Tuesday, March 04, 2008

The Lamka Post | March 2, 2008

Thangginsang Tombing in Super Idol hihna la

LAMKA, March 1: Inter Tribe Super Idol Contest Dec.2007 apan Lamka a om ah tuni sun dak 12:00 in YPA (Hq) Hall ah Grand Finale nei uhi. Hiai hun ah Chief Guest in Sumant Singh IAS DC/CCpur pang a, aman Inter Tribe Super Idol kibawl pen thupi a sak thu gen in lasa siam tuamtuam tamtak talent zon khiakna ahih ban ah lalam a khan touhna ahihdan gen hi. Aman Super Idol hihna la leh 2na 3na te kiang ah kipah man pekhia hi.

Tuni a Grand Finale ah Thangginsang Tombing S/o T. Sinkhawtual of Mualkawi in Super Idol ngah in khatna la a, cash Prize Rs.50, 000/- ngah hi. 2nd in Stephan in la a, Cash Prize Rs.20,000/- ngah a, 3rd ah Khummuanching pang in Cash Prize Rs.20,000/ ngah a, Top 10 tan telpha teng kiang ah Cash Prize Rs.5,000/- chiat pia uhi.


Dr. T. Hatzaw in charge la

LAMKA, March 1: Dr. Thangkhanpiang @ Dr. T. Hatzaw in tuni sun dak 12:00 in Dr. M. Lachinkhai apan in Medical Superintendent/Dist. Hospital, Lamka hihna charge la hi. Charge a lak toh kitawn in Rev. M.Gousuan, DS Lamka South (EBC) in Pathain kiang ah thumsakna leh vualzawlna nget sak hi.

Executive Secretary 2 in charge la

LAMKA, March 1: Zou Presbyterian Church Synod(ZPSC) a Sr.Executive Secretary leh Executive Secretary thak leh luite tuni zingkal lam dak 11:00 in ZPSC (Hq) Office Zomi Colony ah Charge kipiak khiatna hun zang uhi. Rev. H. Nengzatun Moderator chairman na Sr. Executive Secretary Rev.Hangpi Manlun mun a ding in Rev.Tualzachin in Charge la a, Executive Secretary Rev. Khamchinkhai mun a ding in Rev. Stephan Chinzathang in Charge la hi. Huai hun ah Office Peon pension Upa Ginzadong kiang ah leng Pahtakna Certificate, Gratuity, GPF piak ban uah Puanlaisan silh sak uhi.

Mobile Medical Unit Ambulance 2 hong tung

LAMKA, March 1: Dr.Gouzalam Chief Medical Officer makaih in tuni’n Imphal ah Mobile Medical Unit a ding Ambulance gari 2 vala ua, tuni sunnung dak 2:00 in Lamka hong tung uhi. Huai Ambulance Gari sung ah Damlou gimzualte leng emergency in operation bawl theih ding a, asung ah Oxygen Generator leh vanzat tuamtuam bukim tak toh kithuah hi.

Bike spoke in het liam

LAMKA, March 1: Miss Sangthamoi (27) d/o ngawilien of Patpuimun tuni sun dak 12:00 in Hmar Veng a Pasal khat in Bike apuak spoke in a khekol chip kha in atak lam khe tul hetkha in nasatak a liam in tun Dist. Hospital Lamka ah ki-enkol hi.

Biak inn mun ding gam Plot 9 lei

LAMKA, March 1: EBC Lamka South in New lamka Vengnuam a PT Sports Complex kiang ah EBC Biak Inn mun ding gam Plot 9 a lian Rs.4lakhs vel a lei khia uh chih Rev. M.Gousuan DS, Lamka South apan kiza hi.

Inverter kigumang

LAMKA, March 1: EBCC Central Lamka Biakinn a Inverter zatlai gutate’n February 29, 2008 nitak in gu ua, hiai toh kisai in EBCC/Central Lamka Secretary in Inverter gutu’n kintak a Local Pastor kiang a ngaihdam va ngen a koih nawn ding in theisakna bawl hi.

TPO President ding tel

LAMKA, March 1: Thangkhal People Organization (TPO) in zan in Mr. Thangkhanlam, President, TPO., teenna inn, New Lamka Gouchinkhup veng ah TPO vaipaw ding telna nei ua, tua ah Mr. Thangkhanlam telching nawn uhi.

