Telephone pailouh toh kisai in SDOT in hilhchian
Lamka, Feb 28: Bharat Sanchar Nigam Limited, CCpur Telephone Exchange nuai a Landline phone teng apaisa February 20, 2008 sunnung dak 2:00 apan a ni 3 sung telephone zat theihlouh a omna toh kisai a, SDOT/BSNL, CCpur in angaihsaklouh ziak hidan a Newspaper khenkhat a kisuah toh kisai in Mr. A. Jasobanta Singh, SDOT/BSNL, CCpur in hilhchian hi.
SDO in thusuah a bawl in a taklat dan in, electric supply ginatlouh ziak in Exchange ah Genarator zat hi a, himahleh BSNL authorized Depot Tuibuang in Diesel stock a neihlouh ziakin PCO neitu Parmeshwor apan in Diesel 500 litres leh BSF STC apan in Litres 100 banah Truck neitu khat apan in litres 100 leitawi ahihdan taklang hi. Diesel bei ziak a Exchange zattheihlouh a a omma deuh in SDOT in DC/CCpur kiangah Diesel ngen ding in vakuan mahleh DC a kailouh ziak in ADC kimuh in diesel va ngen mahleh ADC inleng Diesel stock neilou a, tua zoh in SP/CCpur in 30 Litres kia ana hawmthei a huai in ni khat leng daihlou hi. Huai ni mah in SDOT in a tung a thuneite kiangah Fax in kintak a diesel leina’ng sanction dia a nget dungzui in February 22, 2008 sunnung in a sum piakkhiak in om a, tua sumte zang in February 23, 2008 in Imphal ah diesel lei in hon potou a huai ni mah a Exchange zattheih nawn hipan dan in Press ah theisak hi.
Mr. A. Jasobanta Singh, SDOT/BSNL, CCpur in Lamka Post palai kiang ah amah khut a sum sanctioning power omlou ahihdan gen in Divisional Engineer (Rural) kiangah ngetna pelut a huai apan in Asst. General Manager tawn in Chief Account Officer kiang tut hi a, Chief Account Officer apan in Dy.General Manager kiang tung a DGM in approval abawlkhit chiang in sum lakkhiat theihphet hidan inleng gen hi.
Pasal 1 kaplupsa in mukhia
Lamka, Feb 28: Lamka Police in Kangvai khosak a tuilou lakah pasal khat kaplupsa a om chih report a omziak in siluang lading in vakuan in sundak 12:00 vel in Lamka Damdawi Inn morgue ah siluang tun uhi. Hiai misi pen Mr. Songminlun Mangte (25)S/o.(L). Ngamzahao Mangte of Saiton Khunou ahih chet ahihnung in Post mortem bawl hi a, Post mortem bawl ahihzoh in asungkuante kiangah piakkhiat in om hi. Thukizadan in Mr. Songminlun Mangte bel kha 3 vel paisa apan inn a pawtkhia hi a, zan nitak dak 8:00 vel a Kwakta bazaar pan meltheihlouh pawlkhat in man a Gypsy ngou khat zang a apukkhiat uh hi a tuzing a Kangvai khosak a army post omna khang a tuilou lak sisa a naupang tangkuangteh zongte’n amuhkhiat uh ahi. Mr. Songminlun Mangte mitkhumul te geel ah thautang lutna ma muhtheih in omtuak hi.
Songminlun Mangte kaplup in om
Lamka, Feb-28: Lamka Police in tuni zingkal lam dak 11:30 in Kangvai khua Tuilou ah Mr. Songminlun Mangte s/o Ngamzahao Mangte kaplupsa in naupang tangkuangteh toute’n mu ua, police a report piak ahihnung in Police in va in Dist. Hospital morgue ah koih hi.
Police apan thutut kingah dan in, Songminlun Mangte bel a mit tung tuak ah thau a kapna ma om a, postmortem bawl zawh in misi innkuante kiang ah pekhia ua, tuni mah in Seitual khua ah vui in om hi.
Thukizadan in Mr. Songminlun Mangte bel kha 3 vel paisa apan inn a pawtkhia, zan nitak dak 8:00 vel a Kwakta bazaar apan meltheihlouh pawlkhat in Gypsy ngou khat zang a apuakkhiat uh tuzing a Kangvai khosak a army post omna khang a tuilou lak a sisa a muhkhiak a om ahi. Mr. Songminlun Mangte mitkhumul te geel ah thautang lutna ma muhtheih in omtuak hi. Hiai thu gelh ahihtan in tualthattute kuamah kipuang omlou hi.
Louma a lohsamte report pekin ding in theisak
Lamka, Feb 28: District sung a louma a lohsamte solkal in panpihna apiaktheihna’ng a SDO teng kiang ah amau bialsung chiat inspection bawl a detail report pe dia DC/CCpur in apaisa December 18, 2007 ni a theihsakna abawl tunitan SDOte’n report apiaklouh ziak un DC/CCpur in District sung a SDO teng kiang ah hongtung ding March 1, 2008 tan a report bukim pelut chiat ding in noh hi.
Hiai louma a lohsamte toh kisai a detail report piaklut ahihlouh ziak a panpihna piak ding toh kisai a provision processing suzekai ahihman in kimtak a March 1, 2008 tan a pelutchiat ding in DC in theisak hi. Hiai report piaklut ding toh kisai a proforma leng SDO teng khut ah apaisa December 18, 2007 a DC in apiakkhit hita hi. Hiai panpihna muhtheihna ding in louma lemlak leng piaklut ngai ding hi.
Mautaam toh kisai in meeting
Lamka, Feb 28: District sung a mautaam tung toh kisai a meeting ding a Chief Secretary in a sap ziak in DC/CCpur Imphal ah hohsuk hi. Hiai mautaam toh kisai a panpihna AID Zomi, Japan tungtawn a Osaka pansan Japan International Food for the Hungry (JIFH) in canned/packed food 40 Tonnes hon khaak ding toh kisai leng Lamka bangchitut ding hiam chih chiangkuang nailou hi. JIFH in bel Long a puak ding ahihleh Nagoya Port apan Kolkatta Port tan apuakman seng ding ua, Lenna a puak ding ahihleh Nagoya apan in Narita Airport (Tokyo) tan apuakman seng ding uhi. Hiai panpihna vante Lamka puaktung ahihna ding in SSPP in DC/CCpur tungtawn in Government kiangah puakman sensak ding in ngen a, himahleh Government in dawnna penailou hi.
Doctor in TV pekhe nuamlou
Lamka, Feb 28: Lamka Damdawi Inn a zat ding Television (29” Philips Flat) khat MACS in a piak pen Dr. Paikhomba Singh, Gyneacologist in hun bangtan hiam apan in amah quarter ah koih a, zan zek in Damdawi Inn OPD Building a damlou ki-ensak dingte omna lak a thuah dia ava lakdek uhleh pekha utlou hi. OPD Building ah damloute’n amau ki-etsak hun tunma a ettheih ding in TV khat SDO/CCpur in Dish antenna toh apiak pen bel thuah hita hi.
VET ah Graduation zang
Lamka, Feb 28: Rengkai Muallum a Reformed Presbyterian Church North East India saina a Vocational Education and Training (VET) Centre ah 2nd batch a Weaving training zouthakte Graduation programmme tuni zingkal lam dak 11:00 in zang uhi. Huai hun ah Brig. BC Sharmah Commander, 27 Sector Assam Rifle Chief Guest apang in training zou thakte kiang ah Certificate, vanzat tuamtuam leh kipat sat nang uh sum bangzahzah hiam pe khia hi. Vocational Education and Training Centre ah tutan in training zou mi 143 phata in huai lak ah mi 95 vel mahni kitoudelh thei in omta uhi.
Lamka a Hindu te Mandir hong
Lamka, Feb-28: Light House Lane kiang a Hindu te pathian biakna ding (Mandir) thupitak kibawl tuni zingkal dak 11:30 in hongkhia uhi. Huai hun ah T.Gouzadou Ex. Minister Chief Guest apang in Mandir hong a, Lamka khawpi sung a Hindu tamzaw kikhak in huai hun ah tel uhi.
