HPC in Lalkham Ngaite toh kisai thusuah bawl
Lamka, March-7: Hmar People Convention (D) in thusuah a bawl tuni a press a kimu in a taklat dan in Mr. Lalkhkam Ngaite @ LK of Rengkai hun hunsawttak HPC (D) ah gin-omtak in gam-lel-nam a dingin Public Relation Department nuai ah sem mahleh, amah kingetna dungzui in ahihna apan khahkol ahihtak dan taklang hi.
Thusuakin a taklatna ah, HPC D toh kizopna bangmah nei nawnlou ahi chih mimal leh pawl tuamtuamte’n theilou a, a tung a haksatna banghiam a tunkhak ding launa a hiai theihsakna suahkhiak a om hi’n leng thusuak in taklang kawm in, kua man HPC toh kisai a haksatna bawl saklou ding inleng taklang hi.
Step ah kipuk in liam
Lamka, March-: Young Learner School a kai Class-II sinlel Thangsianlun (7) s/o Khamsuanpau of Zomi Colony tuni sun dak 1:00 vel a School recess laitak in Step ah kipuk in a biang veilam pang tat kha in bawk a, Dist. Hospital puak tung ahihnung in Imphal a investigation bawl ding in Doctor in refer a, tuni tak lam dak 4:00 in Imphal ah paw suk uhi.
Bank a ding sum hong tung
Lamka, March-7: Tuni sun dak 1:00 vel in Imphal apan in Security ven bitna nuai ah UBI/CCpur a ding sum hong koih uhi. Sum hong tun toh kiton in SBI/CCpur branch a NREGS a sum la khe ding ten leng la thei pahta ding uhi.
DC Office ah meeting 3 kizom
Lamka, March-7: District Level Co-ordination Committee(DLCC) meeting tuni sun dak 12:00 in DC/Churachandpur Conference Hall ah om hi. Huai ah Dist. Level Officer tamtak leh SDO/BDO te tel ua, Churachandpur District a NREGS nasepna toh kisai in mipin hamphatpih uh hiam chih kikum uhi. Tutung DLCC meeting ah DLO tel tamna pen hilai ding in gen uh.
Hiai zoh in DC makaih in SDO/BDO teng toh development tung tang gen khawm ua, tua zoh in District Level Security Co-ordination meeting nei zui ngal uhi. Hiai hun ah ARMY, BSF leh Ist. IRB CO te tel ban uah SDPO/Churandpur leng tel a, Lamka khopi sung a dan leh thupiak dinmun toh kisai a Security in panlak ding dan gen uhi.
Dr. T. Nengkhanmang in Vellore zuan
Lamka, March-7: Dr. T. Nengkhanmang, Medical Officer, District Hospital a sem in Quality Diabetes care toh kisai ni 10 CMC Vellore Hospital ah training ding in tuni’n Lamka apan zin khia hi. Amah March 8, 2008 in training pan ding a, March 17, 2008 in zou ding hi.
Life Word Seminar om ding
Lamka, March-7: Korea Life Word Seminar saina in March 25-30, 2008 sung Bungmual EBCC biak inn ah 8th Life Word Seminar neih sawm uhi. Hiai hun ah Korea apan sinsaktu ding tamtak hong pai ding uhi.
Kipahpihna ankuang lui sawm
Lamka, March-7: Tuibuang District Hq Jail sak a N. Molhoih Hausa (Chief) Solet Lhungdim inn sung mite leh Khawsung mite kithuah in Hausapa kiang ah kipahna ankuang programme thupitak zingchiang March 8, 2008 zinglam dak 10:30 apan neih sawm uhi. Hiai hun ah Sialtal-1, Bong 3 leh Vok 1 gou in mipin ankuang um khawm ding uhi.
Document piak lut ngai
Lamka, March-7: National Foundation for Communal Harmony (NFCH) nuai a naupang tagah panpihna sum mute’n document tuamtuam Income Certificate, Progress report 2006 leh Reading Certificate -2007 a te a kinlam a DC/Churachandpur office ah piak lut ngai a, document pelouten sum muthei lou ding uhi.
Dept. 30 val pay bill passed
Lamka, Feb-7: Dist Treasury Office in March 3, 2008 apan tuni tan in Govt dept tuamtuam 30 val Feb.2008 pay bill passed in advised bank ah thon ua, kha loh la leng hunkhop omta uhi.
Chief Executirve Officer in CDCTA phiat
Lamka, March-7: Autonomous District Council Churachandpur (ADCC) nuai a Churachandpur District Council Teachers’ Association (CDCTA) June 2004 a kitelna om a, huai vaipawte hun June 30, 2007 a bei nung kha 6 sung behlap in om mahleh election neih ahih tuanlouh ziakin Chief Executive Officer(CEO)/ADCC in March 6, 2008 in Association subei (dissolve) hi.
CEO in a suk bei sung in Paokhothang, AI of School, H.Thangkhankham, AI of School leh Limkholet, Headmaster ten a kin theilam a Teacher Community deihna bang a CDCTA Election sai ding in sep hi.
CD hongkhe ding
Lamka, March-7: Baptist Youth Fellowship, Zion, New Lamka in CD a bawl thak uh ‘Hon Domsang in’ chih, hong tung ding Nipini March 9, 2008 sunnung dak 1 in Zion Biakinn ah Rev. L. Kham Kho Lun, General Secretary, EBC in hongkhe ding hi.
Assembly news
## W. Morung Makunga MLA dotna FCS Minister Y. Erabot in adawnna ah, Indo-Myanmar Border Trade Agreement toh kisai a, Govt. of India leh Myanmar authority in Moreh tungtawn a kisumdon tuah theihna item 22 nei ahihdan gen hi.
Minister in item 22 te hiai bangin taklang hi. Mustard/Rape seed, Pulses and Beans, Fresh vegetables, Fruits, Garlic, Onion, Chillies, Spices (excluding Nut Meg, Mace, Cloves, Cassia & Cinnamon), Bamboo, Tobacco, Minor Forest Products (excluding Teak), Betel Nuts and Leaves, Food items for local consumption, Tomato, Roasted sunflower Seeds, Reed Broom, Sesame, Resin, Coriander Seeds, Soyabean, Katha leh Ginger ahi.
## N. Mangi MLA dotna IFCD Minister N. Biren in adawnna ah, govt. in downsizing a bawl nunga IFC Department a Assistant Engineer sanctioned post 60 om ahihdan a gen toh kiton tua zah geih mah AE omlel hi’n gen hi. Aban agenna ah, tulel a regular AE 45 leh Incharge AE 28 om hidan inleng minister in gen hi.
## T. Hangkhanpao MLA dotna Works Minister K. Ranjit in adawnna ah, Churachandpur district sung Singhat leh Behiang kikal a lampi leh leite periodical a improvement bawl hizel dan in gen hi. Hiai kal a lampi leh lei puahna toh kisai funding 2004-05 in maintenance 7 leh ACA/SPA 1 om a, 2005-06 in Maintenance 8 leh 2006-07 in Maintenance 1 leh ACA/SPA 1 om hidan in minister in gen hi.
## Dr. U. Deben MLA dotna Higher Education Minister L. Jeyantakumar in adawnna ah, Manipur a govt. Aided College 7 om te ah, govt. approved teacher 118 om hidan in gen hi. Aban agenna ah, Aided college min leh govt. approved teacher omzah leh omdan bel, Biramangol College, Swombung ah 26, Liberal College, Luwangsangbam ah 15, Standard College, Kongba ah 11, Thambal Marik College, Oinam ah 13, Mayai Lampi College, Yumnam Huidrom ah 16, Kakching Khunou College, Kakching Khunou ah 21 leh Jiri College, Jiribam ah approved teacher 16 om uh chih ahi. Himahleh, hichibang Aided College a govt. approved teacher te bel, pension hamphatna piak hilou dan un leng Higher Education minister in gen hi.
## K. Raina MLA dotna Education Minister L.Jeyantakumar in adawnna ah, Maram A/C sunga Aided leh Junior High School te a naupang leh sinsaktu omdan hichibang in taklang hi. Maram Aided High School ah student 56 leh teacher 3, Gelnel High School ah student 344 leh teacher 7, T.Waichong Junior High School ah student 481 leh teacher 13 leh Chalwa Junior High School ah student 238 leh teacher 7 chih ahi.
Minister in aban agenna ah, Maram Aided H/S, T.Waichong Jr. H/S leh Chalwa Jr. H/S chihte govt. in tulel a High School full fledged dia upgrade ding chihna omlou hidan inleng gen hi.
## S. Joy MLA dotna IFCD Minister N. Biren in adawnna ah, Wangoi A/C sung a Imphal river luipang dalna ding toh kisai luipang niamna munte lei hih sang ding ngaihtuah ahihdan gen hi. Hiai nasepna 2008-09 a State Flood Control (Plan) Fund nuai a 2008 tuk vuahzuk mangei a sepsuah hiding inleng Minister in gen hi.
## Tuni a Demand for Grants, 2008-09 dia a passed te uh bel,
Education -Rs. 405,76,56,000,
Panchayat -Rs. 35,77,43,000,
Art & Culture -Rs. 18,00,19,000 leh
Tourism -Rs. 3,54,02,000
Hiaite bel March 31, 2009 a zat theih ding ahi.
