L. T. Ngaihte
I nam leh gam neukha, tulai khovela a suahtak a,khang-gui kha zomthei a aom na ding igen chian ‘vakhu bang a nunnem a gul bang a pil hun’ ahi ichi sek ua,huai bang himah hiam chih a ngaihtuah sau itam di uam chih ka thei kei. Thil omdan theih haksa simpi ahi a,Jesu’n a nungzuite kiang ‘Ngai di uh,ngia lak a belam omding bang in ka hon sawlkhia ahi’ ana chi a,huai khit in, ‘huaiziakin,gul bang a pil leh vakhu bang a nunnem in om un’ achi zui ngal hi.
Ngia(wolves) ichih chiang in sasial ne a kivak ding a siam ahi ua, huaidungzuiin, ha hiam tak, chin hiam tak,taksa hattak,mit vaktak-zan a leng muthei,avun uh kivenna dia mul sau tak a tuam,huham tak leh hehpihna bei ganhing ahi ua, amau a chingtu hiam vengtu hiam neiloua,gamlak a khosa ding a siam ahi uhi.Chingtu bei ahihna uah, amau ut dan chiat a om,kuamah thunun louh,kuamah keplouh leh veen louh ahi uhi.Nisa nuai,vuahpi-huihpi nuai aleng,amau a haksatna omtuanlou a,gamtang thei ahi ua,a mit hah uh kia leng melmate thah na ding in a hak uhi.A melma te uh hiam a target te uh, amau sang a hatzaw te leng,awl awl a bei in,ngakzoutakin a pang ua, sazuk bang lawi bang leng a that zou zel uhi.Bawng bang a thah ding chiang un, asa neemna a taw ah apan ua, a ngoi uh a kaih khiaksak ua,a bawng sihma in, a sung teng bang gaiman khop a ganhing mulkimhuai ahi uhi.Singtang a ka ten lai un, Ngia in bawng a sual uh, ahong si ding kuan hong ‘sih-ham’ a, huai izak khak chiang in a mulkim huaina kithei khia hi.Huchibang a hehpihna bei gan hon lak a,belam om ding dan I ngaihtuah chian, lem liai lou dinga, ‘zum-leh-hiam’ kaal chih bang nepte hi ding hi.
Belam ichih leuleu chian, ganhing poihlong mahmah,khase baih, kepngai leh dondon ngai ahi ua, amau tang a hing thei ahi kei ua,a hon hon in a gamta uhi.Amau a kivenna ding a tal ua kii lou ngal a om kei a,a haa uh louhing nou nek nading lel ahi a, a lei u leng thil neem valhna ding lel ahi uh.Gam lak a khosa ding in a khe uh a tom a,thahatna a hau kei ua,singkung genlouh kawl sang deuh leng a kan zou kei uhi.Huaiziakin, inkhoi(domesticate) ahi na uh alian zaw a,pitu/Chingtu ama uah,leh anung uah a om zel hi.Ka neulai Lawibual a ka tenlai un,belam ka vul sek ua, sawm a sim ka nei sek ua, ka nuleh pa’n sawm-a-khat a pe zel uhi. Belam te a diakin, nou a neih chiang un abuai huai pet mah a,zan khat zan nih bang ‘labour’ anei ua, mi innuai khat ah a Pi’n a kah pih pih hi. Nou a honnei khin a, aneihna ma a hong nasia a, tulai pau leh a hong ‘septic’ a,amau alah bang mah hihtheilou, a nai leh a than(lungte) ka meek pawt sak sek ua, ama liam ah Iodine hattak ka nuh sak ua,hiai mahmah belam neihna a nuam lou pen ahi.
Jordan leh Israel lam a ka khosak sung un,Belampu te leh a dinmun uh kichian zawsem in kava mu a,zingsang a Belam pu’n a Belam te noisuk ding a a volh bang I muh leh lamdang asak theih phial hi.A Belam nawi gau teng a kualin, a lulam uh kisutuah in a ding ua, a Chingpa’n a nunglam uapan a noi lian mahmah te aban aban in a suk khe zel a, a Belam ten na asak chiang un a lu uh aki battuah ua, nupi khasia kikahpih bang mai in a om uhi.A gam uh eilam bang ahikei a, mual lian loulou,akal a kuam thukpi loulou a kibawl ngen ahi tang pi a, sing leh gua muhding a om kei a, suang leh lei ngil heuhhouh ngen ahi uhi. Tua suang pang mun khenkhat ah lounah hing tamlou khakha a hong pou khia ua, tuate ne ding in Belam te a gam agam in a om souh souh uhi.A Chingpa’n a panpih ding in Uital bang zah hiam a nei zel a, ahonpi nung gamla aomte ava naa ua, a ngak ua, a holkhawm zel uhi.Tuate phetlouin, ngia Belam te mandia hong kisa te a na attack zel uhi.
