- Aimin Thang ZoZo sungah eite thei masang lai-in a hat mama, a gang mama Va-no vut tung a tai cieng a ketot kimulo, an hai bepi taangman nganhuon ngankhat le Voh-ho khat bang a khawng na om hi. Va-no in a tha hatna khuoletui hunna le dalna'n na zangh thei a, ii pu ii pa anhai or ang tampi a khawngte lo-hlaw singpuah zong na hat zawdeuh uh hituah hi. Socrates in "A dugaw mama (Burning desire & greed) atang a ngawlzo'te mihat" na ci hi. Ama cibang hileh mihat pen a tha gol'te leh siemna nei'te beh hilo in, aneu'te zong mihat hithei hi (small yet, mighty or seize doesn't matter) ci, ei phawh sah.
Lai Sieng Tho 'Bible' in anhai (glutton)'te, siedongte (tax collector) mawnei (sinner) na ci hi. Siedong'ten kumpi'te ciengtan sang aa, atamzaw mipi tungah dongin meigong, taga, cimaw genthei'te nanawn dallo, khuatua lo, hepina neilo ahiziehun mawnei na kici hi. Bangding a "Anhai luat mawna hi" ci'a,"na ankam a tui leh na tawl at in" Lai Siang Tho in a ci giap a diei? Solomon'te Topa Jeisu te hun lai a kipan nehding dawn ding lunghimawlo, mihau mi cithei a na om bangin, nehding, dawn ding lunghimaw den mizawng zong na tamtuah hi. A cithei te'n a cimaw'te hepi lemah in zawthaw bawlin leiba tangin a neisun gougil lahpieh, gougil neilote sal in na khawi uhi.
Nei zaza matang a ne-tum, khawng-tum, koima hawm nuam lo a cilpawng, vetkawite Lai Sieng Tho in anhai na ci a, tua ten a tawl uh a atsan dinguh na gen hi.
Tuhun ciengin Zo innkuon sungah zong "Anhai" tampitah om in, tua'te zieh in ikhuo ii tui ciet a, meigong te gamdang mi te'n eiva pieh, sang ei koipieh uhi. Anhai le ku-du ii thua ziehun, ii khua ua hu lawm et lawm te ki-en zo, ki-hu zo nawn lo in, amaute gamdang miten va uhi. Tuate ziehin a hi ding za in ii khangto thei sih uhi. Kkhangto ding a om sunsunte zong kizomsuah theilo, tangtat paipai in guitung thei mama lo hi. I khuo ciet a, meigong taga'te kepding phawh in kemnuom lei gamdang huna kisam lo hi. I ankam uh nah tui lua lo hileh tavuon (mawpuah) alazo dingin Pasien in a thupha ei pie-ciet zo hi.
Gentena in, Tedim Zo Tuiphum pawlpi ten gamdang huna nga sih nan uh le, lainatna tawh taga honkhat a kem ua, tua bang a naupangte a kep ziehun pawlpi sesua (hop sawm) te le a dangdang mission (gammiel) na sepna te ah kiemtuam tuan lo ua, khang zaw va-iel lai uhi. A tahtah in, Kawlgam ZBA pawlpi lah ah, Tedim pawlpi a gol pen hi lo a, a gol pawl ah zong kise nai lo kha ding hi. Mihingtha le neisa muanna tawh tagate kep sawm uh le, tuni dong cieng lampi mu nai lo ding uhi. Naupangte a kem ding kicien zong omlo a, om na ding kicien zong om lo a, hinan le a pastor pa un ama omna ah luppi, giapi a, kum bangza ei khat tuabang a a om pi zo cieng ii mite unau gamdang; Korea le USA om khat in a sisa a nu uh phawhna in inn khat lampieh uhi. Tu in tuami Tedim ZBA te kep naupang sungpan numei khat tan sawm ong (Matriculation) zo a, Pasien nasem nuam a hiziehin Lai Siang Tho sangka in ki thawi hi.
2000-kum in ZBA in USA sum tul sawm ni val bang tawp in gamdang mite huna lo tawh zum-inn (office) khat a lam uhi. ZBA te beh piehkhietna tawh kilam hilo a Kawlgam le mundang a om Zo tate zongh kihal uhi. Topa Zeisu in Moh luum-5 leh nga tawn-2 a pun sah a, mi tul tampi a va bangin kiphalna, lainatna le veina tawh ii pieh te uh Pasien in thupha pia in, sepna bawlna tung ah gualzaw matutna tampi kinei hi. Leitung muntuam a om Zo taten ii tha ii neisa le ii siem ii theina te uh gawmton thei ulei, ii khua ii tui ua, biehinn, sanginn te kilam zo in, cimaw meigong tagate kikem zo ding hi. Tuabangin ii khua ii tui ua ding le ii mi ii sa a dingin piehkhietna le sepna ii nei ciengun Zo Laukha Pallun in tahsa le hlagau lam ah khangcinna le picinna lam ii manaw ding uhi.
