I NAM BANGCHI PUAHPHAT DING

By HangP (Paulianhang), M.A.
“I lungkiat kei pouhleh ahuntak in agah I aat nading hi..” [Galatiate 6:9 ]

Thupatna: Thangkhal kuan, a kampau zangh leh Thangkhal khak leh suan khat kahihhang in ka tenna uh tuam ziak in Thangkhal sung kivaipuakna – khotang leh biakna lam ah kakihalkha kei a, mipite hi in lamkaite hitaleh kuamah kathei kholkei hi.

Pawl 10 ka zawh apat in Lamka pulam ah maban ka sunzom a eima sung a kihal nading hun ka nei kei hi, tu’n zong sepna ziak in muntuam ah ka om a kei a ding in ei sung a kihal ding chih pen manglam mah bang chih ding ahita hi. Tuabang teng ahihhang in Thangkhal ka itna leh ngaihnatna pen a bei tuan kei a zongh beilou ding hi. Kei deihtel ziak a Thangkhal kahikei a, kei utlouh ziak a zong hilou thei ding kahikei hi. Thangkhal khak leh suan kahih ziak a Thangkhal kahizaw hi.

Ei Thangkhal te pen tawmnou khat a ikilat vang un itawm khol kei ua, asiam-apil omlou ibat vang un hunkhoppi I om veve uhi. Tualeh ei pen ituam vilvel na uh khat om hi’n kathei hi. Kuate hiam Thangkhal kichite chi’n en in abeh aphung en talei – atuam vive kihiden mok hi. Nam dangte ahihleh atangpi in tua behte ahihleh tuate hi’nteh kichi thei in ei pen atuam vive I ham in ahung kankhawmte kihi ahihman in kuamah akineisak tuam omlou in nuam mahmah in thei ingh. Nam dangte ahihleh akineisak tuam omthei zelzel mawk uhi. Ei Thangkhal sungpen Mangkam in gen talei ‘beyond clanism’ ichi diai ‘borderless’ ichizaw diai chih ding khat kisuak in ihuap uh lian mahmah hi. Hih pen lamkaite leh mipite’n itheihsiam mahmah uh poimawh hi. A zatdan isiam leh ihatna bulpi ahiding a, isiam keileh ingiamkiakna bulpi hikik thei veve hi. Tualeh nam khenkhat in hih beh-leh-phung pansan in Thangkhal sung sukkek sawm gige uh chih pen mit a imuh leh bil a izaksa uh ahita a, kuapeuh ipilvang chiat kisam hi.

Bangziak a tawmnou khat a kilangh, apil-asiam omlou bang a kilangh ?

I gensa mah bang in ei Thangkhal te pen tunia kitheizah sang in itamzaw ding uhi. Hinanleh Solkar leh mi vantang theihna ah itamkei uhi. Aziak pen mi hunkhop Thangkhal khak leh suan hinapi in Thangkhal kichi utlou ki omthei lai hi. Bang ziak? Akizumpih ziak uh maw, ahihkeileh lamkaite kitup louh ziak. Ka theihkhelh kei leh kum 3 hal zel in gamsung pumpi ah Solkar Census Dept. in misimpina (Census) neizel a, tuapen kum 10 hal zel in India pumpi ah kisuahkhia in India sung a miphazah in record kikoih a kipomdet zel hi. Hih gamsung misimpina ah ‘kuate nam?’ ‘Nu-nawitui ham(mothertongue) bang?’ chihte zong gelhtel teitei na ding mun om hi. Hih hun chiang in Thangkhal hi a, akampau zangh mi hunkhop te’n beh-leh-phung a ana enkha in Thangkhal tang in nam dang ana gelhkha zel uhi. Ahihkei leh Thangkhal pen recognized tribe ahihlouh ziak a gelh utlou pawl zong om ding a gintat ahi. Hichibang teng ziak in iphakzah diktak taklat in om lou a, atawmzaw a chiamteh in I om zel uhi. Tu’n bang lawh ding? Maban ah Solkar Census Dept. ten misimpina ahung neih kik chiang un nam min gelh na ding mun ah Thangkhal gelh chiat in, Nu-nawitui ham gelh nading mun ah Thangkhal mah gelh chiat ta ni. Tua chi’n ihihna diktak leh iphakzah diktak theih leh chiamteh in I om ta ding uhi. Banghiam chi’n Census latute’n Thangkhal kichi omkei/solkar in theikha kei chin atuam gelh ding in ahung sawl maithei uhi, lauken la pangdet in, nou theihpih leh theipihlouh ziak a ka hihna bei ding ahikei, Thangkhal kahihziak a ka gelh ahi, bangchi’n atuam ka gelh thei diai? Chi’n pangdet lei bangmah gentam theituam lou ding uhi. Hih igen pen census lak hun chiang a ding maimai ahi a, tribe certificate leh official lai poimawh tuamtuam lak hun chiang in recognition imuh masang izangh theinai tadih kei hi. Pilvang ni.

