APL anntang zuakding
Lamka July 31: FCS Depertment in zingchiang August 1, 2007 zing dak 10:00 apan sunnung dak 3:00 tan Lamka Police station kiang a FCS Mobile Shop leh SP/CCpur Office kianga FCS Mobile Shop ah Above Poverty Line (APL) Card neite ading in APL anntang zuakna neiding uhi. Hiai ah APL Card 1 ah anntang Kg.8 jel leitheih ding hi.
Inter School Games hunsuan
Lamka July 31: State Level Inter School Games Meet hongtung ding August 1-6, 2007 kikal sung neih ding a geelkholh a om pen lemtaanlouhna khenkhat ziak in ahunsuan a om hidan in DYASO/CCpur apan thutut kingah hi. Ahun leh amun ding bel awl a kitheihsak thak hiding inleng thutut kingah hi.
Cycle Workshop 1 kaangtum
Lamka July 31: Tuibuang a Radhakrishnan Foundation School kong a Mr. Ranjit Singh Cycle Workshop tuni zinglam dak 2:00 vel in akipatna theihlouh in kaang a Fire Brigade te sap himahleh meikuang nasatluat ziak in kangtum man hi. Hiai workshop kaangtum ah van tuamtuam Rs. 41,000/- man vel ding kangtum hidan in Fire Brigade te’n tuat uhi.
CDSU in Khawnvaktui zuak
Lamka July 31: CCpur District Students’ Union (CDSU) tuni zing dak 10:00 vel apan in New Lamka Area, Sagang Area leh Molnom Area ah Khawnvaktui zuakna nei uhi. Zingchiang in leng Teddim Road M/S BB Lal&Co. pansan in huaikiim nai a tengte ading in zing dak 10:00 apan in Khawnvaktui zuak nawn ding ua, Saikot leh akiimvel a khua omte ading in Saikot khua ah zingchiang mah in khawnvaktui zuak ding uhi. Khawnvaktui bel Litre 1 ah Rs.12/- jel in inkuan 1 ah Litre 4 zel in zuak uhi.
Treatment Launching Programme
Lamka July 31: National Vector Borne Diesease Control Programme nuai ah Malaria Department/CCpur saina in hongtung ding August 4, 2007 zing dak 11:00 in Synod Hall, IB Road ah SP+ACT First Line Treatment Project Launching programme om ding hi. Hiai hun zatna ah Health & Family Welfare, CADA, Labours & Employment Minister Ph. Parijat Singh in Chief Guest hihna toh uap ding a Power Minister Mr.Phungzathang Tonsing in Guest of Honour hihna toh uap ding hi. DC/CCpur Mr. Sumant Singh, IAS in leng hiai hun Functional President hihna toh uap ding hi. Hiai malaria damdawi SP+ACT bel North East a State tuamtuam te ah District 1chiat ah zat theih ding hi. Assam a Karbi Anglong, Arunachal Pradesh a Lohit, Manipur a CCpur, Meghalaya a Tura, Mizoram a Lunglei leh Nagaland a Dimapur banah Tripura a South Tripura te kia ah zat hiding in kigen hi.
Anntang tamtak pawkhia
Lamka July 31: HQ Veng a FCS Godown apan in zan in Singngat A/C Nominee in amau bialsung ading anntang truck 7 pawkhia hi. Tuni’n Thanglon A/C Nominee in amau bial ading anntang truck 7 pawkhia a, Tipaimukh bial a MLA Nominee in leng Truck 5 pawkhia hi. CCpur A/C ading leng Truck 2 puakkhiat in om hi.
Anntang hawmding
Lamka July 31: CCPur A/C MLA Nominee in Zenhang Lamka Hausa Mr. Letboi te inn a BPL anntang Quintals 181 akoihte zingchiang in Nehru Marg, Beulahlane, SA Road, Khuga Tampak , Zoveng leh Zenhang Lamka leh Mantop Leikai (Polling Station 31-38 kikal)te ading in zing dak 9:00 apan in hawmna neiding hi.
MTA Sangtak in zoukhia
Lamka, July 31: Mr V Haukhanlian S/o Pastor V Chinpau of Chimtung Veng, New Lamka in tuma zek in Bangalore University nuai a Christ College apan Master of Tourism Administration (MTA) 65.9% mu in zoukhia a, King Fisher Airlines nuai ah Cargo Supervisor nna mungal hi. Mr Lian in ahihleh, St Edmund’s College, Shillong apan BA (Sociology) sangtak in ana zoukhe ngeita hi.
