi. Gam it man leh zogam minin tampi mahmah in sihna tuakta, hiam gamna lah niteng simthu hita, seplouh a muh tupna leh thadahna mahmah in mite zouta, nasem a sepna neia loh khete sum nangawn deihgoh lawlawa, bang zahzah hiam bek chih tuntun na ngen a dim zogam ahita chileng ichi khial kei ding hi.
Pathian zara tulel a ka omna uh Seoul khopi apan ka suangtuahtuah chiang, bangdia kagam, mi zatamte lubuk/lutang phumna, it leh ngaih mahmahte tenna, mimbang piang kilbang khanna hichi tel a om a khangtou theilou ahia? Zogam itna laa tampi mahmah kiphuak kheta, a thu a gelhsiam ten tampi gelh kheta, zogam khanna ding ngimna a pawlpi tampi kiphut kheta, damdoi khamtheih leh zu dalna lah sotpeka kipan hita, huchi hinapi a Rehab. Centre lah pung dedeuh maimah! I khamtheih doudalna nasep te uh phatuam lou adiam? Ahihkeileh kivel thak in I nasep dan te uh suut thak ngei mah ni hang maw? Khamtheih I dou kawm2 a ahihtute (mite) leng dou khawm2 ihi kha hia le? I society sung a huailut dan siam zou lou deuha amau kia a hun awl hauh man leh kingaihsiat mana a top tung ta leng tampi om din kaging ta hi. Ahihkei leh dou a om ziak a hih utna pung deuh2 mai ade aw chih na bang om a, douna hichi zah nung a le punlam not2 lai chu khah zan mai le houh bang achi lehlam dia? Ei lawi lak chu khaam aomte hat deuh2 a phal a omte niamkiak deuh2 mah hilou maw? Bang ziak a miten khamtheih, zu leh adang2 te hichi tel a zongsang ta a duhna piang ahi di? I insung te uah kisinsak na zaw nulepan tamvei pi honna nei ta mah un teh maw? Nuleh pan tate insung kia a enkol zou a kholak a vasa khahsuah bang houh ihi kha ua ade aw? Sim tuten bang ngaihdan inei ua?
Kholak a walking paia hun awl zang a ka tutkhawl komin ka dak a, min a gam uh nop a sakdan te uh, a sun a zan omlou a zankhua a kuan leh pai ki tatsat lou, nek leh dawn lah kining ching mahmah. A sun a zana tui lum & vot om, load shedding chihte om selou, luidung a bawl ua achei moi dante uh, agei a khawl tawldam utte tutna ding nasan hoihtak leh siangthou taka koih a om, suang omsa omlouh na munte ah bawltawmte khong koih ua, numei naupang zalen taka kimawl a zan sot pipi tan hun azat dan te uh mit a muh chia’n, aw…kou gam (zogam) le hiaite sang mahin a thupizaw in kilawm zawthei ding hia, amau gamin sum hau lotel ahi di uah aw? A govt. uh hoih china mai e? sum zat didan theinonlou uh a bang ua. Niteng a gari leh taithei dangte taigige ua amau bandh nei ngei lou uh ahi diam? Ahihkeileh bandh bawl sese ngailou a solkar in kulleh poimoh teng pe jiah2 jou ahi di uh maw? Ahih keileh bandh bawl man di khuk omlou a nasep tha iit a tai hehu gige uh hi di un kaging ta.