Tribe recognition ipoimawh takpi na uhiam?

September 2008 in TPO in Zomi Council ah Tribe recognition tawh kisai apuaklut thu KHALVONTAWIINFO (group mobile SMS) in ahung suah a, ahung thathousak tuan mahmah hi. A langkhat ah nam khenkhat te’n hihthu azak un pataudak ana satman phial uhi. Tribe recognition muh in bang phattuam na hungtut hiam chihpen ka ngaihsut a, phattuamna om leh omlouh pen thu tuam hitaleh tuni a Thangkhal kampau zangh nam tuamtuam sung a kitheh thangte hung huaikhawm in kankhawm ding a, Thangkhal chih kizumpih mi bangzah hiam te hung hangsan ta ding ua, tualeh eimite UNO – Zomi Council ah kimpih tawh tanvou kikim itang thei tading uhi. Nam khenkhat in kamsiam tak leh kilawmtak in ‘Zomi Council nuai a kigawmkhawm ding kibuaipih a, pan kilapan pan a, nou a tuam a recognition na delh louh ding uh ahi, pankhawm hun ahita’ ahungchi heuhhauh maithei, pilvang in. Zomi Council nuai a kigawmkhawm ding pen sil hoih mahmah ahi a, hinanleh Zomi Council nuai ah nam min chiat in ki om kik veve hi chih manghilh kei in. Thangkhal te’n atuam in recognition adelh kei ua, a lawm leh gual teng atun na ding mun atun khit a hung mitkeuh pan uh ahizaw a, Zomi Council nuai a kigawmkhawm nading lampi ah hih recognition in dal/subuai ahihleh recognition nei sate abang chi ! Thangkhal te recognition poimawh lou ahih leh adangte recognition zong poimawh lou hi. Zomi Council nuai a om Recognitised sa nam teng in pangkhawm ka ut ta uh, a tuam tuam a recognition ka deih nonkei ua, ka recognised hihna uh lakhia in Zomi chi’n hung recognized ta un chia India solkar kiang a apiak ma uh Thangkhal Tribe recognition thu ah kuamah in bangmah agentam thei kei ding hi. Tuabang ahung om leh Thangkhal te’n zong atuam in recognition idelh ut non kei ding un ka gingta hi. Tuaban ah tulai a Zomi wave om masang pek apat Thangkhal recognition thu ana om ahita chih zong manghilh lou in atheisiam loute hilhchian zelzel ni. Tribe recognition imuh ziak a Thangkhal ihikei a, mukei bilbel lei zong Thangkhal ihi veve hi. Tuaziak in hih recognition muh leh mulouh thu ah kuamah lungke kei ni, ilungkiat kei pouleh ahuntak in agah I aat na ding uhi.