Dr. T. Hatzaw in Medical Supdt len ding
Lamka, Feb-28: Medical Supdt. len lel Dr. Lachinkhai zingchiang February 29, 2008 apan a pension ding ziakin Dr. T. Hatzaw in Medical Supdt. dinmun len ding in tuni’n Govt. in order suah hi. Amau gel March 1 chiang in charge kipe ding ua, tua ni apan Dr. T. Hatzaw in len ngal ding hi.
Mi 6 pension ding
Lamka, Feb-28: Dy. Director Sericulture Office Bijang ah tuni zingkal lam dak 11:30 in Office Staff 2 Thuampau Vaiphei, Sub. Inspector leh Tlangdawl Driver te Feb.29, 2008 a pan pension ding khakna hun zang a, staff ten nampuan silh sak in Singpi don pih uhi. Huai lou in Chief Medical Office(CMO)/CCpur nuai a sem Office Staff mi 4 H.D. Bawilien Pharmacist, T.Ginzathang Pharmacist, Ningngaihnem Health Educator leh Vanlaltawka Driver te Feb.29, 2008 apan pension ding khakna zingchiang sunnung dak 1:00 in CMO/CCpur Office ah khakna programmed neih sawm uhi.
Lalsuong Gangte in AEO len
Lamka, Feb-28: DC/CCpur Office a Asst. Election Officer (AEO) hun sawttak omlouh nuang in February kha bul apan in Lalsuong Gangte SDC in Asst. Election Officer (AEO) hihna charge la hi.
Youth Centre 2 ah final bill pia
Lamka, Feb-28: Nehru Yuva Kendra (NYK)/Churachandpur nuai a Establishment Youth development Centre 2 bawlna 2005-2006 a final bill Rs.15, 000/- tuak T. Champhai Youth Development Centre leh Nahphou Youth development centre a President te kiang ah L. Chitra Devi, Dist. Youth Co-ordinator, NYK/CCpur in tuni’n NYK Office ah pekhia hi.
EE/PHED in DC theisak
Lamka, Feb-28: EE/PHED, CCpur Mr. N. Bipin Singh Churachandpur in Lamka khawpi in buannawi tuikai a nek uh toh kisai in DC/CCpur kiang ah Lanva nak tuilakna mun ah Gari tuamtuam in suang paw khia a tui lak apai ziak ua tui nin ahih dan thei sak hi.
Thutut kingah dan in, Dist. Magistrate in Lanva nak a suangla Gari tuamtuamte khamna order suah poimoh ahihdan DC theisak hi.
Class-XI & XII final Exam kipan ding
Lamka, Feb-28: Board of Higher Secondary Education Manipur saina in Class-XI & XII final exam zingchiang February 29, 2008 in kipan ding hi. Class-XI te bel mahni College chiat ah exam ding ua, Class-XII te bel CCpur Private Centre 2 Churachandpur Govt. College leh Lamka College ah exam ding uhi. Churachandpur Govt. College Centre ah Churachandpur College, Sialmat Higher Secondary, CTS Higher Secondary leh VK Tawna College te exam ding ua, Lamka College Centre ah Lamka College, Rayburn College leh Ebenezer Higher Secondary te exam ding uhi.
Hanship khote a ding EPIC lak hiding
Lamka, Feb 28: Thanlon sub division a om Hanship Polling Station a min om, tulel a Lamka pansan a khosate’n hong tung ding March 1, 2008, zinglam dak 6:30 in Mr. T. Paukhanlian, Elim Veng, New Lamka inn ah Photo identity Card lak theih ding hi. Hanship kho mun a omte a ding inleng a kho mun mahmah ah tunung sawtlou a lak hiding hi’n official thutut kingah hi. EPIC kichipen India khua-le-tui hihna dia poimoh ahihman in ngai poimoh chiat ding inleng a kisaipihte’n ngen uhi.
KLO in hilhchetna bawl
Moreh, Feb 28: Kuki Liberation Army (KLA) in thusuah a bawl dan in Seppatni paita a Raj Hotel, Aizawl a kaplup a om Mr. Thangcha Kipgen @ Johnu pen party dankalh a a gamtat ziaka kaplup a om hi’n taklang hi.
Thusuak in a taklatna ah, Mr. Thangcha in sum-le-pai a diktatlouhna a neih kia hilou in a mah-le-mah leadership kipia a tung a mite a zahlouh ziak leh zuih ding a thupiakte a ngaihsaklouh ziak a capital punishment piak a om hi’n thusuak in taklang hi.
Mr. Thangcha thahna toh kisai a organization leh phung-le-tang nuaisiah ziaka nasep hilou in, mimal hihkhelhna ziaka thah a om hizaw dan in taklang hi.
ZSF in Exam Centre te enkhe ding
Moreh, Feb 28: Zomi Students’ Federation (ZSF) in thusuah a bawlna ah zingchiang a kipan ding Class X leh Class XII exam centre te vehkual ding ahihdan uh taklang hi.
Thusuakin a taklatna ah, mipite’n leng exam na buaisak thei ding thawm neilou ding in ngen a, tuabanah electric department inleng hiai hun sung a electric meivak hoihtak a pe ding in theisak kawm in, exam dingte vangphatna hoihtak toh exam chiat ding a deihsak thu leng taklang hi.
Kum 1 sung in gari 5000-6000 kibehlap
Imphal, Feb 28NNN: Manipur a gari register kibawl zah December 2007 bei toh kiton in 1,138575 hi a, kum khat sung kia in gari neu 5000-6000 kikal kibehlap hi’n tuni’n Transport Minister L. Jayentakumar in Manipur innpi theisak hi. Innpi a dotna a dawnna ah, Transport department in kum nawn sung in Imphal leh Churachandpur district sung a bus terminuses khat tuak bawlzoh hidi’n gen hi.
Inpi tut khawmna a dotna State Health Minister Ph. Parijat in a dawnna ah, lobour toh kisai awareness nei kitawm mahmah a, tunung sawtlou in awareness campaign neih hipah ding in gen hi. Minister in a genzelna ah, tulel in naupang kumchinglou 230 amau leh mau kiloh tawm a nek zong om uh hi’n gen a, amaute free education leh a poimohte uh piak hidi’n leng gen hi. Tuabanah, Imphal District huamsung Jiribam ah Rs. 430 crores bei a ITI khat bawlkhiak hiding a, tua ah sinlai 132 in sin thei ding uh hi’n leng innpi theisak hi.
Meghlaya Election ah Crore-patis 27 kibei ding
Shillong, Feb 28NNN: Meghalaya pansan NGO khat in Meghalaya Election hong tung ding March 3, 2008 a om ding ah, mihausa crores patis ngen mi 27 kituh ding uh hi’n suikhia hi.
Thusuak in a taklatna ah, Congress candidate crores khat tung lam nei ngen mi 10 in election tuh ding ua, Unied Democracy Party (UDP) in tua bang mah in crores patis candidate 4 nei a, HSPDP leh MDP iln khat tuak banah Ind. Candidate 4 leng crores patis om uh hi’n taklang hi.
Hiaite lak ah Ronrenggiri apan Congress candidate Deborah C Marak tops list a dia puankhiak hi a, a gou neihte Rs 112,36,87 492 banah, gari Boleros 3, Accent 1 leh Bond 1 hi a, NCP candidate from Tikrikilla Asahel D. Shira in Rs.37,66,74,649 leh Tata trucks 10, Scorpio jeeps 3, Scooty bikes 2, Maruti cars 3 leh motor cycles 4 nei hi.
Metbah Lyngdoh, UDP candidate in Rs.21,05,12,633 nei a amah panpih Nongspung Constuency a tuh sawm in Rs 13,80,47,466 leh Getz car 1 nei hi. Congress candidate mah Sayeedullah Nongrum in Rs11,83,24,144 leh gari Fords 3, Tata Safari 1, Hyundai car 1, Mitsubushi car 1 leh Toyata 1 nei hi. Ind. Candidate Maysalin War kichi in Rs.10,27,97,500 leh Ambassador car 1 nei hi. Amaute tutung Meghalaya election a crores 10 tung lam nei a chiamte hi uhi. Miding 27te bel crores 10 nuailam nei ngen hi uhi.
