ZOLENGTHE

WWW.ZOKUOMTHAWN.CO.NR

ZOD/ZSP IN PU HANGKHANPAO VAIDAWNNA NEI Zaanni Sepkiani July 10, 2007 ni'n ZOD Office, Safdarjung ah nitalang nai 06:30 apan Pu Hangkhanpao, Ex. President UZO leh MLA vaidawnna leh kipapina vaiguon leh annzaluina thupitah in ki nei hi. Tuona mipi tamkuomtah kipeikhawm in, vaiguon lawching mama hi. Pu T. Zamlunmang Zo in hunkem in Nu Chiinneikhum in hunpat thumna nei hi. ZSPDB Secretary, Mr. M. Soilienmang in mipi hingpeikhawm tengteng pulahna nei a, tuozaw in Nupawlte'n Zo puondum awsahna nei uhi. ZOD President Pu Haulienkap in Lungdampina leh ZOD tup-le-ngiimte tomkim a talatna nei in ZOD kiphunasan Nopni-dani'a ki uop a, apoimawna bang a i nam sung enkol dia panla ahidan gen hi. Tuozaw in ZSP Vice President Mr. S/ Thangsuonmung Zou apat in ZSPDB activities leh akip akawi chi umlou in ZSP nasepte ngaikhiet ahikia hi. Mipi hng peikhawm: Nu Man, Pu S. K. Mung, Tv. M. Lalmuonlien Zou, Pu Khakhai Zou, Tv. Thanglunmang Mate, Tv. Kamlienlal leh adangte apat thugenna leh MLA inei uh ahoidan, tuoleh MLA pun i nam sunga khentuom paituom nei lou a na ahing sep touzeel a lam etdan uh taangpi ngaikhietna aban ban in ki nei hi. Tuozaw in Rev. G. K. Joshua in Psalm 28:9 na tungtawn in hasot thugenna nei in MLA pu Pasian mai a khupdin pen a lu tunga khut ngam in vangpiehna leh thumsahna nei hi. Tamteng zaw in Pu T. Hangkhanpao in thugenna tam bang in nei hi. 01. Tuni'a tambang kipahpina leh noutawina vaiguon nang siem ban uah annkuong luina na'ng neipi uh ka ngaisut chiengin kei tanguollou ahiman in kakipah na asang dieh hi. 02. Delhi ka'ng hawna san ahileh I zogam sung hoina diing toh kisai a hing haw kahi. PWD hilou a BRote'n i Zogam lamlien enkol uleh chi deina toh thuchien kan a hing haw kahi. 03. Chandel MLA kahi lai in Delhi ah khatvei vaidawnna ang nabawl ua, tuni aniveina ahita hi. Lungdam mamam ing ei. 04. A neulai a gentheitah a a lai anasimdan leh mittawte bang mai a Delhi khopi a laisim di'a ana kuon dan, agenthei dan leh Delhi khopi atun a mun-le-muol theilou pi hinanleh ana gamtatdante tomkim in agen hi. 05. Tupna lien nei nahi uleh nouma tanga di'n thugen sih unlen, nami na sa ua di'a representative hidan a ki ngai sut in thungen in laisim leh uchin lawchinna na ngah diing uhi chi hi. 06. A genzeelna ah, politics a a'ng luutna root cause ahileh Chandel a eimi leh Nagate hing kibuoizieh hi taangpi in agen hi. Naga leh Kuki kibuoi Zoute a lang bai a um, ginmaw a um, Sugnu ki tung ngam lou, tuo ahi tah chiengin alampi hing kingaisut in politics ah kahing ki involve khata hi achi hi. 07. UZO President kahilai in Politics oriented leader a'ng kichi hi, ke'n zong dih kasahna chieng a um thousam hi. Nampi leader hidiing in alienzaw sem tuona toh hingai hi. Eima sung mai a sep thei lu, I nampi'n a poimaw tampi a um hi. MLA kahi zangin UZO constitution ka kalna a um sih hi, MLA kakaini'n UZO President hina apat ka ki resign pai a UZOte deina bang in ka gam taang hi. 08. Zou Nampi'n MLA i poimaw ua, term ni vel i nei lou sung un a ngui in i nguui gamsieng uhi. MLA i neilou uh ahoilouna khat ahileh ZDV i neilawh uhi. MLA i neizaw lou ziehua ZVD hing pieng ahi. UZO President kahi lai in nam ngainatna toh koimaw theipi lou in kana si dihdih hi. Akilawmlou pi court bang kana kai thithe hi. Tuote pen nam a di'a ka sep ahiman in kipana'n ka la zaw bou hi. 09. Tutung MLA Election pen i nampi'n akipang hi. USA, Shillong, Bangalore, Delhi, Mizoram leh mun tuomtuom pat panpina leh hasotna laithotte kana mu suoh kei hi. Tuote