Mr. Thanglianpau thah in om
Lamka July 18: Lamka Police apan thukiza dan in zan nitaklam dak 5:00 vel in meltheihlouh mi 5 in Mr. Thanglianpau (25) s/o. Khamgen of Kangvai Jubilee Veng a inn ua pan vapikhia in nitak dak 8:00 vel in Torbung Govindpur ah sisa in taisan hi uhi.
Thutut kingahdan in, hiai toh kisai in Moirang Police te zan nitak dak 10:00 vel in theihsak in om ua himahleh tuzing kal dak 6:00 vel in siluang vala uhi. Misihna mun Lamka Police te thuneihna area ahihkhak ziak in Lamka Police in tuni zinglam dak 9:00 vel in Lamka police in Moirang Police khut apan in siluang vala in Lamka Damdawi Inn a Morgue a koih uhi. Siluang Post mortem bawl ahihzoh in a innkuanpihte kiangah piakkhiat in om a akholam a vuiding in puakkhiat hingal hi.
Mr. Thanglianpau bel a deek ah khetna ma muhtheih in om a abil langnih ah sipawt hi. Hiai thiltung toh kisai in hiai gelh ahihtan in bangmah theih omlou a, himahleh Police in thubuaichiamteh hi. Hun paisa in hiai bang tualthahna om zeuhzeuh in Police in thubuai chiamteh zel mahleh bangmah muhkhiak om manglou hi’n leng thutut kingah hi.
RDC a AC Copper gui kigu
Lamka July 18: Lamka Damdawi inn huangsung a Regional Diagnostic Centre a Air Conditioner kithuah teng a Copper wire teng apaisa July 16, 2007 zan kal in kigu mangvek hi.
Hiai guktakna toh kisai in Medical Superintendent Dr. M. Lachinkhai in July 17, 2007 in SP/CCpur kiangah report bawl in Police in thubuai chiamteh hi.
Hiai gukmang a om Copper wire te AC khat a kibulh in Rs. 7000/- val man a, Regional Diagnostic Centre a CD4 Count Machine koihna room ah AC 3 koih hi a huaibanah CT Scan room ah AC 2 koih in om hi. Hiai AC kikoihteng a Copper wire innpolam a dawkkhe teng gukmang ahihziakin AC teng zattheihlouh in om hi.
Tulai in Lamka Damdawi Inn ah khamtheihhih gutapawl laang in kal paisa sung in damdawi inn sung a Dailenbuuk a tuilawng hekna teng leng gumang gai ua tu’n Damdawi inn a Overhead Tanky ah tuikholtheihlouh suak hi. Regional Diagnostic Centre nunglam leng khamtheih hihpawlte kikapna munpi suak a huai ah Proxyvon Capsule hawng leh Syringe tamtak muh theih ding om hi.
NCRF proposal khak ding
Lamka July 18: Natural Calamity Relief Fund toh kisai in District Level Relief Committee in tuban ni 2 nung in relief proposal Constituency bangzah hiam a Relief Commissioner kiangah pelut ding hi. NCR Fund bel khokheeng, Tuilian leh adangdang ziak a louma a lohsamte kiang a panpihna piak hi a , Hectre khat ah Rs.1000/- zel a piak hiding uhi.
CMO in Explanation call
Lamka July 18: Chief Medical Officer/CCpur in amah nuai a sem ANM te’n Monthly Health and Sanitation Observation Report of June 2007 a bawllouh ziak un a kha loh uh heentaang sak hi. Huaibanah tuni apan ni 5 sung a abawllouh ziak uh hilhchetna pe ding in theisak hi.
Inter-School Football Tourney 2007-08
Lamka July 18: Youth Affairs & Sports saina in State Level Inter-School Football Tournament 2007-08 hongtung ding August 2007 kha bul in Imphal a Khuman Lampak ah neih hiding hi.
Hiai hun ah Lamka apan District ai-oh in Under-17 Boys ah team 1 leh Girls ah team 1 tuak leh Under-14 Boys ading in Team 1 va kimawl ding uhi. August 1, 2007 in Imphal tungkim ding ua August 2, 2007 in Medical examination nei ding ua, August 3, 2007 in March Past nei in kimawlna pan ngal ding uhi.
