Monday, September 24, 2007

Sakhuo le Histawri

Written by L. Keivom

Religion is the opium of the people.
-Karl Marx

It is the test of a good religion whether you can joke about it.
-G.K.Chesterton

Kum 1966 khan Gauhati University-a inthoka M.A (History) ekzam zoa Churachandpura ka hung suokin Sielmat Christian College-ah history zirtirtu sin a ruok thut leiin Principal Ruolneikhum Pakhuongtein hung thrangpui dingin a mi fiel a. A aite cheuna dinga October-November sung Shillong Centre-a Competetive Exam zu thaw ka tum thu le leave ka nei naw chun a buoithlak ding thu ka hril leh hlaw la zinga ekzama ka zu thrang an mi phalpek ding thu a mi hril leiin ka zom nghal a. B.A 1st Year le 2nd Year hai ka zirtir ding chu Indian history trobula inthoka India ramin zalenna a hmu chen, kum sang tam tak huop a nih.

B.A 1st Year Class-a Ancient Indian history ka zirtir hmasa tak nia hung kaihai ka hril hmasa tak chu, “Voisun hin India chanchin a trobula inthokin ei phok tran ding a ni leiin a hmasa takin in Baibul la siehre phot ro” ti a nih. A san chu Baibul hi histawri anga hril fie tum pha leh a buoithlak hlak lei a nih. Kha hma khan Juda mithiemhai chun khawvel siem hun kha October 7, 3761 B.C ni dingin an sut suok a. B.C 5509 ni dinga sut suok khom an um. Chu hnungah Ireland-a Anglican Archbishop James Ussher (1581-1656) chun 1654 khan Baibula mihriem an inthlasawng dan anga sûtin hnuoi hi B.C. 4004 a siem niin a sut suok a. A thawpui Bishop John Lightfoot (1602-1675) chun chu chu dit tawk el loin, ‘Khawbung a la ti ta deuh deuh’ ti ang khan, hnuoi le van siem zo ni kha October 23, 4004 B.C, Zirtawpni zing dar 9 chie niin a sut suok a nih.

Ussher le Lightfoot thukhawchang hin nasa takin ei kum tiem dan chen khom a thruoi leiin, Thuthlung Hlui hun kha kum 4000 ni ding le Thuthlung Thar hun khom kum 2000 chen ni ding le chu zoah kum sangsari chu Isu Krista rawia kum sang rorel la hung tlung dinga ngai chu intran dingin mi tam takin an ring a nih. Kum 1963-a inthoka ka kol tah King James Version-a chun Genesis bung khata hnuoi le van siem thu hi B.C. 4004-a inthoka thil tlunga ngaiin, Thupuong chen hi phek tinah a kum indotin an ziek dap a nih. Hi tukvera inthok hin eini rawi, abikin thrang hlui tieng chun khawvel le thil la hung tlung dinghai khom ei inkhi tlangpui niin a’n lang.

Amiruokchu, ei hnuoi kum tiem anga khawvel hi kum sangruk vel chaua upa ni dinga hril chu ei intrawmpui chun tuta neka mihriem ei mawlcho lai huna an hrietna vawrtawp hmanga an lo hmu thei chin anga an thil hisapna kha ei inpompui zing tina a ni a, chu chu thil varthlak ni kher naw nih. Hrietna le thiemna tieng mihriemin hma ei hung sawn hrat ang peiin Pathien ropuizie le a thilsiem makzie ei hung hriet suok deu deu ding a na, chu ruol chun ei chengna leihnuoi le a sunga mihriem chenghai trobul khom hi kum maktaduoi iemani zata upa a ni tah ti hai khom ei hung hriet suok pei ding a nih. Baibul khawvel kum B.C. 4004 vela intran anga an lo hril hi thu dik um sa leh inzomna a nei nawh. Chu chu ei hriet fie pha chun Daniel lekhabu le Thupuong ei hril fie nuom dan khomin thutak a hung zawl deu deu pei ring a um.