Bandh bawlte mi 7 police in man
Thingbaijam Dhamen
IMPHAL, Feb 28: All Manipur Government Aided School Co-ordinating Committee in Manipur Innpi a CM in govt. grant-te incentive dan a paisak ding toh kisai a a thugenna deihlouh ziak a Manipur pumpi Ningani a a bandh sung un police te’n aided school a teacher 7, Lamlai area a mipi kiang a leaflet hawmlai man uh hidan in thusuak in taklang hi.
A thugenna tungtawn a CM in 1980 apat kum 30 sung aided school a nna ana semte nelhsiah ahihdan kilang hidan in committee in thu suah ua, Imphal lak ah bandh omlam theihlouh phial in om mahleh, school khenkhat a teacher-te bel lamlian dung a hong ding khia a lamlian khak uh hidan in thusuak in taklang hi.
Teacher pawlkhat in Imphal-Sagolmang road ah lamlian khat in Imphal zuan a tai passeng bus-te paisaklou uhi. Teacher kiphin te’n maban March 3 a HSLC examination 2008 om chiang a duty dia seh a a om ua leh leng, Febr 21 a CM in Innpi mai a a thugen toh kisai govt. in a etthak kei leh, pomlou dia vauna bawl uh hidan in thusuak in taklang hi.
Lungkimlouh ziak in lamlian khak
Thingbaijam Dhamen
IMPHAL, Feb 28: Assam Rifles leh Manipur police commando te’n Seppatni a Kongba a dawrkai mi 2 a kaplup uh toh kisai in a ni nihna di’n Ningani’n Imphal West a Yumnam Huidrom mipite’n Mayai Lambi ah kiphinna sunzom a lamlian khak uh hidan in thusuak in taklang hi.
Sepaihte’n a kaplup uh mi nihte lak a khat pen PREPAK member hidan in leh amaute apat 9mm pistol khat leh hand grenade khat musuah hidan in gen mahle uh, mipite’n hiai mi nihte, Lilong Chajing mi Yumkham Dhamen (30) pen MU gate a Paradise Gift dawr neitu leh Yumnam Huidrom a Th Birkumar Singh’ tapa Thongam Suranjoy Singh (28) pen dawr ngaktu hidan in gen uhi. Siluang nihte RIMS morgue ah koih in om mahleh tunitan in a sungkuante un la ut nailou uhi.
ACTSOM in PM kiang ah ATSUM a gup thu theisak
IMPHAL, Feb 28 NNN: Manipur University a singtangmi student tengteng March 1 apan lakkhiak di thusuah ATSUM in a bawl delhzui in, university a om singtangmi student-te’ haksatna sukveng ahih kei ngeingei leh, Manipur University toh kizom college a kai singtangmite teng teng in a college chiat uh nusia ding uh ahih dan All Colleges Tribal Students’ Organization, Manipur (ACTSOM) in Ningani in Prime Minister theisak hi’n thusuak in taklang hi.
Manipur a singtangmi student te’n Manipur University pen Central University a hongsuah kipahpih mahleh, university a migenthei singtangmi student-te’ a dia siatna a hon tutzawk pen lungkim huailou lua ahih dan Ningani a Prime Minister kiang a laithon a piakna a ACTSOM president ML Haokip in gen ban ah, 2004 a PM in state a hongveh lai a memorandum ana kipia bang a Manipur-a a tuantual singtangmi student-te’a dia Autonomous Hill Central University khat bawlkhe ding in leng ACTSOM president in ngetna nei thak hi’n thusuak in taklang hi.
Singtangmite’ a dia university a hamphatna omte University thuneitute’n a piak utlouh uh tungtang a Prime Minister amimal mahmah a hong kigolh dia a chial ban ah, Manipur University a singtangmi kiphinte a thuakpihna uh a latsakna ua MU toh kizom college a kai singtangmite tengteng in avek ua a college chiat uh nuse hak lou ding uh ahih dan leng ACTSOM in prime minister kiang a laigelh a piakna ah gen hi’n thusuak in taklang hi.
CM in tualthahtute min Innpi a puangkhia
IMPHAL, Feb 28 NNN: Manipur Assembly session pailel ah Ningani a opposition MLA Dr Ibohalbi leh RK Anand in tuma deuh a Social Welfare Department nuai a Child Development Program Officer (CDPO) sem numei khat sihna toh kisai calling attention motion a puaklut uh Home In-Charge hihna leng lenkhawm CM Ibobi Singh in a dawnna ah Kangleipak Communist Party (Military Council) (KCP-MC) member nih, Ng Khelendro a.k.a Ngamba a.k.a Naresh a.k.a Naoba (35) s/o (L) Ng Manihar of Napet Palli, Imphal East district leh Ksh. Krabidas a.k.a Helendra a.k.a Inaomema (32) s/o Ksh.Amuyaima of Thinungei Maning Leikai, Bishnupur district, nikum November 14 a Moirang a SWD office a Rasheswori Devi thahna a tangtak a kigolh uh ahihdan gen hi.
CM in a gendan in, IPC section 304 nuai a FIR bawl himahleh, hiai tualthat mi nihte Manipur pawlam a tunitan kibumang uh ahihdan leh police te’n suizui lel uh hi’n leh a min uh ‘wanted’ a puang ding ahihdan gen hi. Huai banah, Raseshwori’ tapa leng chitna a neih a leh police department a Sub-Inspector a guan dia thupukna om ahihdan gen hi.
Dr Ibohalbi in a genna ah, Raseshwori kaplup a a om banah, Imphal Municipal Council a ex vice-chairperson, Komlatombi Devi leng Sept. 29, 2007 a meltheihlouh pawlte’n Imphal East a Soibam Leikai a a tenna inn a ana kaplum uh ahihdan leh numei dang khat leng Imphal West a Kwakeithel a August 16, 2007 a kaplup a om ahihdan gen hi.
Class-XI exam lou a pass man Rs.500
IMPHAL, Feb 28 NNN: Manipur higher secondary exam sintawpni chiang a pe dia kisa student 6-te min tupmawng a thaimang hidan a ngoh in All Manipur Students’ Union (AMSU) in Chandel district a Moreh College lecturer sem, Imphal a Bashikhong Irang mi, Waikhom Brojen (40) s/o W.Momon kitawpsak sawm uh hidan in thusuak in taklang hi.
Media-te mai a Ningani a Brojen dingsak in AMSU General Secretary T. Premananda in Brojen gamtatdan a genna ah, February 29 a kipan ding Council of Higher Secondary Examination a dia examination form saisakna di’n Brojen in a sepna Moreh College a student 6 apat sum la a, himahleh naupang te’n a heutupa uh muangtak a a ngansiah lai un a heutupa un a examination form uh saisaklou ana hihdan gen hi.
Student 6-te ahihleh a vek un Imphal mi hi ua, a teacher uh Brojen ahihleh Moreh College a Physics Department a part-time lecturer hidan hi. Premananda in thil omdan a genzelna ah, college principal toh kithukim a hiai college a teacher khenkhat te’n Class-XI exam ngailou a pass theihna dia student-te apat sum Rs. 500 dawng zel uh hidan a gen hi’n thusuak in taklang hi.
Moreh College a hiai chiindan hoihloutak a om pen poi mahmah ahihdan genkawm in AMSU secretary in a kisaipih thuneitute’n a kintheipen a college principal tung a a poimoh bangbang panla pah ding a ngetna bawl hidan in thusuak in taklang hi.
Zemabawk numeite thangpai in kiphin
AIZAWL, Feb 28 NNN: Sorkar in numei pawngsualtu MC Lalengliana mohpaihna dia hun a laksawt luat uh lungkimlouh lahna in Nilaini a MC Lalengliana tungtang ngaihtuah a a omlai in Mizoram a numei pawlpi lianpen Mizo Hmeichhe Insuihkhawm Pawl nuai a Zemabawk Branch leh pawngsual a om numeinu’ tanaute Court mai ah kipunkhawm uh hidan in thusuak in taklang hi.
