(A prelude to the Silver Jubilee Anniversary of the Zomi Baptist Church, Mizoram)
Dr. Hau Za Cin, Taipei
Tua hi leh Pasian' Tapa i theihna leh i thu upna-ah kithukhatin,
eite a khangcing suakin, Khrih' cingtaakna ciang i banto ding hi.
Tuahun ciangin thu upna lamah naupang ihi nawn kei ding a,
mite khemin a khialsak theite' mutna hangin i suk hoi i to hoi nawn kei ding a,
itna lungsim tawh thutak genin, lutang ahi Khrih tawh i kibat dongin i khangto ding hi.
Efesa 4: 14, 15)
‘Picin Kum’ cih pen kammal nih, ‘Picing’ leh ‘Kum’ cih pan hong pai hi a, ‘picing’ cih ciang ‘pi’ leh ‘cing’ kigawm hi leuleu in, ‘pi’ pen ganhing tawh genteh lehang ta nei, no nei, suan leh khak nei thei, khangcing, khangham, lian cihna hi in; ‘cing’ cih ciang neih leh lam kicing, thu leh la kicing, zatkhom ding nei, hau, hihzo, lamzo, neizo, akisam omlo in kicing cih bangin kihilhcian thei ding hi. Tua ahih manin picing cih ciang ‘amah leh amah kikem theita, lianta, khangcingta, etc’ ciin i ngaihsun thei hi. ‘Kum’ cih pen hun simna khat hi a, ciangtansa om, a kipatna pan a tawpna ding hun ciamtehna khat om cihna hi. A kipatna, i sim patna pan i tawpsakna kikal hun pen kum, kha, ni, nai, minit, second, etc cih bangin kiciamteh hi. Tua teng lakah kum pen hun picing khat, hun saupi khat, anlak hunkhat sung bang kihuamsak hi.
India kumpi mihing khat a pian kum pan simin anlak hun 18 vei a cin ciangin mi zattheih, sia leh pha khentel thei, zi leh ta nei thei, gamsung vaihawmna leh ki-ukna paizia thei dingin tuat a, anlak 25 vei a cin ciang mi picing khatin kingaihsun ahih manin vaihawmna, MLA, MP dingin sang hi. Tua ahih manin mihing leh kumpi ngaihsutna panin kum 25 cin hun pen picing khat suah taktakna hi a, innsung khat, gamsung khat vaihawm thei ding, amah leh amah kikem zo ding, amah khe tawh ding thei ding cihna ahi hi. Tua ahih manin tua kum cinna pen thupi in lungdam huai phadiak hi. Tua bang nihvei a cin ciang Pasian nam tel Israel mite in Jubilee ciin pawi thupi bawl in Pasian kiangah lungdam thu na ko zel uh hi.
ZBC Kum 25 Cingta
Zomi Baptist Church, Mizoram (ZBC) zong tukum in a kipat ciil pan simin anlak pawi 25 vei cingta ding hi. Anlak pawi pen Zomite hun simna ah Khuado kici ahih manin khuado 25 vei cingta cihna hi. Mikang hun simna tawh i sim ciangin kum 25 cingta a, i Topa Jesuh pian hun in sim leng zong Lungdambawl Pawi (Christmas) 25 vei kizang khinta cihna hi. Tua ahih manin Champhai Bethel Veng ah zumpi (ZBC Headquarter) lianpi nei in gambup vaihawmna i neih zawh kum 25 cinna Silver Jubilee kum hong tung takpi hita hi. Ahi zongin ZBC tangthu i etkik ciangin a lungdam huai mah bangin a lunglen huaina zong tampi om veve hi.