Hichibangtuk a ganhing nih kibanglou,teengkhawm dia thupiak, athupetu leng Topa Jesu Kris meuh ahi.A lampi a om ngei ding. Thil khat chiangtak a I muh theih bel-gul bang a pil leh vakhu bang a nunnem hinkhua hi,thil kibang lou mahmah tehtuah kal a hinkhua, ‘mai suang teh’ bang ahi.
Singtang lou khou khaten nathei ding ua, mai nou hong gah tung,apiankhiakna teel thei lou ahih manin,suang lianpi nih kal ah a hong khang khia a,a lang tuak ah delh in a om a, ahihhangin, azungpi a vaaktu ding nei ahihmanin, a hong khang khia a, suang teh khakna te khang theilou ahihman in, a awn nana a hong khang a, mel hoihlou tak lah pahtakhuai,phathuai mahmah in a hong piching hi.
Jesu Kris in a nungzuite kiang ‘gul bangin pil unla,vakhu bang in nunnem un’ achih hangin, ahihdingdan a gen sau pih kei. Ahihhangin, hiai hinkhua nih te amau mimal hinkhua a nei chiat din a deih hi.Ahihleh bang chi hin ta ding ? chih dotna lianpi leh theihnop huaipi ahi.Thil nih a kidoutuah(opposites) mikhat in neih khawm ding chihna ahi. Ngaihtuahna Neem leh Lungtang Khauh! Hiai gel neihkhawm da hi chu.Neih khawm phetlouh a, I mihinna a mun kikim luahsak ding hizaw mah.Mi maimai hih theih louh ahi,ahi alah Jesu’n a nungzui te mi maimai dia deihlou hi ngei ding.
I theihsa bang in, leitung hinkhua thil nih a akikalh (opposite) a bawl ngen ahi,Etsaknan:Mial leh Vaak,Dik leh Diklou,Sa leh Vot,Nuam leh Nuamlou etc.Hiai thil kibang lou te a kikim a mun khat a a om louh chian, buaina a tung gige hi.Huai buaina tuh,mimal ah, inkuan ah, society ah, nam kaal ah leh leitunghinkhua(environment) bang ah a tung zel hi. Tulai a kigen ‘Global Warming’ bang leng khawvot leh kholum a hong kikimlouh deuh ziak a thil piang himai mah hi.Huchibang in,neemna leh khauhna leng akidoutuah, aki kim(balance) tak a mi khat a a omkhak chian,huaipa uh mi pil,miettontak leh piching ahong suak hi. Misual(militant) te nunnem ngei lou, a nunnem te militant hingeilou bang mah leh hiai gel a hunlel a mix theite a pilpen himai mah hi.
Ka tangval tunglaiin, Pherjol ah zankhat kulkhum in ka omkha ua,huailai a ka thei gige khat genkhiak hong kilem lian abang.Gal mat piansimin,kou bel mikhat Bel gu va zongkhia in,a bel valaksak/aman va laksak dia kuan hina pi’n, a doha uh ichih- a pilna u leng hi,a inneipa ahong pau ngaih lala a,a inveng aza kha ten a khopi mitamna lam ah ‘Lawibual ten I khothak lam uh balsialnuai uh ahi’ chi’n va tangkou phiangsan uhi.Nungal tangval tam a tam hong tung phei ua, kou lawi bel 10 kipha nawnlou, Bible a ‘gohding belamnou’ bang ka hong hita ua,a minthang gen mangmoh ‘khindang a sahou’ bang lel ka hong hita uhi.Huchihlai in, amau Val-upa nih, akibang hetlou anei ua, khatpen a hong paichian ‘hiai Lawibual te phiangsan, vua unla khen un,khosung apan delhkhia unla,ahong ngamnawnlouh na dingun soisa zialzial un’ achi toitoi zel a,huaite izak chian chimul bang a thou sisi thei hi.Val-upa dang pen a hong paichian, ‘e khai,lunngaihna ding leh patauhna ding himhim a om kei, unaukhat,khawkhat I kei ua hia, zan a sawttak toh na giak ding ua, singpi bang le I dawn di ua, zingsang anne sa in,gilvah takin na kik ding uh’ a hong chi zel hi.Hiai I zak chian chu chimul thoute hong bok suk zel uh abang. Mi huai lai pek a huchi uh hitan chin !