Thusuak in a taklatdan in, ngoh a om MC Lalengliana in Zemabawk a numei naupang kum chinglou tamtak ana bawlthang mahleh tunitan court in mohpaih nailou hi’n gen hi. Zemabawk a khotang heutute leh non-governmental organization te’n hiai thu toh kisai in tuma deuh in meeting ana neita ua, government in hiai thu kintak a saifel ding a ngenkawm in a ngetna uh nelhsiah a a om leh a khozang ua govt. tung a kiphin ding uh hi’n vau uhi.
Additional District Magistrate (J) Lucu Lalrinthari mai a Nilaini a MC Lalengliana dinsak ahihlai in MHIP member-te leh pawngsual a om numeinu’ tanaute court kongtual a kipunkhawm in a tawmtawp a damsung suangkulh tang dia gawtna piak ding a ana kikou uh hidan in thusuak in taklang hi.
India ah Mizoram galmuang pen: Mzr HM
AIZAWL, Feb 28 NNN: Mizoram a police headquarter-te a pan thau leh atang manngte muhkik louh in om chia opposition party-te’n a ngohna uh a dawnna ah, India a Mizoram state galmuang pen ahih dan leh state a police camp-te apan thau khat le mang lou ahih dan Nilaini a Police Headquarters Arya Mess a 5th Mizoram Police Service Association General Conference neihna a a thugenna a gen ban ah, Fire Department puahphat ding leh Secretariat a home secretary post khat bawl kisawm ahih dan leng Home Minister Tawnluia in gen a, Mizoram police tamsem lak kisawm ahih thu leng a thugenna ah gen hi’n thusuak in taklang hi.
DGP Lalrokhuma Pachuau in leng thugenna nei a, police headquarter tengteng a police public relations officer khat, legal adviser khat leh police toh kizopna hoihtak nei official khat Home Secretariat-a a om a deih thu a gen ban ah, police department puahphat hoih a sak thu gen a, Police Headquarters in thusun a bawlte state in ngaihtuah ding ahih dan Home Minister in DGP chiam hi’n thusuak in taklang hi.
Chattisgarh a Mizo IRB koih di’n Home Ministry in ngen nawn leh leng kum 2 zoh chiang a tua IRB om lai teng lakkhiat phot ahih ma battation thak sawl hilou ding ahih dan a gen ban ah, IRB 20 site leng ex-gratia leh insurance piakna dia a poimoh bangkim state in sem hi’n Home Minister in gen hi. A thugen zoh in 2006 leh 2007 Police Medal leh Gallantry Award ngah dia India President in a telkhiak police personnel-te medal leh Award piakkhiakna nei a, Gallantry medal ngahte’n Indian Airlines 75% leh Railways 50% concession a muh ding ban uah, a khaloh uh Rs. 750 in khang ding a, Gallantry award ngahte’n leng tua bang mah in concession mu ding ua, himahleh, a khaloh uh, kha khat in Rs. 450 in pung ding hi.
Tuni Thupi: Huchi in Aman a lungtang uh hoihna bangzel in amaute a vak a, khut siam in a pita hi. Sam 78:72
Manipur University a ST quota
Manipur University pen State University apat 2005 in Central University dinmun piak in ana om hi. Central University ahih dungzui in, hoihna tamtak om mahleh, thuneitu leh vaihawmtu kikhek ahihman in Dan leng tamtak a kikhek ziak in Manipur’ singtangmite a ding in bel hoihkhinlou a theih in om hi. Huai ziak mah in MU a kai Manipur University Tribal Student’s U.nion (MUTSU) leh All Tribal Student’s U.nion of Manipur (ATSUM) in Dan kikhek omte singtangmite nelhsiahna hidan a tangkoupih in MU a singtangmite a dia hamphatna omte hei lamdanglouh ding in MU, Manipur Govt. leh Centre Govt. tanpha ah ana tangkou uhi.
ATSUM President Dr. John Pulamte leh General Secretary Thomas Taishya in singtangmite a dia lamet ding a om nawnlouh ziak a singtangmite’n March 1, sunma dak 11 a MU nusevek ding ahihdan February 14, 2008 in thusuah ana bawl uhi. MUTSU in leng amau sang a lianzaw pawlpi ATSUM thupukna zuihlouhngal a hihtheih uh om nawnlou hi’n MU nuse dia kiman ahihdan uh ana taklang khin uhi.
ATSUM leh MUTSU lungkimlouhna bel, sepna post awng hukdimdan toh kisai banah, Manipur reservation policy dungzui a MU a sepna awng lak a 31% ST quota omsek pen Central University a hih apat 7.5% a a kiakniam ding deihlou hi uhi. MU a Vice Chancellor Prof. C. Amuba in hiai thu a hilhchetna ah, MU pen Central University a hihtak dungzui a University Grants Commission’ (UGC) paidan a zuih uh ngai hi’n gen hi. Vice Chancellor thugen pen thudik mah hi a, koimun peuh a om hileh leng, Central University te’n UNG norms zui ua, MU in leng ST quota 31% leh SC quota 2% Manipur reservation policy ana zat pen ST quota 7.5% leh SC quota 15% a a khek ngai mah ahi hi. U.nion Minister for Human Resources Development Arjun Singh toh leng January 18, 2008 in genkhawm in ana omta mahleh, hiai paidan khenna ding in bel Paliament in Manipur University Act, 2005 a bawlthak ngai ding hi.
Central in reservation policy a guan pen India pumpi et a a guan ahihman in diklou tangchih theihlouh hi. Huai banah MU pen Central University a suah dungzui in Manipur mite a ding kia hinawnlou a, India khua-le-tui banah gamdang mite a ding tanpha khualna hita hi. Manipur population i et chiang in General category tampen mahleh, Scheduled Tribe category bel nakpitak in Scheduled Caste category toh teh in tamzaw hi. State level a et in bel SC quota 2% apat 15% a a kalsang lai a ST quota 31% apat 7.5% a a kiakniam pen thil hitheilou ahi hi. Himahleh, MU gentaklouh, Manipur govt. in leng hiai toh kisai a a hihtheih tawm mahmah hi.
Punjab ah Sikh-te population tampen a, huai dungzui in Shromani Gurudwara Prabandhak Committee (SGPC) in leng amau nuai a college-te a Sikh-te a dia 50% quota ngetna Punjab leh Haryana High Court ana tun a, HC in ana nawlkhin hi. Huai nung a leng lungkim tuanlou in SGPC in Supreme Court ah writ petition ana khia hi. Himahleh, 2001 census dungzui in Punjab ah Sikh-te 59.2% hi ua, Hindu-te 37% hi uhi. Huai ziak in, India pumpi et in Sikh-te minority himahle uh, Punjab a dia minority a hihlouh man SC in leng February 16, 2008 in HC thutanna phel tuanlou in gum hi.
MU, state govt. leh New Delhi in a ngetna uh a ngaihsak kei leh MU a singtangmi sinlai om teng in March 1 sunma dak 11 a MU nutsiat dia February 14 a thupukna a lak February 25 in ATSUM’ information and publicity secretary Joseph R Hmar in taklang nawn uhi. MU a ST quota back-log vacancy teng hukdimna dia special recruitment drive neih ding chih ngetna toh kisai bel ‘realistic’ hidan in ngaihsut theih hi. Himahleh, Manipur University Act, 2005 amendment bawl ding chih pen ahihleh Parliament in ATSUM leh MUTSU ngetna a pichinsak ngeingei leh SGPC-te kia hilou in, quota toh kisai ahihman in, hiai bang ngetna India ah pumdim ding hi. I pichinsak zoh leh bel Manipur singtangmite a ding in hoih mahmah ding a, himahleh, ‘I keihkhiak zohlouh ding pet’ a ei leh ei kituisabuah khong i hih khak ding uh lauhhuai hi.
zogam.com
Lamka, Feb 28: Bharat Sanchar Nigam Limited, CCpur Telephone Exchange nuai a Landline phone teng apaisa February 20, 2008 sunnung dak 2:00 apan a ni 3 sung telephone zat theihlouh a omna toh kisai a, SDOT/BSNL, CCpur in angaihsaklouh ziak hidan a Newspaper khenkhat a kisuah toh kisai in Mr. A. Jasobanta Singh, SDOT/BSNL, CCpur in hilhchian hi.