Rama leilak, Adam leilak
Tu laia India rama ei thu chai laia sahot pakhat chu Sri Lanka le India inkara long lien fena daltu, kum sang tam tak trieu le phaiphin muol anga intieng khawm tah chu cho tlang a, long lien fe theina dinga siem an tum thu a nih. Hi laia tuipui sunga muol inkham phei hi Sri Lanka thlierkar pawna dinga Ramaswarama inthoka an pathien pakhata an ngai Rama inrawina hnuoia zawng honin an bawl ni dingin Hinduhai chun an ngai leiin tu khomin an suksiet an remti naw a nih.

Hi trobul thusim hi a hre nawhai ta dingin a tawi thei ang takin hang hril inla. B.C 500-100 inkar lai khan mi pakhat Valmiki an ti hin hla anga insam chiin tienami sei tak el, Rama chanchin a ziek a, a bu hmingah Ramayana ti inbuk a ni a. Ramayana hin chang 24,000 a nei a, chu chu bung 500-in an thre a. Hi tienami le tienami dang Mahabharata an inhlan sawng pei chu A.D 150 hnung, Gupta Period lai khan a buin an siem a, chu chu tu lai chena an hmang hi la niin an hril.

Ramayana tienamia a hril dan ang chun, Ayaodhya lal Dasaratha chun nuhmei pathum a nei a, a thaipuiin naupasal Rama a nei a, a thai hninain Bharat, a thai thumnain Lakshman le Shatrugan. Lala inthrung ding Rama chu a thai hnina phierrukna leiin an lal rama inthokin a nuhmei Sita leh kum 14 an hnot suok a, Lakshman-in a zui a. Ram hnuoia an khawsak lai hin Rama le Lakshman ramvak kar Sita chu Sri Lankaa lal Ravana chun dawi hmangin a lo thruoi lui a. Rama chun zawnghai lal inthuruolpuiin, Hanuman thrangpuinain Ravana chu a rùn a, a nuhmei Sita chu a thruoi kir a. Hi truma India mong zuma inthoka Sri Lanka thlierkar kaina dinga Rama thupeka zawng honin ni nga sung chaua leilak km 48 vela sei an bawl chu Rama Setu (Rama’s Bridge) tia an ko hi ni dingin Hinduhai chun an bel.

Hieng lai hmun hi chieng taka survey thawtu hmasa tak chu British geographer Major James Rennel a nih. Kum 1788-a a ripawtah ‘Rama’s Bridge’ tiin a zieka chu kum 1804-a a ripawta ruok chu Hinduhaiin an pathien Vishnuin mihriem taksa puta a hung inchangna nia an ngai Rama hming chu inputtir ta loin, Juda, Kristien le Islam sakhuo zuituhai trobul intranna hming chawiin Adam Leilak tiin a thlak tah thung a nih. Sri Lankaa tlang insang pakhat chu Adam’s Peak an ti a, a ram mihai ruok chun Sri Pada an ti thung. Muslim-hai tienamia chun, vana inthoka Adam hnot suoka a um khan a suol thaw a simzie inentirna dingin hi tlang sipa hin kum sang khat ke khing khat chauin a ngir a. Chuleiin, hi tlang sipa hniekhnung ang deuh lungphek inkhuor, a dung 5.4 ft-a sei le a khang 2.6 ft a lien chu ‘Adam hniekhnung’ tiin an ko a, Buddhist-hai chun ‘Buddha hniekhnung’ an ti ve thung. Adamin hi tlang a pannaa a hraw chu Adam Leilak/ Rama Setu hi niin an hril pei a nih. Arabian Nights tienami tiemtuhai chun ‘Sixth Voyage of Sindbad the Sailor’ tia khan Adam’s Peak hi a hril sa ti hrieng an tih. Chuleiin, hi lai chanchin hi sakhuo le inzom tienami hrang hrang leh a’n kei chin nasa leiin a ieng lai hmun khom hi sakhuo tienga lak chun Buddhist, Hindu, Kristien le Muslim hai nak khik thei ding a tam a nih.