Singtang nungak ‘ii’ chitheilou nu a kigen khat lah, ka hon ngai a chiteng nial theih neilou, lupkhawmpih dia zawn teng lah nial nachang theilou, ta a honneih tak a leng a ‘pa’ ding theih zoh hilou chih bang leng om thei.Khenkhat lah amau deihdan tak mihing omdia ngaihtuah in ngakngak, atawp a amah kia om kha chihbang le om thei.Mi gen teng gingta a, taalkaih theih dia om ding ahoihlouh mahbang in, midang gen khempeuh gingta lou a va om leng dik khin tuanlou hi.Ei kia dik hiam ei a ding kia dan a va muhna pen in midang hinlam leh poimohna phokbatlouhna ahi a, midang tellouin lah mimal in kuamah hing sawt zoulou hi.Lungsim neem, mite khemzoh mitampeuhmah ahihman in,Dictator minthang Adolf Hitler in a laibu gelh ‘Mein Kampf’ ah hichin gelh hi ‘Zuauthu siamtak a phuah I zak sak zelzel leh mitamzaw ten vangam bang gawtmun hi’n gingta thei ua, gawmun bang leng vangam bang in ngai thei uhi.Lamdang asak khop uh zuau I gen leh gingta baih deuhdeuh uhi’(By means of shrewd lies, unremittingly repeated, it is possible to make people believe that heaven is hell-and hell,heaven…The greater the lie, the more readily will it be believed’) chi hil hial hi.
Gul bang a pil a,vakhu bang a ngilneihna neilou mite pen ngaihnatna bei,zumna theilou leh angmasial na hi a,vakhu bang a ngilnei a gul pilna bang neilou te lah khasiatna,zoina leh tupkichian neihlouhna ana hi zel hi.Telding zaw theih huai lou. Anih gel un telhuai lou uhi.
Ei nam neute I khankhiak na ding in lungtang khauhna leh nunneemna I polhsiam uh kipha moh hi. Lungtang khauh chihmana melma a i theihte va sat hiam va thah hiam pen,nikhat ninih vualtungtuanna lel pe thei a,a hong kileh kikchiang in, na tu leh tate adin haksa law ding hi.Nunneem chi a, michihteng diksa a, mi nung zuizui mai ding chihleng dik tuanlou hi.Minung khat vei I zuih khak chian, huai mah zuih zuih baihlam pi hong suak a, zuih a ompa’n zong, zui zui lel din hon koih pah zel sek hi.Hiai leng thil diklou,tawpsan pah ding thil ahi.
Atung ate apan, thuakzohna toh douna (non-violent resistance) ei ading in poimoh pen hin kilang hi.I dikna leh I hihna gupna a thaulong ma a khutvuak toh din ngamna, I gam leh inam adia sepaih galthuam te dou dia thudik toh panngamna,hon hawte thilomdan theisiam sak kawm a chibai ngamna,melma te itna, doha a hon beite a diklouhdan uh theisak kawm a thumsak ngamna, I panpihna theisiamlou te bang le panpih semsem utna,ahoihlou te a hoih a thuk ngamna chihte zatsiamna tuh ‘gul bang a pilna leh vakhu bang a nunneemna’ hinkhua hi maimah hi. Pang teitei(Trang fanfan).Mai suang teh bang a I om na mun a khanlet dan siam a, I sung a om lungtang khauh tak leh ngaihtuahna nunem kihel sak in,malam nawt hanchiam ve ni.