SDO in thusuah a bawl in a taklat dan in, electric supply ginatlouh ziak in Exchange ah Genarator zat hi a, himahleh BSNL authorized Depot Tuibuang in Diesel stock a neihlouh ziakin PCO neitu Parmeshwor apan in Diesel 500 litres leh BSF STC apan in Litres 100 banah Truck neitu khat apan in litres 100 leitawi ahihdan taklang hi. Diesel bei ziak a Exchange zattheihlouh a a omma deuh in SDOT in DC/CCpur kiangah Diesel ngen ding in vakuan mahleh DC a kailouh ziak in ADC kimuh in diesel va ngen mahleh ADC inleng Diesel stock neilou a, tua zoh in SP/CCpur in 30 Litres kia ana hawmthei a huai in ni khat leng daihlou hi. Huai ni mah in SDOT in a tung a thuneite kiangah Fax in kintak a diesel leina’ng sanction dia a nget dungzui in February 22, 2008 sunnung in a sum piakkhiak in om a, tua sumte zang in February 23, 2008 in Imphal ah diesel lei in hon potou a huai ni mah a Exchange zattheih nawn hipan dan in Press ah theisak hi.
Mr. A. Jasobanta Singh, SDOT/BSNL, CCpur in Lamka Post palai kiang ah amah khut a sum sanctioning power omlou ahihdan gen in Divisional Engineer (Rural) kiangah ngetna pelut a huai apan in Asst. General Manager tawn in Chief Account Officer kiang tut hi a, Chief Account Officer apan in Dy.General Manager kiang tung a DGM in approval abawlkhit chiang in sum lakkhiat theihphet hidan inleng gen hi.
Pasal 1 kaplupsa in mukhia
Lamka, Feb 28: Lamka Police in Kangvai khosak a tuilou lakah pasal khat kaplupsa a om chih report a omziak in siluang lading in vakuan in sundak 12:00 vel in Lamka Damdawi Inn morgue ah siluang tun uhi. Hiai misi pen Mr. Songminlun Mangte (25)S/o.(L). Ngamzahao Mangte of Saiton Khunou ahih chet ahihnung in Post mortem bawl hi a, Post mortem bawl ahihzoh in asungkuante kiangah piakkhiat in om hi. Thukizadan in Mr. Songminlun Mangte bel kha 3 vel paisa apan inn a pawtkhia hi a, zan nitak dak 8:00 vel a Kwakta bazaar pan meltheihlouh pawlkhat in man a Gypsy ngou khat zang a apukkhiat uh hi a tuzing a Kangvai khosak a army post omna khang a tuilou lak sisa a naupang tangkuangteh zongte’n amuhkhiat uh ahi. Mr. Songminlun Mangte mitkhumul te geel ah thautang lutna ma muhtheih in omtuak hi.
Songminlun Mangte kaplup in om
Lamka, Feb-28: Lamka Police in tuni zingkal lam dak 11:30 in Kangvai khua Tuilou ah Mr. Songminlun Mangte s/o Ngamzahao Mangte kaplupsa in naupang tangkuangteh toute’n mu ua, police a report piak ahihnung in Police in va in Dist. Hospital morgue ah koih hi.
Police apan thutut kingah dan in, Songminlun Mangte bel a mit tung tuak ah thau a kapna ma om a, postmortem bawl zawh in misi innkuante kiang ah pekhia ua, tuni mah in Seitual khua ah vui in om hi.
Thukizadan in Mr. Songminlun Mangte bel kha 3 vel paisa apan inn a pawtkhia, zan nitak dak 8:00 vel a Kwakta bazaar apan meltheihlouh pawlkhat in Gypsy ngou khat zang a apuakkhiat uh tuzing a Kangvai khosak a army post omna khang a tuilou lak a sisa a muhkhiak a om ahi. Mr. Songminlun Mangte mitkhumul te geel ah thautang lutna ma muhtheih in omtuak hi. Hiai thu gelh ahihtan in tualthattute kuamah kipuang omlou hi.
Louma a lohsamte report pekin ding in theisak
Lamka, Feb 28: District sung a louma a lohsamte solkal in panpihna apiaktheihna’ng a SDO teng kiang ah amau bialsung chiat inspection bawl a detail report pe dia DC/CCpur in apaisa December 18, 2007 ni a theihsakna abawl tunitan SDOte’n report apiaklouh ziak un DC/CCpur in District sung a SDO teng kiang ah hongtung ding March 1, 2008 tan a report bukim pelut chiat ding in noh hi.
Hiai louma a lohsamte toh kisai a detail report piaklut ahihlouh ziak a panpihna piak ding toh kisai a provision processing suzekai ahihman in kimtak a March 1, 2008 tan a pelutchiat ding in DC in theisak hi. Hiai report piaklut ding toh kisai a proforma leng SDO teng khut ah apaisa December 18, 2007 a DC in apiakkhit hita hi. Hiai panpihna muhtheihna ding in louma lemlak leng piaklut ngai ding hi.
Mautaam toh kisai in meeting
Lamka, Feb 28: District sung a mautaam tung toh kisai a meeting ding a Chief Secretary in a sap ziak in DC/CCpur Imphal ah hohsuk hi. Hiai mautaam toh kisai a panpihna AID Zomi, Japan tungtawn a Osaka pansan Japan International Food for the Hungry (JIFH) in canned/packed food 40 Tonnes hon khaak ding toh kisai leng Lamka bangchitut ding hiam chih chiangkuang nailou hi. JIFH in bel Long a puak ding ahihleh Nagoya Port apan Kolkatta Port tan apuakman seng ding ua, Lenna a puak ding ahihleh Nagoya apan in Narita Airport (Tokyo) tan apuakman seng ding uhi. Hiai panpihna vante Lamka puaktung ahihna ding in SSPP in DC/CCpur tungtawn in Government kiangah puakman sensak ding in ngen a, himahleh Government in dawnna penailou hi.
Doctor in TV pekhe nuamlou
Lamka, Feb 28: Lamka Damdawi Inn a zat ding Television (29” Philips Flat) khat MACS in a piak pen Dr. Paikhomba Singh, Gyneacologist in hun bangtan hiam apan in amah quarter ah koih a, zan zek in Damdawi Inn OPD Building a damlou ki-ensak dingte omna lak a thuah dia ava lakdek uhleh pekha utlou hi. OPD Building ah damloute’n amau ki-etsak hun tunma a ettheih ding in TV khat SDO/CCpur in Dish antenna toh apiak pen bel thuah hita hi.
VET ah Graduation zang
Lamka, Feb 28: Rengkai Muallum a Reformed Presbyterian Church North East India saina a Vocational Education and Training (VET) Centre ah 2nd batch a Weaving training zouthakte Graduation programmme tuni zingkal lam dak 11:00 in zang uhi. Huai hun ah Brig. BC Sharmah Commander, 27 Sector Assam Rifle Chief Guest apang in training zou thakte kiang ah Certificate, vanzat tuamtuam leh kipat sat nang uh sum bangzahzah hiam pe khia hi. Vocational Education and Training Centre ah tutan in training zou mi 143 phata in huai lak ah mi 95 vel mahni kitoudelh thei in omta uhi.
Lamka a Hindu te Mandir hong
Lamka, Feb-28: Light House Lane kiang a Hindu te pathian biakna ding (Mandir) thupitak kibawl tuni zingkal dak 11:30 in hongkhia uhi. Huai hun ah T.Gouzadou Ex. Minister Chief Guest apang in Mandir hong a, Lamka khawpi sung a Hindu tamzaw kikhak in huai hun ah tel uhi.
