Monday, September 17, 2007

Lamka Post | September 16, 2007

Casualty ah Doctor duty lou

Lamka Sept 15: Lamka Damdawi inn a sem Doctor 4 te mundang a semding a suankhiat ahihziak un Casualty a Duty ding roster kibawlsa zuihtheih hinawnlou a huaiziak in tuni’n Casualty ah Doctor Day duty omlou hi. Zan a Roster kibawlthak dungzui a sun hun a doctor duty dia she a kailouh ziakin damlou tamtak buai uhi. Health Minister in Lamka damdawi inn etkhiatna hongneih hun in Casualty Deptt. hong khia a, Doctor piak beh chiam mahleh tunitan in piakbeh nailou hi.
==================

Bomb thang ah Lallawmpui si

Moreh Sept 15: Miss Lallawmpui (29) w/o Hngaka, tulel a Myanmar leh India gamgi zul a om Jangngoulen Village a teeng, zan Sept. 14, 2007 sunnung dak 1 in Molcham Police Station apan Kms 3 vel ding a gamla ah helpawlte bomb thangkam hih puakkha in a mun in si hi.

Thutut kingah dan in Mrs. Lallawmpui bel a lawmnu Miss Kimte toh lou a kuan in hiai bang tuahsia tuak hi ua, amah pen a mun ah si ngal a, a lawmnu Kimte pen naktak a liam in Khampat, Myanmar damdawi inn ah etkol in om lel hi.
====================================

MPSC Chairman lui T Gwite IPS (Rtd) mualliam Pawlpi tuamtuam in suunthu puang

Lamka, Sept 15: Thangzamang Gwite IPS (Rtd) @ T Gwite S/o (L) Khamkhopau Gwite of Paite Veng, Imphal tu nitaklam dak 3 in New Delhi ah heart attack in buaiphut a, kintak in All India Institute of Medical Sciences, (AIIMS) zotpih in om ngal a, himahleh, nitaklam dak 5:40 in damzoulou in mualliam hi.

Pu T.Gwite, a zi Nu Chungi te'n a tanu uh FLorence US a om veh dia kisa lai Indira Gandhi International Airport, New Delhi ah heat attack in phaguih in buaisia a AIIMS Delhi ah puaklut in om ngal hi. Pu T. Gwite ahihleh Lungtang na neisa hi a, tuma lam in, Delhi mun ah leng ki enkol sak sek hi.

Pu T Gwite ahihleh, Manipur Public Service Commission a Chairman lui leng ahi hi. Amah sihna toh kisai in Siamsinpawlpi General Headquarters, Zomi Human Rights Foundation, Zomi Students’Federation Headquarters, Zomi Welfare Association

Guwahati leh Paite Tribe Council, Mizoram in sunthu puang uhi. Pu T Guite ahihleh, Siamsinpawlpi ah Patron ahih ban ah, lehkhabu bawl na toh kisai a lunglut mahmah hi’n kigen hi.

Pu T Gwite luang ahihleh, tu zan in AIIMS Mortuary ah koih in om a, Delhi YPA in buaipih in nitak nung in Lady Hardinge Hospital ah Embarnment bawl ding in phutna bawl ua, a zoh kei ualeh, zingchiang zingkal dak 7 in AIIMS Hospital ah Embarm bawl ding ua, zinglam dak 10:25 a Indian Airlines Flight ah a luang hon puaksawm uh hi’n kigen hi.

Pu T Gwite tanchin tomkim:

Pu Thangzamang Gwite ahihleh, January 1 1942 in Thanlon khua ah piang a, CC High School, Imphal apan 1958 kum in Pawl X ana zou a, DM College,Imphal apan 1960 kum in Intermediate ana zoukhe nawn hi. St Edmund’s College, Shillong apan BA 1962 in zou a, Allahabad University apan 1966 in MA (English Literature) zou khia hi. Aman Churachandpur Government College ah Lecturer hun bangtan hiam sem a, huai zoh in DM College/GP Women College te ah 1973 tan Lecturer hihna seem hi.