thamlou in i Zou kho chin ah sing-le-suong, bu-le-baal khop seng lou pin agawtah den hi. I nam in MLA ing nei apat in akiliip a, iki thanuomsuo chiet uhi. Kei zong katha thousah mama hi. 10. Tuni chiengin mite'n i Zo hina ang deigaw ua, zong a'ng lasah nuom phielta uhi. Zoute Zo iki chilou leh koite Zo kichita diing, bangdi'a Zomi movement a Zoute kihallou a um thei di ihiei. Zoute'n pan ilahlou leh Zomi movement lawching thei lou diing hi. I nam min zong under threat a um ahi chinuom phiel kahi. Laisiemte'n ngaidan giltahtah hing sung zel un, UZO ah vaihawmna a um chieng bang in Dlhi lam, Mizoram lam, Shillong, Bangalore lam a i laisiemte ngaidan bang kichi theita leh ut huoi kasa hi. Noute hing hapan leh uchin, nangaidan giltahtahte uh hing kihat hun hing um tham diing ahi. 11. Poi kasah mama khat ahileh UZO President Election i nei chiengun laisiem pipi, sepna hoi muzou dite [laisiemte ahoisih kachina hilou in] hing teet ua, a chingzawlou chiengun lamkaite gensie in apang zeel uhi. Tuopen poi kasa mama hi. 12. ZOD pen UZO ah affiliate bawl un zong kachi ngam sih a, hinanleh kang gennuom pen ahileh UZO pen i nampi vaihawmna saangpen ahi chi hing manghil sih unlen, UZo in a thu ngaisutte pen mimal ngaidan hilou in i nam sung hausa leh intellectualte ki consult zaw chieng a nasem pan ahidan thei gige leh uchin chi hing gen nuom kahi. 13. I nam sunga zil tha di’a hoi kasah khat ahileh mi dangte mai a I dih louna hileh zong dup chitangma a ki gup a hinanleh eima sunga a bawl khiel penpen phaw chi tangma a kiphaw di chipen zil thei in zui thei lei dei huoi kasa hi. 14. Pasian in I ma hing pui hi. MLA I hing ching uleh nidang a nasep di bawldi ana kikhahtante zong ahing ki hong huoi huoi a, tu’n mit a muthei in I gam sungah khantouna hing um panta hi. Lamka apat Singngat pen hun tonlou a kaal sunga kimuthai thei diing dinmun in umta hi. 15. Pu Thangso Baite MLA ahisung in I gam sunga guolzawlna hing tung diingte toh ana ki apmai hi. Behieng lam a solar lamp diing teng zong apei mang dildel hi. Ka biel a di solar lamp kava nget lai in nang bielpen akipekim ahita hi chi’n hing ki dawng hieu hi. A theisiemte a di’n puonat ahuoi thei mama hi. 16. ISA, IPS leh laivuonna lienpipite a lungluutna nanei tahtah uleh nei kikuppi ngam diing uh ahi. I nampi a di’a na I sep diing uh ahi. IAS zou khat in ama angsung mai akho leh pen lawching ngai lou diing hi. I nam leh gam a di’a IAS nahileh vang laching teitei ding nahi. 17. Zo minphatna diing pen Zou ham zangte khut mama ah ki nga hi. Zou ham zangte’n ma I pat lu uleh Zomi pen pallun ngei lou diing hi. Zou kahi kichi pen I kiletsah pi diing uh ahi. Ni dang a Zou kahi kichi diing zong kizumpite pen tuni chiengin Zou kahi iki chi leh mite’n hing ngaisangta uhi. Zomi sunga Zou kichite pen akilang pen leh a hapan pen a I pan diing uh ahi. 18. UZO, ZYO leh ZSP Hqrs. Ahileh Zou chi ngen in akihengta hi. Ahi dingma zong ahi, Govt. in a’ng recognisedna zong Zou ma ahi. Tuoziehin Zou ma I pan san diing uh ahi. Delhi ZSPte’n Hqtr. Apat lai nu uleh mulou uh vang thei sing, hinanleh I mumpi in abawl pen a ka hiengte’n zong zui pen poimaw mama hi. 19. Atawpna diing ah, ZOD or ZSP in poimawhna na nei chieng in hing houpi pou leh uchin I Nampi a di’a ka bawl thei tan a pang diing a masa gige kahi. Ki thuzah tuo zeel vai chi’n ZOD leh ZSP panpina’n dang tamkuomtah pieh in ahun zawna bawl hi. Tamteng zaw in Pu Zamlunmang in Kalaisai samna nei a, Nu Ngaineiching in thumna toh hunkhah in annkuong luina nei ahita hi.