Literature, Culture leh Custom:

Thangkhal ham pen khauh ahihman in igelh chiang in atamzaw consonant ‘H’ leh “K’ tawh tawp hi. I ham igelh chiang in khat gelh leh khat gelh pen kuapen a dikzaw chih ding khat in om gige thei hi. Biakna tuam leh kivaihawmna pawlpi tuam nei ihihngal leh hih pawl tegel kigawm in Literature Board khat om thei leh deih huai in poimawh mahmah ta hi. I ham, itawndan te kepbit ding poimawh hi. Thangkhal te’n ham zong ihau ua, tualeh eimi sung a sannem laa tamzaw zong Thangkhal te a ahi a, ikepbit kei leh khatvei chiang itanghzou kei khathei hi. Tualeh miteng in ihaam igelh chiang a akibat nading in Literature Board in zuih ding tangpi khat bawl hun ahita hi. Khatvei chiang Manipur Board nuai ah subject khat hung hithei ahihman in, panlak hun kipat hun ahita hi. Tualeh sawtlou a Thangkhal haam a Laisiangthou (Bible) nei ding ihita ua, tua Laisiangthou a thuteng kizatdan pen dikkim khol kei mah leh Literature Board I neih ua, zatding abawl masang ua kuapeuh in ilaigelh nate ua izuih ding un ahoih hi, tuachi’n ilaigelhte uh ahung kituak thei tading hi.

October 2008 in TPO in Thangkhal culture & Custom laibu asuahkhia chihthu kana za a, kakipak pih mahmah hi. Thangkhal mi tamzawte’n Mulaam a ipu-ipa te tawndan theipha nonlou in eima beh-leh-phung te tawndan iki zuih chiat tamawk valong uhi. Anai pen a gen in- Mulaam ah ipu-ipa te’n tawndan tuam ana nei ngei ding uhi. Hinanleh kuama’n kem leh zui lou in, tuni’n itenna mun tuam dungzui in anailam a ibeh-leh-phung tawndan te nopni-dahni in izui ua, hihpen inam simmawhna leh nelhsiahna khat ahi. Thangkhal ikichih ngal leh ibeh-iphung tawndan sang a Thangkhal tawndan mah nopni-dahni a izuih chiat ua, ipuahphat ua ikepbit ding uh poimawh hi. Nang leh ke’n ikepbit kei a izuih kei leh kuate’n kembit a zui ding? Hih Thangkhal Culture & Custom Laibu pen kuapeuh in zuichiat in itawndan kembit chiat ni chi’n ikichial hi. Amin maimai a alaibu nei hilou in nopni-dahni in zuichiat lei inam itawndan tawisang ihi ding hi. Tualeh khangthak te’n zong hih laibu apat itawndante zilthak in theichiat lei hih laibu akibawl man om hipangiap ding a, tuachilou in amawkna suak thei hi.

Tuaban ah, inam khantouh na ding, I ham, itawndan kepbit nading in literature lam uangbawl poimawh hi. Literature ihauh zawh peuh leh ihaam pen khang semsem ding hi. Laphuahsiam, laigelhsiam, tangthu gelhsiam te’n atamtheipen a Thangkhal ham a isuahkhiat ding uh poimawh hi, tuachi’n ihaam pen ithehthang ding a, mite’n atheitam in asimtan ding ua, ihaam hung popular mai ding hi. Tuhun chiang in aneizou leh mikiphal hunkhop I omta ua, atung a igen talent neite pen kiphaltak a ihasot ua itawsawn zing ding uh kisam hi.

Lamkaite leh mipite mawhpuakna:

Nam khantouh na ding in miteng in mawhpuakna inei chiat ua, imawhpuakna pen kibang chiat lou hi. Tualeh isep theih lam bang chiat in imawhpuakna uh omkhin hi. Kuamah amimal in hih nang mawhpuakna chi’n kihawmgual lou ding a, hinanleh eima’n imawhpuakna ikitheih ding poimawh hi. I septhei ibawltheih leh isepna chiat ah imawhpuakna om khin ahihman in chihtakna tawh ipan chiat uh kisam hi.