ZBC Min Kiphuak
Rev. Khup Za Go a laibu LEIVUI PANIN (2004) laimai 79 ah, “May 19, 1987 nitak in CBA pawlpi zong ahi nailo Pa Cin Khan Thang inn ah ka kikhawm uh hi” ciin na at hi. Laimai 80 na ah, “May 26, 1987 nitak nai 6 in Pa Cin Khan Thang inn ah Mizoram CBA Committee ciin kamkumna ka nei uh a, upadi (Constitution or Byelaw) zong gel pha-in ZOMI BAPTIST CHURCH cih ding thukimin thu thak tampi ka gel uh hi. May 27 niin Champhai pan Ngur ah pai-in Suan Za Thang in hong zui a, Pian Thang in ka van hong puaksak hi. Nitak ciangin Upa Zam Do Thang (J. Thomte) innah ka kikhawm uh hi. May 28 niin Upa Vial Khai in voktal tuk li khat hong gawhin pawlpi mi khempeuh tawh ankuang ka um hi. Nitak ciangin Ngur YMA in hong kikhoppih uh a, “Tang bang hong dam maw” cih leh “Eite kikhen ciangin” cih la khawng hong sakpih zuaizuai ciangin 1952 – 54 sung Champhai ah Murlen pan sang kaha ka pai zel lai hun tawh ka teh ciangin Mizoram Zomi te zong a khangto, a khanglo mahmah khat hita veh e cih ka phawk hi,” ciin na gelh hi. [1982 kumlai a CBA Mission Field pen 1987 ciangin ZBC ciin a min kipia a, tu-in kum 25 cingta hi. Silver Jubilee kum cihna hi]. Jubilee pawi i zat laitakin i pawlpi kipat cillai in hong makaih siate, upa pawlkhat i thu, la leh hunlui sutpih ding om nawnlo a, lungdam kum ahih hangin lunglen kum tawh zong kibang hi. Meigit tangkhat in gamzapi a hal bangin hong makaih leh hong lamlah, tu in eite tawh a om nawnlo siate i phawk mahmah ding hi. Ahi zongin mihing nuntakna Pasian khut ah om ahih manin eite cih theih omlo hi.
Pianpih Pau Tawh Biakpiakna
Mizogam sunga Zomite in hun bangtan hiam eima pianpih pau, nu leh pa hong hopih masakna kammal, leitung mi khempeuh in a kizahtak leh a kithupi sim penpen ‘mother tongue’ (pianpih kampau) ci a kilawm taka a lawhkhiat uh pau tawh Pasian phatna a kipat pen 1982 kum hi a, tua kikhopna Hiangmun khua ah hong kipan hi. Leitung bei dongin hih khua leh hih thu a kisut simin kigengen ding hi. Tua panin khua tuamtuam ah a hun zuiin tuni dong tunga, i khualzinna lam a saulai zongin saupi mah a tung khin hi hang ciin makaite leh upate in ciamteh hi. Hihte khempeuh mipite hanciamna, makaite lamlah siamna leh Pasian thupha hi a, lungdam in nuam tek ni.
A Kipat Cilna
Jubilee Souvenir laibu ah khua tuamtuam a pawlpite kipat dan leh a khantoh dan upate, laitheite leh makaite in hong at dinga, akicing zaw tua ah i mu ding hi. A kipat ciil in biakinn sikkang neisa pawlpi a om ding ka um kei a, Lai Siangtho leh Labu kicing in a neih ding uh ka um kei hi. Tuni in zong kicing cihna ahih loh hangin a kipat ni sangin nakpi takin kiningcingzaw thamtham hi. Mi inn ah kikhawm in, niangbel khat tuilum suang leh pawlpi mi khempeuh ading kicing a, intekte hai, kuang leh bel, sikkeu, zasan meh natawm pawlpi mite adingin kicing a, singkhul ding natawm tang nasep kullo in innkuan khat in sik khin zo hi. Tuni in Pasian huhna tawh a mi kicing zawdeuh in Niangbelpi nih leh thum lo tawh pawlpi kivak zo nawnlo a, innkuan khat neihsa tawh Lungdam Pawi kizang thei nawn lo hi. Tua pen a lungdam huai hi a, a khangto, a picing cih ciamtehna khat hi. Tua ahih manin lungdam takin Topa phat ni.
