- S. Mung
Nam itna/ngainatna nei mi’n nam/pawlpi a ding in tha-le-jung, sum-le-pai sen khaw asasih a, gim-le-tawl, gensietna leh jumhuoina teng a thuohmuolsuo ngap a, a luong nasan a taanngap hiel hi.A jieh bang? A nam/pawlpi a it tahtah chi na ahi. Tuachi’n a nam tawisangtu, pahtawitu leh nam/pawlpi kingahna ching mi a suoh a, ama jieh ma in a nam/pawlpi a pallun a, a bahiengnei ah mite nopsa in lamtang a kai let uhi. Tuachi hunlai in nam/pawlpi ngaina tam sih nanleh a ngaina tawmnou khatte jieh in nam/pawlpi tawisang in um ngitnget hi.
Tuhun ah, nam/pawlpi ngaina lou a umnon tasih a, nam/pawlpi ngaina ngen ahita hi. Nang na nam/pawlpi ngaina sihteh chikha lei shitheina khop ahita hi. Hinanle nam ngaina a tam sengseng tajieh in buoina, kiehniemna chite a pieng jawsop mawh hi. Bang jieh a nam/pawlpi ngainat seng jieh a buoina/kiehniemna tung la?? I nam/pawlpi ngainat dan uh dihjoulou deu hiva chi ngaidan kanei hieu leltah hi. Tuaban ah nam/pawlpi ka ngaina ichivang in angaina tahtah ki um mellou china ahi kia hi. I nam/pawlpi pen kam/genthaw a ngaina ngen, lungtang sung a ngaina te’n jong kuo den kengkung mawh, agenthaw a nam/pawlpi ngainatna neilou pen ten jong a zi/pasal, nungahnu/tangvalpa sang in a ngaina jaw hi. A gen a genthaw in vang nam/pawlpi kivaipuoh dingdante, khantou ding dante, bawl ding leh sepdingte khuoiju sang a humjaw in kigen thei chiet tasam hi. Ahinlah i nam.pawlpi sung ah buoina, kiehniemna um jing hi.
Nam/pawlpi hat leh khantouna ding in nampikhuom (lamkaite) detsah poimaw mama hi. Halaw bei a nam/pawlpi pawding a lamkai di’a itelte uh tha-le-jung, sum-le-pai a phungvuo a, nang leh ken ibawl thei khamkham a bawlpi a, juunpi ngai hi. Lamkaite guoh in nam/pawlpi khat mipi panpina lou in pawjoulou ding, hatsah joulou ding a, khangtousah jou dieh lou ding chi theisa ahia, thei ngawingawi ahi hi.
Nam/pawlpi hatnang lehkhantou ding lah dei mama mai, ‘inam/pawlpi uh jong mi a tawh tekah in....’ chia a phunding kidem khop, ahinlah nam/pawlpi nasep tawh kisai bawl ding, sepding, taikawi nading, etkolding leh panlah nading a um chieng a kilepnading sui a buoi, Uital kihatsah tah Uidangte mai a meikhup a vah diangduong tawh kibang ngen. Kipieh jawna lah kinei mama lou, hinanleh a kipejou, sum-lepai thaw gige leh semjou sunsunte patawi a noutawi malah a gensiet belap, thamlou in a thanuomte jong thasiet sah belap nalaiset. Lucifer nuojui di’n jong kichienthei vevaw sam hai e maw! Setan in jong ‘talawmlawm mai noulawi...’ an’g chikhah ding gintat huoi mai sa ing.
Nam/pawlpi na it tahtah a,ahat ding nadei a, akhantou ding na utleh nalawi- napai, na sanggam-suopi, nu-le-pa guolte leh pi-le-pu guolte nasan tawh inam/pawlpi khantou ding dan houlimna a gentangpi a nei kul-le-poimaw mama hi. Khat-le-khat kigensetuo; mi nu-le-pa kikal thu vasai/gen, ipasal/zi te mi kung a ahoilou nateng gen a dada..didi.. sa, nungah-tangval kingai teng thu houlim na a nei, phun nading hawlkhop chite pen khanglui lai ate hita. Nam/pawlpi khantouna ding leh masawnjel theina ding thute houlimna bang a nei gige ngai sa ing.
Nam/pawlpi khantou leh hat nading in toumun a genthaw leh ngaituo dedu hun ahinawn sih a, a practical mama a kuonkhia a, sem a, bawl a, panla a, enkai a, enkol a, kitawsawntuo a, sum-le-pai, tha-le-jung a pankhawm a phungvuo hun ahita a, tualou ngal in nam/pawlpi hat in khangtou theilou ding hi. Nam/pawlpi hat leh khangtou na ding in nang leh ken bawlthei inei hi. I bawl theidan uh kibang kholsih nanleh ibawl/isep na lam chiet a sep leh bawl poimaw ta hi.
I nam/pawlpi hat leh khantou nading in nang banglam ah pan nala ngap ei; sum-le-pai amaw, tha-le-jung amaw?Tam option ni te ngaituo vengveng inlen khat penpen beh ah panlah sawm inlen tuni apat pan la mawng vawi ta. Na kisia sih ding a inam/pawlpi hat leh khantou na ding a khuom dettah khat nasuoh ding hi. A genthaw in vang nang-le-kei sang a gensiemjaw leh mi thujaw dan siem tam seng ta. Nang-le-ken practical in bawl mawng vai suopi sanggam laiguijom.
No comments:
Post a Comment