Friday, September 05, 2008

Suspension of Operation

- V L Mangzou

India in British-te apat zalenna amuh nung sawtlou in ZA Phizo (Angami Zapu) makaih Naga helte’n galvan toh Naga gam’ zalen na ding ana sual pah charchar uhi. Himahleh, ngaihdan kibatlouh ziak in akithukimpih mi 5 te’n November 11, 1975 in Shillong ah Lemna Suai (Peace Accord) hon kaihsan ua, hel tampi kipekhia uhi. Hiai Accord deihlou pawlkhat in 1980 in National Socialist Council of Nagaland (NSCN) hon phuan ua, 1988 in NSCN tuh Pawl 2 (NSCN-Issac/Muivah leh NSCN-Khaplang) in hong kikhen nawn uhi. Tunai chin in NSCN-Unification chih bang le hong omthak uhi. NSCN (IM) leh India Sorkar in June 25, 1997 in kikap khawl (ceasefire) puang uh a, gamgi neilou (without territorial limits) ding in June 14, 2001 in kithukim uhi. Hiai thumal 3 te Nagaland toh kigi gamte’n ngaisiamlou uh a, Manipur houh sousang diak in mipite naktak in kiphin uh a, June 18, 2001 in mihing 18 in sihloh ua, sorkar’ mun poimoh tamtak suksiat in om hi.

Kihouna piching nei naikei mahle uh NSCN (K) lam in le April 2001 in India Sorkar toh ceasefire puang uhi. India Sorkar leh NSCN (IM) in tamveitak kihouna nei thithe mahle uh NSCN (IM) in a-ngiat “Nagate’ tenna teng gawm ding” thu a Phualpi Sorkar amin theihlouh ziak in tunitan in bangmah thupilua gahsuah muh ding omlou hi. 1997 apat ceasefire tuh kha 6, kum 1 chih khong in behlap tou zel ua, July 31, 2007 apat in bel chiamtan omlou (indefinite) in puang uhi. Bangteng hileh ceasefire puang napi in Sepaihte leh Helte tuh ceasefire thukhun bohsia a ki-ngohtuah in, aguk in kibeituah veve ua, amau leh amau (faction)’ kal ah kitheihsiamlouhna om in kithat tuah vengvung uhi.

Suspension of Operation (SoO) nuai a om Singtang Helpawl 19 te tuh Pawl lianzaw 2 in khen in om uhi. Kuki National Organization (KNO) nuai ah Pawl 11 om ua, amaute – Kuki National Army (KNA), Kuki National Front-Military Council (KNF-MC), Kuki National Front-Zougam (KNF-Z), Kuki National Organization/Kuki Liberation Army (KNO/KLA), Hmar National Army (HNA), Zou Defence Volunteer (ZDV), United Socialist Revolutionary Army (USRA), United Komrem Revolutionary Army (UKRA), Zomi Revolutionary Front (ZRF), Kuki Revolutionary Army-Unification (KRA-U) leh United Minority Liberation Army (UMLA/Old Kuki) te hi uhi. Huan United People’s Front (UPF) nuai ah Pawl 8 om ua, amaute – Zomi Revolutionary Army (ZRA), Hmar People’s Convention-Democratic (HPC-D), Kuki National Front-Samuel (KNF-S), Kuki Revolutionary Army (KRA), Kuki Liberation Army/Kuki Liberation Organization (KLA/KLO), United Kuki Liberation Front (UKLF), Kuki National Front-Presidential (KNF-P), leh United Socialist Revolutionary Army-Reformed (USRA-R) te hi uhi.

August 1, 2005 in atung a i gente’ lak a tel helpawl bangzah hiam in Indian Army toh ceasefire ana puang mahle uh Manipur Sorkar in theihpih (ut)lou hi. Manipur Sorkar nuai a Home Department enkoltu leh Chief Minister, Pu Okram Ibobi Singh in hiai Army-Hill based UGs’ Ceasefire tuh muantham ching asaklouh thu gen hi. Hiai hun vel mah in Armed Forces (Special Powers) Act, 1958 pansan in sepaih tamsem saplut in om a, ceasefire om napi in sepaihte’n singtangmi hel (cadre) tamkhop mahkhe veve ua, bangzah hiam that in minautang kaplup leh kapliam nei thouthou uhi. Tuabang kal ah New Delhi in Chief Minister Ibobi sam suk in Singtang Helte leh Army kal a ceasefire pompih ding in ngen (theisak) hi. Pu Ibobi in amawkna a ceasefire puan in omzia neilou, helpawlte’n hiai hun lemtang a la a galvan leh sepaih (weapons and cadres) hatsaksem na hun a zang thei uh ahi chi in zuih ngeingei ding thukhun (ground rules) kichiantak a-om ngiat tinten hi. Huchi’n, Phualpi Sorkar in hon enchianthak a, ceasefire tungtang a achiangkuang zoulou deuhte (loophole) bawllem a ground rules kichian (Ibobi’ lungkimna tan) ahon phoukhiak tak in Manipur Sorkar in July 29, 2008 in Suspension of Operation lemsakpihna (approval) pia hi. Tua dungzui in August 22, 2008 in Ashoka Hotel, New Delhi ah India Sorkar/Manipur State Sorkar leh UPF/KNO nuai a kigawmkhom Singtang Helpawl 19 te’n Suspension of Operation suai kai uhi.

