Wednesday, August 01, 2007

Tulai Lamka III


By Lealyan Thomte Denmark

2007 Lamka MLA Election sousang lai a va tung khathei di kahi chih kha, ka omna apan ka hong kipat khiak ma inle ka thei a. Ka huphurh mahmah a. Lamka a' term' khat lai a heutu nih ki maituah ziaka, ka maakpa pa khat uh gan vuak a vuaklup a ana ombang kathei a. Hithei liai leh, hichibang, i heutu te tel di hun a Lamka om khak ding hi ka uut het kei hi. Himahleh Lamka a mimal thil hih di kaneih leh poimoh a ka ngaih , ka sepna apan 'suti' ka laak di leh 'return ticket' a hoih pen Austrian Airlines te a ka muh theih in - huai hun lai a Lamka a ka om a hon ngaisak mawk hi.

Hilele, 'politics' him him leh kum 4/5 lalna kituh leh Lal bawlna lam ah lunglut luat na hi a na nei ngei khollou kahih man kialou, ei te 'politics' kimawl daan te bang - beh leh phung tan khong hilel ahihjiakin, gen tamlouh leh pautamlouh hoih kasa a. Va gen tam a va pautam di hi lengle, a kua hon thulaak di le kihi saam lou ahihjiakin, ka veng kiim vel ua INC leh NPP flag kitaak te khong ka en sek zaw hi. Kua 'flag' a tamzaw leh tawmzaw chihbel kasim khol kei. Hilele, mi kihou leh kikup vengvung nate leh - a thuleng te ka theih chiangin, panpih leh gup guuk bang kava neikha mawk hi. Himahleh, a poimoh a katheihpen chu, Lamka mipiten a deih a tel theih uh hi thil thupi hiin kathei hi.

Lamka zuan a kahong ziin na a, Nepal suahlam khaw lianlou apan hon na kithuah leh honna makaihtu Rama tung ah kipahthu gendi tampi ka ba a. A min tawn zang lou a, Rama kahon chih lel naziak omkha ding in. Himahleh tulai saptuam a dinmun hihna nei te lak a lungsim zau leh lian puu kialou, tulaai khangthak te dinmun leh thiltuah theisiam te khat ahih baakah, amah ngei inle, Lamka bang a khangthak hihdan leh i gam dinmun mumal louh jiaka thil haksatna tampi te a hinkhua paisa te a ana tuak kha sam ahi.

Khatvei chu khamtheih hihte etkawlna ah, thu geen di in hon chial hi. Ken ka damsung a thugen kialou, mipii ma ale ding ngeilouin leh theih leh siamna neilou in bang pentak va gen a va hasawt di kadiam ´chih kathei kei hi. Himahleh, kei bangle khamtheih teng a ana kibual kha sam kahih ziak in - ka thiltuah te apan lametna, kawkmuhna bang a neih khak uh leh chi in, kimuang lou sim pi pi in ka va zui a. Rama kianga bat nei a kingaihna le ka neih jiakin. Kei hi, hun paisa a thiltung leh kahih te ki zahpih mi kahi kei a. Huaite apan tu bang dinmun ka tun theih ziak a kisathei te hizaw kahi.

Saptuam buatsaih khamtheih hihte etkawl na ah, mi 4 kia ana om ua. Compound liansim tak ah. Ka va phaak nii un Nurse khat ana om a, annhuan tu leh a Center enkawltu hi awmtak khat. Midang bangzah in huaimun a sem uh hiam chihbel ka dong khol kei. Hilele, Lamka a saptuam te bang le mini-sorakr dandeuh sim ahih jiakun, a poimoh khollou, lah lawh le tam piak ngailou a nasem bang omkha ding un ka ging hi. Rama bel Counsellor dan a vasem ahi.

Ka hong kikhawm ngei ua. Kenle, hiai tangval/tleirawl te bangchi a hasuan thei di kahia chi a thu leh thilte kahon kup chiangin - a Center a makaaitu uh, a nung lam a, gen louhdi ka genkhak di enkhia hi awmtak a tu hi ka haih thei kei hi. Huai kachih nasan chu, ka lawm leh sanggam hoih mahmah khat in, kum 25 val bang khamtheih a akibual nung, hong Piangthak in leh Pathian thu hi muh daan khat in ana mu a. Khatvei khamtheih etkawlna a Counsellor dan a va kuan in, a Pathian thu leh saptuam muh dan khong a gen leh, a Center neituten a thugen deihlou un, va pha nawn lou din hilh uh hi.