Semtu ding tamtak hong kisuan
Lamka July 18: Medical Department nuai a semtu tamtak CCpur District a sem ding in zan zek in suan in om uhi. Huai Order dungzui in Pharmacist 2, Non Medical Asst.1, MHW 8, MHS 1, Opthalmic Asst.1, Health Educator 3, Driver 5, UDC 6, LDC 6, Lab.Tech. 2, BCG Tech. 1 Mech.-cum- Driver 1 leh Sta.Asst.1 banah FHS 27 te District sung a muntuamtuam a semding in hong kisuan uhi.
Hunchiam omlou Bandh 2 kizom
Lamka July 18: CCpur District Students’ Union (CDSU) in CCpur District in Mautam kial doulai a Phaijang helpawlte mipi khual nei hetlou a percent a lak uh lungkimlou a District Quota bukimtak muh matan District sung hunchiam omlou Bandh bawl ding tunitak zankim (00:00 Hrs.)a kipanta hi. CDSU in bandh hunsung in Medical Department, Security leh Press/Media te kia khahkol ahihdan taklang uhi. Damdawi inn leh OPD bel ngeina bang in kihong ding hi. Huailou in Tedim Road Upper Bus Owners Joint Committee in leng Election hunlai a gari zatman kimtak a muhlouh ziak in July 20, 2007 apan in hunchiam omlou Chakka bandh bawl ding uhi.
KSO in thusuah bawl
Lamka July 18: Mrs. Lamneilhing w/o Seichon of T. Phaijol, phaijang helpawlte’n a sualluihna uh toh kisai in KSO leh Chief Minister makaih in PHED Minister Pu TN Haokip leh IFCD Minister Pu Biren ten July 15, 2007 in CM Chamber ah kihouna nei in kilemna bawl uhi.
KSO thusuak in a taklat dan in, vangsiatna thuak Mrs. Lamneilhing leh a inkuante kivakna ding Manipur in a kin theipen a scheme khat a ngaihtuah sak ding, T. Phaijol khua a Assam Rifle post koih ding chih leh hiai bang thil a pian nawnlouhna dia government in pan alak ding chihte in kilem uhi.
Piangsualte’n ngaihven poimoh
Lamka July 18: Social Welfare Department, Government of Manipur nuai a Financial Assistance dia ngetna pete’n zingchiang July 19-23, 2007 sung in Bliss Island, Vengnuam, New Lamka ah thuchian ngah theih ding hi.
ZDV in Fin. Deptt. lem thak
Lamka July 18: Zou Defence Volunteers in thusuah a bawl tuni a Press a kimu in a taklat dan in, ZDV sung a sumsaina ah, Zone-I ah Mr. Mohan, Mr. Roland, Mr. Clay leh Mr. Gideon te collector ding a seh ahihdan uh taklang uhi.
Thusuak in a taklat dan in, demand leh ngetnate amaute min leh seal zang in hong pai ding a, tualoute’n kuaman kuaman kithuahpih lou ding in taklang uhi.
NEWMAI NEWS NETWORK:
ANSAM in Phaizang mite naktak in vau
Senapati, July (NNN): All Naga Students Association, Manipur (ANSAM) thusuak in tuni a agendan in, Naga bial a school haltungtang a kiphinna neite pawl kipahpih thu puang kawm in, a sepding umah sem ahihdan gen ua, himahleh, ANSAM in adikna uh gumtu ding lehkha poimoh bukim nei uh ahihdan zasak uhi. ANSAM thusuak in ataklatna ah, Nagaland Board of School Education (NBSE) tungtang ah Manipur singtangmite’n lungkimlouhna nei ua, thil paidan diklou mah ahih ziak in Manipur CM kiang a Memorandum piak in om zia neilou ding ahi chi in, ANSAM thusuak in khauhtak in taklang hi. Phaizang mite’n Language, school curriculum leh history banah tawndan toh kisai subject a aguanlut dan te un naupang khangthak dingte lungsim pikawi ding ahihdan taklang kawm in, ANSAM in Meitei te tupdan nang zou mahmah ding ahi chi uhi.
ANSAM in bangziak a singtangmite kiang ah phut luih a, Meiteilon, Meitei Mayek, Meitei history leh Meitei culture zatkhum a om ding uhiam chi in dotna leh bawldaih uhi. Meitei mite Manipur gam leh leitang 2238 sq. kms lel luah in, bangziak athagum a singtangmite tenna 20,089 sq. kms te luahkhum sawm uhiam, Phaizangmi Meitei te’n ut ut gen in utut sa mah le uh Singtangmite a gam uapan nohkhe zoungei lou ding uh ahi chi’n ANSAM thusuak in taklang hi.