Pu T Gwite in 1973 kum in UPSC saina nuai ah, Indian Police Service ngah a, UP Cadre piak in om hi. ASP, Aligarh ah sempan a, huai zoh in, SP Agra, SP Vigilance, SP Mainpuri District, Dy Commandant, Special Police Force, Moradabad, Commandandt, 43rd Provincial Armed Constabulary chih te lenkha hi.

June 1982 apan Intelligence Bereau ah kiheikhia in, Assistant Director, IB HQ, Assistant Director, SIB Kohima, Assistant Director, SIB Imphal te ana pawkha ngei a, huai apan Dy Director ah kaisang in, IB HQ, Ministry of Home Affairs, New Delhi ah posting a, Joint Director ah kaisang nawn in, a pension dong, Joint Director/NE, SIB Shilling i/c Meghalaya, Arunachal Pradesh, Tripura leh Mizoram lenden hi.

Pu T Gwite in ahihleh, Intelligence Bureau nuai ah a diktat mahmah ziak in, IB Recruitment Board for Recruitment of Assistant Central Intelligence Officers and Security Assistant lakna te ah Chairman hihna tanpha ana len kha a, SIB Imphal, Kohima, Bhubaneswar, Patna, Guwahati leh Shillong te pawkha vek in, mite theih tham heutu muankhat ahi hi.

Aman Service a aom lai in, London leh New Mexico, USA te ah training ding in ana kuankha a, Course on security chih leng training kha hi’n kigen hi. 1990 kum in nasep hoih ziak in, Indian Police Medal for Meritorious Service 1990 kum in ana sang hi. Government ah hun sawt taka sep khit nung in, December 31,2001 in retired ta hi. Pu T Gwite toh kisai chiam teh tham om bel, DM College a Lecturer a seplai in, Manipur CM masapen MK Priyobratta Singh Chairman na nuai a Manipur Cultural Integration Conference ah leng Member hihna ana leen hi.
========================

Naga Club building suksiat in om

Kohima, Sept 15(NNN): Kohima a om Naga Club Building zan nitak in meltheihlouh pawlkhat in valuh uh a, bang mah gukkhiat nei kei mahle uh, a sung a om van manpha tamtak suse dimdem uhi. Thusuak kingah dan in, Naga Club building ahihleh, tulel in, Naga Students’ Federation (NSF), Naga Mothers’ Association (NMA) leh 0All Nagaland College Students’ Union (ANCSU) in office dia a zat lel uh ahi hi. NSF leh Police thusuak kingah dan in, meltheihlouh pawl khat in Club office lutna kongpi susia uh a, drawers leh file bangkim pholh lek vek in, chabi tuamtuam om te khense vek uh a, NSF President, Vice president, General secretary, Speaker leh NMA room te ngial bang nasatak in lok uh a, file tamtak a paihthaang ban uah, table teng leng sawnpaai vek uh hi’n kigen hi. Thusuak dangkhat kingah dan in, Naga Peoples’ Movement for Human Rights office leng 3 vei hial luh hita a, a luhtu ami kibang ding in gintakthu kigen hi. NSF leh NMA in bang file mang hiam chih zonkhiak sawm in kisa lel ua, hiai thu gelh ahih tan in NMA leh NSF in file mang bangmah report bawl nailou uhi.
==========================

Upa T. Vungkhanthang tuni’n si

Imphal, Sept. 15: Zomite a dia mipoimohte lak a dia chiamteh thamching Upa T. Vungkhanthang @ Beampu (87) Father of T.Lamzamuan, Lamphel tuni zinglam dak 4.25 vel dingin, Cancer natna ziakin si a, a luang tuni sunnung lam in Chingmeirong Christian Cemetary ah thupitak in vuiliam in om hi.