## Manipur Chief Minister O. Ibobi Singh in tuni’n Inpi ah ‘Manipur Ceiling on Government Guarantee (Amendment) Bill, 2008 pulakna leng nei hi.
Mi nih kaplum
IMPHAL MAR 7: Police apat thutut kingah dan in tuni sunnung dak 2.30 vel dingin, Thoubal Police Commando ten helpawl hidia muanmon nih Kongzom Patpan mun ah kaplum uhi. Police te gendan in kaplup a omte apat 9mm pistol khat leh atang nih leng musuah ua, siluang nihte meltheih dingin RIMS morgue a koih in om uhi.
MU gamkek ding deihlou in dharna
IMPHAL MAR 7: Manipur University, Central University dinmun a dopkang ahihtoh kiton a, gam 120 acres lakbeh ding chih thu a, Phumlou Konjin Loukol leh Heibokching chihna mun lou bawlna lak hek ding phallou in, Phumlou Konjin Loukol leh Heibokching Land Protection Committee in, tuni’n leng Manipur University Main gate kiang ah peaceful protest Dharna nei nawn uhi. Hiai pawl in apaisa March 5, 2008 inleng MU main gate tanpha khaksak in protest dharna nei ngeita uhi.
MU in gam a lak hek ding phalloute gendan in, Manipur govt. in gam neitute dot masak omlou a gam laksak a sawm pen naktak a mohpaih ahihdan uh leh, hichibang lou neihna mun laksak sawm ahihna naktak a dal ding ahihdan uh leh, tua adinga pawl tuamtuam NGOs, Clubs leh Organisation ten leng kithuahpihna pedingin ngen uhi.
BYF Imphal in CD Album bawl ding
IMPHAL MAR 7: Baptist Youth Fellowship, EBC Imphal Division in amasapen dingin, tukha sungin CD Album khat bawlkhiak sawm ua, tua dingin BYF Imphal Division sunga lasiam tuamtuam 9 vel telkhiak in om uhi. Hongtung ding March 9, 2008 in National Games Village a Musician Gouhau studio ah Final rehearsal neih sawm uh hidan in leng thutut kingah hi.
Manipur govt. nuai ah semtu 62111 om
IMPHAL MAR 7: Manipur govt. nuai a department tuamtuam 97 adin sanctioned post 69937 om mahleh, tu lel in semtu 62111 om hidan in official thusuak om hi.
Thusuak dan in, Education (S) department a sanctioned post 12910 himahleh, semtu 12519 om a, semtu tam napen suak hi. Semtu tawmna pen Institute Finance Cell ah sanctioned post 9 lak ah semtu 5 om lel hi.
Department tuamtuam in MGEL bawlna dia Finance (Budget Section) a data apiak dungzui un, PSUs tuamtuam 13 a semtu 510 te kum khat loh khiak ding Rs 668.73 lakhs tungpha hi. Tua toh kiton in department tuamtuam 24 a Adhoc semtu 369 te kumkhat loh Rs 247.61 lakhs, department tuamtuam 15 a Casual semtu 830 te kum khat loh Rs 189.64 lakhs, Deptt. 7 a Work-charged semtu 2376 te kumkhat loh Rs 193.68 lakhs, Deptt. 12 a Muster Roll semtu 4913 te kumkhat loh Rs 819.49 lakhs, Deptt. 4 Grants-in-aid a semtu 4073 te kumkhat loh Rs 66.80 lakhs leh Adult Education leh Fisheries a Officiating semtu 184 te kumkhat loh Rs 69.12 lakh hidan in leng official thusuak in taklang hi. Home Guard te leng Muster Roll nuai a telsak in om uhi.
HSLC exam 3 nohkhiak in om
Imphal, March 7: Board of Secondary School Education, Manipur nuai a HSLC exam pailel ah tuni’n Lilong B centre a exam Roll No. 5943, Mayang Imphal centre apan Roll No. 7582 leh Noney centre apan Roll No. 13392 te chindan kilawmlou a hih ziakun nohkhiak in om uhi.
Fair Job om ding
Imphal, March 7: Ministry of Development of North Eastern Region (DoNER) etkaina nuai ah NASSCOM saina in hong tung ding March 13, 2008, zinglam dak 9 apan nitak dak 7 tan GP Women’s College, Imphal ah Manipur apan NAC candidate te a ding in Job Fair om ding hi.
Hiai hun ah Manipur apan NAC candidates tengteng telkim ngai ding a, tua ah HSLC apan a tunglam orginal certificate, NAC score card tawi ngai ding a, hiai neiloute a mun ah piak hiding uhi. Thuchian kimzaw theinuamte’n www.nac.nasscom.in ah et theih ding hi.
Sharmila in kiphinna sunzom
IMPHAL, March 7 NNN
Judicial custody apat Sintawpni in Imphal ah Irom Sharmila Chanu khahkhia himahleh, aman Imphal East a Kongpal Kongkham Leikai a a innsung sik utlou in, home guard personnel-te leh jailour in escort mahle uh, lam kiang a bawkta khat a a kiphinna a sutzom hi.
Indian Penal Code (IPC) section 309 pansan a March 7, 2007 apat judicial custody a koih a ana om nung in Sintawpni in Imphal a Additional Chief Judicial Magistrate (CJM), RK Memcha Devi in Irom Sharmila Chanu khahkhia hi. Manipur a kizang Armed Forces Special Powers Act (AFSPA), 1958 lakkhiakna dia sih tanpha a ann-ngawl dia November 2000 apat kiphin Irom Sharmila Chanu Sintawpni a Additional CJM in a khahkhiak toh kiton in aman lupna ngak a a omna Jawaharlal Nehru Hospital nusia hi.
Sharmila kiphinna toh kisai Sintawpni in Manipur Assembly Budget session ah MPP MLA RK Anand in zero hour sung in pawlut a, Sharmila in ana tangkoupih AFSPA ziak a mipi haksatna leh thuaknate mipi’ palaite’n mangngilhlouh ua, a daih dide louh ding uh ahihdan gen hi. Sharmila in mipi thuaknate a tangkoupihna ziak in Korea apat pahtawina Gwangzu Award ana sangta a, kum 7 bang kuhkaltak a kiphinna dan a ann a ngawl ziak in ‘iron lady of Manipur’ chih min piak in om hial hi.
Lam kiang a bawkta a kiphinna a sutzopna mun a Sharmila in thuthaksaite kiang a a genna ah, hospital a amah etkolna ziak a state govt. in overdraft neihloh hidan a thuthang a zak pen kingaihsiatpih mahmah ahihdan gen kawm in, awl-awl a thah a a om (govt. in) sang a a nu’ aanglum a lungmuangtak a sih ut ahihdan gen hi. Huai banah, Sharmila in a genzelna ah, aman mipite a dia theihtawp a suah lai a mipi’n amah nusia uh hi a thei ahihdan khase tak in gen hi.
Congress in Mehgalaya ah seat 59 lak ah 25 ngah
SHILLONG, March 7 NNN
Meghalaya Legislative Assembly election March ni 3 a neih a ompen Sintawpni in vote simzoh hita a, constituency 59 simkhit ahihna lak ah Congress in seat 25 ngah hi. Congress in a hihhoih mahmah ziak ahihleh lamet bangloutak a National Congress Party (NCP) leh United Democratic Party (UDP) in a hihhoihlouh luat ziak uh hidan in thusuak in taklang hi.
Amau bial deuh a a neih uh Garo Hills ah NCP in hihhoihlou mahmah in seat 12 chauh ngah ua, Khasi Jaintia Hills a seat 2 a ngah uh toh kigawm in a vek in seat 14 ngah in Congress zom a hatpen hihna la uhi. A thumna ding in seat 11 ngah UDP pang a, Hill State People Democratic Party (HSPDP) in seat 2 ngah hi. Khun Hynniewtrep National Awakening Movement (KHNAM) leh BJP in seat khat tuak ngah ua, huai banah, independent candidate 5 leng ching uh hidan in thusuak in taklang hi.
Apaisa election 3 a UDP’ hatna gige Jaintia Hills ah Congress in hihhoih mahmah a, seat 7 lak ah seat 6 ngah ua, a omlai sunsun leng NCP in a tan ziak in a hatna gige uah UDP in seat khat lel leng tanglou uhi. Jaintia Hills ah Congress in hihhoih mahmah in UDP nil sak hial mahleh, Ri Bhoi district a seat 4 om lak ah UDP in seat 3 ngah a, a omlai khat, Nongpoh constituency pen Congress Chief Minister in vote 720 ziak lel in ngah hi.
East leh West Khasi Hills district apat Congress in seat 11 ngah a, UDP in 7, HSPDP leh NCP in nih tuak, KHNAM leh BJP in khat tuak, banah, independent candidate 2 ching uhi. State pumpi dan a et in vote kiakdan kikhenzak mahmah a, Congress, NCP leh UDP chihlouh, party neunounoute’n bel Innpi ah palai bangmah zah sawl zoulou uhi.