CM’ ngetna ziak in MUTSU in MU pawtsan ding khawlsak tadih

IMPHAL, March 1

Manipur University Students’ Union a President Gonmei Gaisingam leh General Secretary Michael Lunminthang in tuni a thusuah a bawlna uah, MUTSU in tuni a MU pawtsan ding a chih himahleh, Chief Minister O. Ibobi Singh in, Cabinet Minister-te, singtangmi MLA-te leh Chief Secretary mai a ngetna a bawl ziak in, MU pawtsan ding a chih pen uh khawlsak tadih ahihdan taklang hi.

MUTSU thusuak dan in, assembly a singtangmi MLA te’n MU a sepna leh hamphatna toh kisai a thangpaitak a a tangkoupih uh phathuai a sak dan uh leng taklang uhi. Manipur University a 34.2% reservation phut chih zekaita himahleh, hun hongpai zel ding etna a, ‘rightful share’ ngah ahihtheihna dia singtangmi MLA te’n pan hon latou leh bilvaktak a om ding ua lamethuai a sak dan uh leng thusuak ah taklang uhi.

Zan nitak a CM’ office a MUTSU palaite toh govt. kihouna dungzui in, Central govt. kiang a, Manipur govt.’ reservation paidan MU a leng zat ahihtheihna dia, CM, Education Minister, HAC Chairman, Tribal MLA-te, Chief Secretary, ATSUM leh MUTSU makaite Delhi a hoh a, phutna neih ding leng thupuk uhi. Huaite ban ah, MU in teaching leh non-teaching post lakna dia advertisement awl bawl ding chih leng zan nitak a meeting ah genkhawm uhi.

Mobile Medical Unit a zat ding gari hawmkhia

IMPHAL, March 1

National Rural Health Mission nuai a Manipur’ district teng a damlouhna toh kisai a zattheih ding, gari 18 hawmkhiakna tuni’n State Health Society, Manipur saina in, Kangla Hall ah Khuallian Chief Minister O. Ibobi Singh in nei hi. Hiai District Mobile Medical Unit-te, gari Unit 1 leh 2 chiat district teng in ngah uhi.

Hiai gari hawmkhiakna hun ah, President in Health & FW Minister Ph.Parijat banah, Guest of Honour in Assembly Speaker Dr. S. Budhichandra Singh leh Deputy Chairman State Planning Board E. Kunjeshwor pang uhi.

Hiaite banah, mi poimoh tuamtuam, Minister K. Ranjit, N. Biren, N. Loken, PDA Chairman Dr. Kh. Loken, Th. Lokeshwor MLA, Chief Secretary Jarnail Singh leh medical officer tamtak leng kihel uhi. Hiai hun a Khuallian Chief Minister in a genna ah, nam khangtou khat hihtheihna dia alou theilou damtheihna ahihdan gen hi. Tuni a mobile medical unit hawmkhiakte’n, Manipur a singtang gam mun tuamtuam a damlouhna toh kisai a phattuamna peding ahihdan leng gen hi. Hiai mobile unit in, District HQ tan a damlou ki-ensak dia hohzouloute leng naktak in panpih ding hi.

CM in aban a genna ah, Manipur govt. in Imphal, Porompat a om JN Hospital complex a JN Institute of Medical Sciences kichi Medical College kum nawn a bawl patna ding toh kisai a nasem panta hidan in leng gen hi. Hiai institution honkhiak ding tungtawn in damlou ki-etsakna leh doctor zilnuamte a di’n leng phatuam mahmah ding hi.

Hiai hun a President a pang Health Minister Ph. Parijat Singh in a genna ah, tuni a mobile medical unit patkhiak pen, Manipur state a dia amasapen ahihban ah, gari sung a doctor-te om in, damlouhna etna tuamtuam x-ray machine tanpha koih ahihdan gen hi. Hiai mobile medical unit-te bel district chih a Chief Medical Officer-te etkawlna nuai ah om ding hi.



CHSEM exam ni masa ah 6 hawlkhia

IMPHAL, March 1

Council of Higher Secondary Education, Manipur saina a Class XII examination patni zan in Motbung Private Centre apat chiindan hoihlou leh mi taang a exam 6 hawlkhiak in om ngal uh hi’n tuni’n CHSEM Chairman thusuak om hi.