2007 ZSP MERITORIOUS AWARDS DECLARED Pu (L) Rev. T. Doupu Award – [Class X Topper in Zou (MIL)] goes to M. Hauminthang s/o M. Zamkholam of D. Phailien, Churachandpur. Mark 100 lah a 91 mu hi. Pu (L) Thangkhanlal, Ex-President, UZO Award [Class X Topper among the ZSP] goes to Judy Hatsienchiin d/o Upa Ginzadong of Zomi Colony, Lamka. Total mark 600 lah a 482 mu in ZSP member tan X zoute lah a sang pen in pang hi. Ka Pu Saipu Award [Class XI Topper in Zou MIL] goes to T. Kimngailun d/o T. Gouzalal of Tuibuong, Lamka. Total mark 100 lah a 88 mu hi. (Tam Kapu Saipu Award ahileh ZSP member sunga Zo Lai ngaisahna tu saanga sangzaw leh hoizaw a a’ng khanlet diing deina in Pu John Mangpite innkuon in a Pu uh thei zingna di’a a bawl uh ahi). Tam hunzahna ah Pu. T. Hangkhanpau, Hon’ble MLA Singngat A/C in Chief guest hina toh uap hi. Last Year Winners (L) Rev. T. Doupu Memorial Award + Citation + Rs. 2000 (1st Div. & Highest mark in Zou MIL) was awarded to Ms. Kimdeiching d/o Tualzalam, Simveng. (L) Pu Thangkhanlal Meritorious Award + Citation + Rs. 2000 (Zou’s HSLC topper) was awarded to Gouminlun s/o (L) Pu Sialchinlien, Singngat ------------------------- YOUTH SEMINAR ZCFD Youth Department in ha khat a Pasiannii ngavei umnate a Fellowship anei zel bang un, ahing tung diing July 29 chieng in zong Youth Fellowhship um diing hi. Tuonah hun dang banglou in Seminar huoise tah nei in um diing hi. India a FCMG company lienpen, “Hindustan Lever Limited” a Corporate Affairs Manager, Pu Biaklun Shoute in huoisetah in “How to lead a successful & Motivated life” chi thupi a zang in Zomite a di’a poimaw sil tuomtuom sangnaupangte leh nu-le-pate thuhilna nei diing hi. A nuom tapou a di’n kot kizong hi. Tuobang thugen ngaichiet diing in iki deisah ua, michin telkim chiet diing in iki chiel uhi. ZO KHAWMPI TOH KISAI THEI TUOHTE ZSPDB Lamkaite apat thu kimu dan in Zo Khawmpi [ZSP Freshers’ Meet 2007] 2nd October (tentative) a zah diing chi uhi. Tuoleh tam anei abangin sum tuoh diingdan zong bikhietta uhi. Innkuon (Family) – A: Rs. 1000/- Innkuon (Family) – B: Rs. 600/-. Single Employees 1. Rs. 10,000 & above lawte - Rs. 600/- 2. Rs. 5000 – Rs. 10,000 - Rs. 400/- 3. Rs. 5000 & below - Rs. 200/- 4. Students & Unemployed - Rs. 100/- Mi tawmngaite’n na kot hing kiu panta diing ua, ahuntah a ana pechiet diingin ki singsah chietta vai aw le. ZOD GENERAL SECETARY UMNA KITUON General Secretary, ZOD Mr. S. Thangsuonmung te unau Munirka apat in Chirak Delhi lam ah laisimna lemzaw diing deina in kiruonta uh. DU AH ADMISSION MUTA UH Delhi University nuoi a under-graduate first cut-off list 26th June ni’n suohkheta a, first cut off list a ZSP member admission mute ahile – Doulienkhup Jou - BA(P) - Hindu College Robert Thangmuanpau - B.Com(P)-Khalsa Hauminlun - B. Com(P) - Dyal Singh TK Lulun Samte - BA(Geog) - KMC College Chinhauching – BA (Phil) - Gargi College Reuben Suantah - B.Com(P)- Ramlal Anand Khupbawi Suantah - BA(P) - Zakir Hussain S.Kapsuanthang - B.Com (H) - Dyal Singh T. Zamminlun - BA (Hist) – Deshbandhu Tualeh, 2nd Cut-Off list ah Tv. Robert M. Thangminlien in History(H) Dyal Sing ah mu hi. Cut-Off list a mulou