Tienami rong chi hrang hrang kaihai chu la fesan phot inla. James Rennel chun hi lai hmun hi long lien fe theina dinga cho lien a rot a. Chuonga thaw chun Sri Lanka thlierkar fe huol hi ngai ta loin long lien po po fe tlang an ta, hi laia inzin hi darkar sawmthum neka tamin a suktawi ding a nih. A thu rot chu kum sawmruk hnungah 1838 khan an buoipui a, sienkhom an puitling hman naw a. Tu hin kum zahni hnungah Sethusamudran Shipping Canal Project ti hming inbukin thaw thar an tuma chu Hindu kulmut ruolin an pathiena an ngai Rama rawia an leilak bawl nia an ring leiin dang an tum a, chalrang party BJP le an uicho VHP ruolin Congress suot thlakna remchanga hmang tum rânin, tol pawng rak khopin ri an suksiet a nih.

Hi lai hmun hi National Aeronautics and Space Administration (NASA) haiin van sanga an boruok long (satellite)a inthokin 1999 lai vel khan chieng deuin thla an lak a, chu chu kum 2002 khan tlang hrietah an tar lang chauh a. Hi thlalak a hung suok khan besan remchanga hmangin Hindu kulmuthai chun an pathien Rama leilak bawl chu a tak tak a lo nizie thu chanchinbuah an insuo uoi uoi a. Delhi tlanga chanchinbu pakhat lem chun, “The bridge’s unique curvature and composition by age reveals that it is man-made. Legend as well as Archealogical studies reveal that the first signs of human inhabitants in Sri Lanka date back to the primitive age, about 1,750,000 years ago and the bridge’s age is almost equivalent” tiin mihriem kutsuok ngeiah a hung hril lut a. Kar khat hnungah NASA office-a inthokin Mark Hess chun, “Remote sensing images of photographs from orbit cannot provide direct information about the origin or age of a chain of islands, and certainly cannot determine whether humans were involved in producing any of the patterns seen” tiin NASA thlalak, mani trang hma kei zawnga hmanga indik lo taka zeldin thubawl an lo tlangsampui chu a hung hnawl thlak a nih.

Ramayana tienami hi phuokfawm tienami a ni le a ni naw thua inselna hi khawvela Hinduhai an um sung chun bo naw nih. Rama hi a tak ngeia mihriem um tak tak a nih ti fiena ring tlak ruok chu histawrianhaiin an la hmu nawh. Secular history-ah Rama inlal thu ziekna khaw lai khom hmu a la ni bok nawh. Chuleiin, secular historian-hai chun Rama hi tienami (story) le thusim (myth) amanih thurachi (legend) mei mei, a tak taka um lo, sienkhom a tienamia inthoka mihaiin mihriem tak tak ni dinga an pom niin an ngai. A tak takin Rama a um si naw chun Rama Leilak tia hril khom hi tienami le an kei kop mei meiah an ngai bok Hieng thil tienga rawn tak Archaelogical Survey of India (ASI) khomin Rama Leilak tia ko hi mihriem kutsuok a nina awm ieng khom an hmu naw thu le hriet naw thu an puong bok a nih. Chuong sa khom chun pathien anga lo ngaituhai chun Rama chu a tak ngeia an pathien Vishnu hung inchangna niin an la ngai zing tho a nih.

Sakhaw thil le inzom vonga mihriemin thil ei lak pha leh mihriem ngaituona pangngai hmang ta loa sakhuo inkhina chauh thu indikah ngaia a dang po po hnawl thlak vong tumna a um a, chuong anga vai ruia um mihriem chun pangngai a aw thei mei mei ta ngai nawh. Taliban ei tihai khom hi lungril fîma thil ngaituo le buktuo thei lo dinga Muslim sakhuo inzirtirnaa vai rui an ni leiin an thil tum hlenna dinga turuna an insuo nasat po leh sakhaw mi le thlarau mi-ah an inngai el a nih. Hindu turu VHP tihai khom hi chuong ang tho chu an nih. Rama chu a tak taka mihriem um a nih ti ringnawtu Tamilnadu Chief Minister Karunanidhi-in, “Rama chu tu am a na? Chuonga leilak bawl thiem chu khaw lai engineering college-a kai am a na? Rama chu Valmikiin a siem mei mei a nih. Mihriem um tak tak a ni nawh. A um ti fiena hlekte khom hmu ding a la um nawh” a hang tipek lem chu an hmai a sen zâk el a nih. Congress party vuokna dinga hmoltum remchanga ngai BJP hotu Advani chun arpui intui lai an thatpek angah a ngai a, a’n trek nasa hrim a nih.

