Wednesday, December 24, 2008

Private school leh sinsaktute

Naupang siamsin lellelte maban a nu-le-pa ding, khotang, gam leh nam makaitu dingte ahihdan uh i theichiat ua, huai ziak in amaute khankhiakna di’n siamsianna lam tel in kong chiteng ah a hoihpen i deihsak hi. Ahihleh, hichituk a i ngaih poimoh i tate uh sektu, lamhilhtu, sinsaktute i ngai poimoh hiam chih dotna ching mahmah khat ahi.

Maban a i nu-le-pa dingte, khotang, gam leh nam makaitu dingte sektu, lamhilhtu, sinsaktute bel ngaih poimoh tuak mahmah ahi uhi. Hiai tungtang ah, i district sung ua private school a sinsaktute’n “Provident Fund, employee’s pension, Gratuity, Employee’s deposit linked insurance scheme, Maternity/medical benefits, etc.” a neih theihna ding un Churachandpur Consumers’ Club (CCC) in pan hon la hi. Sinsaktute loh tungtang ah leng naupang 800 nuailam nei school a sem Matriculate-te’n Rs.2000/- month, Under-Graduate-te’n Rs.2500/-month, Graduate-te’n Rs.3300/-month leh Post-Graduate-te’n Rs.3500/-month a lohna ding uh, naupang 800-1000 nei school a sem Matriculate-te’n Rs.2200/- month, Under-Graduate-te’n Rs.2900/-month, Graduate-te’n Rs.3700/-month leh Post-Graduate-te’n Rs.4000/-month a lohna ding uh, banah, naupang 1000 val nei school a sem Matriculate-te’n Rs.2500/- month, Under-Graduate-te’n Rs.3200/-month, Graduate-te’n Rs.4000/-month leh Post-Graduate-te’n Rs.4200/-month a lohna ding ngaihtuah di’n CCC in Private School Teachers’ Association (PSTA), CCpur district kiang ah ngetna lai khia hi.

Alehlam ah, private school admission fee Rs.500/- apt Rs.700/- kal hihsak ding, monthly tuition fee a tamtawp a Rs.200/- per month hihsak ding leh handbook/brochure leng Rs.40/- hihsakna ding in PSTA kiang mah ah CCC in thusun bawl hi. Huai banah, student 50 enkol dia sinsaktu khat zel (student-teacher ratio 1:50) a om theihna ding in leng CCC in PSTA kiang mah ah thusun bawl hi. Churachandpur Consumers’ Club in i district sung ua siamsinna a hoihsemna ding leh sinsaktute khualna a hiai bang pan a hon lak pen hoih mahmah ahihman in kipahpihhuai mahmah hi. A dangdangte banah, loh pun ding leh sinsaktu khat in naupang 50 tan etkol ding chih bang sinsaktute a dial eng zangkhai tuan mahmah ding ahihna ah PSTA in bel hoihsa ngei ding in a gintakhuai a, himahleh, a tangtunna ding bel school neitute khut a om ahihna ah PSTA hihtheih tawm mahmah hi. Private school neitute lam i et chiang in, school pen amau a dia sum dawnna ahi a, sum dawnna a a neih ziak mah ua sum dawnna dan a neilou govt. school-te sang a private school-te hoihzaw ahi. Sum dawnna a neite’n admission fee leh tuition fee a kiamsak ua, sinsaktute loh a punsak ban ua sinsaktu a lakbeh ding uh gintak haksa mahmah hi. Gintak haksa chi mahlehang, private school ah admission fee leh tuition fee sang mahmahta a, i khosakna (economy) un ban nawnlou ahi chih theih phial ahi. Huai ziak in, admission fee leh tuition fee bang kiam thei leh bel innsung khosakna niamtaktak naupangte’n siamsinna lam ah mi hausate tate toh tan kibang nei thei zaw deuh ding un a gintakhuai hi.

Private school a sinsaktute loh toh kisai ahihleh, school neitute leng a sup/man tuanlouhna ding tan ua CCC in a tuat dan thusun a bawl bang zuih theih hileh deihhuai mahmah hi. School neitute’n a nuai ua sem sinsaktute loh a punsak louh tawp ua leh leng “Provident Fund, employee’s pension, Gratuity, Employee’s deposit linked insurance scheme” leh a diak in ‘Maternity/medical benefits’ bek hoihtak a bawlsak uh poimoh mahmah ahi. Private school a sem chih ziak a kha loh chihlouhngal hamphatna dang himhim sinsaktute’n a sanlouh uh bel, private sector tuamtuam a semtute’n leng kha loh ban a leng hamphatna tuamtuam sang ahihna uah, mimawl ngaihtuahna ah leng dik zoulou deuh a bang hi. Huai banah, school hoihna ding, sinlai naupangte a dia hoih ding leh sinsaktute a dia leng zangkhaizaw kia hilou a hoihtak a sinsakna a piak theihna ding uh lah hi, class room khat ah naupang 50 sang a tamzaw omkei himhim leh chih deihhuai petmah ahi. Tulel dinmun in bel, sinsaktute’n lehkha siamtaktak leh mi lohchingpipi, maban a i nu-le-pa dingte, khotang, nam leh gam a dia makai dingte a sekkhiakna ua tha-le-zung a sennate uh toh a tan uh kituaklou ahi.

The Lamka Post | December 24, 2008 | www.zomionline.com

Reblog this post [with Zemanta]

No comments:

Post a Comment