Dr. T. Hatzaw in Medical Supdt len ding
Lamka, Feb-28: Medical Supdt. len lel Dr. Lachinkhai zingchiang February 29, 2008 apan a pension ding ziakin Dr. T. Hatzaw in Medical Supdt. dinmun len ding in tuni’n Govt. in order suah hi. Amau gel March 1 chiang in charge kipe ding ua, tua ni apan Dr. T. Hatzaw in len ngal ding hi.
Mi 6 pension ding
Lamka, Feb-28: Dy. Director Sericulture Office Bijang ah tuni zingkal lam dak 11:30 in Office Staff 2 Thuampau Vaiphei, Sub. Inspector leh Tlangdawl Driver te Feb.29, 2008 a pan pension ding khakna hun zang a, staff ten nampuan silh sak in Singpi don pih uhi. Huai lou in Chief Medical Office(CMO)/CCpur nuai a sem Office Staff mi 4 H.D. Bawilien Pharmacist, T.Ginzathang Pharmacist, Ningngaihnem Health Educator leh Vanlaltawka Driver te Feb.29, 2008 apan pension ding khakna zingchiang sunnung dak 1:00 in CMO/CCpur Office ah khakna programmed neih sawm uhi.
Lalsuong Gangte in AEO len
Lamka, Feb-28: DC/CCpur Office a Asst. Election Officer (AEO) hun sawttak omlouh nuang in February kha bul apan in Lalsuong Gangte SDC in Asst. Election Officer (AEO) hihna charge la hi.
Youth Centre 2 ah final bill pia
Lamka, Feb-28: Nehru Yuva Kendra (NYK)/Churachandpur nuai a Establishment Youth development Centre 2 bawlna 2005-2006 a final bill Rs.15, 000/- tuak T. Champhai Youth Development Centre leh Nahphou Youth development centre a President te kiang ah L. Chitra Devi, Dist. Youth Co-ordinator, NYK/CCpur in tuni’n NYK Office ah pekhia hi.
EE/PHED in DC theisak
Lamka, Feb-28: EE/PHED, CCpur Mr. N. Bipin Singh Churachandpur in Lamka khawpi in buannawi tuikai a nek uh toh kisai in DC/CCpur kiang ah Lanva nak tuilakna mun ah Gari tuamtuam in suang paw khia a tui lak apai ziak ua tui nin ahih dan thei sak hi.
Thutut kingah dan in, Dist. Magistrate in Lanva nak a suangla Gari tuamtuamte khamna order suah poimoh ahihdan DC theisak hi.
Class-XI & XII final Exam kipan ding
Lamka, Feb-28: Board of Higher Secondary Education Manipur saina in Class-XI & XII final exam zingchiang February 29, 2008 in kipan ding hi. Class-XI te bel mahni College chiat ah exam ding ua, Class-XII te bel CCpur Private Centre 2 Churachandpur Govt. College leh Lamka College ah exam ding uhi. Churachandpur Govt. College Centre ah Churachandpur College, Sialmat Higher Secondary, CTS Higher Secondary leh VK Tawna College te exam ding ua, Lamka College Centre ah Lamka College, Rayburn College leh Ebenezer Higher Secondary te exam ding uhi.
Hanship khote a ding EPIC lak hiding
Lamka, Feb 28: Thanlon sub division a om Hanship Polling Station a min om, tulel a Lamka pansan a khosate’n hong tung ding March 1, 2008, zinglam dak 6:30 in Mr. T. Paukhanlian, Elim Veng, New Lamka inn ah Photo identity Card lak theih ding hi. Hanship kho mun a omte a ding inleng a kho mun mahmah ah tunung sawtlou a lak hiding hi’n official thutut kingah hi. EPIC kichipen India khua-le-tui hihna dia poimoh ahihman in ngai poimoh chiat ding inleng a kisaipihte’n ngen uhi.
KLO in hilhchetna bawl
Moreh, Feb 28: Kuki Liberation Army (KLA) in thusuah a bawl dan in Seppatni paita a Raj Hotel, Aizawl a kaplup a om Mr. Thangcha Kipgen @ Johnu pen party dankalh a a gamtat ziaka kaplup a om hi’n taklang hi.
Thusuak in a taklatna ah, Mr. Thangcha in sum-le-pai a diktatlouhna a neih kia hilou in a mah-le-mah leadership kipia a tung a mite a zahlouh ziak leh zuih ding a thupiakte a ngaihsaklouh ziak a capital punishment piak a om hi’n thusuak in taklang hi.
Mr. Thangcha thahna toh kisai a organization leh phung-le-tang nuaisiah ziaka nasep hilou in, mimal hihkhelhna ziaka thah a om hizaw dan in taklang hi.
ZSF in Exam Centre te enkhe ding
Moreh, Feb 28: Zomi Students’ Federation (ZSF) in thusuah a bawlna ah zingchiang a kipan ding Class X leh Class XII exam centre te vehkual ding ahihdan uh taklang hi.
Thusuakin a taklatna ah, mipite’n leng exam na buaisak thei ding thawm neilou ding in ngen a, tuabanah electric department inleng hiai hun sung a electric meivak hoihtak a pe ding in theisak kawm in, exam dingte vangphatna hoihtak toh exam chiat ding a deihsak thu leng taklang hi.
Kum 1 sung in gari 5000-6000 kibehlap
Imphal, Feb 28NNN: Manipur a gari register kibawl zah December 2007 bei toh kiton in 1,138575 hi a, kum khat sung kia in gari neu 5000-6000 kikal kibehlap hi’n tuni’n Transport Minister L. Jayentakumar in Manipur innpi theisak hi. Innpi a dotna a dawnna ah, Transport department in kum nawn sung in Imphal leh Churachandpur district sung a bus terminuses khat tuak bawlzoh hidi’n gen hi.
Inpi tut khawmna a dotna State Health Minister Ph. Parijat in a dawnna ah, lobour toh kisai awareness nei kitawm mahmah a, tunung sawtlou in awareness campaign neih hipah ding in gen hi. Minister in a genzelna ah, tulel in naupang kumchinglou 230 amau leh mau kiloh tawm a nek zong om uh hi’n gen a, amaute free education leh a poimohte uh piak hidi’n leng gen hi. Tuabanah, Imphal District huamsung Jiribam ah Rs. 430 crores bei a ITI khat bawlkhiak hiding a, tua ah sinlai 132 in sin thei ding uh hi’n leng innpi theisak hi.
Meghlaya Election ah Crore-patis 27 kibei ding
Shillong, Feb 28NNN: Meghalaya pansan NGO khat in Meghalaya Election hong tung ding March 3, 2008 a om ding ah, mihausa crores patis ngen mi 27 kituh ding uh hi’n suikhia hi.
Thusuak in a taklatna ah, Congress candidate crores khat tung lam nei ngen mi 10 in election tuh ding ua, Unied Democracy Party (UDP) in tua bang mah in crores patis candidate 4 nei a, HSPDP leh MDP iln khat tuak banah Ind. Candidate 4 leng crores patis om uh hi’n taklang hi.
Hiaite lak ah Ronrenggiri apan Congress candidate Deborah C Marak tops list a dia puankhiak hi a, a gou neihte Rs 112,36,87 492 banah, gari Boleros 3, Accent 1 leh Bond 1 hi a, NCP candidate from Tikrikilla Asahel D. Shira in Rs.37,66,74,649 leh Tata trucks 10, Scorpio jeeps 3, Scooty bikes 2, Maruti cars 3 leh motor cycles 4 nei hi.
Metbah Lyngdoh, UDP candidate in Rs.21,05,12,633 nei a amah panpih Nongspung Constuency a tuh sawm in Rs 13,80,47,466 leh Getz car 1 nei hi. Congress candidate mah Sayeedullah Nongrum in Rs11,83,24,144 leh gari Fords 3, Tata Safari 1, Hyundai car 1, Mitsubushi car 1 leh Toyata 1 nei hi. Ind. Candidate Maysalin War kichi in Rs.10,27,97,500 leh Ambassador car 1 nei hi. Amaute tutung Meghalaya election a crores 10 tung lam nei a chiamte hi uhi. Miding 27te bel crores 10 nuailam nei ngen hi uhi.
