Tuesday, August 21, 2007

Bandh/Blockade/Strike toh kisai in legal action lak hita ding


Imphal, Aug 18: Tu nitaklam dak 6 apan nitak dak 8 tan Chief Minister O Ibobi Singh makaih in Cabinet Meeting neih hi a, tua ah thu poimoh tamtak genkhop in om hi. Thusuak kingah dan in, Cabinet Meeting in Hill District Council Election ding toh kisai hun bangtan hiam ngaihtuahna nei ua, tua ah tu current financial year sung ngei a election neih ding in thupuk uhi. Cabinet meeting in District Council election (MDC Election) ding toh kisai in hun bikhiah nei ua, election tukha apan kha 6 sung ngei a neih ding in thupukna la ua, tua toh kiton in Committee khat bawlkhia uhi.

Cabinet meeting in thupukna abawl dungzui un, Chief Secretary Chairman hihna nuai ah Committee khat dinkhia ua, Principal Secretary (Hills) PC Lawmkunga IAS in Covenor hihna lending a, Principal Secretary (Planning) leh Commissioner (Finance) te member hiding ua, amaute’n District Council ah thuneihna sangzaw piakding toh kisai a ngaihtuah ding banuah, Finance leh adangdang tanpha huap in thu poimoh tuamtuam ngaihtuah khawm ding uhi.

Tuabanah, State Cabinet Meeting in District Council Election neih ding toh kituak in, Singtanggam a kho hausa (Village Chief) Election neih ding in leng thupukna bawl uhi. Tuateng banah, Cabinet meeting in thu poimoh tuamtuam dang leng genkhawm uh a, Manipur ah Bandh, General Strike, Economic Blockade leh adangdang om toh kisai ngaikhawk mahmah uh hi’n kigen hi. Cabinet Meeting in thupukna poimoh mahmah abawlna uah, a biiktak a National Highway 2 om te sukbuai veu ahihna ah panlak ding dan kikup khopna nei uhi. Supreme Court in November 12 1997 a bandh, strike leh Economic Blockade toh kisai thutanna aneih pen state cabinet in pom leh paipih ding uh ahihdan puang ua, huai dan kalhte tung ah legal action lak hiding in puang uhi.

Thusuak in agendan in, 2004-05 sung in Manipur ah Bandh ni 20 sung om a, huai ah Manipur mipi’n nikhat in Rs 5.34 Crore mansuah a, kumkhat sung in Rs 106.80 Crore mansuah pha hi. Hiai hunsung mah in, Economic Blockade ni 60 sung om a, ni khat in Rs 2.32 mangsuah in kumkhat in Rs 139.20 Crore mipi mangban hi. 2004-05 sung a bandh leh economic Blockade ziak a mipi manna tengteng ahihleh, Rs 246 Crore phazou hi.

Thusuak in agenzelna ah, 2005-’06 sung in ni 48 sung bandh om a, ni khat in Rs 6.30 Crore mipi mang ban a, Rs 294.24 Crore kum khat in mangban suak a, Blockade ni 97 sung neih in om a, huai sung in nikhat in Rs 2.67 Crore manna om a, kum khat in Rs 258 Crore chingzou hi’n Government in tuat hi. 2006-07 January 31 tan in bandh ni 42 sung neih in om a, ni khat in Rs 6.22 Crore mang ziahziah in, hiai hunsung a manna teng Rs 288.96 Crore tungzou hi’n kigen hi. Economic Blockade hiai hunsung in ni 77 sung om a, ni khat in Rs 3.01 Crore manna om a, kum khat in Rs 231 Crore tung ban hi. 2004 apan 2007 January 31 tan in, Bandh, Economic Blockade leh General Strike ziak in sum Rs 1319.06 Crore mansuah in om tel hi.

Cabinet meeting in hiai tungtang nounel tak in velkhopna nei a, Bandh leh strike banah blockade tuamtuam om te, illegal leh unconstitutional ahi chi in, maban ah tuabang sawm leh hihte pawlpi tuamtuam te tung ah strict legal action lak hiding in thupukna bawl ua, hiai ahihleh, economic thil a mipi nautang manna thupiluat ziak ahihdan leng taklang ngal uhi. Hiai tungtang ah tu zan mah in Chief Secretary in mipite kiang ah kithuahpih ding in ngetna (appeal) bawlzui ngal hi’n kigen hi.

State C abinet in tulel a om sa Metre 30 alian Manipur University leh Lilong Lei (Bridge) kal lamlian kek ding in thupukna bawl ua, Metre 60 suahsak ding in thupuk uhi. Tuabanah, Naga MLA te thu toh kisai a All Political Party meeting neih ding chih leng hunchiam omlou in suan gamla uhi. Sericulture Project nuai ah Account/Consultant pst 6 lakthak ding leh, Engineering Deppt nuai a Divisional Acct/ Consultant post 10 lakthak ding in thupuk uhi. Hiai post awngte ahihleh, officer retired te chauh ading ahih ban ah, Contract basis hiding in kigen hi.