Upa T. Beampu bel Pu Kaikhup Tawmbing leh Naulak innkuan apan Pi Theiching-te tapa hi a, 15th April 1920 in Kaihlam khua ah piang hi. 1949 in Imphal a Churachand High School Imphal ah Class IX zou in 1953 in Pharmacist in lem pan in 1986 in retired hi. 1965 in Songtal khua ah teng pan in tapa 4 leh tanu 2 nei hi.Pu Beampu in a damsung in chi-le-sa itna ziakin chiamteh thamching a chipihte a ding in semkhia hi.
===============================

Programme Officer in joined

Lamka Sept 15: ICDS nuai a CDPO/CCpur hihna lenlel Ms. R. Khumi pen Manipur Governor in apaisa September 10, 2007 a Order a suah dan in ICDS Cell/CCpur a Programme Officer in-charge hihna toh leenkhawm ding hi. Huai order dungjui in Ms. R. Khumi in tuni’n Programme Officer hihna lending in in joining report pia hi.
===============================

Election Duty ding in kuan ding

Lamka Sept 15: Manipur phaijang bial a hongtung ding September 19 chiang a Panchayat election neih ding ah Lamka Police Station a apan in Police personnel 70 vel Election duty ding in kuan ding uhi. Huailou in Department tuamtuam apan in semtu tamtak leng Election duty ding in kuan ding uhi.
================================

HAC Meeting postponed

Lamka Sept 15: Hill Area Committee (HAC) a Member teng in tuni zing dak 10:00 a Lamka hongpha a CEO, Autonomous District Council/CCpur toh meeting nei ding chih himahleh lemtanlouhna khenkhat ziakin hongtung ding September 19, 2007 chiang a meeting neih ding in a hun suan uhi.
================================

Tuilawng 68 guukmang in omta

Lamka Sept 15: Lamka khopi tuidawn ding zawlna tuilawng 150mm a lian te Tipaimukh Road a Lanva Lei leh Bungmual a tanky kikal ah Tuilawng tamtak guukmang in omta hi. Apaisa July 28, 2007 apan in hiai tuilawngte guukpat in omta a tuni chiang in tuilawng kigumang teng 68 phata hidan in PHED Department in Police ah report bawl ua, himahleh tunitan tuilawng khat bek muhkhiak gen om nailou hi.
==============================

MSF te Jeep khetsiak sak

Lamka Sept 15: Lamka Police apan thukizadan in zan sunnung a Imphal apan Lamka zuan a hongtai Medecins Sans Frontieres (MSF) te Jeep/Mahindra Max (MN01K-4779) dak 2:30 vel in Ningthoukhong ah Ambassador Car (no. 1810) leh Escort Party te toh kituak ua Escort te tuanna Maruti Gypsy a tuang Police khat in MSF te gari a chiang tawi in MSF te gari Side/rearview mirror satkhap sak hi.

Hiai thiltung toh kisai in MSF Project Co-ordinator Ms. Ya Ching Lin in Lamka Police ah complaint bawl hi.
==================================

Bike in phukha

Lamka Sept 15: Mrs. Lhingzahat (60) W/o. (L) Jamkholun of Teisiang tuni sunma dak 11:00 vel in Tuibuang ah Bike in phukha a alu leh a khe langnih nasa in Lamka Damdawi inn ah etkol in omlel hi.
===============================

Bike khetsiat sak

Lamka Sept 15: Meltheihlouh galvan tawi pawlkhat zan nitak dak 7:30 vel in Chiengkonpang a Post Office kong lakah gari taituahte khawlsak in thudotna a neihlai un ZSF President Mr. S. Kapkhanmuan leh alawmpa bike atailai khawlsak in gari headlight off pah lou chi’n a Bike headlight khensiat sak uhi.

Amau leng a Bike uh hemkhe ding chih paulam in mi daikawmkal zui in kihemkhe thei uh hidan in thutut kingah hi.
=================================

Rationing Agent ten Deposit ngai

Lamka Sept 15: 56/Thanlon AC nuai a Rationing Agent ten MLA Nominee kiang a amau quota a ding sum Sept. 18, 2007 tan a pechiat ding in theisakna bawl hi.
============================

Candidate tamtak exam ding

IMPHAL SEPT 15: Social Welfare department nuai a Supervisor/LDC/Statistical Assistant post tuamtuam lakna dingin, BSEM saina nuai ah, zingchiang Sept. 16, 2007 zinglam dak 9-12 tan Imphal a centre tuamtuam ah candidate tamtak in exam ding uhi. Supervisor numei ading chauh himahleh, centre 33 ah candidate 7250 in exam ding ua, LDC ah candidate 2100 in centre 9 ah, Statistical Asstt. adin candidate 450 in centre 3 ah, Supervisor (Anganwadi) adin candidate 578 in centre 3 ah exam ding uhi. Hiaite ban a tuni a form submit thakte a dingin, post teng a din Bengali High School, Babupara leng reserved hidan in tuni’n BSEM thusuak om hi.
=============================

Imphal Bazar leh MTDC kikhak

IMPHAL SEPT 15: Imphal Municipality Council etkawlna nuai a Imphal bazar sunga, Ima market chi a kithei dawr buk tamtakte tuni'n kikhak hi.