Bandh bawlte mi 7 police in man
Thingbaijam Dhamen
IMPHAL, Feb 28: All Manipur Government Aided School Co-ordinating Committee in Manipur Innpi a CM in govt. grant-te incentive dan a paisak ding toh kisai a a thugenna deihlouh ziak a Manipur pumpi Ningani a a bandh sung un police te’n aided school a teacher 7, Lamlai area a mipi kiang a leaflet hawmlai man uh hidan in thusuak in taklang hi.
A thugenna tungtawn a CM in 1980 apat kum 30 sung aided school a nna ana semte nelhsiah ahihdan kilang hidan in committee in thu suah ua, Imphal lak ah bandh omlam theihlouh phial in om mahleh, school khenkhat a teacher-te bel lamlian dung a hong ding khia a lamlian khak uh hidan in thusuak in taklang hi.
Teacher pawlkhat in Imphal-Sagolmang road ah lamlian khat in Imphal zuan a tai passeng bus-te paisaklou uhi. Teacher kiphin te’n maban March 3 a HSLC examination 2008 om chiang a duty dia seh a a om ua leh leng, Febr 21 a CM in Innpi mai a a thugen toh kisai govt. in a etthak kei leh, pomlou dia vauna bawl uh hidan in thusuak in taklang hi.
Lungkimlouh ziak in lamlian khak
Thingbaijam Dhamen
IMPHAL, Feb 28: Assam Rifles leh Manipur police commando te’n Seppatni a Kongba a dawrkai mi 2 a kaplup uh toh kisai in a ni nihna di’n Ningani’n Imphal West a Yumnam Huidrom mipite’n Mayai Lambi ah kiphinna sunzom a lamlian khak uh hidan in thusuak in taklang hi.
Sepaihte’n a kaplup uh mi nihte lak a khat pen PREPAK member hidan in leh amaute apat 9mm pistol khat leh hand grenade khat musuah hidan in gen mahle uh, mipite’n hiai mi nihte, Lilong Chajing mi Yumkham Dhamen (30) pen MU gate a Paradise Gift dawr neitu leh Yumnam Huidrom a Th Birkumar Singh’ tapa Thongam Suranjoy Singh (28) pen dawr ngaktu hidan in gen uhi. Siluang nihte RIMS morgue ah koih in om mahleh tunitan in a sungkuante un la ut nailou uhi.
ACTSOM in PM kiang ah ATSUM a gup thu theisak
IMPHAL, Feb 28 NNN: Manipur University a singtangmi student tengteng March 1 apan lakkhiak di thusuah ATSUM in a bawl delhzui in, university a om singtangmi student-te’ haksatna sukveng ahih kei ngeingei leh, Manipur University toh kizom college a kai singtangmite teng teng in a college chiat uh nusia ding uh ahih dan All Colleges Tribal Students’ Organization, Manipur (ACTSOM) in Ningani in Prime Minister theisak hi’n thusuak in taklang hi.
Manipur a singtangmi student te’n Manipur University pen Central University a hongsuah kipahpih mahleh, university a migenthei singtangmi student-te’ a dia siatna a hon tutzawk pen lungkim huailou lua ahih dan Ningani a Prime Minister kiang a laithon a piakna a ACTSOM president ML Haokip in gen ban ah, 2004 a PM in state a hongveh lai a memorandum ana kipia bang a Manipur-a a tuantual singtangmi student-te’a dia Autonomous Hill Central University khat bawlkhe ding in leng ACTSOM president in ngetna nei thak hi’n thusuak in taklang hi.
Singtangmite’ a dia university a hamphatna omte University thuneitute’n a piak utlouh uh tungtang a Prime Minister amimal mahmah a hong kigolh dia a chial ban ah, Manipur University a singtangmi kiphinte a thuakpihna uh a latsakna ua MU toh kizom college a kai singtangmite tengteng in avek ua a college chiat uh nuse hak lou ding uh ahih dan leng ACTSOM in prime minister kiang a laigelh a piakna ah gen hi’n thusuak in taklang hi.
CM in tualthahtute min Innpi a puangkhia
IMPHAL, Feb 28 NNN: Manipur Assembly session pailel ah Ningani a opposition MLA Dr Ibohalbi leh RK Anand in tuma deuh a Social Welfare Department nuai a Child Development Program Officer (CDPO) sem numei khat sihna toh kisai calling attention motion a puaklut uh Home In-Charge hihna leng lenkhawm CM Ibobi Singh in a dawnna ah Kangleipak Communist Party (Military Council) (KCP-MC) member nih, Ng Khelendro a.k.a Ngamba a.k.a Naresh a.k.a Naoba (35) s/o (L) Ng Manihar of Napet Palli, Imphal East district leh Ksh. Krabidas a.k.a Helendra a.k.a Inaomema (32) s/o Ksh.Amuyaima of Thinungei Maning Leikai, Bishnupur district, nikum November 14 a Moirang a SWD office a Rasheswori Devi thahna a tangtak a kigolh uh ahihdan gen hi.
CM in a gendan in, IPC section 304 nuai a FIR bawl himahleh, hiai tualthat mi nihte Manipur pawlam a tunitan kibumang uh ahihdan leh police te’n suizui lel uh hi’n leh a min uh ‘wanted’ a puang ding ahihdan gen hi. Huai banah, Raseshwori’ tapa leng chitna a neih a leh police department a Sub-Inspector a guan dia thupukna om ahihdan gen hi.
Dr Ibohalbi in a genna ah, Raseshwori kaplup a a om banah, Imphal Municipal Council a ex vice-chairperson, Komlatombi Devi leng Sept. 29, 2007 a meltheihlouh pawlte’n Imphal East a Soibam Leikai a a tenna inn a ana kaplum uh ahihdan leh numei dang khat leng Imphal West a Kwakeithel a August 16, 2007 a kaplup a om ahihdan gen hi.
Class-XI exam lou a pass man Rs.500
IMPHAL, Feb 28 NNN: Manipur higher secondary exam sintawpni chiang a pe dia kisa student 6-te min tupmawng a thaimang hidan a ngoh in All Manipur Students’ Union (AMSU) in Chandel district a Moreh College lecturer sem, Imphal a Bashikhong Irang mi, Waikhom Brojen (40) s/o W.Momon kitawpsak sawm uh hidan in thusuak in taklang hi.
Media-te mai a Ningani a Brojen dingsak in AMSU General Secretary T. Premananda in Brojen gamtatdan a genna ah, February 29 a kipan ding Council of Higher Secondary Examination a dia examination form saisakna di’n Brojen in a sepna Moreh College a student 6 apat sum la a, himahleh naupang te’n a heutupa uh muangtak a a ngansiah lai un a heutupa un a examination form uh saisaklou ana hihdan gen hi.
Student 6-te ahihleh a vek un Imphal mi hi ua, a teacher uh Brojen ahihleh Moreh College a Physics Department a part-time lecturer hidan hi. Premananda in thil omdan a genzelna ah, college principal toh kithukim a hiai college a teacher khenkhat te’n Class-XI exam ngailou a pass theihna dia student-te apat sum Rs. 500 dawng zel uh hidan a gen hi’n thusuak in taklang hi.
Moreh College a hiai chiindan hoihloutak a om pen poi mahmah ahihdan genkawm in AMSU secretary in a kisaipih thuneitute’n a kintheipen a college principal tung a a poimoh bangbang panla pah ding a ngetna bawl hidan in thusuak in taklang hi.
Zemabawk numeite thangpai in kiphin
AIZAWL, Feb 28 NNN: Sorkar in numei pawngsualtu MC Lalengliana mohpaihna dia hun a laksawt luat uh lungkimlouh lahna in Nilaini a MC Lalengliana tungtang ngaihtuah a a omlai in Mizoram a numei pawlpi lianpen Mizo Hmeichhe Insuihkhawm Pawl nuai a Zemabawk Branch leh pawngsual a om numeinu’ tanaute Court mai ah kipunkhawm uh hidan in thusuak in taklang hi.