I gensa bang in eipen tuam vilvel ihihman in lamkaite’n lungpi akuah uh kisam a, nam tawh kisai thute ah nihvei-thumvei ngaihtuah a thupukna alak zelzel uh hoih in nam damna hiding hi. Tualeh eima mimal deihtuam/tuptuam leh phattuam na ding ziak a lamkai hihna tuhlou ding in kuapeuh ikichial hi. TPO, TSP chihte zong mipite deihna bang a lamkai itel zel ua, mipite’n zong Pasian kiang a thumna (prayer) tawh inam lamkai ding itel zel ding uh poimawh hi. Tualeh mipite’n zong inam/pawlpi lamkaite hoih in hoihkei taleh ithuap phot ua, ahoihlou te zong I sukdik zawk ding uh ahi. Nam dangte mai a ilamkaite sialphou lou a agupdan leh seldan isiam zawk ding uh ahi. Tuabang ahih chiang in ikituak ding ua, inam hat in ikhangtou ta ding uhi. Tuaban ah, Pawlpi leh nam lamkai ding tel hun chiang a kuapeuh in ngaipoimawh a, lunglut tak a I lamkai ding uh itel zel ding uh zong poimawh hi. Nang leh kei lunglut louh ziak in inam in lamkai hoih leh muanhuai khat taan thei ahi chih manghilh ken.

Sinlaite ahihleh zingchiang a inam lamkai dingte ahi uhi. Tua ahihman in ilaisimna chiat uah kuhkal tak a pan ilak uh kisam hi. I innkuanpih, I unau-sanggam te maimai hilou in inam in zong na lawhchin a na phungchin kal ngaklah mahmah ahi. Nam itna leh veinatna ziak a laisim paisuaklou/kituplou chih zong sinlai khenkhat omthei a, tuate pen ke’n nam it kachikei a, nam it dan theilou, ahunlou a agah aatsawm kachi zaw hi. Nam itna ziak a kuama’n ilaisim ibuaisak louh ding uh ahi a, inam I it takpi leh I sinlai a ihahpan sem a, asiampen, apilpen, a tungtuangpen hih ding itup zawk ding uh ahi. Tuachia a penpen ihung hih chiang in isakmin lawibangthang in, inam min tawisang in a om ding hi. Sinlaite’n ‘ka nam bang kapia in ka nam ading in bang kabawl thei a…..’ chinai tadih lou in ‘ka nam bangchi’n ka tawisang in, ka nam min bangchi’n vannuai ah ka thangsak thei diai…’ chizaw lei eima ading leh I nu-leh-pa ban ah inam ading in lawchinna thupi hizaw ding hi. I nam I it takpi leh I sinlai hihna manghilh louh ding ahi. Hih kachih hang in, inam nelhsia a nam min a kivaipuakna, kipawlkhawmna tuamtuam te ngaihsak louh ding kachihna ahi laizangh kei hi. Zingchaing a nam lamkai dingte ihihman in tuni apat inam sung paidan, kivaipuakdan itheih zong poimawh hi. Nam sung a khotang hinkhua a kihal dan ahunchaing theihding, ilaisim isinlai hihna manghilh zen a nam thu a lunglut a, inam veinat nai tadih louh ding chi ut ihizaw hi. Tualeh siam leh pil a iphungchin chiang in kuapeuh in inam nelhsiah louh hamham sawm chiat ni.

Nangmah mimal in va lunglut kholkei lechin zong khatvei-nihvei inam vaisai nate a navakilak chiang in sinlaite hanthawn in, mipite khamuan tuan mahmah ding ahi. Nam dang bang a asiam apil kiching depdup nailou ihihman in a omsunte’n inam a nelhsia chiang in mipite ading in lungneu huai a, sinlaite ading in etton ding omlou thei hi. Mun khat peuh a I om zong in inam ading in sep leh bawl, piak leh tawi I bawlthei gige hi chih manghilh ken.

Pasian min a ikiphalnate ah pilvang hoih hi.