Tutung Meghalaya election ah sitting MLA 35 chingzou nawnlou ua, huaite lak ah Chief Minister lui Dr. F.A. Khonglam (HSPDP) tel a, a thumna in leng pang zoulou hi. Huai banah, opposition leader Admiral Sangma, Tourism Minister Deborah Marak (Cong), PWD Minister Zenith Sangma (Cong), Agriculture Minister Manirul Islam Sarkar (Cong), Martle Mukhim (MDP), UDP ticket a thumvei ana ching Bires Nongsiej leh Deputy Speaker P.W. Muktieh (Cong) leng kia uhi.
Tuabangkal ah, Meghalya Pradesh Congress Committee (MPCC) President O.L. Nongtdu in a gendan in, a paisa kum 5 sung ana semkhawm khinta ahihna uah, tua leng party neunounoute toh coalition sorkar din ding khoksalou a, himahleh, independent candidate 5-te mitsuan deuh uh hidan in thusuak in taklang hi.
UDP’ MLA 9, MDP’ MLA 4, KHNAM’ MLA 2 leh HSPDP’ MLA 2 toh Congress makaih in Meghalaya Democratic Allaince (MDA) in a paisa kum 5 sung Meghalaya ah vai ana hawm uhi.
Regional party te’n hel bawl uh hidan a gen hiau in Nongtdu in Kiginni chiang a Congress Legislature Party (CLP) in meeting a neih chiang ua thupukna lak a om ding ahihdan gen hi. Huai banah, NCP toh sepkhawm ding toh kisai ahihleh national level a gen ngai ding ahihdan leh NCP toh kisai thu himhim MPCC’ thunuai a omlou ahihdan Nongtdu in gen hi.
Luxury bus 9 mei in kang
Guwahati, Mar 7 NNN
Ulubari, Guwahati a ASTC te’ compound sung a kikoih Guwahati pansan Prerona distance luxury bus-te bus 9 Sintawpni zinkal baihtak in mei a hal in om a, Prerona office-bearer te’n migiloulawi khat thilhih hi ding in gingta mahle uh, police te’n bel suikhiakna nasep pan nailou uh hi’n thusuak in taklang hi.
Mit a mute’ gendan in zinglam dak 2 vel ding in, mei kang bus khat a kipan muh ahihphet a fire dept.-te ahilh uh leh , dakkal 1 zohnung in tungpan ua, zingkal dak 4 vel in phelhmit pan uh hi dan in gen uhi. Bus-te’ nuai a thautui dan pian muh hi a, migilou thilhih ahih kei leh accident leng hithei ahihziak in bangmah genchian theih omnailou ahihdan Additional Superintendent of Police (City) in hi. Himahleh, huai kiim-le-kiang a electric transformer a omlouh ban a, halogen light-te a main switch apat kilakhia ahihman in mii hallouh a bus-te kuanglou ding ahihdan Prerora Manager, Latu Hazarika in gen hi’n thusuak in taklang hi.
Prerona Travels nuaia ah, luxury travels 92 om a, hiai teng lak a, 70-te Ashok Leylands company toh akilei khit uh, hilele aman akipiakkhit nailouh ziakua, Prerona in kha khat a bus khat zel a, Rs. 70, 000 a piakzel ding chih ahih banah, December kha apat state sung ah Prerona bus-te 53 bang zatlouh in om a, installment piaklouh ziak a tua bus kihalte’lak a 4 te Ashok Leyland in a lakkik dek hizomah lai hi’n thusuak in taklang hi.
Siamsinna toh kisai Innpi ah
IMPHAL, March 7 NNN
College 25 a lecturer leh principal 45 lakna ding toh kisai state Education Department in Manipur Public Services Commission (MPSC) khut a koihta ahihdan Manipur Education Minister L. Jayentakumar in Sintawpni in Innpi zasak hi.
Budget Session pailel a cut motion a hilhchetna ah, Education Minister in college teacher-te a dia age relaxation thu pen June kha a Cabinet meeting om chiang a genkhawm hiding ahihdan leh primary teacher lakna ding toh kisai teng Budget session zoh chiang a hihfel ding ahihdan gen hi. Jayentakumar in a genna ah, Deputy Inspector of School-te promotion ding leng daltu tamtak lak a DPC neihna dia department in theihtawp suah a, zoh hidekta ahihdan gen hi. Graduate teacher te’n loh thu a buaina a neih uh leng ngaihtuah pah a om ding ahihdan leh secondary school teacher 352-te loh toh kisai a thu court a kibanglai ahihdan gen hi.
Student-te lunglutna lungsim a ngaihtuah kawm a singtang bial a education system upgrade-na dia, policy thak guangtu ding expert committee bawlkhiak ding thu Jayentakumar in gen hi. Huai banah, Budget session a bei chiang a student-te haksatna leh lungkimlouhna enkhe dia amah mahmah Ukhrul a Pettigrew College hoh ding ahihdan Jayentakumar in gen hi.
Singtangmi MLA-te’n singtang leh phaizang a budget kibanglou hidan a dotna Education Minister in a hilhchetna ah, sum a lakh a sim govt. apat grant dan a hill district a private college-te kiang a kum teng a piak a om gige ahihdan gen hi. Hill district a college-te a siamsinna sangzaw koihna dia department in pan lak sawm ahihdan leng Jayentakumar in gen hi.
Manipur University (MU) kekletna leh National Institute of Technology (NIT) bawlna ding toh kisai a singtangmite deidanna bangmah omlou ahihdan Jayentakumar in a genna ah, MU pen Central University dinmun piak ahihtoh kiton a, a mel a puam bang leng Central University dangte toh kikim ahih poimoh ahihdan leh khangsawnte a dia gou dan a ngaihtuah ding ahihdan gen hi.
EDITORIAL
Tuni Thupi: ….ahihhangin, i Pathian in hamsia vualjawlna a suaksak hi. Nehemia 13:2
Mautaam kial apat sinlai
Pathian a kipat vualzawlna i chih a zangsiamte a di’n genvuallouh in hoih a, himahleh, a zangsiamloute a di’n bel hamsiatna toh kibang hi. Huai mah bang in, thilsia, haksatna leh vangtahna i chihte leng a thuaktute a pilsiam ua leh vualzawlna naak suakthei hi.
Sawt nailou chik a khovel khangthu i et a leh leng haksatna leh vangtahna kichite vualzawlna mah ana batna muhtheih in om hi. Kidoupi Nihna pen neih-le-lam tamtak gentaklouh, mihing hinna manphatak, a million a simte manthatna ahi. Himahleh, a lehlam a a zangsiamte’n bel dinkhiakna in neihloh uhi. USA in leng hiai galpi apat ana dinkhiak loh a, Kidoupi Nihna ana omlou hileh tua tuk a USA hat ding in gintakhuailou hi. USA in Hiroshima leh Nagasaki a Atom Bomb a khiak pen thil mulkimhuaitak, neih-le-lam tamtak gentaklouh, mihing hinna manphatak manthatna ahihbanah, Japan in a vuallelh lohna ahi. Himahleh, hiai vangtahna Japan in a zatsiam man in tu’n a economy uh hoih mahmah a, khovel a economy hoihpen, super power USA zom in a nihna in pang hi.
A sawt nailou zaw sem leh a nai zaw sem Lushai Hills, Assam a thiltung enta leng, eimite mahmah inleng i thuakkhak uh, 1959 vel a Mautaam kialpi a tun ziak in mipi’n nek ding ana neilou ua, kial panpihna di’n Mizo famine relief pawl kibawlkhia ua, hiai haksatna a zatsiam ziak un famine relief pawl apat Mizo National Front hong piangkhia a, huai apat a gah a loh uh Mizoram i theichiat uhi.
Tulai in i gam uah Mautaam kialpi a tung a, mipi’n haksatna nasatak a tuah ziak un ZEPADA makaihna deuh in pawlpi tuamtuam in pan naktak in la uhi. Pawlpi leh mipi phatuamngaite panlakna ziak in tutung a Mautaam kial pen Pathian panpihna toh i douzou ngei ding ua, himahleh, Mautaam i chih kum 50 vel hal a thiltung ahihman in, mau a hong taam nawn chiang a tua i phutsa teng mah phutou zel ding i hi ding uam? Tutung a haksatna i tuahte vangtahhuai himahleh, ‘vangtahhuai chihlouh ngal a hih/chih ding dan omlou’ chih lungsim i neih khak ding uh lauhhuai mahmah hi. Hiai vangtahna pen vualzawlna suahsak ding dan lampi i ngaihtuah uh ngai ahi. Famine relief pawl kiphuhkhiak a ‘Mizoram’ dandeuh kapkhiak ding chihna bel hipahlou hi. Ahihleh, hiai Mautaam kial i tuah uh bangchi leh ei a dia vualzawlna hong suakthei ding hiam?