Ciamteh Huai Khantohna
Na khua pawlpi laibu luite enkik inla a kipatni pan tuni ciang dong a khantohna thute hong gelh dih in a khantoh zia lamdang nasa ding hi. Kha khat in khua khat pawlpi thu LAITAI ah suak leh kumkhat in suakkhin zo nawnlo dinga, khua khat khanna thu bek zong LAITAI ah khatvei in suakkhin zolo ding ahih manin nihvei, thumvei zop kul kha ding hi. Tua zahta in lungdam huai hi. Ahi zongin kigelh lo, kipuah lo leh a kiciamteh kei leh laidal pen muat ding a, inlawi-in ne in sia lel ding a, thu manpha tampi mangthang ding hi. Tua manin kumtawp thupuak (report) kicingtakin khua pawlpi khempeuh in kumsim in zum ah puak tek hamtang thei le’ng hoih ding hi. GC kahkawm in puak ding hanciam in nei tek ni. Khua pawlpite thu ciat pen lai-atpa (Secretary) in limtaka a ciamteh pen a kigawm toh toh ciangin i khanna, i picinna kithei hi aci nuam hi ing. Ko scientific research hihna ah zong kum tawp khoppi ah kumkhat nasepte kipuak a, tua pen a bu in kibawl in, tua teng mah leitung science pilna khanna ciamtehna laibu hitoto lel hi.
Hiangmun ah kipan kikhopna pen kibehlap in Vaikhawtlang, Hnahlan, Vapar, Ngur, Murlen, Champhai, Sesih, Leisenzo, Khuangphah, Aizawl, Zokhawthar, Mimbung, New Champhai, New Hiangmun leh Shillong khuate ah pawlpi omta hi. A kipat ciilin Zum ah bangmah kinei lo a mi inn kisap hi. Tua pan sikkang inn kinei a, a sawtloin leisek innpi (Taih inn) kinei ding hi. Kipat cil in Pawlpi sia ding kinei hetlo in Pasian in sia ding mihoih vive hong pia hi. Upa ding zong a kicingin hong pia a, nupi makai ding zong a kicingin hong pia hi. Pilna, siamna a nei khangno tampi hong khang zo a, hong khanglai ding ahih manin mailam limci deuhdeuh lai hi. Shillong ah sang ka kah ciilin kei bek ka hi a, tu in kum 15 zawh ciangin lapawl sa ding, football kimawl thei zah ding pilna sin ZBC sung pan omta cih ka mit mahmah tawh ka mu hi. Hihte khantohna hi a, picinna ahi hi. Kumsim in tan 10 zo kibehlap a, tua bek zong picinna hi.
Ngilh Mawh Ka Tun Tongneem
Ka theih khitloh hangin ka theih pen mah ahi Murlen khua picinna hong gen lai ning: ZBC, Murlen pen 1983 kum in a kipat laiin kei pawlpi dangah omlai hi. Pu Kham Ngo Thang leh Pu Khup Do Thang-te inn ah kiphual zawdeuh uh a, a inn kilaih in kikhopna nei zel uh hi. A tung lai thu teng kei sangin a tel zaw Upate om a, Souvenir a ding report puakna ah a kicingzaw in hong at ding uh lamen ing. Ka pianpih pau tawh Pasian phat ngeilo ka hih manin (sianggen leng, hong theisiam uh henla) ka zahpih a, ka zumpih mahmah hi. Ka nu pen Lusei pau siamlo ahih manin ZBC ah kikhawm zel a, ko adangte ka pemthak pawlpi uh ah ka kikhawm uh hi. Nitak khat ka nu in annek lai in, “naute, kei mi banga mi pau mi ham zong theilo ka hih ciang’ i pau theihna mah ah kikhawm leng ut ing…” hong ci hi. Tua hun laitak in ka thupi ngaihsutloh hangin tu ciangin hih kammal ka ngaihsut khak simin ka lunglenna ding ahihna thu ka thei kei hi. Tun zong hih lai ka gelh kawmin ka khitui luangluang hi (honestly). Laphuakte in dah man leh lungdam manin ka biangah mittui hong luang ci uh a, hih pen lungdam man hi. Mikang pau hel bualbual leng, I have to be honest here (a siangin gen leng) - tua laiin ka nu thugen pen ka zahpih a (kisik mahmah ing), tuniin ka zahtak hi. Tu ka cih hang tuma hizo a, Shillong ka tunsuk, College ka kah ciang ka tel pah a ka nu thukhual dan ka phawk hi. Tua pan Zolai tawh thu leh la zun ding ka hanciam hi.