Thusuak dan in, chiindan hoihlou zat ziak a hawlkhiak, Tahira Begum Roll no. 1469 (Arts) leh mi taang a exam Arts stream ngen ah, Jangkholal Khongsai Roll no. 1413, Kholneineng Sitlhou Roll no. 1447, Lamchi Gangte Roll no. 1449 leh Thempy Khongsai Roll no. 1470 hi uhi.



February khaloh lak theihta

IMPHAL, March 1

Manipur govt. nuai a Under Secretary (FC) Finance S. Chinglensana in tuni a thusuah a bawlna ah, Manipur govt. nuai a semtu tuamtuamte February 2008 kha loh leh a tuamtuamte tuni March 1, 2008 apat laktheihta ahihdan taklang hi.



Kimawlmi te’n nuakna khawlsan

IMPHAL, March 1

Manipur apat kimawlmi national level a Gold medal ngah mi 110-te Manipur govt. in a chiam bang a sepna pelou chih ziak in, kimawlmi te’n Khuman Lampak a YAS office gate bul a nuakna ni bangzah hiam paita apat nei uhi.

Hiai toh kisai in, tuni’n Imphal Police Station a OC makaih Police te’n kimawlmi dharna neite hawlkhia in gate chabi khen hong in, office kaite nna semsak uhi.

Hichibang kal ah, YAS a Director Bobby Waikhom in kimawlmite toh ama office ah kihouna nei ua, tua ah amau ngetna toh kisai a file paisak hidia thuchiam a bawl ziak in, kimawlmi te’n nuakna khawlsan uhi. Hiai mun a kimawlmite thupuangtu khat gendan in, YAS Director thugen ni 4/5 sung etkhiakna nei ding ahihdan uh leh, hiai hun sung a Khuman Lampak a kimawlna tuamtuam bangmah omtheilou ding in leng gen hi. Hichibang hun tan a, govt. in a ngetna uh a pichinsak kei leh Gold medal leh certificate a tawite uh Chief Minister kianga pekhe ding uh hidan in leng gen uhi.



Ex-Servicemen rally om ding

IMPHAL, March 1

Manipur a om Assam Rifles a pangsa Ex-Servicemen-te a ding in, Ex-Servicemen rally, 39 Assam Rifles saina in, March 3, 2008 zinglam dak 9.30 in Sanjeevani, North AOC a Minuthong gei ah om ding hi.

Hiai rally a telte’n ann nekkhomna nei ding ua, tua hun ah IGAR (South) Maj General B.K. Chengapa AVSM in, Ex-servicemen-te toh houlimna hun leng zang ding uh hidan in IGAR (S) thusuak om hi.



Mapithel Dam bawl sunzomlou ding in ngen

IMPHAL, March 1

Thoubal Multipurpose Project (Mapithel Dam) Downstream Affected Area Committee ten, zan in Chief Minister kiang ah, memorandum khat pelut ua, tua ah, Mapithel Dam bawlna toh kisai a assessment tuamtuam leh a suk khak ding mite hintheihna ding toh kisai sukfel ahihma, hiai dam bawl khawlsan ding in ngen uhi. Hichibang a dam in a sukkhak dingte khualna omlou a nasep teitei ahihleh, Committee in ‘democratic’ tak a gam humbitna ding leh hin theihna dia panla ding uh hidan in leng memorandum ah taklang uhi.



State Level Tribals Consultation on Land, Forest & Natural Resources

IMPHAL, March 1

All Tribal Lawyers Association, Manipur leh Naga Peoples’ Movement for Human Rights kithuah in, February 28 & 29, 2008 sung Tribal Research Institute, Adimjati, Chingmeirong ah 2 Days State Level Tribals Consultation on Land, Forests and Natural Resources kichi neih in om hi.

Hiai hun ah, Manipur a Tribal Apex Bodies leh Tribal Student Bodies tuamtuam 20 ban ah, Social Activist, Scholar leh mimal tuamtuam kihel uhi. Hiai consultation a paikhom te’n thupukna tuamtuam leng bawl uhi. Hiai hun a thupukna a bawlte uh bel, Manipur leh India a singtangmite a dia hoihlou ahihziakin, Supreme Court Interim Order, 1996 kheng lamdang dia phut ding, Joint Forest Management Programme zukkik ding ban ah, Forest Department in constitution toh kituaklou nasep a neihte a tawpsan ding chih leh Hill Areas Committee leh Legislatures te’n Manipur a singtangmi te’n gam leh gammang toh kisai a ‘right’ a neihte uh humbitna dia pan a lak ding uh chihte ban ah, ‘right’ kepbitna dia Central Act tungtawn a panlak touh ding chih ahi.