Mautaam kial ei a dia vualzawlna suahsakna ding in bangziak a hong tung a hia? chih leh bangziak a pumpelh theilou i hi ua? chih ngaihtuah masak ngai hi. I nekzonna uh, i kingakna uh singtang loubawl dan i et chiang in, a hat mahmahte’n kum 2 a khamkhop ding uh khoukhe lel ding uhi. Huai ziak in, mau a hong taam ziak a kial hong tung hizawlou in, i lungsim un maban kum 1 tan kan a muhbatlouh ziak ahi. Mautaam kial ana tuak ngeita i hihman un, buhlei bawl in bangtan mah hon tunlou ding ahihdan ana thei in, bazaar a zuaktheih ding haichi chiin nachang ana thei hileng mau a taam sung a i nek ding uh anntang leizohna ding sum, mau a taam nawnma kikal sung in ina kholkhe chiat ding uhi.
Etsakna di’n, nikum lam apat zawngtah bang leng mau toh a paidan uh kibatna nei ahi ngei ding a, a si souhsouh hi. Huai ziak in tukum in a man a tam mahmah a, zawngtah kung bang tamtak nei hileng a si veklou ding ahihna ah, sum luah a luah thoh mai ding i hi. A zuakna ding toh kisai ahihleh, eilak a i khotgaih zohkei a leh leng Meitei te’n leng hah nek mahmah ua, huai banah, Mizoram leh Nagaland leng omlai hi. Manipur, Mizoram leh Nagaland a i khot nawnlouh chiang in bel i zawngtah kung tengteng si vek leh leng kial ziak in ei kisi nawnlou ding hi. Mau a taam nawn chiang a i zawngtah kung neih tengteng a sih vek a leh leng, mautaam i chih kum 50 vel hal a tung ahihman in, huai hun sung in chu ina hausa khinvekta ding uhi.
Etsakna dia zawngtah i lak pen a hoihpen leh dikpen ahikei maithei, haichi dangdang banah ui vulh, ak vulh leh vok vulh chihte bang leng hoihzaw kha thei hi. Himahleh, buhlei bawl in bangtan mah hon tunlou ding ahi chih leh i kingakna uh khek ngai ahihdan i gen ut pen ahi. A hoihzaw ding bel mipi mah in i dapkual ua i maikhiak uh ngai ding hi. Mipi phatuamngai leh pawlpi tuamtuamte panlakna tungtawn in Pathian panpihna toh, sorkar tellou in leng hiai kial i douzou ngeingei ding uh chih hangsantak in gen ngamhuai a, himahleh, i maban taktak ding bel kuaman anntang hon pe gige zoulou ding ahihna ah ei mah in pan i lak taktak ngai ding hi. Huai ziak in, tutung a ‘vualzawlna’ i tuah uh a phatuam theipen in zang chiat ni.
Tuni Thupi: Diktatna in nam a tawisang a; himahleh khelhnami kuapeuh a ding in zahlakna ahi. Paunakte 14:34
Electric hoihna ding in i duty chiat uh semkhe ni!
North East pumpi in khanmohbawk a a neih tuinek kiningching, lamlian hoih leh electric ahi a, North East sung sapsap ahleng Manipur in hiaite neih ginatlouh ziak in haksatna tuak kholdiak hi. Electric toh kisai ahihleh tamveitak gen in ana omta a, hah gen ziak a sih ding bang hileh electric department a sem teng a hinglai om nawnlou ding un gintakhuai hi. Hah gen ziak a hoih ding hileh bel hoihta ding in gintakhuai a, himahleh a gentu a omlouh chiang a leng hoih ahih tuanlouh ziakin, lametna lianpi toh gengen phot peuhmah leng chih ut i hi.
Koi mun peuh a di’n dik thou mahleh, a diak in Churachandpur district ah electric hoih hitaleh bangchituk in i khangtou ding ua? Tuchiang in nna khat peuhpeuh electric zang a khawl toh kisemta ahihman in zan mial tanvaktu ding kia hinawnlou in a poimohna nidang toh teh in lian petmah hi. Etsakna di’n, misterite nangawn inleng khawl hah zat mahmahta ua, electric hoih hileh tua a sepkhiak zah uh leh bangzah hiam a tamzaw semkhezou ding ua, amau kia hilou in a sepnate uh leng met ding ua, a tawp in tuh khotang in khosakna hoihzaw neihloh ding hi. Sing-aatte bang leng, nileng in sing-aat thei le uh a sing neite leh amau mahmah met ding ua, a tawp in khotang in khosakna hoihzaw neihloh ding hi. Electric hoihlouh ziak in electric van zuakte’n a khot ding tuk in khonglou ua, sum kipei ding naktak in dal hi. Damdawi Inn bang leng mei ginatlouh ziakin a hoih ding tuk in hoih theilou a, kithuzakna mobile leh landline, tui kai leh a dang tamtak leng electric hoihlouh ziak in a hoih ding tuk un hoih theilou uhi. Huai mah bang in, computer leh khawl tuamtuam, electric zang a nasepna khawl khempeuh electric a hoihlouh ziak in a manphatna bang un kizang theilou hi.
Electric toh kisai i gen chiang in Manipur sorkar inleng a hihtheih tawm mahmah ahi ngei ding a, lianpi leng ngim vetlou a, ei district sung bek hoihtak a a paitheih ding dan ngaihtuah poimoh hi. Minister Pu T. Phungzathang panlakna ziak in tuma deuh in electric hong hoih deuh mahmah a, tuni chiang in a ngei a hong tun nawn ziak bang hi hiam? chih Lamka Post palai in a kanchetna ah, Churachandpur Electricity Department a Executive Engineer, Mr. Benjamin Saiate in ana hilhchian hi.
District sung a meivak kiningching omtheihna’ng a sub-station-te upgrade theihlouh ding hiam? chih dotna a dawnna ah Exe. Engineer in tulel a Khengjang Power Sub-station a 5MVA Transformer 3 omte phalna nei a electric late a dia hun mahmah ahihdan gen hi. EE in a hilhchet dan in, tulai a district in electric a ngah zah kiamtuanlou a himahleh electric zangtu a tamluat ziak a khawl in zoulou in trip (overload) pahpah hi. Singngat feeder in 300 amps tan pethei a meivak ni chiang a ON/vaksak ahihtung in 298amps tung mahleh meivak nung sawtlou in 305 amps bang tungtou in mit zel hi. Tulai a electric a ginatlouh ziak taktak EE’ gendan in bel, district pumpi sung a phalna nei a electric la 12560 chauh a omna lak a 9000-te’ kiang chauh a bat siktheih hi. District in 27 Million unit a zatbei lak ah 7 Million unit khong lel bill theih a, a dang teng phalna neiloute’n a thawn a a zatbei uh ahi. A omdan tak bel, phalna nei a electric la inn 3560-te kiang a department in bat sikna ngaihna leng theilou uhi. Permit nei mi 9000 te lak ah 50% in fee hoihtak in a pe diam? chih hisawn lai hi. Phalna neilou a electric la mi tam mahmah napi a, ei district in power supply i muh zah pung tuanlou ahihna ah, Power Minister in transformer 20 a hon piaksa banah hon piak beh lai lehleng hoih tuanlou ding a, i khawl i neihsa teng nangawn un siat beh ding hi.
Phalna neilou a electric late leh electric fee peloute’ hihna kibang geih ahi. Ei district in power supply i muh uh phalna neite a dia kiching ahihleh phalna neiloute leh bat peloute’ electric lakkhiaksak hileh bel veng mai ding hi. Himahleh, a thuak ding eimite mah i hihziak un thil uthuai leh deihhuailou ahih kia hilou in hoihpenlou hi. Huaiziak in “Diktatna in nam a tawi sang” chih kam a genthoh hinawnlou in, i niteng khosakdan ah kilangsakzaw in, mi teng in i bat hoihtak in din leng phatuam ding hi. Phalna neilou a electric late’n leng phalna neihna dia sum sun ding i ngah zohkei hial a leh leng tamloulou a piak theih dan department in bawl tham ahi. Ditattak leh hoihtak a i bat teng i piak khit nung ua leng electric a hong hoih ngal kinephuai tuanlou hi. Himahleh, huai hun chiang in bel hangsantak in ‘kaki daihkei uh, hon piak beh un’ chihtheih ding hi. Tua bel eilam leng dik khinlou i hihna uah kuamah hangsantak in pau ngamlou hi.
Himahleh, Pawl-XII leh Pawl-X te’n tulai in exam san lel ua, tu-le-tu a meivak hoih poimoh i hihna uah, EE’ gendan leh ngetna dungzui in, veng tuamtuam a heutute’n heater zat khong a kham uh phatuam mahmah ahihna ah, mipite’n meivak chilsiamtak a zang a a poimohlouhna munte mekmit zel mai leng Pawl-XII leh Pawl-X te’n exam a neih sung bek uh meivak hong hoih deuh ding hi. Siamsin naupangte i panpih chiat theihna uh ahiding a, maban a gam-le-nam’ nu-le-pate hong hiding ahihna uah poimoh ngaih chiat ni.
Electric hoihlouh ziak kuate ziak a hia chi’n ngoh ding zong le, mipite’n official i ngoh ding ua, official ten mipite fee piakhoihlou a hon ngoh nawn ding ua, a nih in a diktuaktuak mai thei. Temtatpu leh Kaikuang tangthu kigen mah bang ding hi. Kingohtuah sang in Official ten a hih ding uh hih uh henla’n, mipite’n i duty uh buching sak le hoihzaw ding hi.
lamkapost@yahoo.com
www.zogam.com
Lamka, March-7: Hmar People Convention (D) in thusuah a bawl tuni a press a kimu in a taklat dan in Mr. Lalkhkam Ngaite @ LK of Rengkai hun hunsawttak HPC (D) ah gin-omtak in gam-lel-nam a dingin Public Relation Department nuai ah sem mahleh, amah kingetna dungzui in ahihna apan khahkol ahihtak dan taklang hi.
