Thang Sian Mang
-----------------------------------
Zomite pen Pasian in hong lamto a, sim leh mal (Kawlgam Vaigam) apan leitung gam mun tuamtuam ah ih teeng khia uhi. Pasian sehsa hiding hiven, cikmah a zong mangmat phaklohna gam (Pakistan) zuan in ko zong ka nupa un kum 2000 May 5 ni-in Delhi pan vanleng tawh ka lengkhia uh a, tua ni zan nai 9 pawlin a khopi uh Islamabad ka tung uhi. Delhi pan vanleng tawh Lahore kitawn a, nai thum sungin Islamabad kitung hi. Mawtaw/meileeng tawh ni khat sungin kitung suak zo hi.
Pakistan cih a khiatna in ‘Holy Land’ (Pak=Holy) ahi hi. Muslim gam ahih manin voksa nek ding genloh a vok mahmah zong kimu mengmeng lo hi. Suai (gold) sangin muh hamsa zaw ci leng kikhial lo kha ding hi. Gam lian lua hilo a, India gam sehli suah sehkhat (1/4) khawng bek pha lel hi. Muslim biakna a zui 97% hi a, Hindu biakna a zui (Sikh leh adgdg tawh kigawm) 1.6% pha in, Christian biakna a zui 1.4% bek pha hi. Urdu leh Punjabi paute kizang phadiak hi. Tua lo-in Sindhi, Baluchi leh Bravi kampaute zong kizang hi. A sum uh Rupee mah kici a, ei sum 100 pen amau a 120/125 tawh kikim hi. Mite lawpluatna mun leh teel masakna mun hi khollo hi. A tangpi in gal gam khat in kiciamteh a, galkap bang hileh J&K ahihke’h North-East (adiak in Manipur/Nagaland/Assam) posting tawh kibang kha ding hi. Sente tawh a kitanauna uh a hoih man leh ih mel-leh-puam kibatna hang mah tawh hong ngaina tuam bilbel uhi. Ahih hangin, ko om hun sung pen India gam tawh kizopna a huaisiat hunlaitak ahih manin ko zum nasemte a ding in nuam lo laklak ah zong nuam lo kholdiak hi. “An eye for an eye” hiam “Tit for Tat” cih bang pian in, khat lamah zum nasem khat kiman hiam ahih keileh kinotkhia hiam om peuh leh, a lang lam te’n zong tua bang mah a kithuk suk pah, kua mawh a kua dik hiam cih kikan nawn tuan lo, a kamsia penpen in thuak kha hiziau lel hi.
India in Pakistan gam ah mission khat ‘High Commission of India’ kici Islamabad khua ah kinei hi. Zum nasem api-atal gawmkhop 110 pha ding a kiseh hinapi in nohkhiatna (PNG/persona non grata) ahih keileh sapkhiatna (recall) cihte hangin kikim sipsip ngeilo hi. A ‘khulang-khang’ in cileng, ka tun kum uh 2000 August kha-in vuak-le-sat thuak man lo in khat hong kinotkhia pah hi. Kha nih zawh ciangin mi khat vuak thuak khin sa-in kinotkhia leuleu hi. Banah, gen tham meello lah ninhuai/huathuai mahmah pawl khat bel – sun hun gentakloh zan kim lai peuh in ‘blank call’ kingah thei zel hi. Kelkong kan peuh leng kua pusuak kua sungtum cih encik ding mi om uh a, i vakna khempeuh ‘bazar’ kaina natawm ah ong sul zuihzuih tazen uhi.
Tua bangin kum 2001 mel kimu a, sep ding bangbang sem le bawl a ka om liailiai laitak un 9/11 (September sawm-le-khat) ni a America a ‘World Trade Center’ ki ‘bomb’ na hang tawh patauhna hong kipan pianpian hi. Tua kum December 13 ni-a ‘Indian Parliament’ kiluh thu leh kum 1999 December kha a Indian Airlines vanleng ki ‘hijack’ thu hang tawh “liamna ma ah ci kitaat” tawh kibang in, tua ‘meima’ dam nailo pen hong nasia gawp ding bang hi. Ani ni-in thu thakthak piang a, kitanauna zong huaisia kholdiak hi. America in Afghanistan sim(attack) ding in hong kithawi a, India kumpi in Pakistan kap suk mai ding geel uh cih khawng tawh kisa vengvung hi. US President George Bush in Pakistante huhna deih ahih manin, “Lawm ut maw, gal ut?” a cih ciangin a President pa un, “Sikha, nang lamah ka pang” cih bang pian in, ‘Talibante’ (tua hunlai a ‘Al Qaeda’ tawh kizom a Afghanistan a ukte) langpan in Americate panpih ding a khensat hi. Cik ciang nawnkhiat in a ki-om tam aw?! ci-in kiging sa in ka om gige uhi. Suitcase ah van guansa in kikoih a, vanleng bang zong kithawi manta hinapi’n a sawtlo in kinawnkhiat ding vai hong theng bilbel hi. Kum 2002 January kha in i kumpite’n a lungkim loh uh lahna in Gam Palaipipa (High Commissioner) sam khia uhi (cikmah in hibang om ngei nailo kici hi). Gam kikawm tuahna vanleng, meileng leh mawtawte khawlsak in om a, Indian satellite channel zong TV ah khahkhiat ding kham(phal lo) uhi. Ko zum nasemte zong alang (50%) hong ciahkik in alang ka om uhi. Inn lam zong phawk man lo-in kisa vengvung hi. Kizopna a huaisiat zawk lai leh kumpite’n nawnkhiat sipsip hong sawm uh a, nek-le-tak bang zong nipikal khat a ding lei kholhsa in kikoih hi.