Meghalaya ah vote campaign hun khak hita

SHILLONG, March 1 NNN

8th Meghalaya State Legislative Assembly election Seppatni March 3 a om ding toh kisai in Kiginni nitaklam dak 4 in campaign hun khak in omta a, Assembly Constituency 60 a Polling Station 1582 a polling personnel dingte nitaklam a kuankhe panta uh hidan in thusuak in taklang hi.

Electoral Roll kibawlthak dungzui in Meghalaya ah voter lakh 12.30 om a, tutung assembly election ah political party 10 apat candidate 258 leh independent candidate 73 te’n assembly seat 60 kituh ding uhi. Meghalaya a polling station 1582 lak ah polling station 635 ‘hyper-sensitive’ leh polling station 194 ‘sensitive’ hidan a chiamteh in om hi. State a ana omsa state police force leh CRPF personnel-te banah CRPF leh BSF company 40 sawlbeh in om ua, election a buaina bangmah a omlouhna ding in Meghalaya a district 7-te a hawmzak a omta uh ahihdan thusuak in taklang hi.

Tuabangkal ah, BSF te’n Sintawpni in Bangladesh-te mi 7 ana mankhia ua, Khais kichite ngen ahihban uah, Meghalaya Assembly election a mi taang a vote khe dia hong kuan uh hidan a kipuang uh hi’n BSF te’n gen uhi. March 3 a election neih ahih zoh chiang in March 7 in vote sim kipan ding a March 10 in 8th Meghalaya Legislative Assembly dinkhiak in om ding hi.



ANSAM leh ZSUM in mohpaih

IMPHAL, March 1 NNN

Thoubal district sung a Lilong a Chingkham Kabui khua a thau tawi pawl khat in February 24 leh 27 zan a thau nasatak a a kapna uh toh kisai Zeliangrong Students Union, Manipur (ZSUM) leh All Naga Students Association, Manipur (ANSAM) in naktak a mohpaih uh hidan in thusuak in taklang hi.

Chingkham Kabui khua a February 24 leh 27 a thiltung toh kisai ANSAM in thusuah a bawlna ah, hichibang a numei-naupang leh minautang patausak thei banah kitheihsiamlouhna piangsak thei thil chiing nawnlou ding a thau tawi pawlte kiang a ngetna bawl uh hidan in thusuak in taklang hi.

ANSAM ngaihdan toh kizul in, Zeliangrong Students Union, Manipur (ZSUM) in leng hiai thiltung pen, khatvei kia hilou a nihvei ahihziak a ngaikhawk mahmah ahihdan un taklang kawm in, thau tawi pawlte thawmging husa ziak a khomipi pataute a thuakpih dan uh thusuah bawl uhi. Huai banah, ZSUM in thau tawi pawlte kiang ah, a thilhih ziak ua thilpiang hoihlou om thei ahihna ah, mipite zaidohna chianlou dia ngetna bawl uh hidan in thusuak in taklang hi.



Sonia Gandhi in Dimapur ah campaign nei

DIMAPUR, March 1 NNN

Hiamgamna in bangtanmah hon tunlou ding ahihdan leh khekhap tamna lam zui dia Naga tuailaite chial kawm in All India Congress Committee (AICC) President, Sonia Gandhi in India’ Constitution nuai a Naga political problem sukfel theih ding ahihdan kawkna kawm in buaina leh haksatna neite khempeuh a dia India’ constitution in panpihtheihna lampi nei ahihdan gen hi’n thusuak in taklang hi.

March 5 a 11th Nagaland State Legislative Assembly Election a dia Nagaland Congress party a dia campaign AICC President leh UPA Chairperson Mrs. Sonia Gandhi in Dimapur District Sports Complex ground a mipi 10,000 valte mai a a genna ah, Congress party in India’ zalenna sualkhia ahihdan leh Nagate a dia State ana bawl ahihdan gen kawm in Congress party kia in Nagaland a lemna leh muanna taktak, mipi toh semkhawm a tunthei ahihdan gen hi’n thusuak in taklang hi.