Thusuakin a taklatna ah, HPC D toh kizopna bangmah nei nawnlou ahi chih mimal leh pawl tuamtuamte’n theilou a, a tung a haksatna banghiam a tunkhak ding launa a hiai theihsakna suahkhiak a om hi’n leng thusuak in taklang kawm in, kua man HPC toh kisai a haksatna bawl saklou ding inleng taklang hi.
Step ah kipuk in liam
Lamka, March-: Young Learner School a kai Class-II sinlel Thangsianlun (7) s/o Khamsuanpau of Zomi Colony tuni sun dak 1:00 vel a School recess laitak in Step ah kipuk in a biang veilam pang tat kha in bawk a, Dist. Hospital puak tung ahihnung in Imphal a investigation bawl ding in Doctor in refer a, tuni tak lam dak 4:00 in Imphal ah paw suk uhi.
Bank a ding sum hong tung
Lamka, March-7: Tuni sun dak 1:00 vel in Imphal apan in Security ven bitna nuai ah UBI/CCpur a ding sum hong koih uhi. Sum hong tun toh kiton in SBI/CCpur branch a NREGS a sum la khe ding ten leng la thei pahta ding uhi.
DC Office ah meeting 3 kizom
Lamka, March-7: District Level Co-ordination Committee(DLCC) meeting tuni sun dak 12:00 in DC/Churachandpur Conference Hall ah om hi. Huai ah Dist. Level Officer tamtak leh SDO/BDO te tel ua, Churachandpur District a NREGS nasepna toh kisai in mipin hamphatpih uh hiam chih kikum uhi. Tutung DLCC meeting ah DLO tel tamna pen hilai ding in gen uh.
Hiai zoh in DC makaih in SDO/BDO teng toh development tung tang gen khawm ua, tua zoh in District Level Security Co-ordination meeting nei zui ngal uhi. Hiai hun ah ARMY, BSF leh Ist. IRB CO te tel ban uah SDPO/Churandpur leng tel a, Lamka khopi sung a dan leh thupiak dinmun toh kisai a Security in panlak ding dan gen uhi.
Dr. T. Nengkhanmang in Vellore zuan
Lamka, March-7: Dr. T. Nengkhanmang, Medical Officer, District Hospital a sem in Quality Diabetes care toh kisai ni 10 CMC Vellore Hospital ah training ding in tuni’n Lamka apan zin khia hi. Amah March 8, 2008 in training pan ding a, March 17, 2008 in zou ding hi.
Life Word Seminar om ding
Lamka, March-7: Korea Life Word Seminar saina in March 25-30, 2008 sung Bungmual EBCC biak inn ah 8th Life Word Seminar neih sawm uhi. Hiai hun ah Korea apan sinsaktu ding tamtak hong pai ding uhi.
Kipahpihna ankuang lui sawm
Lamka, March-7: Tuibuang District Hq Jail sak a N. Molhoih Hausa (Chief) Solet Lhungdim inn sung mite leh Khawsung mite kithuah in Hausapa kiang ah kipahna ankuang programme thupitak zingchiang March 8, 2008 zinglam dak 10:30 apan neih sawm uhi. Hiai hun ah Sialtal-1, Bong 3 leh Vok 1 gou in mipin ankuang um khawm ding uhi.
Document piak lut ngai
Lamka, March-7: National Foundation for Communal Harmony (NFCH) nuai a naupang tagah panpihna sum mute’n document tuamtuam Income Certificate, Progress report 2006 leh Reading Certificate -2007 a te a kinlam a DC/Churachandpur office ah piak lut ngai a, document pelouten sum muthei lou ding uhi.
Dept. 30 val pay bill passed
Lamka, Feb-7: Dist Treasury Office in March 3, 2008 apan tuni tan in Govt dept tuamtuam 30 val Feb.2008 pay bill passed in advised bank ah thon ua, kha loh la leng hunkhop omta uhi.
Chief Executirve Officer in CDCTA phiat
Lamka, March-7: Autonomous District Council Churachandpur (ADCC) nuai a Churachandpur District Council Teachers’ Association (CDCTA) June 2004 a kitelna om a, huai vaipawte hun June 30, 2007 a bei nung kha 6 sung behlap in om mahleh election neih ahih tuanlouh ziakin Chief Executive Officer(CEO)/ADCC in March 6, 2008 in Association subei (dissolve) hi.
CEO in a suk bei sung in Paokhothang, AI of School, H.Thangkhankham, AI of School leh Limkholet, Headmaster ten a kin theilam a Teacher Community deihna bang a CDCTA Election sai ding in sep hi.
CD hongkhe ding
Lamka, March-7: Baptist Youth Fellowship, Zion, New Lamka in CD a bawl thak uh ‘Hon Domsang in’ chih, hong tung ding Nipini March 9, 2008 sunnung dak 1 in Zion Biakinn ah Rev. L. Kham Kho Lun, General Secretary, EBC in hongkhe ding hi.
Assembly news
## W. Morung Makunga MLA dotna FCS Minister Y. Erabot in adawnna ah, Indo-Myanmar Border Trade Agreement toh kisai a, Govt. of India leh Myanmar authority in Moreh tungtawn a kisumdon tuah theihna item 22 nei ahihdan gen hi.
Minister in item 22 te hiai bangin taklang hi. Mustard/Rape seed, Pulses and Beans, Fresh vegetables, Fruits, Garlic, Onion, Chillies, Spices (excluding Nut Meg, Mace, Cloves, Cassia & Cinnamon), Bamboo, Tobacco, Minor Forest Products (excluding Teak), Betel Nuts and Leaves, Food items for local consumption, Tomato, Roasted sunflower Seeds, Reed Broom, Sesame, Resin, Coriander Seeds, Soyabean, Katha leh Ginger ahi.
## N. Mangi MLA dotna IFCD Minister N. Biren in adawnna ah, govt. in downsizing a bawl nunga IFC Department a Assistant Engineer sanctioned post 60 om ahihdan a gen toh kiton tua zah geih mah AE omlel hi’n gen hi. Aban agenna ah, tulel a regular AE 45 leh Incharge AE 28 om hidan inleng minister in gen hi.
## T. Hangkhanpao MLA dotna Works Minister K. Ranjit in adawnna ah, Churachandpur district sung Singhat leh Behiang kikal a lampi leh leite periodical a improvement bawl hizel dan in gen hi. Hiai kal a lampi leh lei puahna toh kisai funding 2004-05 in maintenance 7 leh ACA/SPA 1 om a, 2005-06 in Maintenance 8 leh 2006-07 in Maintenance 1 leh ACA/SPA 1 om hidan in minister in gen hi.
## Dr. U. Deben MLA dotna Higher Education Minister L. Jeyantakumar in adawnna ah, Manipur a govt. Aided College 7 om te ah, govt. approved teacher 118 om hidan in gen hi. Aban agenna ah, Aided college min leh govt. approved teacher omzah leh omdan bel, Biramangol College, Swombung ah 26, Liberal College, Luwangsangbam ah 15, Standard College, Kongba ah 11, Thambal Marik College, Oinam ah 13, Mayai Lampi College, Yumnam Huidrom ah 16, Kakching Khunou College, Kakching Khunou ah 21 leh Jiri College, Jiribam ah approved teacher 16 om uh chih ahi. Himahleh, hichibang Aided College a govt. approved teacher te bel, pension hamphatna piak hilou dan un leng Higher Education minister in gen hi.
## K. Raina MLA dotna Education Minister L.Jeyantakumar in adawnna ah, Maram A/C sunga Aided leh Junior High School te a naupang leh sinsaktu omdan hichibang in taklang hi. Maram Aided High School ah student 56 leh teacher 3, Gelnel High School ah student 344 leh teacher 7, T.Waichong Junior High School ah student 481 leh teacher 13 leh Chalwa Junior High School ah student 238 leh teacher 7 chih ahi.
Minister in aban agenna ah, Maram Aided H/S, T.Waichong Jr. H/S leh Chalwa Jr. H/S chihte govt. in tulel a High School full fledged dia upgrade ding chihna omlou hidan inleng gen hi.
## S. Joy MLA dotna IFCD Minister N. Biren in adawnna ah, Wangoi A/C sung a Imphal river luipang dalna ding toh kisai luipang niamna munte lei hih sang ding ngaihtuah ahihdan gen hi. Hiai nasepna 2008-09 a State Flood Control (Plan) Fund nuai a 2008 tuk vuahzuk mangei a sepsuah hiding inleng Minister in gen hi.
## Tuni a Demand for Grants, 2008-09 dia a passed te uh bel,
Education -Rs. 405,76,56,000,
Panchayat -Rs. 35,77,43,000,
Art & Culture -Rs. 18,00,19,000 leh
Tourism -Rs. 3,54,02,000
Hiaite bel March 31, 2009 a zat theih ding ahi.