Annhuan dan sinsakna
Lamka July 31: ICDS/CCpur nuai a Lamka Block, Tuibuang Block, Saikot Block leh Sangaikot Block sung a Anganwadi Worker leh Helper teng a ding in hongtung ding August 2, 2007 zing dak 10:30 in New Lamka YPA hall ah Ann huan dan toh kisai training omding hi. Hiai hunah Anganwadi worker leh Helper teng telkim ngai ding hi.
Deputy Speaker teelna August 2 in om ding
Imphal July 31: Ninth Manipur Legislative Assembly a second session, tuni zinglam dak 11 in Assembly hall ah kipan hi. Hiai hun ah, 4th Report of the Business Advisory Committee, 2007 kichi Chief Minister O.Ibobi in pom ding in Inpi ah luikhe mahleh, opposition lam apat O.Joy MLA in, Assembly a Deputy Speaker post awng a om toh kisai oppositon lam te piak dia ngen kawm in, hiai post luah tu ding teelna session sunga neih dingin phutna nei hi. O.Joy MLA in a gen beh na ah, Deputy Speaker post kichi constitutional post ahihban ah, parliamentary practise leh tradition dungzui in sawt koihdap hoihlou dingin leng gen hi. House makaitu O.Ibobi Singh CM in leng hiai tungtang Congress Legislature Party in hoihtaka genkhom na neita ahihdan uleh, Inpi a, atamzaw hoihsak ahihleh Deputy Speaker teel ding poi salou ahihdan gen hi.
Law Minister Th.Debendra Singh in leng hiai post poimoh tak himahleh tunitan teellouh ahihziak dan bu a hunchiam omlou ahihziak hidan in genchian hi. Hiai dungzui in, Speaker Dr.S.Budhichandra Singh in Deputy Speaker teelna session hunsung a neih hidingin puang ngal hi. Tua toh kiton in Assembly Secretary T.Joute in Bulletin Part II suah a, tua ah Deputy Speaker teelna August 2, 2007 om dingin thusuah bawl a, tua dingin nomination paper leng August 1, 2007 sun ma tan a piaklut theih hidingin taklang hi.
Chandra Sekhar suunna hun zang uh
Imphal July 31: Tuni zinglam a Assembly session ah India Prime Minister hingei (L) Chandra Sekhar suunna hun Assembly Speaker Dr.S.Budhichandra makaih in om a, tua hun a Chandra Sekhar hinkhua toh kisai in thugenna, Leader of the house leh Chief Minister O.Ibobi Singh, Opposition leader, Radhabinod Koijam MLA, Ph.Parijat Minister leh O.Joy MLA ten nei uhi. Hiai te zoh in member tengin minute 2 sung dinsa in suunna hun zang uhi.
Assembly in Assam Rifle te gamtatna naktak in mohpaih: Privilege committee in AR te gamtatna suizui ding
Imphal July 31: Apaisa July 18, 2007 ni a, Health and Family Welfare Minister Ph.Parijat in official tour a Bishnupur district sunga Primary health centre tuamtuam, Oinam, Saiton, Kumbi leh Wangoo Ahanlup munte Health Servces a Additional Director, Family Welfare Additional Director leh Kumbi MLA N.Mangi toh va enkhia ahoh, a kiklam ua Wangoo Sagang mun a 7th Assam Rifle ten detained abawl utoh kisai leh tuamun a Major Nikhil Thakker kampau leh omdan kilawm lou toh kisai in, Opposition MLA O.Joy leh R.K.Anand ten tuni'n assembly ah Calling attention motion khat polut uhi. Hiai hun a O.Joy MLA in agenna ah, hichibang a Minister khat official tour a hoh India flag gari a leng kitak himahleh Assam Rifle a Major khat in aziak omlou a, detained abawl kia hilou a thudotna leh kampau leh omdan kilawm lou aneih in, mipi palai te suminsia leh parliamentary su mualphou ahihdan gen hi. Mawk a koihdap mailou a akituahpih action Army officer tunga lak ding in O Joy in Inpi ngen hi. Hichibang gamtatna pen breach of privilege of the house ahihdan gen hi. Dan dungzui in civil servant khat in mipi palai detained leh mat aneih leh ahun, amun leh aziak hoihtak Assembly Speaker atheihsak ding himahleh hiai dan zuih omlou ahihdan leng gen O Joy MLA in gen hi. Hiai toh kisai a Bishnupur police ten leng bangziaka FIR case chiamteh lou uhiam chih dotna bawl kawmin, Home Minister leh CM kiang ah, FIR bawlsak dingin O Joy in ngen hi. Army lam ten inquiry bawl ding achih lel uh hilou a court martial bawl ding ahihkei leh, civil court a trial bawl hoihding in leng ngaihdan gen hi. R.K.Anand MLA in leng Assam Rifles discipline neilou te zillai hoihtak piak kul hidan a gen in, Minister tunga hichibang gamtatna Army ten aneih theih ua leh mi nautang tung ah bangchi phet in a om ding uam chih dotna leng bawl hi. Calling attention motion polut ten notice apiak bangun, thil omdan chiangtak in Minister Ph.Parijat leh N.Mangi MLA ten leng Inpi ah puankhiakna nei uhi.