Sonia Gandhi in a thugenna ah, Nagaland a vai ana hawm Democratic Alliance of Nagaland (DAN) Government in golhgukna, hiamgamna leh Dan omlou mahbang a gamtatna pungsak uh hi’n leh Congress makaih UPA sorkar in Nagaland mipite a dia fund tamtak a thonte DAN Government in zang thelthang hidan a ngoh in mipite’n ah DAN leader-te kiang a kum paisa sung a fund-te kizatna kanchian dia mipi chou hidan in thusuak in taklang hi.



Pettigrew College tungtang ah ACTSOM in govt. vau

IMPHAL, March 1 NNN

Ukhrul a Pettigrew College, thubuai toh kisai govt. in a ngaihsak louh nna asak thu leh a kisaipih department ahih kei leh state govt. in dakkal 48 sung a saifel kei leh kiphinna sousang tak pan ding ahih dan leh university reservation policy toh kisai a Manipur University Tribals Students’ Union (MUTSU) leh All Tribal Students Union, Manipur (ATSUM) kiptak a agup thu chiam ahih dan All Colleges Tribal Students’ Organisation (ACTSOM) in Kiginni in state govt. za sak hi’n thusuak in taklang hi.

Pettigrew College te ‘n ahih theih tawpkhawk uh hunger strike aneih pen uh a theih in ACTSOM in pona lua a, reservation policy tungtang a MUTSU leh ATSUM in kiphinna aneih bangbang uh gum dia mansa a om ahih dan uh leng ACTSOM in puang hi’n thusuak in taklang hi.


College infrastructure puahhoih ding leh teacher post awng omte huk dim ding deihna in Pettigrew College a student te’n hunger strike nei lellel uhi.



Crorepati-te’ gou kipatna suikhe ding in ngen

SHILLONG, March 1 NNN

Meghalaya a minister-te leh MLA-te’ gou neih zah kanchian political party om naikei mahleh, Meghalaya minister-te leh MLA-te bangzah hiam crore-pati ahih thu uh puankhiak ahih ziak in agou uh hong kipatna suikhiakna nei ding in BJP in demand bawl hi. Hiai thu toh kisai Bihar deputy Chief Minister Sushil Modi in Kiginni a Shillong a agen dan in mineral a hausa Meghalaya-a mihing 70% vel bang under poverty line a aom lai un bang chi dan in politician-te’n a crore-a sim gou nei thei ding uh hiam chi’n gen a, hiai toh kisai central agency-te’n suikhiakna aneih uh a deih thu leng Modi in gen hi. Hiai crore-pati te atam zaw Congress apan hi ua, Meghalaya ah nekgukna om chih za mah leh hichi tuk a om dinga bel gingta lou ahih dan agen ban ah, nekgukna kipatna congress-te ahih dan uh gen in congress-te amohsak thu gen hi’n thusuak in taklang hi.

State a constituency omte’ electorate zah a kibat louh dan, khenkhat ah 30, 000 om a, khenkhat ah 8000 aom thu a genna ah kum khat a MLA-te’ dia Rs. Crore khat kipia azat ding dan uh a ngaihtuah chiang a alung zing ahih dan agen kawm in amah state a constituency khat in voter lakh nih leh kim sang a tawmzaw nei lou a, crore khat pen khantouhna nna sepna dia hoihtak a kizang thei ahih dan leh state a tuantual ziak fund hoihzat louh ziak hi ut zaw ahih dan leng Modi in gen hi.

Congress amohsakthu agen zelna ah Assam a Congress makaih govt. toh ULFA kithuah a Hindi pau zangte target uh ahih dan gen in, ULFA-te’ panpihna a congress govt telching a aom ziak a buaina bawl ULFA-te’tung a govt gamtang ngamlou uh ahih dan a gen ban ah, Hindi pau zangte humbitna ding a central leh state govt. in pan la taktak lou uh ahihdan leng Modi in gen hi.

Tuabang mah in Maharashta a NCP-Congress makaih in panchayat election lai a Udhav Thackeray leh Raj Thackeray toh kizopna aneih ziak ua, tu ma a buaina abawl ua leng govt. gamtang ngamlou ahih dan leng Bihar deputy CM in gen hi’n thusuak in taklang hi.



