DC/CCpur makaih in Mautaam panpihna dia sum Rs. 7,22,83,578/- zat dan ding genkhawm

NREGS nuai a Job card ni 200 a di’n process pailel

Lamka, Nov 10: Shri Sumant Singh, IAS, Chairman, Natural Calamities & Disaster Management Committee makaih in tuni sunnung dak 3 in DC office, Tuibuang ah meeting poimohtak nei uhi. Hiai hun ah Manipur a Mautaam kial thuak Churachandpur district, Tamenglong district leh Chandel district a dia phualpi kumpi apan huhna hong pai Rs. 16.67 crores lak a CCpur a dia sehkhiak Rs. 7,22,83,578/- zat dingdan toh kisai nouneltak in genkhawm uhi.

Thutut kingah dan in, CCpur a dia sehkhiak Rs. 7,22,83,578/- pen Head 3 in khen hiding a, tuate bel Agriculture Input Subsidy, Supplementary Nutrition to Lactating Women leh Gratuitous Relief hiding hi.

Agriculture Inpur Subsidy head a ding in Rs. 7,22,83,578/- lak ah Rs.2,28,41,218/- sehkhiak hi a, hiaite Mautaam thuakte louma a hihsiat dan dungzui in inkuan 14,307 te lak ah hawmzak hiding hi. Tulel in CCpur district ah SDO tuamtuamte apan survey kibawl dan in louma 13920.609 hectres suksiat a om hidan in chiamteh in om hi.

Tuabanah, Gratuitous head tungtawn in Rs. 7,22,83,578/- lak ah Rs. 4,42,62,360/- sehkhiak in om a, hiai sumte zang in antang 2605.354 MTs lei hiding a, inkuan a piching leh naupang omdan in hawmlual hiding hi. Tulel in Mautaam kial thuak piching 58170 leh naupang 45379 omlel a, piching khat in 28.23 Kgs. ngah zou ding a, naupang khat in 21.19 Kgs. ngah zou ding hi.

Tuabanah, Supplementary Nutrition tungtawn in Rs. 1,80,000/- sehkhiak hi a, hiaite bel naupang nekselua a om ding venna hiding hi. Tulel in CCpur district sung a Mautaam kial thuak inkuante lak ah nupi naupawm mi 1000 om a, naupawm nupi khat kiang ah Rs. 180/- zel piak hiding hi.

Thutut kingah dan in, Mautaam in a sukkhak louma leh mihing zah chiamteh dan ah a kibanglou khenkhat a om ziakin a thak in survey bawl hiding hi’n leng thutut kingah hi. Tuni a meeting na ah DC/CCpur leh Chairman, Natural Calamities & Disaster Management Committee in Sub-Division chih a SDO te’n ngentel tak a mahni bial chiat en thak ding in theisak a, official dangte sawl mailou a, amau mahmah in a mun chiat a va en a a diktak chiat mah zongkhe ding in theisak thakthak hi. Government fund hong paite ahiding bangtak a zat ahihtheihna ding in DC’n a kisaipihte theisak hi.

Mautaam kial thuakte awlmoh DC i neihkhak ziak un CCpur mipite hampha tungtuan mahmah i hihdan uh leng press ah thutut tamveitak kingahta hi.

Tuabangkal ah, NREGS nuai a job card tungtawn a nasepna toh kisai in tulel a kum khat sung a ni 100 sep theih a ompen ni 200 ahih theihna ding in proposal bawl ding in Ministry of Rural Development apan in lai hong pai hi’n muanhuaitak apan thutut kingah hi.

Hiai toh kisai in, a kisaipih PO Ms Joycee in buaipih lel a, hiai proposal pen a pai suak theih leh tunung chiang in job card tungtawn in ni 200 sep theih ding hi.

Thutut kingah dan in, DONER Secretary Smt. Vena S Rao, IAS in Oct. 15, 2008 a Lamka a hong phak lai in, Mautaam kialpi ziak a ni 200 bek poimoh ahidan press te mai ah gen hi. Hiai hun a DONER Secretary in a genna ah, centre government in fund hau mahmah a, CRF tungtawn a leng sum tamtak zat theih ding om ahihdan gen hi.

Source: http://zogam.com/index.php?option=com_content&task=view&id=4881&ac=0&Itemid=2