Phawkkik Thu Pawlkhat
Ka mipihte kikhopna pen a Mizogam pauin genle’ng ‘thring’, zumpih huailua kisa hi. Upate zong pemthak vive hi a, a suah a khan in khoppi khatvei zong a siim ngeilo teng, pawlpi ah zong makai cih thadah Hunpan thungetna zong a tang ngeilo zah dongin a tualtello teng hive’n. Belhtak kisa lo, zumpih huai in ‘thring’ kisa hi. Tua hunlai ka ngaihsut kik ciang ka kisik a, Pasian in mawhmaina hong piak ding ka lamen hi. Kei banga ama pau zahpih, Zolai zumpih a omlai khak leh hehpih huai kasa a, kei bangin kisik ni a nei dingin ka lamen hi. Tua bang hun a neih leh a leitung damsung tomcik mi hampha ahihna lungdam in khitui luangin Topa a phat teitei ding cih ka lamen hi.
Lungdamna Khitui
Tua nitak in ka nu in ZBC kikhopna Upa Kham Ngo Thang inn ah (Biakinn om nailo) hong kikhoppih a, Upate in thudotna kam tawm hong neih zawh in pawlpi mi dingin hong sang uh a, pawlpi mi khempeuh khitui a luang keuhkeuh ka mu hi. Tua khituite dahna khitui hilo a, kilawm mahmah hi. Pasian kiangah lungdam kohna leh apna hong nei uh a, Amen khit ka hah ciangin vantung gama kimu mahmah ka bang uh hi. Hih ka lai-at pen tua nitakin a om upate in zong simkha dinguh ahih manin tua hun-a amaute lungdamna luankhi ka theihsiamloh pen tu-in lungdam ako ka hihna thu hong ciamteh sak uh hen. Kikhop tawp ciang upate in datmei (torch light) tawh inn dong hong kha in thungetna ka neih khit uh ciangin niangphaan dawn in ka kikhen uh a, tuni ciang hong tun hi.
Ebenezer
Tua bang nengneng a pawlpi kikaikhawm pen tu in Biakinn nei in, sikkang inn bek hilo taihinn kician sawm hi. Tua hun lai in a milip kitamlo, nungak omlo, nungakno nih bek kinei hi. Pasian huhna tawh tu’n zingsang lam niangtui hawm ding leh nitak lama hawm ding kikhen bawl thei ta; Upa lai-at siam kinei lo, tuin BA ciang zong kinei ta; numei makai ding laithei omlo, tuin laitan nei tampi omta; ngaihsutna kikhek in khantohna kidelh a, pawlpi upate zong thugen siam ta, khoppi pai ngeilote khoppi pelh nawnlo in, naupang nipi sangah zong laitan nei mah in siapi sem theita ahih ciang ka ngaihsutna ah “Murlen Biakinn hon masak kum 1986” pan sim leng zong hun saupi a pai zo na hi a, makai masa pawlkhat in hong nuntakpih nawnloh hangin amau makaihna nuaiah pawlpi hih ciang tungin a picing toto hita ciin ka ciamteh hi. We have come along way. Ebenezer!
Thukhupna
Khantohna pen a tawp omlo ahih manin ‘hih ciang hita’ cih omlo hi. Gualnuam taka Pasian phat thei, biakinn leh vanzat kisuangsam lo; pawlpi akici khatin a kisap khempeuh i neih loh hang puktaw nawn lo; amah khe in ding thei ahih ciangin a picing khat in ka tuat hi. Tua ahih manin ZBC gambup pawlpite en kawikawi le’ng a kipatcil sangin tuni in picingzaw thamtham hi. Neih leh lam bek hilo lungsim leh ngaihsutna ah zong picing lungsim pua in lungduai, thukhual, ngaihsunsa vive in kampau ta dingin ka um hi. Tua pen pilna hi a, tua pen picinna ahi hi. Tu tan Topa in hong makaih ahih manin tukum pen Zomi Baptist Church, Mizogam picin kum ahi hi. Tua ahih manin picing bangin nungta in picing takin gamta in picing takin nasem le’ng khantohna manlang lai ding hi. Picing khat pen hattak a khantoh ding a maban ahi hi.