(Hard copy of this article available in latest Tongluang Magazine)
http://zogam.com/index.php?option=com_content&task=view&id=2117&Itemid=32
I nam leh gam neukha, tulai khovela a suahtak a,khang-gui kha zomthei a aom na ding igen chian ‘vakhu bang a nunnem a gul bang a pil hun’ ahi ichi sek ua,huai bang himah hiam chih a ngaihtuah sau itam di uam chih ka thei kei. Thil omdan theih haksa simpi ahi a,Jesu’n a nungzuite kiang ‘Ngai di uh,ngia lak a belam omding bang in ka hon sawlkhia ahi’ ana chi a,huai khit in, ‘huaiziakin,gul bang a pil leh vakhu bang a nunnem in om un’ achi zui ngal hi.
Ngia(wolves) ichih chiang in sasial ne a kivak ding a siam ahi ua, huaidungzuiin, ha hiam tak, chin hiam tak,taksa hattak,mit vaktak-zan a leng muthei,avun uh kivenna dia mul sau tak a tuam,huham tak leh hehpihna bei ganhing ahi ua, amau a chingtu hiam vengtu hiam neiloua,gamlak a khosa ding a siam ahi uhi.Chingtu bei ahihna uah, amau ut dan chiat a om,kuamah thunun louh,kuamah keplouh leh veen louh ahi uhi.Nisa nuai,vuahpi-huihpi nuai aleng,amau a haksatna omtuanlou a,gamtang thei ahi ua,a mit hah uh kia leng melmate thah na ding in a hak uhi.A melma te uh hiam a target te uh, amau sang a hatzaw te leng,awl awl a bei in,ngakzoutakin a pang ua, sazuk bang lawi bang leng a that zou zel uhi.Bawng bang a thah ding chiang un, asa neemna a taw ah apan ua, a ngoi uh a kaih khiaksak ua,a bawng sihma in, a sung teng bang gaiman khop a ganhing mulkimhuai ahi uhi.Singtang a ka ten lai un, Ngia in bawng a sual uh, ahong si ding kuan hong ‘sih-ham’ a, huai izak khak chiang in a mulkim huaina kithei khia hi.Huchibang a hehpihna bei gan hon lak a,belam om ding dan I ngaihtuah chian, lem liai lou dinga, ‘zum-leh-hiam’ kaal chih bang nepte hi ding hi.
Belam ichih leuleu chian, ganhing poihlong mahmah,khase baih, kepngai leh dondon ngai ahi ua, amau tang a hing thei ahi kei ua,a hon hon in a gamta uhi.Amau a kivenna ding a tal ua kii lou ngal a om kei a,a haa uh louhing nou nek nading lel ahi a, a lei u leng thil neem valhna ding lel ahi uh.Gam lak a khosa ding in a khe uh a tom a,thahatna a hau kei ua,singkung genlouh kawl sang deuh leng a kan zou kei uhi.Huaiziakin, inkhoi(domesticate) ahi na uh alian zaw a,pitu/Chingtu ama uah,leh anung uah a om zel hi.Ka neulai Lawibual a ka tenlai un,belam ka vul sek ua, sawm a sim ka nei sek ua, ka nuleh pa’n sawm-a-khat a pe zel uhi. Belam te a diakin, nou a neih chiang un abuai huai pet mah a,zan khat zan nih bang ‘labour’ anei ua, mi innuai khat ah a Pi’n a kah pih pih hi. Nou a honnei khin a, aneihna ma a hong nasia a, tulai pau leh a hong ‘septic’ a,amau alah bang mah hihtheilou, a nai leh a than(lungte) ka meek pawt sak sek ua, ama liam ah Iodine hattak ka nuh sak ua,hiai mahmah belam neihna a nuam lou pen ahi.
Jordan leh Israel lam a ka khosak sung un,Belampu te leh a dinmun uh kichian zawsem in kava mu a,zingsang a Belam pu’n a Belam te noisuk ding a a volh bang I muh leh lamdang asak theih phial hi.A Belam nawi gau teng a kualin, a lulam uh kisutuah in a ding ua, a Chingpa’n a nunglam uapan a noi lian mahmah te aban aban in a suk khe zel a, a Belam ten na asak chiang un a lu uh aki battuah ua, nupi khasia kikahpih bang mai in a om uhi.A gam uh eilam bang ahikei a, mual lian loulou,akal a kuam thukpi loulou a kibawl ngen ahi tang pi a, sing leh gua muhding a om kei a, suang leh lei ngil heuhhouh ngen ahi uhi. Tua suang pang mun khenkhat ah lounah hing tamlou khakha a hong pou khia ua, tuate ne ding in Belam te a gam agam in a om souh souh uhi.A Chingpa’n a panpih ding in Uital bang zah hiam a nei zel a, ahonpi nung gamla aomte ava naa ua, a ngak ua, a holkhawm zel uhi.Tuate phetlouin, ngia Belam te mandia hong kisa te a na attack zel uhi.
