Zuu-le-sa, khamthei toh I buol leng leh??

By T. Zamlunmang Zou

Zo-le-zuu!?! Zumhuoi salou?? I tuachi louta un tuachi’n hing kichi phiengsan sih mava. Hei sung ah um in, bang nasepna sem in, bang dinmun sang tah tah tu naanlei zong zuu ma in I nua hing zuui valeh khop lou in, I ma kaai zing leh I lampi’a ei kipalpuosah zingtu khu giltah a I ngaisut chieng in zuu ma nahi ngeng ngong valon hi.Sep khat, bawl khat I nei leh lah zuu, I kipa ni, I da ni chi’a zuu a um lou leh I vaiguon uh lawching lou bang khop a ngai sun, lung kim thei mama lou. Mipi mai a I din dileh zuu, insung leh khotaang a I lungkim lou ni chiah zuu, nungah khat I heel a I zaw lou leh lah zuu, tangval khat in a’ng khen leh zuu, ni-le-thum I kisuhtuo leh zuu, meeting I zaw leh zuu, kilawikhawmna khat a I tel dileh amasa pen a I koi zuu, Zo-le-zuu, bang la?????????

Zuu a ki hamuon leh nousiet chi-le-nam kihi valon nalai. Bang chi chieng a zuu-le-sa, khamtheite haamsiet lawkhum thei diing ita diei? Kikhopna khat nei talei lah Pasian kuung a thumna toh hun patna kinei sam, hinanleh a tawpna khu “round table” kihisah zeel. “Though the beginning is small, the end will be great” chi hinawnlou in, “though the beginning is great, the end is shameful” chi thei khop in I gam taangta uhi. Hoi tah a ngaisun kha nailou I diei? Bang zataa a zumhuoi leh bang zataa a bawlkhiel ita uai?“Madu, beer mei mei hibou, zuu zong chita sih, mi officerte’n khovel changkaang dungjui a, a ngeina bang a abawl uleh, nou naupangte’n bang e na geen lih leh uh, sip khiin khien un” chite lah I nu muon huoi tah tahte uh kamsuo hita. Nu manpha, Pasian guoljawlna giil-a-gaa tate mai a I pasal zuu dawn hasot thei kitam sim khopta ma ma, khantouna lamkhat a I khangtou mama un ka thei hi. Hinanleh khangtouna dih ahileh ahilou vang, tunuo kum ni/thum zaw chieng in a hing kilang pai ta ding hi. Tualeh mah ah, a hasot mei a hunsah lou in, “an kam tuina di’n kamkhat, kam ni veel kichiem mei mei hen oh. Tua madu leh beerte pi mi’n niengtui dawn a adawn uh hibou zuh a” chi’n adu a du hinapi aduloute ma ma bang in vachiem teisam hi.

Zuoilah! Nu-le-pa zuu dawn, tate’n mitphe lou keei in khuot sung apat hing luong suh vahieu, a san kilkelte a na en en ta mei uh. Tate lungsim ah bang a um diei? Simtute’n ngaisun vai. “Khovel bukimna chep thei thei chep a, neh thei thei neh dih. Bangma bawl loute mi ching lou, mi phalana khat ahi. Nungah-tangval khat I hi sam leh asia, apha sil chinteng nungah, tangvaal lai a chep suoh diing ahi” chite lah tulai lia-le-taangte kamsuo hita geet zeel. Zuu-le-khamthei chituom tuom chepkha khu, bukimna leh guol tungtuonna bang in I koita uhi. Tuate bawl zieh a bukimna leh guol tungtuonna tah tah ahi nadiei. Ahisihleh, tuote khoilou zieh a mi chinglou leh miphala khat kihi kon a diei leh? Tuabang a ngaisutna nei a tulai a khangdawng melhoi tah tah muolliem zung zungte pi, guol tungtuong hita kon ve un maw.

Guol tung tuong a si hoi a si I chi ngam diei? Tuate bawllou zieh a guol nuoinetna leh phalana lawm lawm um di’n ka gingta sih hi. Khat vei na khoi leh, “asia lah hilawm lawm lou a, a limit I thei pou leh,” china toh ni vei, thum vei, li vei in hing jui van, nangma’n na dawn, na nee laisiepen, na tha na zung in pang sam van, hinanleh zuu-le-khamthei in nang a’ng ne chieng in, addicted to zuu chipen nangma a diing ahita hi. Tuachieh tawp ut in kisie vanguut lei zong, akikhel lampang ahita hi. Tuachieh, a guol tungtuong pa/nu hita ve chin.Koima I kikaap tuomna hilou in, Zo interest a kigeen ahi, a zadaa I umkha leh, a lai gielpa tung a lung nuommaw lou in, bangzieh a I zadaa mah chin eima kingaisun vai. I zadaana san pen suidoh in, aw tuachi ama veleh chi’n lamdihlou apat lamdih zui isawm diing hi.