Suspension of Operation nuai a om helpawlte leh State/Phualpi Sorkar in azuih ding ua kibawl thukhunte (gound rules) ensuk nawn le….. Amalam a i gen helpawl 19 te tuh hiamgamna apat akihepsiang kiukeu ding uh (completely abjure from the path of violence), dan in aphallouh nasep – tualthah (murder), mi suknat/sukliam (injury), mi pimang (kinapping), sepaihte lamtaan/sepaihte’ tung a khutkhak (ambush/attack), mi’ neihsa sum-le-pai leh neih-le-lam thagum a suhsak (extortion), midangte vaulau (intimidation), mipi’ lak a galvan toh kiphoukhiak (carrying of arms in public), mipi’ lak a sum don leh liausak (imposing of tax or fines) chihte hihtheilou ding uh (wow!); SoO hunsung a galvan – thau, thautang leh galdou na vanzat (military equipments) himhim behlap louh; sepaih lakthak (recruitment of new cadre) louh; mahni tuam a kivaihomna sual (try to run its own sovereign government) louh; hel sisate theihgigena (memorials) bawllouh; helpawl in a puanlap (flag) kaihpalhna nei theilou ding leh helte mipi’ muh a alom a kilatkhiak (parades) louh ding chihte tel hi. Himahleh, amau’ omna camp sung chiat (designated camps) ah bel akiphuhkhiakni uh (rising day) zang/lawm thei ding uhi.

Huan, hiai helpawl 19 te’n banghiam ziak a lampi khaktan (blockade) lou ding leh kikawmtuahna chituam-tuamte subuailou di’n kichiam ua, Local leh State Sorkar’ nasep, nek-le-tak thil, gam khantouhna leh niteng poimoh thilte ah kigolhlou ding uhi. Galvan toh hi in hikei ta leh uniform bukim toh mipi’ lak a akilat louh ding uh, Manipur Sate sung koisan mah a muh ahihlouh ding uh, mun piakbik (designated camps) chihlouh ah, chih leh, helpawl dang panpih, phungvuh leh kizopna neih (nexus) hiam, kuapawl hiam apat akakhia (faction) apian na dia panlak chihte phallouh hi a, tuate zui ngeingei ding a kiman a kithukimna (agreement) suai kai ahi uhi.

Hiai atung a zuih ding thukhun i gente bohsiat a a-om peuhmah le bel Security Force te’n akul bang in thagum suah in pan la-ngal thei uhi. Huan, thukhunte bohsiat behlap zel a a-om leh Joint Monitoring Group (JMG)’ hoihsakpihna in Manipur Sorkar in SoO phiat (terminate) thei ding a, apoimoh leh thagum suahna in zui ngal ding hi. Zuih dia bawl a om thukhunte a kigak a khat lel le maih omlou a gin-omtak a zuih ahih nak leh bel Security Forces – Army, Para-Military Forces (AR, BSF, CRPF, etc) leh State Police in hiai helpawl 19 te’ tung ah khut khalou ding hi. Hiai thilte (Security leh Helte’ gamtatdan) enkai ding in Joint Monitoring Group (JMG) phuan in om a, Chairman in Manipur Sorkar’ nuai a Principal Secretary khat pang a, IGP (Int), Manipur leh Home Affairs, Central Police Organizations (CPOs), Army leh Helpawlte apat palai (hiai group ah) tel chiat ua, amaute’n SoO sepkhiak ahihdan (implementation) enkai ding ua, khakhat in khatvei tukhom zel ding uhi.