Thutut kingah dan in, phaijang helpawl khat in dawr buk neite kianga piakzoh vuallouh ding demand abawl jiak uh hidan hi’n kigen a, hiai demand toh kisai in kihouna nei mahle uh kihoulemna om theinai lou hidan in leng thutut kingah hi.

Thudang khat ah, muanhuaitak apat thutut kingah dan in, Lamphel a om

Manipur Tribal Developent Corporation (MTDC) leng helpawlte sum demand toh kisai in, kalkhat vel paita apat khak a omta hi.
================================

MLA in kap in om

IMPHAL SEPT 15: Police apat thu kizadan in, zan nitak dak 10.45 ding vel in, meltheihlouh gari neu a tuang ten, Congress MLA Hiyanglam a om, E. Dijamani tenna inn thau in 3/4 vei vel vakap ua, liam-le-bai omlam theih hilou hi.
=============================

Pensioner ten Sept. 30 tan a hihfel ngaiding

IMPHAL SEPT 15: Manipur govt. nuai a Secretariat Finance Deptt. (Expenditure Section) nuai a Commissioner (Finance) R.R.Rashmi in September 13, 2007 a press note a suahna ah, pensioner te adia lemchangzaw ding khualna in, pension sector reform bawl sawm hi.

Hiai ding toh kisai in, computerization of pension data, digital photograph lak leh bank account honsak chihte progress om mahleh, bangzah hiam in kithuahpihna hoihtak piaklouh jiakin, nawngkaina om hi’n thutut kingah hi. Hichibang ahihna ah, pensioner ten bank account honna ding leh digital photograph lakna di toh kisai a Treasury Office naih dia theihsak hi ua, hiai napen September 30, 2007 tan a zoh ding chih ahi. Pensioner hiai hun kipia tan a hihfel loute PPOs te permanent a invalidated/disabled hidinga, tuate Accountant General a surrender hiding chih ahi.

Hichibanga pensioner bank account hongsate a, payment bel 1st October, 2007 apat hita ding.
========================

Cabinet meeting zoh in CM Delhi zin

IMPHAL SEPT 15: Tuni zinglam in CM Secretariat ah CM makaih in cabinet meeting poimoh tak om hi.Hiai hun ah Assembly sitting nanung pen khakna dia Governor a recommend ding lemsa ua, huailou in Manipur a Elementary & Secondary Education Act 1972 leng amendment bawl ding phasa uhi. Hiai meeting zoh in, Chief Minister in Delhi zuan ngal hi.

Thutut kingah dan in, Manipur Information Centre, Delhi thusuak dan in, India Independence kum 60 toh kituak in, Ministries of Tourism, Culture Textiles, Commerce, leh Overseas Indian Affairs kithuahte saina nuai ah, festival om ding ah tel ding hi.

Hiai Inaugural ceremony of the Incredible India Cherishing Democracy and Celebrating Diversity Festival in New York mun a, September 23-26, 2007 sung om ding a vakihel dingin, Manipur Chief Minister O. Ibobi Singh in chialna a muh dungzui a huai a leng va hoh ding hi.

Hiai chialna bel, Union Minister of Tourism and Culture, Smt. Ambika Soni leh President of Confederation of Indian Industries (CII) Sunil Bharti Mittal ten abawl uh ahi.

Hiai hun honkhiakna September 23, 5.30pm in Avery Fisher Hall, Lincoln Centre, New York mun ah, Union Minister of External Affairs Pranab Mukherjee in nei ding hi.


www.zogam.com

No comments:

Post a Comment