Kawl gam a Zo khuo tan-4 (Primary School) sangte ah Kawl kumpi in sangsia 2 bang beh koi zo a, siaten ni khat in nai 6 (six hours a day), nipi khat sung in ni 5 (five days a week), hla khat in nipi 4 (four weeks a month), kum khat in hla 10 (ten months a year) naupangte lai hil zo lo uhi. Tu a dan a ii peisuah uleh lai pil, lai siemna tawh an-ne Zo tate ang tawm semsem ding a, gamdang pei sunsun ten zong 4D beh sem ding hi. (Dirty=Kidahhuai, Dangerous=Zauhuai, Difficult=Hamsa, Dehumanized= Mihing hina kiem/tawm). Zo khuo, Sielmei, Bizang, Phaidim, Thauthe, Maulawn, Muizang, Lamthang, Sehshi, Tahzang, Buolkuong, lah ah laihil ding sie kicien omlo hi.
Zo khuo sangcin ah khan (class) khat cieng sia(teacher) khat in ni khat nai-6, nipi khat ni-5, hla khat ni-20, kum khat hla-10 teitei naupang'ten siete tawh lai a simton sih leh a sin uh theizo lo ding ua, laitan sangpi (class sang or tam) tung zo lo ding uhi. Tua ahi ziehin anhai lo in, ii khuo ciet a ding na ii sep dinguh hun mama ta hi. Kumpite ii ngamsie uhle leisung ah kitum suh dinga, gual kiban zo nawn lo ding hi.
Suhleto a kisapna zosie gamdang mite kung a ii nget uleh ii Pasien uh lungdam vahuau lo ding hi. Pasal khut kim kengkim khat in mikung a zatep ding le ci me ding a nget den keei le, a khangual mai ah mai nga ngai lo dinga, a ma ziehin a pianna a pa angtaang ngai lo ding hi. Zo tate ziehin Pasien angtang nuam hi. Zo taten kisap le tulmaw ii neisiel ua mite kung a ii khut ii daw denkeei ule, Zo te a siem Pasien angtang lo ding hi. Lungdam lo ding hi. Pasien in Zo te ei ma le ei ma ki pui thei, ki-pua zo dingin ei dei a, tua zocieng, midang te a hu ding, apanpi dingin ei dei hi.
Ku-du lo, anhai lo, ankam tui besehlo in kipawl in Zo taten na ii septon thei ciengun Zo Laukha Pallun pan ding hi. A tahtah in Pasien gam a pieh ding leh Zo tate tung a,hawm sawn ding thupha Pasien in ei pie hi. I tawl ua naam ii phu masang sie uh, ii mite kihu, kipanpi zolo ding a, ii khua ii tui ua meigong, taga te mite'n eiva pieh ding uhi. Tuabang ii hi ule, Vantung ah Topa Jeisu tawh ikimu ciengin "Ka gilkial laitah a an ei pielo nang! silding teending ka neilo phalbi vuasan kathuah laitah a, puon eise nuomlo nang! omna ding inn le lou ka neilo ni-sa, gua-zu ka luzaang a ka thuah laitah na inn hlim a khawl ding a phallo nang!" ci'n ei siipkaw kha ding hi.
Pasien mai a, tua bang na toh masangin "na ankam a tuiluat, an na hai luat leh na tawl ah naam phut in, na tawl at in" (Paunah 23:2) na tawl a naam na phu masang sie, an-neh thunget cieng a, "nehding dawnding a neilo tampite lah ah nehding dawnding neipieh ka lungdam" ci'a na lungdam kona Pasien bil ah dong ding hi. Cimaw genthei hu ngailo in, Pasien tung ah lungdam na ko den hangin Pasien in za lo ding hi. A nei a lam ten a tawl a atsan lo ziehun cimaw gentheite tawl ki-atsan hi. Ahia'ng a nei a lam ten a tawl atsan le amaute a si lo ban ah cimaw gentheite a cing a kem ding om ding ahi zieh in a tawl uh ki-at talo ding hi. Ankam a tuiluat a, an na hai a, an na tam khawn luat le na tawl ah naamsau phut in. "An khamluat mawna hi" a cinopna in cimaw genthei, meigong taga'te kem lo don lo a mu zaza, lam zaza matang a khawngtum, netum te a kawh a hihi.
Leitung ah mi honkhat in a du a dei uh a du hun le a dei hun in ne ziauziau ua, an tamneh lua uh a hiziehin thau (fatty) in a pumpi ule a gil uh lawpmaw gol mama hi. Leitung ah mi honkhat in a du a dei gen thada, ni khat in khat vei na ngawn neh ding nga zolo in a ui gil hamsa a vah tam mama hi. An hai mi a tam laisia, ui gil hamsa a gilkiel dangta a vah ii kiim ii pam ah om den ding hi. "An na hai luat mawna hi. An na hai luat le na tawl at san in".
Source: http://www.pu-zo.com/
No comments:
Post a Comment