Hichibangtuk a ganhing nih kibanglou,teengkhawm dia thupiak, athupetu leng Topa Jesu Kris meuh ahi.A lampi a om ngei ding. Thil khat chiangtak a I muh theih bel-gul bang a pil leh vakhu bang a nunnem hinkhua hi,thil kibang lou mahmah tehtuah kal a hinkhua, ‘mai suang teh’ bang ahi.
Singtang lou khou khaten nathei ding ua, mai nou hong gah tung,apiankhiakna teel thei lou ahih manin,suang lianpi nih kal ah a hong khang khia a,a lang tuak ah delh in a om a, ahihhangin, azungpi a vaaktu ding nei ahihmanin, a hong khang khia a, suang teh khakna te khang theilou ahihman in, a awn nana a hong khang a, mel hoihlou tak lah pahtakhuai,phathuai mahmah in a hong piching hi.
Jesu Kris in a nungzuite kiang ‘gul bangin pil unla,vakhu bang in nunnem un’ achih hangin, ahihdingdan a gen sau pih kei. Ahihhangin, hiai hinkhua nih te amau mimal hinkhua a nei chiat din a deih hi.Ahihleh bang chi hin ta ding ? chih dotna lianpi leh theihnop huaipi ahi.Thil nih a kidoutuah(opposites) mikhat in neih khawm ding chihna ahi. Ngaihtuahna Neem leh Lungtang Khauh! Hiai gel neihkhawm da hi chu.Neih khawm phetlouh a, I mihinna a mun kikim luahsak ding hizaw mah.Mi maimai hih theih louh ahi,ahi alah Jesu’n a nungzui te mi maimai dia deihlou hi ngei ding.
I theihsa bang in, leitung hinkhua thil nih a akikalh (opposite) a bawl ngen ahi,Etsaknan:Mial leh Vaak,Dik leh Diklou,Sa leh Vot,Nuam leh Nuamlou etc.Hiai thil kibang lou te a kikim a mun khat a a om louh chian, buaina a tung gige hi.Huai buaina tuh,mimal ah, inkuan ah, society ah, nam kaal ah leh leitunghinkhua(environment) bang ah a tung zel hi. Tulai a kigen ‘Global Warming’ bang leng khawvot leh kholum a hong kikimlouh deuh ziak a thil piang himai mah hi.Huchibang in,neemna leh khauhna leng akidoutuah, aki kim(balance) tak a mi khat a a omkhak chian,huaipa uh mi pil,miettontak leh piching ahong suak hi. Misual(militant) te nunnem ngei lou, a nunnem te militant hingeilou bang mah leh hiai gel a hunlel a mix theite a pilpen himai mah hi.
Ka tangval tunglaiin, Pherjol ah zankhat kulkhum in ka omkha ua,huailai a ka thei gige khat genkhiak hong kilem lian abang.Gal mat piansimin,kou bel mikhat Bel gu va zongkhia in,a bel valaksak/aman va laksak dia kuan hina pi’n, a doha uh ichih- a pilna u leng hi,a inneipa ahong pau ngaih lala a,a inveng aza kha ten a khopi mitamna lam ah ‘Lawibual ten I khothak lam uh balsialnuai uh ahi’ chi’n va tangkou phiangsan uhi.Nungal tangval tam a tam hong tung phei ua, kou lawi bel 10 kipha nawnlou, Bible a ‘gohding belamnou’ bang ka hong hita ua,a minthang gen mangmoh ‘khindang a sahou’ bang lel ka hong hita uhi.Huchihlai in, amau Val-upa nih, akibang hetlou anei ua, khatpen a hong paichian ‘hiai Lawibual te phiangsan, vua unla khen un,khosung apan delhkhia unla,ahong ngamnawnlouh na dingun soisa zialzial un’ achi toitoi zel a,huaite izak chian chimul bang a thou sisi thei hi.Val-upa dang pen a hong paichian, ‘e khai,lunngaihna ding leh patauhna ding himhim a om kei, unaukhat,khawkhat I kei ua hia, zan a sawttak toh na giak ding ua, singpi bang le I dawn di ua, zingsang anne sa in,gilvah takin na kik ding uh’ a hong chi zel hi.Hiai I zak chian chu chimul thoute hong bok suk zel uh abang. Mi huai lai pek a huchi uh hitan chin !
