Zomi Council cabinet kelian

December 22, 2008, 11Am in PTC Conference Hall ah Zomi Council in Cabinet keletna nei uhi. Zomi Council Gen. Secy ding in Pu M. Khamliankhup (UZO), Speaker ding in Pu Jamchinthang (STC) leh Treasurer ding in Pu Khamchinkhup (TCU) telching uhi.

--------------------------------------

Helpawlte ziakin Hqtr. Veng mipite buai

LAMKA, Dec. 22 : Headquarter Veng ah tunitak dak 6:30 vel in galvan tawi helpawlte ziak in buaina piang a, himahleh, a si leh liam bel omlou hi.

EBC Hqt. Veng Biakinn kong a speed breaker ah tunitak dak 6:30 vel in bike a kipua KNF (S) member pasal 2 kipuk ua, a kiang a BYF lazil a om tuailaite’n awlmoh in a bike uh va photpih ua, himahleh bike a tuang pasal nihte’n ‘lampi n’on awnkei’ uh chi’n amau panpih dia kisate kiang ah ‘kou kua ka hi ua chih n’on thei ua hia? KNF(S)-te ka hi uh’ chih toh tuailai lazil bang zah hiamte tung ah khut khak thuah ua, tuailai lazilte’n leng a khoih thuk ziak un buaina piang hi.

Hiai a lazil tuailaite gen dan in, pasal nihte’n a bike uh taisan ua, himahleh, minute 20 vel nung in a lawmte uh leh galvan toh kuan nawn in kholai a mi a muh teng uh samkhawm in line a ding sak in thau kam kawm in vau uhi. Hiai thubuai kanchian dia kuan Headquarter Veng EBCC Local Chairman leh BYF Chairman, KNF(S) te’n thudot ding in mun dang ah pikhia in thu dong uhi. Thudotna uh toh kisai Local Chairman in a gen dan in, ‘saptuam Upate leng na thulim kei uh chi kawm in khoih ding in ka maitang uah khuttum hon lak zel ua, himahleh hon khoih hial kei uh’ chi hi. 3-(NH) Bn. a Major SS Naga in hiai thil tung a theihphet in delh ngal in thil omdan kanchian a, KNF(S) te bike taisan leng a camp ua kep ding in pokhia hi. Hiai thil tung ziakin koi lam mah liam nasalua bel omlou uhi.

--------------------------

Primary Teacher DPC hun ding kisuan

LAMKA, Dec. 22: Autonomous District Council nuai a Primary Teacher 304 lakna ding a Churachandpur district a candidate-te a dia DPC neih hun di’n Dec. 29, 2008 bikhiah himahleh hunchiam omlou a suan in om hi. Candidate list leng tuni’n serial number 1533 tan takkhia ua, serial number theinuam mi tam mahmah uhi. District Employment Exchange in list a bawl pen kikheng lamdang a, Tuibuang a Council office ah number etthak ngai hi.

------------------------------

Head constable apan ASI in kaisang

LAMKA, Dec. 22: Manipur Police dept. nuai ah Head Constable hunkhop tunai zek in ASI in kaisang ua, CCpur dist. apan mi 6, Kamzagin, Gentinmang Vaiphei, Langkhanthang Zou, S. Lukhoi Singh, N. Radha Shyam Singh leh Ibungo Singh tel uhi.

--------------------------

‘Mipite deihdan zui di’n KNO kiman gige’

LAMKA, Dec. 22: Krismas leh Kum Thak chibai buk kawm in “Kuki Churches” kiang ah Lemna Lal Jesu Kris pian hun a Kukite haksatna chidamtak a sukvaivengna dia kigolh di’n tuni’n Kuki National Organisation (KNO) in thusuah bawl hi.

KNO in a thusuahna ah mipite khosakna, khotang leh politics dinmun phawk a awlmoh mahmah ahihdan taklang kawm in mautaam ziak a kial thuakte, khosakna dinmun hoihlouh ziak a phalbi lai a kituamlum zouloute, Krismas lopna dia sum thoh zouloute leh sum haksat ziak a ngeina bang a Krismas lawm zoulou saptuamte thuakpih mahmah ahihdan taklang hi. A jawng leh a hau kal lianpi a omna ah lungsim nuamtak a Krismas lop ding haksa mahleh kuapeuh in lungtang kihongtak a Toupa zong di’n KNO in mipite ngen hi.

Huai banah, mipite gupna leh nungthuapna tellou a ‘ngasa tui apat lakkhiak’ toh kibang lel ahihna uah, vualzohna ngah theihna dia nam leh gam a dia KNO panlaknate kuaman nungtawlhsanlou ding in KNO in mipite ngen hi. Kuki mite lemna leh muanna a deihna ziak ua KNO in sorkar toh SoO kilemna nei ahihdan taklang kawm in a muanglah deuhte theih di’n ‘peace talks’ pen ze-zawl leh derdep mahmah ahihdan KNO heutute’n haihlou hi’n thusuak in taklang hi.

Hiai bang dinmun ah, Kuki mite’n SoO a lungtunglou, deihkhoplou ahih ua leh mipite ngaihdan ngaikhe dial eh mipite deihdan zui dia kiman gige ahihdan tuni a KNO Info. & Pub. Secretary Lenin H. Kuki apat thusuak in taklang hi.

You can see more detail news at www.zogam.com