“MANGPA JESU PAHTAWINA AW”(KALAISAI) (Palm Sunday Sermon) Math 21:9

-Upa S.K. Khama

Thumapi : Mangpa Jesu leitung a angpei lai a “Pahtawina” (kalaisai) anga na thu khantan hoi li(4) tenga imu bangin Jerusalem a, alut a, akipahtawidan saulou in en-vai.

Sabiltungnou khisa: Mangpa Jesu’n pahtawina khat a suoh hi. Tuni a eite shina khauhuol a khisa ihina uh ang thei khesah hi. Mizousie khelna ah ipuasieng ta ua, tua khelna man khu shina ahi a, shina khauhuol in mizousie ang khi chet hi. Hinanleh tuni in Mang Jesu pahtawina angana dingin Sabiltungnou mabang in vanzah poimaw khat na suoh thei hi.

Mangpa teel: Tuami hunlai in, khum gam ah Sabiltungnou khatmai a-um ding gintat hamsapi khat ahi. Hinanleh Mangpa’n pahtawina angana dinga vanzah dingin, tua khau a kikhisa, koima tuan ngailouna ateel sese hi. Unaute vo, tuni in eite zong i Mangpa’n pahtawina angana dingin ang nateel a, “Nouten nei teel sih ua, Ken kang teel jaw a, na ga ding leh na ga uh umden dingin kang namdet hi (John 15:16). Tami jieh in kapa’n pahtawina anga a, tampi’n na naga un, achi hi.

Nuazui mi ni(2): Mangpa Jesu’n Sabiltungnou kai dingin nuazuite lah ami ni (2) asawl hi. Tuama bangin, tuni in eite hing lampui dingin silni(2) angsawl hi. Tuaijiehin, Sabiltungnou kai, nuazuite thumangtah a azui mabangin “Hagau siengthou leh athu tah” a, ang puina khu thumangtah in ina zui uai ? chih iki-etphat dingun deihuai kasa hi. Mangpa’n hing teel nanleh a “Hagau siengthou leh a thutah” in ang puina thumangtah a na zui sih leh na hinna apat in Mangpa Jesun pahtawina (kalaisai) a ngaa ngaisih ding hi.

Sabiltungnou thumang: Tuni in Sabiltungnou thumanna khu gen uongdeu lei uthuai kasa hi. “Sabiltungnou koima tuan ngailouna” chi ahi. Hinanleh Jesu atuan in akitom vawtsih a, nunnemtah in Jerusalem lamzuan in apei hiauhiau hi. Sabiltungnou khu kitom henlen hileh Mangpa pahtawi ut(kalaisai) sam ut numei, naupangte leh mipi atul athen a kikhawmte’n pahtawi in (kalaisai) asam theisih ding ua, Mangpa Jesu ngeel zong atung ah atuong theisih ding hi.
Sabiltungnou khel tampi zu mun ah, Cinema hall ah, zummaw thu leh thumanlou, chiemnui thanghuaite pou ah ikiphumlut zel uhi. Khumbang Sabiltungnou tunga pat in Mangpa’n pahtawina anga-ngai vawtsih hi. Mangpan pahtawina angaa theina pen achi nuom a, anunnem a, akitom sih, thumangtah in Jerusalem lam zuon a peite tung beh ah Mangpa’n pahtawina(kalsaisai) ngaa giap hi. Unau deitahte vo, nang tunga kipat Jesu pahtawi in a-um nai ? Kingaisutpha in, heisung mun ahei khat ah na kiheisan kha ding hi.

Pahtawina Aw (kalaisai): “Hossana Mangpa min a ahingpei khu hampha tei e izaw; Tunung pen ah Hossana “Sabiltungnou tunga Mangpa Jesu atuonlai in mipi nempi kipunkhawmten apuon hoi pente uh, pape kilawmte, nasawlbawhte leh tumnate lampi ah apha uh chi imu uhi. Ahivangin, “pahtawina Aw” Hossana Mangpa min a hingpei khu hampha tei e izaw; achi uhi. Mipiten apuon hoi pente, pape kilawmte, nasawlbawhte leh tumnate apha ua, Hossana Mangpa tuonna Sabiltungnou hampha tei e izaw; chile uh kilawm hinapi’n atung a tuongpa khu pahtawina apie uhi. Tuajieh in, tami in eite theisahnanop hing nei hi dingin gintat-huai hi. Sabiltungnou pen, adanglai in leivui lah a peizel ahi a, hinanleh atung a Mangpa Jesu atuontah chiengin a danga apei ngeilouna puonpha kilawmtah pape hoitah, tumna leh nasawlbawh pha tahtah kipha tungah apei tahi. Unau deitahte vo, tuni in nang zong shina khauhuol a khiisa na hi maithei hi. Hinanleh na lungsim a Mangpa Jesu na tuonsah leh na pei ngailouna “Hundamna puonpha, hundamna kipahna pape kilawmte, nasawlbawh leh tumnate ahoitawp a kipha tungah na pei ta ding hi. Na lungsim a Mangpa Jesu ang tuon a, thumangtah a na pei chiengin na hinna apat in “pahtawina Aw” Hossanna, Mangpa min a hingpei khu hampha tei e izaw; chi in kalaisai angsam khup thei giap ding hi. Tuomi nia pat in na hinkhuo pen pahtawina angsuoh pan ding hi. Pahtawina ni mang dingin, na lungsim ah Mangpa Jesu na tuongsah in, na tuongsah taimah ?

Simtute zousie Mangpa’n guoljawl tahen.

.::. All my articles can be view here: MELTED HEARTS .::.