[Hih article pen Mizogam Champhai khua pan kihawm LAITAI magazine, July 2007 issue pan hong kiteisawn hi. PDF file attached]
------------ --------- ---beita------------ --------- --------
Source: Zogam Dot Com
Dr. Hau Za Cin, Taipei
Tua hi leh Pasian' Tapa i theihna leh i thu upna-ah kithukhatin,
eite a khangcing suakin, Khrih' cingtaakna ciang i banto ding hi.
Tuahun ciangin thu upna lamah naupang ihi nawn kei ding a,
mite khemin a khialsak theite' mutna hangin i suk hoi i to hoi nawn kei ding a,
itna lungsim tawh thutak genin, lutang ahi Khrih tawh i kibat dongin i khangto ding hi.
Efesa 4: 14, 15)
‘Picin Kum’ cih pen kammal nih, ‘Picing’ leh ‘Kum’ cih pan hong pai hi a, ‘picing’ cih ciang ‘pi’ leh ‘cing’ kigawm hi leuleu in, ‘pi’ pen ganhing tawh genteh lehang ta nei, no nei, suan leh khak nei thei, khangcing, khangham, lian cihna hi in; ‘cing’ cih ciang neih leh lam kicing, thu leh la kicing, zatkhom ding nei, hau, hihzo, lamzo, neizo, akisam omlo in kicing cih bangin kihilhcian thei ding hi. Tua ahih manin picing cih ciang ‘amah leh amah kikem theita, lianta, khangcingta, etc’ ciin i ngaihsun thei hi. ‘Kum’ cih pen hun simna khat hi a, ciangtansa om, a kipatna pan a tawpna ding hun ciamtehna khat om cihna hi. A kipatna, i sim patna pan i tawpsakna kikal hun pen kum, kha, ni, nai, minit, second, etc cih bangin kiciamteh hi. Tua teng lakah kum pen hun picing khat, hun saupi khat, anlak hunkhat sung bang kihuamsak hi.
India kumpi mihing khat a pian kum pan simin anlak hun 18 vei a cin ciangin mi zattheih, sia leh pha khentel thei, zi leh ta nei thei, gamsung vaihawmna leh ki-ukna paizia thei dingin tuat a, anlak 25 vei a cin ciang mi picing khatin kingaihsun ahih manin vaihawmna, MLA, MP dingin sang hi. Tua ahih manin mihing leh kumpi ngaihsutna panin kum 25 cin hun pen picing khat suah taktakna hi a, innsung khat, gamsung khat vaihawm thei ding, amah leh amah kikem zo ding, amah khe tawh ding thei ding cihna ahi hi. Tua ahih manin tua kum cinna pen thupi in lungdam huai phadiak hi. Tua bang nihvei a cin ciang Pasian nam tel Israel mite in Jubilee ciin pawi thupi bawl in Pasian kiangah lungdam thu na ko zel uh hi.
ZBC Kum 25 Cingta
Zomi Baptist Church, Mizoram (ZBC) zong tukum in a kipat ciil pan simin anlak pawi 25 vei cingta ding hi. Anlak pawi pen Zomite hun simna ah Khuado kici ahih manin khuado 25 vei cingta cihna hi. Mikang hun simna tawh i sim ciangin kum 25 cingta a, i Topa Jesuh pian hun in sim leng zong Lungdambawl Pawi (Christmas) 25 vei kizang khinta cihna hi. Tua ahih manin Champhai Bethel Veng ah zumpi (ZBC Headquarter) lianpi nei in gambup vaihawmna i neih zawh kum 25 cinna Silver Jubilee kum hong tung takpi hita hi. Ahi zongin ZBC tangthu i etkik ciangin a lungdam huai mah bangin a lunglen huaina zong tampi om veve hi.