## Manipur Chief Minister O. Ibobi Singh in tuni’n Inpi ah ‘Manipur Ceiling on Government Guarantee (Amendment) Bill, 2008 pulakna leng nei hi.
Mi nih kaplum
IMPHAL MAR 7: Police apat thutut kingah dan in tuni sunnung dak 2.30 vel dingin, Thoubal Police Commando ten helpawl hidia muanmon nih Kongzom Patpan mun ah kaplum uhi. Police te gendan in kaplup a omte apat 9mm pistol khat leh atang nih leng musuah ua, siluang nihte meltheih dingin RIMS morgue a koih in om uhi.
MU gamkek ding deihlou in dharna
IMPHAL MAR 7: Manipur University, Central University dinmun a dopkang ahihtoh kiton a, gam 120 acres lakbeh ding chih thu a, Phumlou Konjin Loukol leh Heibokching chihna mun lou bawlna lak hek ding phallou in, Phumlou Konjin Loukol leh Heibokching Land Protection Committee in, tuni’n leng Manipur University Main gate kiang ah peaceful protest Dharna nei nawn uhi. Hiai pawl in apaisa March 5, 2008 inleng MU main gate tanpha khaksak in protest dharna nei ngeita uhi.
MU in gam a lak hek ding phalloute gendan in, Manipur govt. in gam neitute dot masak omlou a gam laksak a sawm pen naktak a mohpaih ahihdan uh leh, hichibang lou neihna mun laksak sawm ahihna naktak a dal ding ahihdan uh leh, tua adinga pawl tuamtuam NGOs, Clubs leh Organisation ten leng kithuahpihna pedingin ngen uhi.
BYF Imphal in CD Album bawl ding
IMPHAL MAR 7: Baptist Youth Fellowship, EBC Imphal Division in amasapen dingin, tukha sungin CD Album khat bawlkhiak sawm ua, tua dingin BYF Imphal Division sunga lasiam tuamtuam 9 vel telkhiak in om uhi. Hongtung ding March 9, 2008 in National Games Village a Musician Gouhau studio ah Final rehearsal neih sawm uh hidan in leng thutut kingah hi.
Manipur govt. nuai ah semtu 62111 om
IMPHAL MAR 7: Manipur govt. nuai a department tuamtuam 97 adin sanctioned post 69937 om mahleh, tu lel in semtu 62111 om hidan in official thusuak om hi.
Thusuak dan in, Education (S) department a sanctioned post 12910 himahleh, semtu 12519 om a, semtu tam napen suak hi. Semtu tawmna pen Institute Finance Cell ah sanctioned post 9 lak ah semtu 5 om lel hi.
Department tuamtuam in MGEL bawlna dia Finance (Budget Section) a data apiak dungzui un, PSUs tuamtuam 13 a semtu 510 te kum khat loh khiak ding Rs 668.73 lakhs tungpha hi. Tua toh kiton in department tuamtuam 24 a Adhoc semtu 369 te kumkhat loh Rs 247.61 lakhs, department tuamtuam 15 a Casual semtu 830 te kum khat loh Rs 189.64 lakhs, Deptt. 7 a Work-charged semtu 2376 te kumkhat loh Rs 193.68 lakhs, Deptt. 12 a Muster Roll semtu 4913 te kumkhat loh Rs 819.49 lakhs, Deptt. 4 Grants-in-aid a semtu 4073 te kumkhat loh Rs 66.80 lakhs leh Adult Education leh Fisheries a Officiating semtu 184 te kumkhat loh Rs 69.12 lakh hidan in leng official thusuak in taklang hi. Home Guard te leng Muster Roll nuai a telsak in om uhi.
HSLC exam 3 nohkhiak in om
Imphal, March 7: Board of Secondary School Education, Manipur nuai a HSLC exam pailel ah tuni’n Lilong B centre a exam Roll No. 5943, Mayang Imphal centre apan Roll No. 7582 leh Noney centre apan Roll No. 13392 te chindan kilawmlou a hih ziakun nohkhiak in om uhi.
Fair Job om ding
Imphal, March 7: Ministry of Development of North Eastern Region (DoNER) etkaina nuai ah NASSCOM saina in hong tung ding March 13, 2008, zinglam dak 9 apan nitak dak 7 tan GP Women’s College, Imphal ah Manipur apan NAC candidate te a ding in Job Fair om ding hi.
Hiai hun ah Manipur apan NAC candidates tengteng telkim ngai ding a, tua ah HSLC apan a tunglam orginal certificate, NAC score card tawi ngai ding a, hiai neiloute a mun ah piak hiding uhi. Thuchian kimzaw theinuamte’n www.nac.nasscom.in ah et theih ding hi.
Sharmila in kiphinna sunzom
IMPHAL, March 7 NNN
Judicial custody apat Sintawpni in Imphal ah Irom Sharmila Chanu khahkhia himahleh, aman Imphal East a Kongpal Kongkham Leikai a a innsung sik utlou in, home guard personnel-te leh jailour in escort mahle uh, lam kiang a bawkta khat a a kiphinna a sutzom hi.
Indian Penal Code (IPC) section 309 pansan a March 7, 2007 apat judicial custody a koih a ana om nung in Sintawpni in Imphal a Additional Chief Judicial Magistrate (CJM), RK Memcha Devi in Irom Sharmila Chanu khahkhia hi. Manipur a kizang Armed Forces Special Powers Act (AFSPA), 1958 lakkhiakna dia sih tanpha a ann-ngawl dia November 2000 apat kiphin Irom Sharmila Chanu Sintawpni a Additional CJM in a khahkhiak toh kiton in aman lupna ngak a a omna Jawaharlal Nehru Hospital nusia hi.
Sharmila kiphinna toh kisai Sintawpni in Manipur Assembly Budget session ah MPP MLA RK Anand in zero hour sung in pawlut a, Sharmila in ana tangkoupih AFSPA ziak a mipi haksatna leh thuaknate mipi’ palaite’n mangngilhlouh ua, a daih dide louh ding uh ahihdan gen hi. Sharmila in mipi thuaknate a tangkoupihna ziak in Korea apat pahtawina Gwangzu Award ana sangta a, kum 7 bang kuhkaltak a kiphinna dan a ann a ngawl ziak in ‘iron lady of Manipur’ chih min piak in om hial hi.
Lam kiang a bawkta a kiphinna a sutzopna mun a Sharmila in thuthaksaite kiang a a genna ah, hospital a amah etkolna ziak a state govt. in overdraft neihloh hidan a thuthang a zak pen kingaihsiatpih mahmah ahihdan gen kawm in, awl-awl a thah a a om (govt. in) sang a a nu’ aanglum a lungmuangtak a sih ut ahihdan gen hi. Huai banah, Sharmila in a genzelna ah, aman mipite a dia theihtawp a suah lai a mipi’n amah nusia uh hi a thei ahihdan khase tak in gen hi.
Congress in Mehgalaya ah seat 59 lak ah 25 ngah
SHILLONG, March 7 NNN
Meghalaya Legislative Assembly election March ni 3 a neih a ompen Sintawpni in vote simzoh hita a, constituency 59 simkhit ahihna lak ah Congress in seat 25 ngah hi. Congress in a hihhoih mahmah ziak ahihleh lamet bangloutak a National Congress Party (NCP) leh United Democratic Party (UDP) in a hihhoihlouh luat ziak uh hidan in thusuak in taklang hi.
Amau bial deuh a a neih uh Garo Hills ah NCP in hihhoihlou mahmah in seat 12 chauh ngah ua, Khasi Jaintia Hills a seat 2 a ngah uh toh kigawm in a vek in seat 14 ngah in Congress zom a hatpen hihna la uhi. A thumna ding in seat 11 ngah UDP pang a, Hill State People Democratic Party (HSPDP) in seat 2 ngah hi. Khun Hynniewtrep National Awakening Movement (KHNAM) leh BJP in seat khat tuak ngah ua, huai banah, independent candidate 5 leng ching uh hidan in thusuak in taklang hi.
Apaisa election 3 a UDP’ hatna gige Jaintia Hills ah Congress in hihhoih mahmah a, seat 7 lak ah seat 6 ngah ua, a omlai sunsun leng NCP in a tan ziak in a hatna gige uah UDP in seat khat lel leng tanglou uhi. Jaintia Hills ah Congress in hihhoih mahmah in UDP nil sak hial mahleh, Ri Bhoi district a seat 4 om lak ah UDP in seat 3 ngah a, a omlai khat, Nongpoh constituency pen Congress Chief Minister in vote 720 ziak lel in ngah hi.
East leh West Khasi Hills district apat Congress in seat 11 ngah a, UDP in 7, HSPDP leh NCP in nih tuak, KHNAM leh BJP in khat tuak, banah, independent candidate 2 ching uhi. State pumpi dan a et in vote kiakdan kikhenzak mahmah a, Congress, NCP leh UDP chihlouh, party neunounoute’n bel Innpi ah palai bangmah zah sawl zoulou uhi.