Govt in Media te leh NGO te enkhe ding
RIMS/CAO tenna Inn kap in om
Thingbaijam Dhamen
Imphal, July 18: Manipur Government in tuni a thusuah abawl dan un, Manipur ah muanna leh bitna kichiantak om theihna ding in Media te poimohna te theikawm in agamtatdan uh enkhe ding ua, huai teng banah NGO pawlpi tuamtuam te nasep dan hoihtak a enkai ding uh ahihdan tuni in thupuan nei hi. CM makaih a Manipur cabinet meeting om ah, Manipur a thiltung tuamtuamte genkhopna om a, huai banah, National Highway-39 kepbit dingdan tanpha genna nei uh hi’n kigen hi. Dawr tamtak leh school banah Office te a helpawl in sum a ngetsekna utoh kisai leng Cabinet meeting ah genlatkhak a om hi’n kigen hi. Tukum sung chauh in NH 39 zui a tai truck 9 bang haltum dimdem a om khin hidan in kigen a, insurance company tel in dawr leh pharmacy tamtak leng helpawlte ziak in khak in om ta hi. Thusuak in agenddan in, Manipur Government in Dan leh thupiak kembit zoulou ahihna ah mipite ading in lungzin huai mahmah hi’n kigen hi.
Tuabangkalah, tuni nitaklam dak 3:15 in Regional Institute of Medical Sciences, Lamphal a Chief Account Officer tenna Inn. Lamphel Sanakeithel ah meltheihlouh helpawl khat in thau in va kap ua, asi leh liam omlou hidanin gen uhi.
Meghalaya Congress te ki kembit zoulou
Shillong, July 18(NNN): Meghalaya Government nuai a Minister of Higher and Technical Education lenlel R.G.Lyngdoh sanggamnu Ampareen Lyngdoh in Congress pawl taisan a United Democratic Party (UDP) pawl a zop in gen nei mahmah ding hidanin kigen a, mi tamtak in Congress pawl muangzou nawnlou in NCP leh party tuamtuam zom in Congress apan taisia uh hi’n kigen hi. Ampareen in ahihleh, maban a Meghalaya Assembly election om ding ah Laitumkhrah apan tuhsawm hidanin kigen a, aman Congress pawl in Meghalaya a kimawlpih dan uh lungkim huailou asak ziak a kitawpna pia ahihdan gen hi. Meghalaya Pradesh Congress Committee (MPCC) President O.L.Nongtdu in leng hiai thiltung pawna kawm mahmah in, Ampareen in maban a election ding chauh angaihtuahkha a eive maw chilel hi.
MNF in President election ah Vote khelou ding
Aizawl July18 (NNN): India President kitelna July 19 a om ding toh kisai in tuni’n MNF in kuamah tellou ding ahihdan un puang uhi. MNF Secretary Vanlalthaliana in thusuah a bawl in a taklat dan in, MNF in thil paidan hoihtak a suizuina a neih nung un President dia kuamah tellou a vote leng khevetlou ding uh ahihdan gen hi. Hiai bang thupukna a hong om ziak ahihleh, India Constitution 103rd Amendment bawl sawmte toh ki namnoih khak himhim leng utlouh ziak hidan in Vanlalthaliana in gen hi. 103rd Amendment bawl hileh Kristiante’ minority status hihna beiding a, Mizoram kia hilou in Nagaland, Meghalaya, Goa leh Kerela ah leng Kristiante’n minority status mansuah ding ahihziak in hiai bang thupukna la uh ahihdan gen hi.
MNF in a taklat zelna uah, MNF in minority-te napnul a kilkhat a neng-bichilh sawm UPA candidate ah vote pethei lou ding ua, independent candidate Bhairon Singh Shekhawat leng a sulnung ziak in vote petheilou ding uh ahihdan puang uhi. Central Cabinet in 103rd Amendment to the Constitution of India Bill 2004 kichi pass khinta uh a, Parliament a luikhiak ding in sam lel ta hi. Hiai Bill pen zat taktak hileh, Namniamte ading in vangtahna thupitak om ding a, Namniam te’n ahamphatna uh mansuah in Namniamte leh Namsangte a kibang in om ding uhi. National Commission for Minority Education in leng hiai 103rd amendment kichi naktak in nial uh a, Ki Ukna Danbu nuai a Article 30 naktak in kalh chi uhi. All India Catholic Union, All India Christian Council leh pawl tuamtuam in leng hiai Bill leh Amendment deihlouh thu tangkoupih khinta uhi.
Source: zogam dot com
No comments:
Post a Comment