ZBC Min Kiphuak
Rev. Khup Za Go a laibu LEIVUI PANIN (2004) laimai 79 ah, “May 19, 1987 nitak in CBA pawlpi zong ahi nailo Pa Cin Khan Thang inn ah ka kikhawm uh hi” ciin na at hi. Laimai 80 na ah, “May 26, 1987 nitak nai 6 in Pa Cin Khan Thang inn ah Mizoram CBA Committee ciin kamkumna ka nei uh a, upadi (Constitution or Byelaw) zong gel pha-in ZOMI BAPTIST CHURCH cih ding thukimin thu thak tampi ka gel uh hi. May 27 niin Champhai pan Ngur ah pai-in Suan Za Thang in hong zui a, Pian Thang in ka van hong puaksak hi. Nitak ciangin Upa Zam Do Thang (J. Thomte) innah ka kikhawm uh hi. May 28 niin Upa Vial Khai in voktal tuk li khat hong gawhin pawlpi mi khempeuh tawh ankuang ka um hi. Nitak ciangin Ngur YMA in hong kikhoppih uh a, “Tang bang hong dam maw” cih leh “Eite kikhen ciangin” cih la khawng hong sakpih zuaizuai ciangin 1952 – 54 sung Champhai ah Murlen pan sang kaha ka pai zel lai hun tawh ka teh ciangin Mizoram Zomi te zong a khangto, a khanglo mahmah khat hita veh e cih ka phawk hi,” ciin na gelh hi. [1982 kumlai a CBA Mission Field pen 1987 ciangin ZBC ciin a min kipia a, tu-in kum 25 cingta hi. Silver Jubilee kum cihna hi]. Jubilee pawi i zat laitakin i pawlpi kipat cillai in hong makaih siate, upa pawlkhat i thu, la leh hunlui sutpih ding om nawnlo a, lungdam kum ahih hangin lunglen kum tawh zong kibang hi. Meigit tangkhat in gamzapi a hal bangin hong makaih leh hong lamlah, tu in eite tawh a om nawnlo siate i phawk mahmah ding hi. Ahi zongin mihing nuntakna Pasian khut ah om ahih manin eite cih theih omlo hi.
Pianpih Pau Tawh Biakpiakna
Mizogam sunga Zomite in hun bangtan hiam eima pianpih pau, nu leh pa hong hopih masakna kammal, leitung mi khempeuh in a kizahtak leh a kithupi sim penpen ‘mother tongue’ (pianpih kampau) ci a kilawm taka a lawhkhiat uh pau tawh Pasian phatna a kipat pen 1982 kum hi a, tua kikhopna Hiangmun khua ah hong kipan hi. Leitung bei dongin hih khua leh hih thu a kisut simin kigengen ding hi. Tua panin khua tuamtuam ah a hun zuiin tuni dong tunga, i khualzinna lam a saulai zongin saupi mah a tung khin hi hang ciin makaite leh upate in ciamteh hi. Hihte khempeuh mipite hanciamna, makaite lamlah siamna leh Pasian thupha hi a, lungdam in nuam tek ni.
A Kipat Cilna
Jubilee Souvenir laibu ah khua tuamtuam a pawlpite kipat dan leh a khantoh dan upate, laitheite leh makaite in hong at dinga, akicing zaw tua ah i mu ding hi. A kipat ciil in biakinn sikkang neisa pawlpi a om ding ka um kei a, Lai Siangtho leh Labu kicing in a neih ding uh ka um kei hi. Tuni in zong kicing cihna ahih loh hangin a kipat ni sangin nakpi takin kiningcingzaw thamtham hi. Mi inn ah kikhawm in, niangbel khat tuilum suang leh pawlpi mi khempeuh ading kicing a, intekte hai, kuang leh bel, sikkeu, zasan meh natawm pawlpi mite adingin kicing a, singkhul ding natawm tang nasep kullo in innkuan khat in sik khin zo hi. Tuni in Pasian huhna tawh a mi kicing zawdeuh in Niangbelpi nih leh thum lo tawh pawlpi kivak zo nawnlo a, innkuan khat neihsa tawh Lungdam Pawi kizang thei nawn lo hi. Tua pen a lungdam huai hi a, a khangto, a picing cih ciamtehna khat hi. Tua ahih manin lungdam takin Topa phat ni.
