Lamka, Sept 5: Committee on Mautam Famine Aid te’ makaihna in tuni in YPA Heaquarters Hall, Hiangtam Lamka ah, Concert for the Hungry, 2008 zatna om a, huai ah Chief Minister khuallian dia chial himahleh, lemtanlouhna aneih man in Phungzathang Tonsing Minister (Power/Horticulture/Sc& Tech) in khuallian hihna len in thugenna hun zang hi. Minister in a thugenna ah, mautam ziak a si kuamah omlou ding ahihdan gen a, tua ban ah, centre Government in kial panpihna ding in CRF fund nuai ah Rs 16.67 crores honpia a, zan nitak in mautam thuakte panpihna ding in Rs 5.45 crores release a om ahihdan taklang hi.
Chief Minister in hiai program a ahongtel theih louh poisakthu gen a, Chief Secretary Rakesh Sharma leh Relief Secretary Paulunthang Vaiphei IAS te hon sawl hi. COMFA program hun ah, district in charge Minister Phungzathang Tonsing, V Hangkhanlian MLA, T Hangkhanpau MLA, T Manga Vaiphei MLA, Rakesh Sharma Chief Secretary, a zi Mrs Rakesh, Paulunthang Vaiphei Relief Secretary, DC/CCpur Sumanth Singh, SP/CCpur S Manglemjao Singh, Vungsuanmang Valte EE/PWD, K Ngulkhanthang District Horticulture Officer leh VIP hunkhop tel uhi.
Thanlon A/C MLA V Hangkhanlian in Chief Minister leh State Government panlak dan deihkhop huailou asakdan gen in, policy ah fail kha zekzek uh ahi chi hi. Government in phu taktak hileh Calamity relief fund nuai ah Rs 20 crore zatlouh a om ahihdan leng gen hi. Singngat A/C MLA T Hangkhanpau in agenna ah, PDS antang dist mipite adia kidaih zoulou ahihdan gen a, Chief Secretary leh relief secy in leng pan naksem a la dingin ngen hi. Tukha September 2008 apan Tuima leh Sangaikot te ah mipite’n antang ki ningchingtak in Kg ah Rs 7 in muthei ta ding uh ahihdan gen a, transportation charge leh sen le paan om teng aman tumvek ding ahihthu puang hi. T Manga MLA Henglep A/C in leng Government in naksem a pan alak deihthu taklang hi.
Power Minister in thugenna neiding in Relief Secretary leh Chief Secretary ang-khak a, Relief Secy P Vaiphei IAS in agenna ah, Centre apan panpihna hong paite component 3 pha ahihdan gen a, huaite ahihleh financial assistance, rice (in kind) leh scheme impletment ahi chi hi. Principal Secretary (finance) tawh panpihna tungtang genkhawm uh ahihdan taklang a, CRF nuai ah Rs 16.67 crores hon pia ua, zan nitak in CM deihna bang in mautam thuakte huhna ding in Rs 5.445 crores released a om ahihdan puang hi. Antang tawh kisai leng Union Agriculture Minister Sharad Pawar kiang ah tulel a hong pai sang a aleh 3 a tamzaw a nget ahihdan gen a, mautaam in a sukkkhak CCpur, Chandel leh Tamenglong bial mipite adingin NREGS nasep na ni 100 pen ni 65 behlap sak dia nget hi’n P Vaiphei in taklang a, relief tawh kisai liauliau in fund tuamtuam et in mautam panpihna ding in Rs 24 crores bang om thei ding ahihdan relief secretary in taklang hi. Chief Secretary Rakesh in leng mautam a awlmawh thugen in mipite panpihna ding in naksem a panla ding ahihdan gen hi.
Chief Guest Phungzathang Tonsing Minister in agenna ah, district level officer, civil organization leh pawl tuamtuamte pangkhawm a mautam dou hun ahihdan taklang a, mautam kial ziak a si kuamah omlou ding ahihdan leng Manipur Government in Mizoram hih zawh zahzah hizou sam ding ahihdan gen hi. Mautam ziak a natna hii leng leh misi om chih tawh kisai a mun mahmah a suichian ding in BDO/SDO leh Medical officer i/c te theihsakna pia a, banghiam thil a om chiang in DLO te’n MLA leh Minister te zasak pahpah ding in theisak a, MLA leh Minister te’n panla lou chi a va ngoh pahpah pen thil dik hi gige lou ding ahi chi hi. CCpur-Sugnu road, Thanlon – Nungba road, Irang Bridge leh development program tuamtuam te proposal guan a omlel ahihdan gen in, Manipur singtang bial ading in district khang hatpen CCpur ahi chi hi. 33 KVA tan electricity supply om na mun ah Solar plate hawm hinawnlou ding a, hiai tawh kisai a solar mandia sum ana khon khin pawl khenkhat om ahihdan leng Power Minister in gen hi. Tuni kikhopna hun ah Power Minister in mautam douding in paikhawm mipite leh official te chial a, tua zawh in COMFA kithuahpih na ding in ama sakhau apan in Rs 1 Lac pia hi.
=========
Pawlpi 3 in CM ah memorandum pia
Lamka, Sept 5: Zomi Students Federation, Churachandpur District Students’ Union leh CCpur dist primary teachers written test successful candidates Association pawl in tuni in a tuam chiat in Chief Minister kiang ah memorandum pia ua, aman Lamka hongphak theih louh ziak in Power Minister tungtawn in submit lut uhi. ZSF in ahihleh, Mautam tawh kisai in ngetna pia ua, mautam ziak in haksatna thupitak tung a, a biiktak in school naupang te’n genvuallouh haksatna tuak uh ahihman un amaute aida Chief Ministers’ Relief fund apan panpihna ngen uhi.
CDSU in ngetna apiaklut na uah district dangdangte ah Mini Secretariat/Joint Administrative building lamna pailel a, himahleh, CCpur district ah bangmah lamkhiak ahih louh pen lamdang sakthu gen in bangziak a Mini secretariat pat hinailou hiam chih dotna bawl uhi. Government in kintak a mini secretariat building panding in ngen ua, CDSU in kithuahpihna peding ahihdan uleng zasak uhi.
CDPTWTSCA pawl in CM kiang ah ngetna bawl in kha 19 paisa a primary teacher lakna dia written test a lawhchinna ngahte tuni tan in viva voce ding in sap hinailou ua, hiai tungtang ah CM in panla ding in ngetna nei uhi.
Photos Source: http://www.zogamonline.com/index.php?option=com_content&view=article&id=932
No comments:
Post a Comment