Meghalaya Cong MLA in Pastor ngeibet

TURA, March 1

Kharkutta a Pastor khat Sintawpni a a ngeibet ziak in sitting MLA leh Kharkutta constituency a Congress candidate ED Marak police te’n kembit ua, case chiamteh khum ding ua lamet hidan in thusuak in taklang hi.

Thusuak in a taklatdan in, election campaign a thugenna a neih zoh phet in Marak in hiai pastorpa tuak a, pastorpa’n leng Marak kiang ah apaisa kum 5 sung a a constituency khantouhna dia bang nna semkhia hiam chih thei ut in dotna bawl a, pastorpa’ dotna pen Marak in a hiloulam a la in pastorpa ana ngeibet hi.

Hiai thiltung a mit mahmah ua ana mu, public meeting a telte, amei-apa thangpai zak ua, himahleh, a kikhelma in meeting neihna mun apat Marak kihemkhia in Kharkutta Police Outpost ah kibu hi. Mipi thangpai 1000 valte’n hiai Congress candidate in saptuam heutu tung a khut a khak ziak a matkhiak ding leh suangkulh a khum ding phut in Kharkutta Police Outpost umkual, sousang mahmah uhi. Himahleh, police te’n kolbulhsa a Marak mipite mai a a lahkhiaktak un mipite thangpaihna dai deuh hidan in thusuak in taklang hi.

Tuabangkal ah, thiltung toh kisai enkai ding in election official-te tel in security force tamtak Kharkutta tun beh ua, district headquarter Williamnagar apat reinforcement toh Kharkutta tun beh police officer khat in a genna ah, mipi’n police kiang a hiai MLA tung a compliant a bawl uh ngai poimoh mahmah ahihdan uh leh MLA pa mankhia a case chiamteh khum ding ahihdan uh gen hi’n thusuak in taklang hi.

Hiai bang a Kharkutta’ MLA Marak gamtatna ahihleh a masapen hilou a, nikum in leng, JD Rymbai ministry nuai a Health Minister a letlai in, State Assembly sung a a file-te a Personal Security Officer (PSO) in a puaklutsak utlouh ziak in ana ngeibet ngeita hi. Huai thiltung leng Police Department in ngaikhawk mahmah ua, Marak a dia security a piak tengteng uh lakkhiaksak ngal ua, PSO kiang a ngaihdam a nget dungzui a sukfel a om hidan in thusuak in taklang hi.



Tribal Research Institute Imphal in Scheme khat bawl sawm

Lamka, Mar. 1: Ministry of Tribal Affairs Government of India in 11th plan ah kum 2008-09 apan “National Tribal Award” kichi scheme khat bawlkhiak sawm a, hiai award-te ahih leh category thum a gen hi ding hi. Award thumte’lak a khat ahih leh, ‘Best Janjatiya Award’ hi a, hiai pen Sports, Education, Culture, Science & Technology, Entrepreneurship, Biodiversity, Conservation leh field tuamtuam te apan ST numei khat leh ST pasal khat tuak piak hi ding ua, hiai award in toh Rs. 2 lakhs, citation leh trophy kithuah ding hi. Anihna ah, ST-te’ lak a nasem mimal, organization-te, NGO-te, Voluntary Organization leh Community based groups te’ kiang ah National Award for Exemplary Community Service piak hi ding a, hiai award, Rs. 3 lakhs, citation leh trophy toh kithuah ding hi. Athumna ahih leh, National Award for best performing Integrated Tribal Development Project (ITDP)/ Integrated Tribal Development Agency (ITDA) hi a, hiai award toh, Rs. 5 lakh, citation leh trophy khat kithuah ding hi.

Lunglutna neite’n July 31st, 2008 ni ahih kei leh ama a Dr. H. Kamkhenthang Director, Tribal Research Institute Imphal kiang a apply ngai ding a, thuchian kimzaw thei nuamte’n leng amah office mah a muh theih ding ahih dan Dr. H. Kamkhenthang Director, Tribal Research Institute, in gen hi.



lamkapost@yahoo.comThis e-mail address is being protected from spam bots, you need JavaScript enabled to view it


www.zogam.com

No comments:

Post a Comment