A lamlian (road) te uh pai a nop mahmah a, a numeite uh highhill sang taktak bun a ataitai na ding uh khual sak uh a diam? Gari chituamtuam tampi tai hehu ua, a thawm uh lah dai mahmah mai, Horn ging vengvung chihlah om lou, gamdang mite lungduai se uh a diam? Ki zepna lah mahni lemchan dandan a kizep, kuamah in kuamah kibuai pih chihte omlou, nungak pipi bang nik sing petpet, a lem didan omtuan lou teeng ua, pasal ten le et zui vungvung leh et tuantuan ale neilou uh (Kicheina lam ah zaw eilam adin ahoih in zuih theih nai ken teh). Subway train leh bus sung ale pasal ten numei te sukkhak teitei tupna le omselou, a pasal te uh hiailam a niam deuh uh adiam? No! Bag sungah wallet leh thil tuamtuam open sa phial2 a koih in a po ding ua, kuahiam in hong sokkhiaksak (pick pocket) kha ding chih om selou in, a muang mahmah uh. Hiai mite khosak dan te kamit siik a en giau2 kawma ka hun kazat chiangin Igam Zogam ingaklah mahmah uh imuh chia hichi dana amaute banga khosak hun di ka ngaklah petmah hi.
Ahihleh zogam chik chiah imu dia? Ahihkeileh tuhun inopsak hun pen ahong himai mah diam? I gam, mual leh luite zunlouh a helpawl leh misuamhat te kibuk na mun ding lel hiden ding mo? Kuahiam mihoih siluang phot nading mun hiden ding mo? Mihoih sisan tampi aluang ta a amaute atop na leng ahong hikholkei maithei uh, amaute sisan man kuan peding ihia? asulnung uh kuan chihtak na toh jui a kansuia delhjui peih kua iom a? Ahihkeileh athu alum laiteng kipei hehu a akhing deuh chia huih muutleng bang vek ihi maimah hia? Min a guam a mual leh a luidung te uh puah ua, akim leh kiang ah in bawl ua, prayer hall te suah a azat manphat mahmah lai ua, en I lampi tot gige leh kingak na mahmah te nangawn bawlzou nai mahmah lou di? I govt. zawnglua a hon bawlsak zou mahmah lou hia le? Kei mimal ngaihdan in solkal apat a imuhsun te beek uh hoih takin ana zang hile I lampite banah I Bazar te leng tuma kum tamsim paita apat zat aom ngitnget te leng khang tou deuh dia, van leh meh zuaka tute adia le kilawp huai leh damtheih huai deuh din kalam en hi.
Migamte zaw govt. in a sum sanction te development nadin a zang ua, a gam uh puah ua, azal le zou uhi. En street light khat le nih a om sunsun chia le a suse kha a pan louh khak laute ihi laitel ua, poi mahmah. I gam a hong khan a, azal izoh ua, nunnuam a ihei khawm theih nadin zaw mimal chiat I kivel thak a, I ki bawlthak uh ngai kasa hi. Kua ahia igam zun di? A mi di om tuamlou ahi, a mite hoih peuh in, kithat that lou in, ineih sunsun te puah in nasem in mineihsa kia laksak didan ngaihtuah lou in om le. Govt. sum khoih kha zekte bangle amau sum ahihlouh dan thei uhenla, a zatna ding muntak ah zang le chih huai mahmah ta. A laigelh kia siama, a gen kia siam mai loua, I tenna I zogam mahmah zunle, kuamah dang hilou ahi a zal zou di. I pupa ten zai laa ana oih uh hoih kasak mahmah:
“Nang kagam nang nahi, mihoihte gam nuam aw,
Na min ka it, na sing na suang ka it,
Na tang na mual ka it ka selung pak in dim pahluat na in.
Ipupa Pathian kiang noplenna omsak Pa na min ka it,
Thilsiam teng in pak in noplenna vak suak hen,
A gam mual chin teng ah gingging ta hen.”
Ana chih ua nuamsa a aheina gam uh ei khangthak ten hichi mai a koih di I diam? Pupa ten hon lamet mahmah uh khangthak ei ten I gam zun lou a nop lenna omsa vulsak mai ding mo? Mi gam kia a nopsa a eigam a koltang bangbang laiding maw?
Hichi khong mai2 hi migam zaleen tak a oma, lauleh liin na omlouh na mun a mahni kia a ka omlai a suang tuah na a hong pawt I Zogam dinmun kon gelh tei mai2 hi e guai.
By: Ching Mangte
No comments:
Post a Comment