Ph.Parijat in agenna ah, official tour ahoh ding utoh kisai approval Home leh CM ban ah DGP kianga la ahihdan gen in, akuanlam ua bangmah chilou himahleh, akiklam ua AR ten gate honglou, gari horn tamvei tak mekkhum nunga gate hon hipan leh tuazoh a santry duty in a commander un kihoupih nuam chih jiaka, minute 10 val ngaksak a om uh ahihdan uh gen hi. Army officer kampau kilawmlou leh discipline neilou ahihdan genkawm in, mualphouna tuak ahihdan leng gen hi. Phungzathang Tonsing in leng hiai thiltung naktak a mohpaih ahihdan leh Assam Rilfe Major gamtat dan serious tak a ngaihtuah ahihdan leh, Army in hiai tungtang bangtan tunta hiam chih leh Sagang mun a Major pa omlai hiam, GOC in bang action lak neita hiam chih dotna Home Minister leh CM kiang ah bawl hi.
Chief Minister leh Home minister incharge pua O.Ibobi Singh in hiai thiltung toh kisai July 19, 2007 a, 57 Mountain division GOC Major General T.S.Handa, IGAR(South) Maj General B.K.Chengapa leh Council of Ministers, Manipur DGP tel a, genkhawmna ama office ah nei uh ahihdan gen in, Army authority in kintak a major tunga action lakna dia inquiry bawl ding thuchiam bawl uh hidan in gen hi. Hiai toh kisai ama Chairmanship na nuai a Unified Command meeting nawn chia leng pokhe ding ahihdan CM in Innpi ah puankhiakna nei hi. Calling attention polut te deihna bangin leh hiai thiltung toh kisai angaihdan tuamtuam tampi genkhawm ahihnungin, hiai tungtang in Inpi privilege sukha ahihna ah, Assembly a privilege commiittee a piakkhiak lemsa uhi.
House Committee casual mun awng hukdim hiding
Imphal July31: Manipur Legislative Assembly a O.Joy Singh MLA, Chairman, Committee on Public Accouts leh M.Manindra Singh MLA, Chairman Committee on Public Undertakings nuai a casual post khat tuak awng omte mun luahtu ding teelna August 2, 2007 in om ding hi. Hiai tungtang tuni a Department nih a Chairman ten' Inpi ah move abawl uh ahi. Tuaban ah, Chief Minister O.Ibobi Singh in leng Salaries and Allowances of Chairman of the Manipur Legislative Assembly (Hill Areas Committee) Third Amendment Bill, 2007 introduce bawl hi. Hiai bill bel, August 2, 2007 chianga genkhom leh pass hingei dia gintak ahi. Tulel a HAC Chairman bel, Kangpokpi MLA (NPP) Thangminlien Kipgen hi a, Vice Chairman leng Tamenglong MLA Khangthuanang Panmei ahi.
BSc(Forestry) : Forest Department Govt. of Manipur in CAU a B.Sc
(Forestry) course zilna ding toh kisai in application sam lel hi. Lunglutna nei 10 + 2 (Physics/Chemistry/Biology or Mathematics) zousa general te 50% leh SC/St 40% muten' form Rs 100 piakin Conservator of Forest/Amn & Plg. Sanjenthong apat lak theih dinga, August 7, 2007 tan in piaklut theih ding hi. Written test August 14, 2007 , 11am chiangin Forest Head Office, Sanjenthong mun ah om ding chih thusuak om hi.