Meitei Laigelhtu khat in, “New Delhi in Manipur Singtangmite (helpawl) toh ceasefire kipuang leh singtanggam teng galmuang ding a, sepaihte’n singtang a ahih ding uh omlou dia, phaijang helte adeihdan tak ua soisa thei ding uh. Huai lunggulhna a Suspension of Operation hong piang ahi a, bangchi’n ma ahon sawn zel a chi in phaijang helte’n khut angkilh in agaldot uh” chi in gelh hi. Phualpi Sorkar’ plan hidan a ahisap tuh awmtak ahi a, dik le dik inteh. Ahi a, ei’ adi’n bel Meiteite’ ading pen va khualvak ding a-omkei. Ei’ adi’n bang phattuamna ahihkei leh poi ahon tun a (dia) chih lam ngaihtuah tuak zaw hi. Amasa in, helpawl kichi akhamhuai ua achimtakhuai uh hiai bang lai a (lauhhuai si uh) Suspension of Operation/Ceasefire hon puan zenzen uh kipahhuai in kithalawphuai petmah hi. Zogam/Kukiland piankhiak na dia kalbi poimohtak hidi’n gintakhuai hi. Zuih dia kibawl thukhunte (ground rules) a i muh bang a kithah-kimat, kipimang, kisoisak, sum/gari kisuhsak, sumdon, percent cut chihte kumkhat sung khawl dek ahih (talawm) leh nuih vurvur di himailou maw? Huaiziak in, August 22, 2008 tuh nipoimoh achihlouh-theihkei, Zomi Nam Ni mah bang a midangte’ thunuai a i kituklut Ni, i vuallelh Ni, khotgaih sipsip a i om Ni uh ahihkei zenzen leh!

Anihna ah, SoO in atunkhak thu poimoh mahmah khat tuh ‘mahni a kivaihom tuam tupna kholsan’ chih ahi. One of the prominent features of the ground rules under SoO is that they (UPF/KNO) have now stopped demanding separate homelands and will protect the territorial integrity of Manipur! Nagate’n ceasefire agreement suai akaih un ‘Nagate tenna teng gawm ding’ chih thumalte tel in akai ua, eiloi in bel ‘Manipur integrity humbit ding’ in suai i kai uhi. Hiai thu na sim in bang ngaihdan/lamet na nei a? Kei tuh ka lungsim ah Pu V. Paukhansiam’ late khat ahong kilang…………

Kua’n sumlei jawl zuikai ding,
Mabang pat zata di’n nuam;
Machaing suan alaizon ah,
Luai bang hong vei adiam maw?
(athu adikkei khak leh ngaihsiam)


Zomi/Zogam movement tuh dinkhol a, alai a luai bang a kivei duaiduai ahi tamai hia leh, chih ngaihdan omthei hi.

Gelngam la’ng e lungmawl in,
Gamlei a-it mizatamte;
Louma kikhat selung tuaklou,
Bangchi’n machiang i suanta diam?

Athumna ah, SoO in agen khaklouh, poi a poimoh khat tuh helpawl khat in helpawl dang a member-te’ tung a khut akhak ding khamna pelou hi. Nagate’n abuaipih mahmah uh tuh hiai factional fight mah ahi hi. Huaiziak in, hiai a suaikaitu (signatory) te’ kiang a ka nget nop tuh, mipi leh sorkar toh kisaikha thilte a zuih dingte hoihtak a azuih kawmkawm ua, factional fight a-omlouh na dia naktak a pan hon lak (ding) uh ahi.

SoO ahiding bangpak a sepsuah in hong omleh, muhkholh theih bang in Singtanggam ahong galmuang (?) ngei ding. Security Force-te’n phaijang helte hon buaipih ding ua, helte buaijak in singtanggam ahong bel ding uh. Sajik Tampak buluh a a-omlai a hel hong taijakte singtang lamte’n ana thuak ekh-ekh bangbang uh ahong tangtung nawn thei. Ban ah, i gam hong galmuang zek leh Meitei-te’n hon haza ding ua Lamka leh asehvel ah ahong gamtang veu ding ua, huai hun chiang in athuaktu a i pan ban ah eite’ khutnung dan in ahon ngoh ding ua, SoO bohsia chi in ahon heek nilouh ding uh. Ei’ lak ah le sum tamlou loh a amaute ana kithuahpih ut (tuntun) bangzah hiam ki-om zomah ding hi. Huaiziak in, SoO tuh hoih hia, hoihlou? chih theihbut ahi naikei, himahleh, kha 2/3 nung in ahong kilang pah ta ding. Eilak a operation suspend a om hiven chi a i lungmuan mawk ua leh hihkhial ngeingei ding ihi.

Khatvei, Shillong a ka U te’n hon phone ua, “Tuibuong/Bijang lak khong suntanglai na-ngon a le vak ngamhuailou khop in agen ua, office kaina ah anuamlou a-om kholkei maw” hon chi ua, “Om tuankei, bangmah kituak zen lou hiven” ka chihleh, “Tuak le chu kikhel di hia maw” ahon chihsan geih uhi. Tuak le zaw kikhel mah inteh! Hileh le, tu’n zaw alungmuanhuai ta. Lighthouse apat Bijang phei mahmah eive, ahuih vohdan le uang diak, hon tawp teuteu mai hiveh, hiai Sihna Limguam in! Ahi, sihna limguam tawn mahle’ng gilou himhim ka laukei ding, SoO a-omta ngal a, Nang lah ka kiang a om zomah lai!


Source: http://zogam.com/index.php?option=com_content&task=view&id=4242&Itemid=32

No comments:

Post a Comment