Ciamteh Huai Khantohna
Na khua pawlpi laibu luite enkik inla a kipatni pan tuni ciang dong a khantohna thute hong gelh dih in a khantoh zia lamdang nasa ding hi. Kha khat in khua khat pawlpi thu LAITAI ah suak leh kumkhat in suakkhin zo nawnlo dinga, khua khat khanna thu bek zong LAITAI ah khatvei in suakkhin zolo ding ahih manin nihvei, thumvei zop kul kha ding hi. Tua zahta in lungdam huai hi. Ahi zongin kigelh lo, kipuah lo leh a kiciamteh kei leh laidal pen muat ding a, inlawi-in ne in sia lel ding a, thu manpha tampi mangthang ding hi. Tua manin kumtawp thupuak (report) kicingtakin khua pawlpi khempeuh in kumsim in zum ah puak tek hamtang thei le’ng hoih ding hi. GC kahkawm in puak ding hanciam in nei tek ni. Khua pawlpite thu ciat pen lai-atpa (Secretary) in limtaka a ciamteh pen a kigawm toh toh ciangin i khanna, i picinna kithei hi aci nuam hi ing. Ko scientific research hihna ah zong kum tawp khoppi ah kumkhat nasepte kipuak a, tua pen a bu in kibawl in, tua teng mah leitung science pilna khanna ciamtehna laibu hitoto lel hi.
Hiangmun ah kipan kikhopna pen kibehlap in Vaikhawtlang, Hnahlan, Vapar, Ngur, Murlen, Champhai, Sesih, Leisenzo, Khuangphah, Aizawl, Zokhawthar, Mimbung, New Champhai, New Hiangmun leh Shillong khuate ah pawlpi omta hi. A kipat ciilin Zum ah bangmah kinei lo a mi inn kisap hi. Tua pan sikkang inn kinei a, a sawtloin leisek innpi (Taih inn) kinei ding hi. Kipat cil in Pawlpi sia ding kinei hetlo in Pasian in sia ding mihoih vive hong pia hi. Upa ding zong a kicingin hong pia a, nupi makai ding zong a kicingin hong pia hi. Pilna, siamna a nei khangno tampi hong khang zo a, hong khanglai ding ahih manin mailam limci deuhdeuh lai hi. Shillong ah sang ka kah ciilin kei bek ka hi a, tu in kum 15 zawh ciangin lapawl sa ding, football kimawl thei zah ding pilna sin ZBC sung pan omta cih ka mit mahmah tawh ka mu hi. Hihte khantohna hi a, picinna ahi hi. Kumsim in tan 10 zo kibehlap a, tua bek zong picinna hi.
Ngilh Mawh Ka Tun Tongneem
Ka theih khitloh hangin ka theih pen mah ahi Murlen khua picinna hong gen lai ning: ZBC, Murlen pen 1983 kum in a kipat laiin kei pawlpi dangah omlai hi. Pu Kham Ngo Thang leh Pu Khup Do Thang-te inn ah kiphual zawdeuh uh a, a inn kilaih in kikhopna nei zel uh hi. A tung lai thu teng kei sangin a tel zaw Upate om a, Souvenir a ding report puakna ah a kicingzaw in hong at ding uh lamen ing. Ka pianpih pau tawh Pasian phat ngeilo ka hih manin (sianggen leng, hong theisiam uh henla) ka zahpih a, ka zumpih mahmah hi. Ka nu pen Lusei pau siamlo ahih manin ZBC ah kikhawm zel a, ko adangte ka pemthak pawlpi uh ah ka kikhawm uh hi. Nitak khat ka nu in annek lai in, “naute, kei mi banga mi pau mi ham zong theilo ka hih ciang’ i pau theihna mah ah kikhawm leng ut ing…” hong ci hi. Tua hun laitak in ka thupi ngaihsutloh hangin tu ciangin hih kammal ka ngaihsut khak simin ka lunglenna ding ahihna thu ka thei kei hi. Tun zong hih lai ka gelh kawmin ka khitui luangluang hi (honestly). Laphuakte in dah man leh lungdam manin ka biangah mittui hong luang ci uh a, hih pen lungdam man hi. Mikang pau hel bualbual leng, I have to be honest here (a siangin gen leng) - tua laiin ka nu thugen pen ka zahpih a (kisik mahmah ing), tuniin ka zahtak hi. Tu ka cih hang tuma hizo a, Shillong ka tunsuk, College ka kah ciang ka tel pah a ka nu thukhual dan ka phawk hi. Tua pan Zolai tawh thu leh la zun ding ka hanciam hi.