Singtang nungak ‘ii’ chitheilou nu a kigen khat lah, ka hon ngai a chiteng nial theih neilou, lupkhawmpih dia zawn teng lah nial nachang theilou, ta a honneih tak a leng a ‘pa’ ding theih zoh hilou chih bang leng om thei.Khenkhat lah amau deihdan tak mihing omdia ngaihtuah in ngakngak, atawp a amah kia om kha chihbang le om thei.Mi gen teng gingta a, taalkaih theih dia om ding ahoihlouh mahbang in, midang gen khempeuh gingta lou a va om leng dik khin tuanlou hi.Ei kia dik hiam ei a ding kia dan a va muhna pen in midang hinlam leh poimohna phokbatlouhna ahi a, midang tellouin lah mimal in kuamah hing sawt zoulou hi.Lungsim neem, mite khemzoh mitampeuhmah ahihman in,Dictator minthang Adolf Hitler in a laibu gelh ‘Mein Kampf’ ah hichin gelh hi ‘Zuauthu siamtak a phuah I zak sak zelzel leh mitamzaw ten vangam bang gawtmun hi’n gingta thei ua, gawmun bang leng vangam bang in ngai thei uhi.Lamdang asak khop uh zuau I gen leh gingta baih deuhdeuh uhi’(By means of shrewd lies, unremittingly repeated, it is possible to make people believe that heaven is hell-and hell,heaven…The greater the lie, the more readily will it be believed’) chi hil hial hi.
Gul bang a pil a,vakhu bang a ngilneihna neilou mite pen ngaihnatna bei,zumna theilou leh angmasial na hi a,vakhu bang a ngilnei a gul pilna bang neilou te lah khasiatna,zoina leh tupkichian neihlouhna ana hi zel hi.Telding zaw theih huai lou. Anih gel un telhuai lou uhi.
Ei nam neute I khankhiak na ding in lungtang khauhna leh nunneemna I polhsiam uh kipha moh hi. Lungtang khauh chihmana melma a i theihte va sat hiam va thah hiam pen,nikhat ninih vualtungtuanna lel pe thei a,a hong kileh kikchiang in, na tu leh tate adin haksa law ding hi.Nunneem chi a, michihteng diksa a, mi nung zuizui mai ding chihleng dik tuanlou hi.Minung khat vei I zuih khak chian, huai mah zuih zuih baihlam pi hong suak a, zuih a ompa’n zong, zui zui lel din hon koih pah zel sek hi.Hiai leng thil diklou,tawpsan pah ding thil ahi.
Atung ate apan, thuakzohna toh douna (non-violent resistance) ei ading in poimoh pen hin kilang hi.I dikna leh I hihna gupna a thaulong ma a khutvuak toh din ngamna, I gam leh inam adia sepaih galthuam te dou dia thudik toh panngamna,hon hawte thilomdan theisiam sak kawm a chibai ngamna,melma te itna, doha a hon beite a diklouhdan uh theisak kawm a thumsak ngamna, I panpihna theisiamlou te bang le panpih semsem utna,ahoihlou te a hoih a thuk ngamna chihte zatsiamna tuh ‘gul bang a pilna leh vakhu bang a nunneemna’ hinkhua hi maimah hi. Pang teitei(Trang fanfan).Mai suang teh bang a I om na mun a khanlet dan siam a, I sung a om lungtang khauh tak leh ngaihtuahna nunem kihel sak in,malam nawt hanchiam ve ni.
(Hard copy of this article available in latest Tongluang Magazine)
http://zogam.com/index.php?option=com_content&task=view&id=2117&Itemid=32
No comments:
Post a Comment