Hilele, ken Pathían thu gen leh hilh dia theih leh siamna neilou kahih jiakin - mimal khantouhdidan leh i hinkhua a pan sin leh lampi hoihzaw lam a kalsuan di daante ka kup pih a. A theisiam lua unle kathei khol kei hi. Ka gen siam louh jiak le hikha ding hi. Hilele a Center 'visitors book' ah chuh, ka min leh ka omna leh thugenna ka va neihdan te a hon gelh sak uh hi. Sorkar bang zen in copy 3 inzaw ka gelh in suai ka kai kei a. Mi 4 kham tawkdia ka theih bawngsa ser khat mandi nusia in ka hong kiik uh hi.

Huailou a ka khangthak leh tuailai muh khak te chu, autorickshaw hekte, rickshaw hekte leh tui zuakte leh niteng a kilawh te a hi deuh uh hi. Hilele, khanghtak leh tuailai - ka chih uut mah mah - ka muh tamtak te chu Lamka hanmual ah ahi. Tabitha Home achih uh khanglam leh Sielmat Bible College nung a, ka Pa haan suang di ka bawl lai un, mun lianlou chik, 30 sq.m sungvel ah, tangval, nungak súan huaitak tak leh mimal a kana theihkhak te hansuang 15 val kasim kha a. Kum 25-35 kar khong ahi deuh uh kialou in, hunlou lua a bei hi ua katheih jiak in ka diip kua in ka dang hul hi.

A tamzaw te khamtheih ahih jiak uh hikha ding in ka um a. Ahihkeh akhamtheih hihjiak ua, natna a hon neihte jiak uh hi kha ding hi. Himahleh, ka lungsim ngaihtuah na a bei theilou chu, khamtheih ihih/ahih jiak ua - ei a damlai te sang a sual zaw uh hiam? I heutu leh khotaang leh saptuam ten khamtheih hihte mihing bang a i et theih nai louh uh hi poi kasa in theihsiam haksa kasa hi. A khelhna hua a - a khial tu pa/nu huat louhdi ahi chih kha kuamah in kithei uut lou hi. Khamtheih hihten, khamtheih hih hi - a tel, deih leh a duhthusam pen uh hikhollou ahi. Hilou ahi chi zaw leng dikzaw din ka ging.

I gam leh i dinmun, i nekzawn nadite hong bing in, sungkuan a Nu leh Pa te'n, a tanu/tapa te ading un a hoihpen deihsak mahleh, amau siam leh theihna kialou, ahihtheih tan uale a khut te uh ki nung leh hensawm te ahih jiak uh hikha ding hi. Huan ah, tulai Lamka a khangthak, tleirawl, nungak leh tangval, pil leh navaak taktak te leh i zingchianga a hon makaih diite hon pulh san zungzung na san, a bul a suut khiak tum kialou, a suut thei diiten le suut khe ngam leh uut lou kibang hi. Suut theihdi hia, chi a ngaihtuah nachang neithei leh poimoh ngaih le ki omlou hi. I tantawk a lung kim mai. Pathain thu thu. Ichih leh Christian na leh hindan hilou in, Hindu sakhua te zui 'Karma' pom akibat na bang om hi.

A khotaang aw neithei, heutu ahihkeh makaai leh dinmun hoihzaw neiten, i ta/nau te mun hoih zaw leh gamdang - Shillong, Bangalore, Delhi ah i thon suah ua. I innkhang, innsak, i khotaang pih pa/nu te sungkuan thiltuah leh haksatna pen in i lungtang deng kha nawnlou hi. Ajiak bang hi di hiam chih sui leh ngaihtuah lou in - a huchi, a khachi ua eivele, chi pheu phau in mahni tanu/tapa te gamdang a laisim, college i kaisak theih leh ihih di zou in i ki thei hi. Adik na chiang om lawtel. I sung, innkuan leh tanau te i khual leh ngaihtuah poimoh masapen hi.