Tamkhollou ihihhang in isung ah biakna tuamtuam a om a, tu dinmun in atamzawte kipiakna leh inam min a biakna omsun TBC ahiphot hi. Iki piakna tuam mah leh I biak Pasian pen khat hi veve a, tuamah bang in I ham zong khat hi veve hi. I biakna doctrine ah kulmut seng lou in inam min a biakna ompen kuapeuh in tuamkoih lou a ibul bawl chiat ding un hoih sa ingh. Hih kachih hang in TBC mite’n Thangkhal kineihsak tuam a, kiletsakna neih ding ahi kei a, Thangkhal min a omsun ahihziak a bulbawl chiat ding chi kahizaw hi. Bang biakna ah om nanlei ihihna Thangkhal beituanlou hi. Ahihhang in inam it takpi ihihleh biakna dang ah om nanlei TBC I nelhsiah thei tuam kei ding uhi. I nam min pua ahihban ah kuamah tawh kigawmlou, ei Thangkhal te a vilvel ahi hi. Biakna dang pen atamzaw nam tuamtuam ham tuamtuam kigawm hi zel hi. Biakna dang a omte’n neizou in Pasian ah hat in sawm-a-thum penanlei, I unau-sanggam in phattuampih khalou ding a, kuate hiam in phattuamna muhlawh zaw ding uhi. Pasian a ding a na silpiak pen mihingte phattuam nading mah a kizangh ahi chih thei in. TBC pen phungvuh lei ahung khantouh chiang in inam khangtou hiding a kei leh nang khantouhna himai ding hi. Thangkhalte khantouh leh khantouhlouh pen inam min a om biakna apat in mite’n hung teh ding uhi. Tua ahihman in biakna lam a piak leh tawi na neihzaw leh pilvang in, denchaing in Pasian ading a nakiphalna pen na tup louh pi in na nam (Thangkhal) mite tung a simmawhna leh nuainetna in pangkha thei hi. Nang Pasian min leh Pasian gualzawlnate kipakna a napiak ahihhang in biakna vaihawmte’n na piaksa pen amau deihna bang leh hoihsakna bang in zek zel veve uh ahi chih manghilh ken. Taksa a omlai ihihman in leitung paidan zong et zelzel poimawh hi. Pasian min a nakiphal nate pen leitung mite’n zek zel veve uh ahihman in, nakiphalna pen inam sung a tagah genthei te’n zong phattuamna nei le uh chi ut ihi. I biak Pasian khat ahi a, Amah min a ikiphalna silpiak zek tute atuamtuam ahihman in theihsiam a pilvang kisam hi.

Thukhitna:

Pasian in ahung gualzawl zel a, nidang sang in ikhangtou mahmah ta ua, tuni’a ikhantouhdan uh ipaipih zel leh sawtlou in nam khenkhat imakhelh pai tading uhi. Kuapeuh lungke kei ni, I nam ading a isep theih bang chiat semtou zel ni. Mimal hi’n pawlpi hitaleh ilungkiat kei pouleh ahuntak in agah I aat nading uhi. Pasian in nang leh kei sang in ahun theizaw a, Amah a ding in bangmah kikhel in zekai ngailou hi. Pasian eilam ah apang tawntung hi, Amah laudan siam a, agualzawlna leh athahatnate azatdan siam ding in simtu tengteng Pasian in hung gualzawl ta hen.


BIO-DATA:

Tax Assistant,
Dept. Of Income Tax,
Nizamabad, Andhra Pradesh
-----------------------------
Pa min – Tunzachin
Nu min – Hangngaihniang
Pianna Khua – Zoumun
Tenna Khua(Present) - Ngoiphai
Born in 13th August 1977.
Class X – Blue Star Academy, Lamka (1993)
Class XII – Churachand Hr. Secondary School, Imphal (1995)
B.A ( Sociology) – DM College of Arts, Imphal (1999)
M.A (Sociology) – Jawaharlal Nehru University, New Delhi (2003)
Present Address – Nizamabad, Andhra Pradesh