Zou Custom leh Sangnaupangte

Xavier Nengkhanlam

I Zou ngeina leh tawndan thei ding leh juiding a poimaw mama pen agamla anai chi umlou a koipou simthei ding a um pen nuomtuom mama hi.Tami apian thei nading a panla te phathuoi in tawmngai kasa mama hi.

Lungsim a kepching ding (By heart) pellou a poimaw te lah a khat in ka ngaitua hi.Khangui dan leh tawndan theilou a umkhah dingpen azum huai leh zauhuai mama
khat ahi hi.Adiah in ei Zoute ihi leh heimun pou a thawllut hamsa salou, miham-mipau jong thei pai pai, amite banga nal taha ham thei pai pai te ihi jiahun, i hamphatna leh Pasian guolzawlna itanna khat ahi hi.Nanleh tuakawm kal ah ipil van mama nading khat ah, tuabanga midangte ham leh tawndante sanga eima tawndan ngai thupi lou jaw a ium khah ding azau huai mama hi.Tu hun chiangin sum le pai, siamna pilna dei-in eima ut thu hilou in migam milei ah iki thethang simta uh a, mite lah a khosa ihi tah jiahun ihina (Identity) leh tawndan tawh kisai pilvan sem sem nading hing tam sem sem ding hileh akilawm hi.

Chinate leitung min zousie ah umsuah keei uh hi.Nanleh angeina uh leh tawndante uh zumpi lou-in atu atate mama uh jong China ham le pau leh pupa tawndante bangkim sinsah uh hi.Tuabang ma in Korea mite jong angeina uh mansuo khah ding zau a pilvang tah a khosate ana hi uh hi.Khopi lian tah tahte ah China te hileh Korea mite leh adang dangte aten pou uh leh aham uh leh angeina te uh sinna dingin hun leh mun khat
bawltuam uh hi.

Eite bang ichi uai chi kien talei, gamdang-mundang khat itun phot uh leh ita inaute ham tawndan tawh kisai lang ah mansuo dingin iki lang uh a, hasiat huai mama hi.Mangkang gam tungte tate mangham vive tawh ham ta uh, Zouham ham thei talou, Meitei lah a tengte i Zouham sanga Meitei ham theijaw chi bang hunkhop khat umta ihi jiahun kibawlphat nading um tham ding hileh akilawm hi.

Chinate, Koreate, Japante, Vietnamte banga i umna lang lang a khota khat beh sat thei ding khop tam kiteng khawm theilou ihi manun, ham leh tawndan kisinna ding mun leh hun tuom umding sil hamsa pi khat suahding ahi manin koidang teng sangin nu-le-pate khut ah akinga lian mama hi.

Keima jong kaneu lai pansa Zouham na ham lou kahi manin kang khanlet chiang leh Zou khat hisam inga, Zou ham hamthei louding chi valong zong dih zou samsih chi
ngaidan kang neithei a, Zouham kang kisin kia leh tu in Zouham hamthei genlou, Zouham a laigiel thei khat kasuahta hi.Bawng khat bawng a piang hina pin lawital
ham ngen in hing ham taleh aneitu leh achingte ban ah khosung miten bang ngaidan anei ding uoi chi jong sil um thei tah khat ahi hi.

Adiah diah in Mangkang gam natung ei Chin-Kuki-Mizo-Zomi-Hmar namte pen iham i tawndan mansuo bai dingte leh nam mangthai thei dingte tawh iki bang uh hi.Hasiat ahuai mama hi.

Tami tawh kisai injong khanlaw nading hunkhop khat aum hi.

Ham-le-pau, ngeina le tawndan mansuo dingte hilou a, akem ching siamte leh nam hampha ihi thei sem sem nading un ei khangtha te mawpuona azou zou ding in
Sian in hing ching hing kem tahen.