Phawkkik Thu Pawlkhat
Ka mipihte kikhopna pen a Mizogam pauin genle’ng ‘thring’, zumpih huailua kisa hi. Upate zong pemthak vive hi a, a suah a khan in khoppi khatvei zong a siim ngeilo teng, pawlpi ah zong makai cih thadah Hunpan thungetna zong a tang ngeilo zah dongin a tualtello teng hive’n. Belhtak kisa lo, zumpih huai in ‘thring’ kisa hi. Tua hunlai ka ngaihsut kik ciang ka kisik a, Pasian in mawhmaina hong piak ding ka lamen hi. Kei banga ama pau zahpih, Zolai zumpih a omlai khak leh hehpih huai kasa a, kei bangin kisik ni a nei dingin ka lamen hi. Tua bang hun a neih leh a leitung damsung tomcik mi hampha ahihna lungdam in khitui luangin Topa a phat teitei ding cih ka lamen hi.
Lungdamna Khitui
Tua nitak in ka nu in ZBC kikhopna Upa Kham Ngo Thang inn ah (Biakinn om nailo) hong kikhoppih a, Upate in thudotna kam tawm hong neih zawh in pawlpi mi dingin hong sang uh a, pawlpi mi khempeuh khitui a luang keuhkeuh ka mu hi. Tua khituite dahna khitui hilo a, kilawm mahmah hi. Pasian kiangah lungdam kohna leh apna hong nei uh a, Amen khit ka hah ciangin vantung gama kimu mahmah ka bang uh hi. Hih ka lai-at pen tua nitakin a om upate in zong simkha dinguh ahih manin tua hun-a amaute lungdamna luankhi ka theihsiamloh pen tu-in lungdam ako ka hihna thu hong ciamteh sak uh hen. Kikhop tawp ciang upate in datmei (torch light) tawh inn dong hong kha in thungetna ka neih khit uh ciangin niangphaan dawn in ka kikhen uh a, tuni ciang hong tun hi.
Ebenezer
Tua bang nengneng a pawlpi kikaikhawm pen tu in Biakinn nei in, sikkang inn bek hilo taihinn kician sawm hi. Tua hun lai in a milip kitamlo, nungak omlo, nungakno nih bek kinei hi. Pasian huhna tawh tu’n zingsang lam niangtui hawm ding leh nitak lama hawm ding kikhen bawl thei ta; Upa lai-at siam kinei lo, tuin BA ciang zong kinei ta; numei makai ding laithei omlo, tuin laitan nei tampi omta; ngaihsutna kikhek in khantohna kidelh a, pawlpi upate zong thugen siam ta, khoppi pai ngeilote khoppi pelh nawnlo in, naupang nipi sangah zong laitan nei mah in siapi sem theita ahih ciang ka ngaihsutna ah “Murlen Biakinn hon masak kum 1986” pan sim leng zong hun saupi a pai zo na hi a, makai masa pawlkhat in hong nuntakpih nawnloh hangin amau makaihna nuaiah pawlpi hih ciang tungin a picing toto hita ciin ka ciamteh hi. We have come along way. Ebenezer!
Thukhupna
Khantohna pen a tawp omlo ahih manin ‘hih ciang hita’ cih omlo hi. Gualnuam taka Pasian phat thei, biakinn leh vanzat kisuangsam lo; pawlpi akici khatin a kisap khempeuh i neih loh hang puktaw nawn lo; amah khe in ding thei ahih ciangin a picing khat in ka tuat hi. Tua ahih manin ZBC gambup pawlpite en kawikawi le’ng a kipatcil sangin tuni in picingzaw thamtham hi. Neih leh lam bek hilo lungsim leh ngaihsutna ah zong picing lungsim pua in lungduai, thukhual, ngaihsunsa vive in kampau ta dingin ka um hi. Tua pen pilna hi a, tua pen picinna ahi hi. Tu tan Topa in hong makaih ahih manin tukum pen Zomi Baptist Church, Mizogam picin kum ahi hi. Tua ahih manin picing bangin nungta in picing takin gamta in picing takin nasem le’ng khantohna manlang lai ding hi. Picing khat pen hattak a khantoh ding a maban ahi hi.
[Hih article pen Mizogam Champhai khua pan kihawm LAITAI magazine, July 2007 issue pan hong kiteisawn hi. PDF file attached]
------------ --------- ---beita------------ --------- --------
Source: Zogam Dot Com