HSLC expelled : HSLC Old course exam pailel ah tunin' chindan hoihlou
ziakin Lilong 'B' centre apat Rollno. 7453 hawlkhiak a om hidanin Controlller of Examination, BSEM thusuak om hi.
ATSUM in demand pichinna dingin Govt. ni sagih sung hunpia
Imphal July 31: All Tribal Students Union, Manipur in govt. a demand tuamtuam aneih uh pichin nailouh te toh kisai pichinna na dingin, tuni July 31, 2007 apat sim in ni sagih sung Govt. hunpia uhi. Hiai hun sunga pichin ahihkei leh, ATSUM in August 6, 2007 zankim apat kiphinna pandingua, action banghiam a om leh ATSUM mohsak hitheilou ding hi’n tuni'n ATSUM Assistant General Secretary, Apao Haokip in thusuah bawl hi.
Hiai thusuak ah mipi te theih dingin point tamtak taklat in om a, tuate Govt. in kul leh poimoh asak dan a hihdingin leng taklang hi. MPSC Official rules leh procedure omte 'Reservation for SCs & STs' zuilou a, hiai toh kisai a hilhchetna dia hunpiak leng beita hi. Govt. in kintak a, asepsuah kei leh 'justice delayed is justice denied' chih suak ding hi’n ATSUM thusuak in taklang hi. Tuabanah, Special Secretary (Home) in July 19, 2007 a thusuah abawlna ah, Jemadar 22 te Subedar dia promotion piak ding chih ahi. Hiai ah leng reservation leh 100 point roster system paidan zuih omlou in, promotion 22 piak lak ah ST 5 leh SC 2 telkha hi. Reservation a 33% (31% ST leh 2% SC) chih himahleh ST 7 ding lai mi 5 chauh promotion piak in om hi. Thudang khat ah, Jemadar 31 leng Subedar a promotion piakna ding DPC hun tanpha bikhiah omta chih ahi.
Manipur Govt. in unofficial in MU a tribal te haksatna te enkai ding High Level committee bawlkhe ding chih himahleh tunitan step bangmah lak omlou hi. Hill District a contract basis teacher lakna toh kisai, Govt. in May 5, 2007 in Hill area contract basis teacher semdia lakte hun suksau dingin lemsa mahleh, hiai toh kisai official thusuah Govt. in bangmah bawl tuannai lou. Hun paisa ah ATSUM in kuahiam Nam khat in pau, tawndan leh laimal khansak nadia thilhih aneih te nang kei mahleh, midang te feeling sukha ding ahih leh kintak a hihlouh ding chih ahi. Hiai toh kisai in leng hun paisa ah singtang gam ah reaction omta hi. ATSUM thusuak in agenbehna ah, gari number laimal nih zangten' singtang gam adia number plate dang zang ding in leng theihsakna bawl uhi. CDSU in CCpur district a dia PDS item amau share demand ziaka helna aneihte uh, Govt. in kintak a sukveng atup ding ahi chi’n ATSUM in theihsakna bawl ua, ATSUM in dai dide in enkhe hetlou ding ahihdan taklang uhi.
Manipur a NIT bawlkhiak na ding toh kisai in district tuamtuam a civil organisation leh student bodies ten amau district a dingin ngetna nei in gam tanpha thoh dingin gen mahle
uh, Govt. in donsak lou in mun kochik tak phaijang ah NIT bawl khiak teitei tupna nei uh hi’n ATSUM in gen ua, Central institution tuamtuam te phaijang chauh a omsak ding chih dan leh thupiak khauhtak om hiam chih leng Manipur govt. ah dotna bawl uhi.
NEWMAI NEWS:
Ukhrul ading Mid Day meal thelthang
Imphal, July 31(NNN): Tangkhul Katamnao Saklong (TKS) in tuni in Government kiang ah lehkha pelut in Ukhrul District a ding ZEO Ukhrul in mid-day meal antang quintal 400 lakhia a, hiai toh kisai a muhding te’n mulou ahih ziak in Government in kintak a etkai sakding in ngen uhi. TKS thusuak in a genbehna ah, Chingai, Ukhrul, Kamjong, Kasom leh Phungyar ading mid day meal May, June leh July kha ading Ukhrul ZEO office in labei khin hidan in ngohna bawl uhi. TKS in ZEO Ukhrul nasepdan toh kisai document bukim nei uh ahihdan taklang uh a, Chingai ading sun-an 175.70 quintals, Kamjong ading 86.80 quintals, Ukhrul ading 66.50 quintals, Phungyar ading 49.70 quintals leh Kasom ading 44.24 quintals te ZEO in alakkhiak ni leh hun leng TKS in theivek hi’n taklang uhi.