Tutung Meghalaya election ah sitting MLA 35 chingzou nawnlou ua, huaite lak ah Chief Minister lui Dr. F.A. Khonglam (HSPDP) tel a, a thumna in leng pang zoulou hi. Huai banah, opposition leader Admiral Sangma, Tourism Minister Deborah Marak (Cong), PWD Minister Zenith Sangma (Cong), Agriculture Minister Manirul Islam Sarkar (Cong), Martle Mukhim (MDP), UDP ticket a thumvei ana ching Bires Nongsiej leh Deputy Speaker P.W. Muktieh (Cong) leng kia uhi.
Tuabangkal ah, Meghalya Pradesh Congress Committee (MPCC) President O.L. Nongtdu in a gendan in, a paisa kum 5 sung ana semkhawm khinta ahihna uah, tua leng party neunounoute toh coalition sorkar din ding khoksalou a, himahleh, independent candidate 5-te mitsuan deuh uh hidan in thusuak in taklang hi.
UDP’ MLA 9, MDP’ MLA 4, KHNAM’ MLA 2 leh HSPDP’ MLA 2 toh Congress makaih in Meghalaya Democratic Allaince (MDA) in a paisa kum 5 sung Meghalaya ah vai ana hawm uhi.
Regional party te’n hel bawl uh hidan a gen hiau in Nongtdu in Kiginni chiang a Congress Legislature Party (CLP) in meeting a neih chiang ua thupukna lak a om ding ahihdan gen hi. Huai banah, NCP toh sepkhawm ding toh kisai ahihleh national level a gen ngai ding ahihdan leh NCP toh kisai thu himhim MPCC’ thunuai a omlou ahihdan Nongtdu in gen hi.
Luxury bus 9 mei in kang
Guwahati, Mar 7 NNN
Ulubari, Guwahati a ASTC te’ compound sung a kikoih Guwahati pansan Prerona distance luxury bus-te bus 9 Sintawpni zinkal baihtak in mei a hal in om a, Prerona office-bearer te’n migiloulawi khat thilhih hi ding in gingta mahle uh, police te’n bel suikhiakna nasep pan nailou uh hi’n thusuak in taklang hi.
Mit a mute’ gendan in zinglam dak 2 vel ding in, mei kang bus khat a kipan muh ahihphet a fire dept.-te ahilh uh leh , dakkal 1 zohnung in tungpan ua, zingkal dak 4 vel in phelhmit pan uh hi dan in gen uhi. Bus-te’ nuai a thautui dan pian muh hi a, migilou thilhih ahih kei leh accident leng hithei ahihziak in bangmah genchian theih omnailou ahihdan Additional Superintendent of Police (City) in hi. Himahleh, huai kiim-le-kiang a electric transformer a omlouh ban a, halogen light-te a main switch apat kilakhia ahihman in mii hallouh a bus-te kuanglou ding ahihdan Prerora Manager, Latu Hazarika in gen hi’n thusuak in taklang hi.
Prerona Travels nuaia ah, luxury travels 92 om a, hiai teng lak a, 70-te Ashok Leylands company toh akilei khit uh, hilele aman akipiakkhit nailouh ziakua, Prerona in kha khat a bus khat zel a, Rs. 70, 000 a piakzel ding chih ahih banah, December kha apat state sung ah Prerona bus-te 53 bang zatlouh in om a, installment piaklouh ziak a tua bus kihalte’lak a 4 te Ashok Leyland in a lakkik dek hizomah lai hi’n thusuak in taklang hi.
Siamsinna toh kisai Innpi ah
IMPHAL, March 7 NNN
College 25 a lecturer leh principal 45 lakna ding toh kisai state Education Department in Manipur Public Services Commission (MPSC) khut a koihta ahihdan Manipur Education Minister L. Jayentakumar in Sintawpni in Innpi zasak hi.
Budget Session pailel a cut motion a hilhchetna ah, Education Minister in college teacher-te a dia age relaxation thu pen June kha a Cabinet meeting om chiang a genkhawm hiding ahihdan leh primary teacher lakna ding toh kisai teng Budget session zoh chiang a hihfel ding ahihdan gen hi. Jayentakumar in a genna ah, Deputy Inspector of School-te promotion ding leng daltu tamtak lak a DPC neihna dia department in theihtawp suah a, zoh hidekta ahihdan gen hi. Graduate teacher te’n loh thu a buaina a neih uh leng ngaihtuah pah a om ding ahihdan leh secondary school teacher 352-te loh toh kisai a thu court a kibanglai ahihdan gen hi.
Student-te lunglutna lungsim a ngaihtuah kawm a singtang bial a education system upgrade-na dia, policy thak guangtu ding expert committee bawlkhiak ding thu Jayentakumar in gen hi. Huai banah, Budget session a bei chiang a student-te haksatna leh lungkimlouhna enkhe dia amah mahmah Ukhrul a Pettigrew College hoh ding ahihdan Jayentakumar in gen hi.
Singtangmi MLA-te’n singtang leh phaizang a budget kibanglou hidan a dotna Education Minister in a hilhchetna ah, sum a lakh a sim govt. apat grant dan a hill district a private college-te kiang a kum teng a piak a om gige ahihdan gen hi. Hill district a college-te a siamsinna sangzaw koihna dia department in pan lak sawm ahihdan leng Jayentakumar in gen hi.
Manipur University (MU) kekletna leh National Institute of Technology (NIT) bawlna ding toh kisai a singtangmite deidanna bangmah omlou ahihdan Jayentakumar in a genna ah, MU pen Central University dinmun piak ahihtoh kiton a, a mel a puam bang leng Central University dangte toh kikim ahih poimoh ahihdan leh khangsawnte a dia gou dan a ngaihtuah ding ahihdan gen hi.
EDITORIAL
Tuni Thupi: ….ahihhangin, i Pathian in hamsia vualjawlna a suaksak hi. Nehemia 13:2
Mautaam kial apat sinlai
Pathian a kipat vualzawlna i chih a zangsiamte a di’n genvuallouh in hoih a, himahleh, a zangsiamloute a di’n bel hamsiatna toh kibang hi. Huai mah bang in, thilsia, haksatna leh vangtahna i chihte leng a thuaktute a pilsiam ua leh vualzawlna naak suakthei hi.
Sawt nailou chik a khovel khangthu i et a leh leng haksatna leh vangtahna kichite vualzawlna mah ana batna muhtheih in om hi. Kidoupi Nihna pen neih-le-lam tamtak gentaklouh, mihing hinna manphatak, a million a simte manthatna ahi. Himahleh, a lehlam a a zangsiamte’n bel dinkhiakna in neihloh uhi. USA in leng hiai galpi apat ana dinkhiak loh a, Kidoupi Nihna ana omlou hileh tua tuk a USA hat ding in gintakhuailou hi. USA in Hiroshima leh Nagasaki a Atom Bomb a khiak pen thil mulkimhuaitak, neih-le-lam tamtak gentaklouh, mihing hinna manphatak manthatna ahihbanah, Japan in a vuallelh lohna ahi. Himahleh, hiai vangtahna Japan in a zatsiam man in tu’n a economy uh hoih mahmah a, khovel a economy hoihpen, super power USA zom in a nihna in pang hi.
A sawt nailou zaw sem leh a nai zaw sem Lushai Hills, Assam a thiltung enta leng, eimite mahmah inleng i thuakkhak uh, 1959 vel a Mautaam kialpi a tun ziak in mipi’n nek ding ana neilou ua, kial panpihna di’n Mizo famine relief pawl kibawlkhia ua, hiai haksatna a zatsiam ziak un famine relief pawl apat Mizo National Front hong piangkhia a, huai apat a gah a loh uh Mizoram i theichiat uhi.
Tulai in i gam uah Mautaam kialpi a tung a, mipi’n haksatna nasatak a tuah ziak un ZEPADA makaihna deuh in pawlpi tuamtuam in pan naktak in la uhi. Pawlpi leh mipi phatuamngaite panlakna ziak in tutung a Mautaam kial pen Pathian panpihna toh i douzou ngei ding ua, himahleh, Mautaam i chih kum 50 vel hal a thiltung ahihman in, mau a hong taam nawn chiang a tua i phutsa teng mah phutou zel ding i hi ding uam? Tutung a haksatna i tuahte vangtahhuai himahleh, ‘vangtahhuai chihlouh ngal a hih/chih ding dan omlou’ chih lungsim i neih khak ding uh lauhhuai mahmah hi. Hiai vangtahna pen vualzawlna suahsak ding dan lampi i ngaihtuah uh ngai ahi. Famine relief pawl kiphuhkhiak a ‘Mizoram’ dandeuh kapkhiak ding chihna bel hipahlou hi. Ahihleh, hiai Mautaam kial i tuah uh bangchi leh ei a dia vualzawlna hong suakthei ding hiam?
Mautaam kial ei a dia vualzawlna suahsakna ding in bangziak a hong tung a hia? chih leh bangziak a pumpelh theilou i hi ua? chih ngaihtuah masak ngai hi. I nekzonna uh, i kingakna uh singtang loubawl dan i et chiang in, a hat mahmahte’n kum 2 a khamkhop ding uh khoukhe lel ding uhi. Huai ziak in, mau a hong taam ziak a kial hong tung hizawlou in, i lungsim un maban kum 1 tan kan a muhbatlouh ziak ahi. Mautaam kial ana tuak ngeita i hihman un, buhlei bawl in bangtan mah hon tunlou ding ahihdan ana thei in, bazaar a zuaktheih ding haichi chiin nachang ana thei hileng mau a taam sung a i nek ding uh anntang leizohna ding sum, mau a taam nawnma kikal sung in ina kholkhe chiat ding uhi.