Tua kum March kha nipi zingsang khat ka lawmnu ‘bazar’ pai dawn ding a inn pan ka kumsuk hiathiat leh, ngaihtak a ‘BOMB’ puak ging khat ka za hi. Koi ah, bang a? ci-a taiphei kawm a ka khuadak phei leh ka building gei ua biak-inn khat ‘International Presbyterian Church’ kici tawlet umna maan (glass) hong kitam zuaizuai in, a sung pan meikhu hong zamkhia ngoingoi hi. Tua kikhopna munah migilote’n ‘grenade’ va lawn lut uh ci-in thuthang kiza hi. A sunga kikhawmte kahna leh maunate kiza a, pawlkhatte sisan kai niaunuau kawm a taikhia ka mu hi. Huh theihna lampi om hiam ci-a ka va naihphei leh ka lawmte khat in, “Va lut laizang ken. Bomb puaksak pa hi ci-in hong ngawh kha ding uhi” hong ci hi. Sawtlo khit nungin, thacing mahmah FBI honkhat a thau/meithal uh tawh tua biak-inn kimkot ah ding dim uhi. Hih biakinn ah a tamzaw ‘foreigner’ kikhawm uhi. Tua ni zingsang a kikhawm pawl in pangkha le ung, a kituakkha ding himai! A munah ‘American diplomat’ khat zi leh a tanu khat tawh sim in mi 5 si uh a, tampi liam uhi. Hibang thupiangte hangin gamdang pawlkhat US, Germany, British cihte in Pakistan ah bitna omlo hi, ci-in a mite lak uah numei-naupangte a gam uah samkik uhi.
Hibang kawm kal-ah April kha zingsang khat zum kah ding a kuan, mawtaw lam naih a ka paiphei leh nakpi tak a huhna ngen a kiko aw’ khat ka za hi. Ka khuadak phei leh Arnold Schwarzenegger ciacia ding ‘mama’ (ISI volunteerte cihna) thum/li te’n ka lawmte khat uh zum kah ding a kuan kimlai man ut lua kisa vok delh in a nungah delh henhan mawk uhi. A phak tak ciang un mancip uh a, a lu tuamsak in, mawtaw (truck) tawh pua khia hiau uhi. Tua mun a om ko pawlte mi guk khawng ka pha uhi. Ahi zongin amah hotkhiat theihna ding lampi omlo ahih manin, cinema ‘last fighting’ et bangin ki-en hekhak lel hi. Nai 7/8 sung thudotna leh gawtna a thuak zawh ciangin inn hong tung hi. A zing ciangin nohkhiatna lai mu a, ni 7 sungin i gam lamah ciangkhut khun sa-in hong ciahsanta hi. Tua ni pen a kuan nunung lam ah ka pankhak manin a tuakkha lo suak hi’ng.
Tua kum mah June kha pawl in ko pawl ka buai henhan leuleu uhi. Kizopna huaisia semsem in, kido taktak ding zah dong a thu hong thang vengvung ciang in, Kumpite’n zong hong nawnkhia ding vanleng bang kisa sa’n koih leuleu uh a, kisa sa a om ding in thupiak kingah hi. Tua bang a kinawnkhiat (evacuate) ding vaihawm a, kiginni (Saturday) natawm nasem a kuan ka lawmte khat mah lampi-ah na pang uh a, gukhia (kidnap) hiau uhi. Nai 7/8 sung ding khawng mah gawtna/sawina leh thudotna a thuak zoh ciangin hong kikhahkhia hi. Inn hong tun ciangin a khe tawh zong ding zolo in, zun-tha ek-tha ding nangawn ngong kawi kawm a paipih ngaingai kul hi. Tua ni kiginni (Saturday) hi a, vakkhiat ni a kizang hinapi in ka pusuah loh ni tawh kituak zenzen. Ni thum khit ciangin PNG puang uh a, lum diatduat sa-in inn lam hong ciahkik hi. Cihmah bangin eilamte’n amau zum nasemte khat Delhi ah man in thudotna nei uh cihthu om ahih manin, a thuak kha hilel hi.
A thuakte lakah ka pang khak loh hangin, lungnuamtak in ki-om hithiat thei tuan lo hi. Hici bang kawmkal ah kum thum bang hong cing in 2003 October 6 ni-in Pakistan ka nusia uhi. Tua zawh a kipan ‘suakta kisa in’, hih article……
Neucik hileh a kithuak kha thei ding hi napi’n tua bang kawmkal ah Pasian in ZCF, Delhi in ‘Silver Jubilee’ a lopna zang thei ding a cidamna hong pia leh hong gualzawhpih ahih manin, A min phat ing. ‘Golden Jubilee’ ciangdong hong mualsuahpih ding zong lamen hang.
No comments:
Post a Comment