Assam Govt. in CBI khut ah pekhia
Guwahati, July 31(NNN): ULFA pawl in a pimang uh Food Corporation of India (FCI) Executive Director P.C. Ram sihna toh kisai in Inntekte ngetna bang in Assam Government in Central Bureau of Investigation kiang ah piakkhiakna nei ua, CBI in suina panding hidanin thusuak kingah hi. Food Corporation of India (FCI) Executive Director P.C. Ram ahihleh, United Liberation Front of Asom (ULFA) pawl in apimang uh hi a, Police in ava hutkhiak sawmna lam uah va kaplum kha laizang ua, hiai toh kisai thuguk kigolh ding in Ram sungkuante’n muanmohna liantak nei uhi. Assam Chief Minister, Tarun Gogoi in agenna ah, state Police pawl in Ram a thah uh hidan a thusuak om ziak a CBI khut a alut mah ngai ahi chi in, hiai in thutak a hon puaksuah a lamet thu leng gen hi. ULFA pawl in ahihleh, Ram taksa tung a lut Police te thautang ahihdan gen ua, huai bangbang thautang ULFA in tawi ngeilou hi’n gen uhi. PC Ram ahihleh, April 17 2007 in pimang in om a, June 30 in kaplup khak in om a, New Delhi ah July 2 2007 in haltum in om hi.
Hunchiam omlou Ceasefire di’n kilemna bawl
Dimapur, July 31NNN): Government of India leh National Socialist Council of Nagalim (NSCN-IM) pawl in tuni in Dimapur mun ah Ceasefire toh kisai tel in thu tuamtuam houlimna nei ua, huai ah August 1, 2007 apan hunchiam omlou hiamkham thukhun neih ding in kilemna suaikai uhi. NSCN (IM) leh India Government in 1997 apan Ceasefire nei in, Europe gam bup tel in khovel mun tuamtuam ah kihouna tamveitak nei ua, Nagalim sung ah kihouna aneihpat na uh hi’n kigen hi.
Tuni zinglam dak 11 geih in Circuit House, Dimapur ah Indo-Naga Peace Talks kipan a, nitaklam dak 3:30 pm tan neih in om hi. Meeting zoh ahih toh kiton in, Centre Interlocutor K. Padmanabhaiah leh NSCN-IM General Secretary Th. Muivah in joint statement bawl in, huai ah, kihouna lamzangtak in pai tou zel a, ceasefire toh kisai leh lemna thugen toh kisai ngentel tak in velna om a, lemna leh muanna kip taktak om na ding lunggulhna ziak in August 1, 2007 apan hunchiam omlou Ceasefire neih ding in lem kisa chi uhi.
Maban kihouna a lamzang semna ding ngimna leh gah kipah huaitak a suantheihna ding chi in Ceasefire monitoring cell suk hat ding in leng pawl nihte’n lemsa uhi. NSCN-IM Collective Leadership thusuak in agenna ah, hunchiam omlou ceasefire ahih toh kiton in India Government in akinlam a Nagate thil nget a sukpi chin uh kinep huai mahmah ahi chi uhi. India Government lam ahihleh, Union Labour Minister Oscar Fernandes, Centre’s Interlocutor K. Padmanabhaiah, Secretary Intelligence Bureau Ajit Lal leh Joint Secretary Intelligence Bureau Naveen Verma te’n makaih uh a, NSCN-IM lam ahihleh, Chairman Isak Chishi Swu, General Secretary Th. Muivah leh Kilonser (Minister) 20 tel uhi..
NSCN IM in special federal relation, Nagate a dia Constitution tuam vilvel, Naga-inhabited area te gamkhat ah gawmkhop ding chih te genkhawm kha uh a, himahleh, hiai toh kisai puankhiak bangmah om lou hi. Oscar Fernandez ahihleh, Minister for Developement of the Northeast Mani Shankar Aiyar ban ah official tamtak in leng zui uh a, IT, telecom, home leh Defence official te leng tel uh a, amau bel North Eastern Council (NEC) meeting ah tel hi un kigen hi.
Source: www.zogam.com
No comments:
Post a Comment