Etsakna di’n, nikum lam apat zawngtah bang leng mau toh a paidan uh kibatna nei ahi ngei ding a, a si souhsouh hi. Huai ziak in tukum in a man a tam mahmah a, zawngtah kung bang tamtak nei hileng a si veklou ding ahihna ah, sum luah a luah thoh mai ding i hi. A zuakna ding toh kisai ahihleh, eilak a i khotgaih zohkei a leh leng Meitei te’n leng hah nek mahmah ua, huai banah, Mizoram leh Nagaland leng omlai hi. Manipur, Mizoram leh Nagaland a i khot nawnlouh chiang in bel i zawngtah kung tengteng si vek leh leng kial ziak in ei kisi nawnlou ding hi. Mau a taam nawn chiang a i zawngtah kung neih tengteng a sih vek a leh leng, mautaam i chih kum 50 vel hal a tung ahihman in, huai hun sung in chu ina hausa khinvekta ding uhi.
Etsakna dia zawngtah i lak pen a hoihpen leh dikpen ahikei maithei, haichi dangdang banah ui vulh, ak vulh leh vok vulh chihte bang leng hoihzaw kha thei hi. Himahleh, buhlei bawl in bangtan mah hon tunlou ding ahi chih leh i kingakna uh khek ngai ahihdan i gen ut pen ahi. A hoihzaw ding bel mipi mah in i dapkual ua i maikhiak uh ngai ding hi. Mipi phatuamngai leh pawlpi tuamtuamte panlakna tungtawn in Pathian panpihna toh, sorkar tellou in leng hiai kial i douzou ngeingei ding uh chih hangsantak in gen ngamhuai a, himahleh, i maban taktak ding bel kuaman anntang hon pe gige zoulou ding ahihna ah ei mah in pan i lak taktak ngai ding hi. Huai ziak in, tutung a ‘vualzawlna’ i tuah uh a phatuam theipen in zang chiat ni.
Tuni Thupi: Diktatna in nam a tawisang a; himahleh khelhnami kuapeuh a ding in zahlakna ahi. Paunakte 14:34
Electric hoihna ding in i duty chiat uh semkhe ni!
North East pumpi in khanmohbawk a a neih tuinek kiningching, lamlian hoih leh electric ahi a, North East sung sapsap ahleng Manipur in hiaite neih ginatlouh ziak in haksatna tuak kholdiak hi. Electric toh kisai ahihleh tamveitak gen in ana omta a, hah gen ziak a sih ding bang hileh electric department a sem teng a hinglai om nawnlou ding un gintakhuai hi. Hah gen ziak a hoih ding hileh bel hoihta ding in gintakhuai a, himahleh a gentu a omlouh chiang a leng hoih ahih tuanlouh ziakin, lametna lianpi toh gengen phot peuhmah leng chih ut i hi.
Koi mun peuh a di’n dik thou mahleh, a diak in Churachandpur district ah electric hoih hitaleh bangchituk in i khangtou ding ua? Tuchiang in nna khat peuhpeuh electric zang a khawl toh kisemta ahihman in zan mial tanvaktu ding kia hinawnlou in a poimohna nidang toh teh in lian petmah hi. Etsakna di’n, misterite nangawn inleng khawl hah zat mahmahta ua, electric hoih hileh tua a sepkhiak zah uh leh bangzah hiam a tamzaw semkhezou ding ua, amau kia hilou in a sepnate uh leng met ding ua, a tawp in tuh khotang in khosakna hoihzaw neihloh ding hi. Sing-aatte bang leng, nileng in sing-aat thei le uh a sing neite leh amau mahmah met ding ua, a tawp in khotang in khosakna hoihzaw neihloh ding hi. Electric hoihlouh ziak in electric van zuakte’n a khot ding tuk in khonglou ua, sum kipei ding naktak in dal hi. Damdawi Inn bang leng mei ginatlouh ziakin a hoih ding tuk in hoih theilou a, kithuzakna mobile leh landline, tui kai leh a dang tamtak leng electric hoihlouh ziak in a hoih ding tuk un hoih theilou uhi. Huai mah bang in, computer leh khawl tuamtuam, electric zang a nasepna khawl khempeuh electric a hoihlouh ziak in a manphatna bang un kizang theilou hi.
Electric toh kisai i gen chiang in Manipur sorkar inleng a hihtheih tawm mahmah ahi ngei ding a, lianpi leng ngim vetlou a, ei district sung bek hoihtak a a paitheih ding dan ngaihtuah poimoh hi. Minister Pu T. Phungzathang panlakna ziak in tuma deuh in electric hong hoih deuh mahmah a, tuni chiang in a ngei a hong tun nawn ziak bang hi hiam? chih Lamka Post palai in a kanchetna ah, Churachandpur Electricity Department a Executive Engineer, Mr. Benjamin Saiate in ana hilhchian hi.
District sung a meivak kiningching omtheihna’ng a sub-station-te upgrade theihlouh ding hiam? chih dotna a dawnna ah Exe. Engineer in tulel a Khengjang Power Sub-station a 5MVA Transformer 3 omte phalna nei a electric late a dia hun mahmah ahihdan gen hi. EE in a hilhchet dan in, tulai a district in electric a ngah zah kiamtuanlou a himahleh electric zangtu a tamluat ziak a khawl in zoulou in trip (overload) pahpah hi. Singngat feeder in 300 amps tan pethei a meivak ni chiang a ON/vaksak ahihtung in 298amps tung mahleh meivak nung sawtlou in 305 amps bang tungtou in mit zel hi. Tulai a electric a ginatlouh ziak taktak EE’ gendan in bel, district pumpi sung a phalna nei a electric la 12560 chauh a omna lak a 9000-te’ kiang chauh a bat siktheih hi. District in 27 Million unit a zatbei lak ah 7 Million unit khong lel bill theih a, a dang teng phalna neiloute’n a thawn a a zatbei uh ahi. A omdan tak bel, phalna nei a electric la inn 3560-te kiang a department in bat sikna ngaihna leng theilou uhi. Permit nei mi 9000 te lak ah 50% in fee hoihtak in a pe diam? chih hisawn lai hi. Phalna neilou a electric la mi tam mahmah napi a, ei district in power supply i muh zah pung tuanlou ahihna ah, Power Minister in transformer 20 a hon piaksa banah hon piak beh lai lehleng hoih tuanlou ding a, i khawl i neihsa teng nangawn un siat beh ding hi.
Phalna neilou a electric late leh electric fee peloute’ hihna kibang geih ahi. Ei district in power supply i muh uh phalna neite a dia kiching ahihleh phalna neiloute leh bat peloute’ electric lakkhiaksak hileh bel veng mai ding hi. Himahleh, a thuak ding eimite mah i hihziak un thil uthuai leh deihhuailou ahih kia hilou in hoihpenlou hi. Huaiziak in “Diktatna in nam a tawi sang” chih kam a genthoh hinawnlou in, i niteng khosakdan ah kilangsakzaw in, mi teng in i bat hoihtak in din leng phatuam ding hi. Phalna neilou a electric late’n leng phalna neihna dia sum sun ding i ngah zohkei hial a leh leng tamloulou a piak theih dan department in bawl tham ahi. Ditattak leh hoihtak a i bat teng i piak khit nung ua leng electric a hong hoih ngal kinephuai tuanlou hi. Himahleh, huai hun chiang in bel hangsantak in ‘kaki daihkei uh, hon piak beh un’ chihtheih ding hi. Tua bel eilam leng dik khinlou i hihna uah kuamah hangsantak in pau ngamlou hi.
Himahleh, Pawl-XII leh Pawl-X te’n tulai in exam san lel ua, tu-le-tu a meivak hoih poimoh i hihna uah, EE’ gendan leh ngetna dungzui in, veng tuamtuam a heutute’n heater zat khong a kham uh phatuam mahmah ahihna ah, mipite’n meivak chilsiamtak a zang a a poimohlouhna munte mekmit zel mai leng Pawl-XII leh Pawl-X te’n exam a neih sung bek uh meivak hong hoih deuh ding hi. Siamsin naupangte i panpih chiat theihna uh ahiding a, maban a gam-le-nam’ nu-le-pate hong hiding ahihna uah poimoh ngaih chiat ni.
Electric hoihlouh ziak kuate ziak a hia chi’n ngoh ding zong le, mipite’n official i ngoh ding ua, official ten mipite fee piakhoihlou a hon ngoh nawn ding ua, a nih in a diktuaktuak mai thei. Temtatpu leh Kaikuang tangthu kigen mah bang ding hi. Kingohtuah sang in Official ten a hih ding uh hih uh henla’n, mipite’n i duty uh buching sak le hoihzaw ding hi.
lamkapost@yahoo.com
www.zogam.com
No comments:
Post a Comment