Thutak hringpui loa sakhuo le pawl inruipuihai hrim hrim chu ieng sakhuo zuitu khom ni hai sien zu inrui bilinghai leh an danglamna a um naw a, tri an um lem dai a nih. Zurui chu darkar sawtnawte hnungah a har suok thei a, sakhuo le pawl inruipuihai chu an har suok mei mei thei nawh. Biling tak an nih.

Chun, tienami (story), thusim (myth) le thurachi (legends) a ieng khom hi mihriem beisei le inzom thu hring pai hrim hrim chu mihriemin ei ngaina a, tak ramah bel ei nuom hlak. Chuong thil laia ei ngaihlut tak chu sansuokna le intlanna thu a nih. Mi huoisen ei ngaisangna san khom hmelma laka sansuoktu an nina a nih. Robin Hood chu tienamia a changtu mei mei ni sien khom mi retheihai le rimsihai santu a ni leiin a tak taka um mihriem anga chei nuomna a um a. England-a inzin tam takin an hmu chak chu Robin Hood chet tlatna Nottingham Forest a nih. B.C 700 vela Homer ziek, Grikhai tienami ropui Iliad le Odyssey khom hi chuong ang tho chu a nih. Chuong ang bokin Phungpuinu sekibusuok lapek ngam khopa mi huoisen Sura chu tienami ela inchangtir phal naw pawl ei um leiin, Sura thlaa inhril khom ei um hiel a nih. Dawithiem hmingthang Lalruong (Ralngam) chu keimihai le thlarau suol leh inkopa dawi suol hmangtuhai hne theitu le chuong mi triumhai kuta sansuok theitu a ni leiin ei ngaisang a, tienami mei meia inchangtir ei phal naw a, ei hnam chanchin zieknaah mihriem tak angin hmun poimaw tak ei inchangtir a, Tuiruong dung le a se vel muol le tlangah a sulhnung ni dinga ei ngai le ei hau tlat hmun iemani zat a um bok a nih.

Mizorama dil lien tak, Burma rama um Ri Dil hi mithi thlarau po po lutna kotsuo ni dingin an lo ring a. Chu taka inthoka mithi khuo le pielral pana an fe peina lampui chu ngairuotnaah pi le puhai chun indin a, chu chun Hringlangtlang hai, Lunglotui hai, Hoilopar hai le thil dang dang a hung hring suok a. Chu le inzom pei chun Khawlek khaw kawla trumkong pakhat chu mithihaiin Ri Dil pana an fe phaa an hraw ngei ngei hlak nia ngaiin Thlanpiel Kot an lo ti a, chu chu ei tienamia hai khom a thrang sa bok a nih. Kristien ei hung ni hnung khoma van ram lampui um dan ding ei hril pha pha leh Ri Dil theulawzi leh ei hmet kop tlat a, chu chu ei hlaah a ni zuol. Ei phak tawk tawk le phak chin chinah hringnun khawvel le thi hnung khawvel um dan ding ei zeldin a, chu sunga chun ei ngaituona le hmathlir iengkim ei khum hlak a nih.

Chuleiin, Hinduhai khomin Rama chu Valmiki tienamia inthoka pathiena an hung indin khom lo ni ta hrim sien, an ngaituona khawvelah hmun lien tak a hluo tlat chun, a takin Rama hi thil um a ni nawzie ieng angin hril inla, an ring nuom tlat sung chun nuom pawnga hang inthlaktir el thei a ni nawh. Mihriemin thi chil ngama ei ring le tran tlat ngam tam tak hi a um ngei thu fiena chanchin chieng tak (historical evidence) a um lei a ni chuong nawh. Mihriem lungril le ngaituona hne le inhmin dinga damtea thil ei intu hin zung a kei nghet pha chun thlakthleng mei mei thei a ni ta naw a, a vâr khom hi a dum, a dum khom a vâr ei ti tlut thei a nih. Chuleiin, thu dik inchuktir hi a poimaw takzet a, chu nêka poimaw lem chu thutak, hringna thu inzirtir hi a nih.


http://www.sinlung.com/Articles/Keivom/1023.html

No comments:

Post a Comment