te ahile lungkham ding um lou hi, 10th July in North Campus ah 10am in counselling um ding a, tuanah college peding uhi. B & M. LIB FORM KIHAWMTA Admission Form: DU nuoi a B. Lib (Bachelor of Library & Information Science) leh M. Lib sinna ding form kihawm panta a, 27th July leh 20th July tan tuah in dangka 70 jel in DU North Campus ah form lahtheiding hi. M.Lib. ahile Entrance test um ding hi. QUARTER MUTHA UH Quarter mutha: Nu Chingliensiem w/o Pa Siempi in jong GTB Hosp. geilam ah quarter mutha a, kal masa lam in ana kituonlut ta uhi. Tualeh Pa Nehzamang te’n jong APS Colony lam ah Quarter mu ua, akimkhat kituon lut ua, akimkhat Munirka ahum nalai uhi. ZOU DIRECTORY Directory 2007 a ding data kila lel pen form submit nailou tamlou umlai a, koipou in akinthei lam a vaisaite kung a submit ding in ikitheisah uhi. Form submit lou a Directory a namin atuon sih leh koima namawsah theisih ding hi. OFFICE OF THE ZOU ORGANIZATION DELHI 97/5, Krishna Nagar, Safdurjung Enclave, New Delhi – 110 029 NGETNA LEH THEISAHNA (Dated New Delhi the 30th June, 2007) Khovel khantou tawh kituah in, India phuolpi Delhi mun ah Zou tate tamkuom ki umta hi. Central Govt. nuoi a sem, private a sem, sangnaupang leh kaam (job) sui agawm in mi 400 vel Delhi leh NCR (National Capital Region) ah ki umthei ta hi. Kum teng in mising kibelap jel a, asiem-apil-a mawl, ahoi-asia zong ki um hi. Inndet-loudet neilou akihiman in shini-manni, nopni-dahni in hahsatna tuom tuom kituohjel hi. Tambang a hahsatna te leh Zou tate kikeptup na ding in kum 2003 in Delhi mun a Zoutate kihoukhawm in Zou Organization Delhi (ZOD) ana kiphutkhe ta hi. Zou Organization Delhi ahile welfare body ahia, non-governmental, non-political leh non-religious body ahi. Nopni-dahni a panlahkhawm nading leh khat-le-khat kipanpituo na ding a dingkhie ahi. Tualeh, Delhi/NCR sung a Zou tate kivaipuohna sangpen(apex Body) ahia, koizong Zouta umdan kilawmlou, nam minsietna tuntu te tung ah hoi asahbang leh nam kepbitna ding a pha asahbang in vai ahawm thei jing hi. Koi jong Delhi/NCR a hing tungte ahing tun ni apat Ha 2 (two Months) sung a ZOD a registration akibawl sih leh genthei-hahsat atuohni in ZOD in maw apawsih ding a, nu-le-pa te’n Delhi a imi-isa te koima na mawsah thei sih ding uhi. Tuajieh in natu-nata te Delhi/NCR a um ding a nahing sawl leh ZOD a kitheisah ding in thuhilna hoitah tawh hing hakhe jel ta un. Tualeh, Delhi/NCR a um a, umdan kilawmlou a natu-nata a umle ZOD in pha asah bang in atung ah vai ahawm ding hi. Koi zong Nule-pa, Pi-le-pu te’n Delhi/NCR a um natu-nata te hindan theinop-kupnop nanei leh bangchihlai pou in ZOD lamkai te nakihoupi thei jing ding hi. A tawpna ah, natu-nata innmun a nakepjoulou; umdan kilawmlou a um, khamthei-guithei chiing(Drug Addicts) te Delhi/NCR a hing sawl mawh lou ding in ikingen in ikitheisah ua, na hing sawl teitei a genthei hahsat atuoh leh ZOD in pha asah bang in atung ah vai ahawm ding hi.. ZOD in nampi damnading leh khantouna ding a panla tawntung ahia, Delhi NCR aum Zou tate khantouna ding leh kipumkhat na ding in theitawp in pan la jing hi. Issued By: Publicity Wing, Zou Organization Delhi, New Delhi