Hilele, tu a, Nu leh Pa..Lamka a om leh a tanu/pa hiam Shillong, Mumbai, Delhi a khateng a chawmten..nei zou tak leh i Lamka khua dinmun uh, lungkim tawk tak kisa a om i om uh hia? Kha thum nung khong in lawh na la ua.Tubuong a office kaibang na lau ua. Poimoh na a om chianga, GPF tamlou na khol sun te uh na lakkhiat ut chiangun a 'dealing clerk' te 10-20% bang na pia ua. Bat a sum na laak uh leh 5% per month bang na pe tel uh hilou maw? Ahihkeh, saptuam a kihel thuk mahmah e chilou in, i singtang gam a 'posting' na te uh - va zawm lou in leh hausa te tawh kithutuak in sorkar khem bang sualna in i ngai thei nawn kei hi.

Kachih bangin, sawtlou Lamka a kahong omlai in, khangthak leh tuailuaite, lim leh kipak lua hi muh ding kanei kei. Kum 25-30 paita laikhong a, Pathíanni taak chianga a, Tiddim Road a kikhop ma a, kuva hai khom a, lamlian dim phial phial, nungak tangval ki vak nainai in, zaan Biakin dak hong ging chia lamlian daaivek chihte bang ka ngaihtuah chiang in lunglen huai kasa a. Kei bel huai daak te ginzawh nung a lamlian zui laite himahleng.

Tu in naupang kialou, tleirawl leh lawm ngai te adia nitak leh zan hinkhua omnawnlou. Naupangte school sunnung dak 2/3 a hong kiik un, a iin ua compound a neih ua, sanngam a neih uh leh kimawl un. Khenkhatten a home-work uh hih un. A siamna uh leh a theih theih dite uh, a lungluut nate uh, hasawt a kithuahpih theih na di bangmah omlou. Kimawl lung lut te adia kimawl nadi lah omlou. Laisim lungluut te adia Library kialou, lehkhabu mumal zuakna le omlou. Upper Lamka Biakin ma leh Lamka playground khang chin a, Community Hall bang chu..zuun louh leh se gawp. Hiai Community Hall bang 'EI' a ahi chi a ngaithei ki omlou. Hilele a siik a YPA HALL lian a lian a kibawl lel bang ka muh chiah..what are we thinking?? Kachi uut hi.

Meivaak hong pai ni zaan a, dak kaar 1 leh 2 khong a Korean serial khong sungkuan phial phial a en in - huai le a DVD/CD khelh man pia a va khelh- leh 'No rul charang ka' lehna bangle kithei vek din ka ging. A pau lah theilou, hilele, a English 'sub-title' bel kisim thei, theisiam thei a, a taangthu te bang ina zuih theih bang a thupi daan thei ki om banglou hi. Bihar leh Jharkhad ichi di hia, ahihkeh Rajasthan gamkeu a khosa te sanga a i theih na uh saang zaw ten - Lamka leh Lamka miite in hiai sanga, thilhoih zaw phu kahi uh chi a kuate aw hong kikou khe ding hiam?? I heutu leh makaai ten amau sakhau leh hauhsak nadi a ngaihtuah lai un, I sahkhua leh saptuam ten bil a dawh theih louh lai un - kuaten i khanglai/tuailai leh i mabaan heutudi te, leh i khotaang leh i Lamka adin kalsuan di ihia.

I vek un. Nu leh Pa. Ta leh naute leh a tak a sepsuah uut leh khovel a i damsung pen thil tak leh, i niteng thil tuah ahi chih thei a - sihnung, kuamah theilouh zalmang leh gindan i neihte, tutphah vual nihna a i tutsak phot ngai kha ding hi. I kiim i kiang en ni in, gam hausa leh gam nuamte en ni in. Bangziak hidi hiam chihte bang theih tum kialou in, kidong tuah ni hang. I gam a haksatna hon tuntu leh i gam buaina te 'tarmit' hat tak bun a i ki et thakthak uh tawh kitawn in..huaite suk dik a poimoh daan, a neu a lian in i theih uh poimoh petmah kha ding hi.


www.zogam.com

No comments:

Post a Comment