Thusuak in a taklatdan in, ngoh a om MC Lalengliana in Zemabawk a numei naupang kum chinglou tamtak ana bawlthang mahleh tunitan court in mohpaih nailou hi’n gen hi. Zemabawk a khotang heutute leh non-governmental organization te’n hiai thu toh kisai in tuma deuh in meeting ana neita ua, government in hiai thu kintak a saifel ding a ngenkawm in a ngetna uh nelhsiah a a om leh a khozang ua govt. tung a kiphin ding uh hi’n vau uhi.
Additional District Magistrate (J) Lucu Lalrinthari mai a Nilaini a MC Lalengliana dinsak ahihlai in MHIP member-te leh pawngsual a om numeinu’ tanaute court kongtual a kipunkhawm in a tawmtawp a damsung suangkulh tang dia gawtna piak ding a ana kikou uh hidan in thusuak in taklang hi.
India ah Mizoram galmuang pen: Mzr HM
AIZAWL, Feb 28 NNN: Mizoram a police headquarter-te a pan thau leh atang manngte muhkik louh in om chia opposition party-te’n a ngohna uh a dawnna ah, India a Mizoram state galmuang pen ahih dan leh state a police camp-te apan thau khat le mang lou ahih dan Nilaini a Police Headquarters Arya Mess a 5th Mizoram Police Service Association General Conference neihna a a thugenna a gen ban ah, Fire Department puahphat ding leh Secretariat a home secretary post khat bawl kisawm ahih dan leng Home Minister Tawnluia in gen a, Mizoram police tamsem lak kisawm ahih thu leng a thugenna ah gen hi’n thusuak in taklang hi.
DGP Lalrokhuma Pachuau in leng thugenna nei a, police headquarter tengteng a police public relations officer khat, legal adviser khat leh police toh kizopna hoihtak nei official khat Home Secretariat-a a om a deih thu a gen ban ah, police department puahphat hoih a sak thu gen a, Police Headquarters in thusun a bawlte state in ngaihtuah ding ahih dan Home Minister in DGP chiam hi’n thusuak in taklang hi.
Chattisgarh a Mizo IRB koih di’n Home Ministry in ngen nawn leh leng kum 2 zoh chiang a tua IRB om lai teng lakkhiat phot ahih ma battation thak sawl hilou ding ahih dan a gen ban ah, IRB 20 site leng ex-gratia leh insurance piakna dia a poimoh bangkim state in sem hi’n Home Minister in gen hi. A thugen zoh in 2006 leh 2007 Police Medal leh Gallantry Award ngah dia India President in a telkhiak police personnel-te medal leh Award piakkhiakna nei a, Gallantry medal ngahte’n Indian Airlines 75% leh Railways 50% concession a muh ding ban uah, a khaloh uh Rs. 750 in khang ding a, Gallantry award ngahte’n leng tua bang mah in concession mu ding ua, himahleh, a khaloh uh, kha khat in Rs. 450 in pung ding hi.
Tuni Thupi: Huchi in Aman a lungtang uh hoihna bangzel in amaute a vak a, khut siam in a pita hi. Sam 78:72
Manipur University a ST quota
Manipur University pen State University apat 2005 in Central University dinmun piak in ana om hi. Central University ahih dungzui in, hoihna tamtak om mahleh, thuneitu leh vaihawmtu kikhek ahihman in Dan leng tamtak a kikhek ziak in Manipur’ singtangmite a ding in bel hoihkhinlou a theih in om hi. Huai ziak mah in MU a kai Manipur University Tribal Student’s U.nion (MUTSU) leh All Tribal Student’s U.nion of Manipur (ATSUM) in Dan kikhek omte singtangmite nelhsiahna hidan a tangkoupih in MU a singtangmite a dia hamphatna omte hei lamdanglouh ding in MU, Manipur Govt. leh Centre Govt. tanpha ah ana tangkou uhi.
ATSUM President Dr. John Pulamte leh General Secretary Thomas Taishya in singtangmite a dia lamet ding a om nawnlouh ziak a singtangmite’n March 1, sunma dak 11 a MU nusevek ding ahihdan February 14, 2008 in thusuah ana bawl uhi. MUTSU in leng amau sang a lianzaw pawlpi ATSUM thupukna zuihlouhngal a hihtheih uh om nawnlou hi’n MU nuse dia kiman ahihdan uh ana taklang khin uhi.
ATSUM leh MUTSU lungkimlouhna bel, sepna post awng hukdimdan toh kisai banah, Manipur reservation policy dungzui a MU a sepna awng lak a 31% ST quota omsek pen Central University a hih apat 7.5% a a kiakniam ding deihlou hi uhi. MU a Vice Chancellor Prof. C. Amuba in hiai thu a hilhchetna ah, MU pen Central University a hihtak dungzui a University Grants Commission’ (UGC) paidan a zuih uh ngai hi’n gen hi. Vice Chancellor thugen pen thudik mah hi a, koimun peuh a om hileh leng, Central University te’n UNG norms zui ua, MU in leng ST quota 31% leh SC quota 2% Manipur reservation policy ana zat pen ST quota 7.5% leh SC quota 15% a a khek ngai mah ahi hi. U.nion Minister for Human Resources Development Arjun Singh toh leng January 18, 2008 in genkhawm in ana omta mahleh, hiai paidan khenna ding in bel Paliament in Manipur University Act, 2005 a bawlthak ngai ding hi.
Central in reservation policy a guan pen India pumpi et a a guan ahihman in diklou tangchih theihlouh hi. Huai banah MU pen Central University a suah dungzui in Manipur mite a ding kia hinawnlou a, India khua-le-tui banah gamdang mite a ding tanpha khualna hita hi. Manipur population i et chiang in General category tampen mahleh, Scheduled Tribe category bel nakpitak in Scheduled Caste category toh teh in tamzaw hi. State level a et in bel SC quota 2% apat 15% a a kalsang lai a ST quota 31% apat 7.5% a a kiakniam pen thil hitheilou ahi hi. Himahleh, MU gentaklouh, Manipur govt. in leng hiai toh kisai a a hihtheih tawm mahmah hi.
Punjab ah Sikh-te population tampen a, huai dungzui in Shromani Gurudwara Prabandhak Committee (SGPC) in leng amau nuai a college-te a Sikh-te a dia 50% quota ngetna Punjab leh Haryana High Court ana tun a, HC in ana nawlkhin hi. Huai nung a leng lungkim tuanlou in SGPC in Supreme Court ah writ petition ana khia hi. Himahleh, 2001 census dungzui in Punjab ah Sikh-te 59.2% hi ua, Hindu-te 37% hi uhi. Huai ziak in, India pumpi et in Sikh-te minority himahle uh, Punjab a dia minority a hihlouh man SC in leng February 16, 2008 in HC thutanna phel tuanlou in gum hi.
MU, state govt. leh New Delhi in a ngetna uh a ngaihsak kei leh MU a singtangmi sinlai om teng in March 1 sunma dak 11 a MU nutsiat dia February 14 a thupukna a lak February 25 in ATSUM’ information and publicity secretary Joseph R Hmar in taklang nawn uhi. MU a ST quota back-log vacancy teng hukdimna dia special recruitment drive neih ding chih ngetna toh kisai bel ‘realistic’ hidan in ngaihsut theih hi. Himahleh, Manipur University Act, 2005 amendment bawl ding chih pen ahihleh Parliament in ATSUM leh MUTSU ngetna a pichinsak ngeingei leh SGPC-te kia hilou in, quota toh kisai ahihman in, hiai bang ngetna India ah pumdim ding hi. I pichinsak zoh leh bel Manipur singtangmite a ding in hoih mahmah ding a, himahleh, ‘I keihkhiak zohlouh ding pet’ a ei leh ei kituisabuah khong i hih khak ding uh lauhhuai hi.
zogam.com
No comments:
Post a Comment