Tual Za Kam
------------------------------------
Tu hun ciang in leitung khantoh na tawh kizui-in, noptalna ding ngaisut manin ki lawmin ki lawmkei ta leh a lampi om sun sun sum-le-pai ki zong ta hi. Sum-le-pai zon ding ihah kat mah bang in, nei le lam zong ki chingin a nei, a hau ki tam ta mah mah ta hi. Ahihhangin alangkhat en leu leu leeng, buhchim tui nangawn a khamzolo, phalbi douh na ding silh-le-ten akiching a nei zolo aong ki tam mah mah lai hi. A zong a hau ki daidanna lian mahmahin thu-um mite’ lakah om keileh ki lawm na pi’n, thu umlo mite toh I ki lamdanna om vetlo mawk hi.
Hau-in sum-le-pai neih peuh leng deihteng kimkhin mai leh kilawm hi. Sum-le-pai kicing neih peuh leng pi-aw hong ci ding zong tam ding a, tu-le-ta, meltheih, lawm-le-gual ki hau mah mah ding hi. Nopni, dahni I tuak ciangin hong lungdampih, hong dahpih ding kicing mah mah ding hi. Mi hong mu kha peuh mah in thupit tuak si-e, liat tuak si-e, zahtah huai peuhmah mawk ei! Tuabek hilo mi’n ong nuoi-et lo-in hong thupi et ding hi. Kikhop khawmna khat peuhpeuhah tutna ah tutna nuam ah hong ki tusak dinga, miteng in zahtakna mit tawh hong enin, pilin pil ta kei leng I thugen khempeuh zatakna tawh hong nail ngam loinahi ding mah in ngaisut ding uh hi. Lengtong Pauno in “Kei zong mi bang a hau hileng hong it hong ngai tam mah mah ding hiven” acih bang in hauh ding ut huai mah mah bek hi lo-in mihaute’n meltheih, lawm, kikholpih, hih ding bek zong a ut huai mahmah khat ahi hi. Minei milien khat in lamkal bekah hong hohpi khak, hong maitai bek zong mipi kitang tuam mahmah hi. Hih bang a leitung nopsak zo-nop manin, pilna siemna, sepna, sum-le-pai I zonna ah, I Pasien I paulam leh ei metna ding bek, ei nopsakna ding bek ngaisutna hi lel a Pasien thu pen eima mimal’ phattuam na ding le ki zepna a nei ki hilel hi.
Sepna Ah: Pasien in zu-le-vate a ann avak tei hangin a buk ah va khiat lieng lo hi. Leitung I nuntak laiteng pen pilna, siemna sum-le-pai zonloh phamaw hi. Nek-le-tak ding, omna ding, zon ding mah hi. P[asianin a tate a thadah ding leh a om mawkmawk ding in hong deih lo hi. Sem lo pi-a muhna nei cih pen Pasien’ deihna hi lo-a, sepna thaman val neih zong Pasien deihna hi tuan lo hi. Tawitehna manlo a deih lo Pasien ahi hi. Paunak sungah – “Mithadah pa aw miksite” gamatna enin ganhing lak pan aneu pente ahi uh hi. Tua ahih manin, Topa Pasioan in a tate pen nasem ding, sepna thaman ciang bek tawh kituak a lungdam dinga hong deihna leh sepna tawh kituak thaman piak dinga mansa ahihna ki lang mahmah hi. Neih le lam kicing neia mi zawngte ahuhg zo, a panpih zo ding in thupha a piaktak ding in Pasien in hong deih hi. Topa Zeisu in leitung hong vaklai-in a nungzui dinga a telte pen na a sep lai tak hi a, Khristian amah nungzuite zong sep le bawlna ah a hahkat ding a thanuam ding hong deih ahihna kilang hi. I sepna thaman I nek bek zong Pasien’ thupha hi. Laisiengthou sungah a “semlo mi’n ngawl hen” ci hi. Tu huna Zogamah siatna hi zahta a hong tung pen, sep loh thaman a kham kitam luata hih man hi kha ding hi. Thazung thatang senga sep thamanin hauhna piengsaha, sp lopi-a tampi neihna thamanin siatna piengsak hi. Pasienin a tat pen a khangkhanga nuamsa dinga hong deih hina pi’n, Zomite in ahauhna, liatna khangkhat val ki kem zo phalo hi. Pilna, hauhnate Pasien’ thupha hi-a I zon dantev Pasien’ deihdan ahi hiam? Cih lungngaih huai mahmah hi.
Piak Khiatna Ah: Topa zeisu leitung hong vaklai in tangvalpa kiangah na neihsa khempeuh zuakin la mi zawngte’ kiangah hawmin na ci hi. Tu hun ciangin hong thukkik zolo ding cih ngaisutna tawh huh ding panpih cih thadah sum leitawi nangawn migentheiten’ a dingin muh haksa hi. Mikhat peuh hong thukkik ding lametna tawh huhna, panpihna na piak leh ahuh a panpi na hi kei a summet bawl, a pung ding zong na hi el hi. Thuhkikna pen Topa’n kei a hi ci hi. Leitung mite tungpan thuk kikna I lamet ding hilo hi. Pasien’ na sepna pen sumngam zah donga sepna/piakna ahi hi. Migenthei, meithaite pan pih cih ciangin hong thukkik ding lametna omlo itna taktak tawh pia cihna hi a, Pasien’ deihdan zong hi pah hi.
Gamtatna Ah: Topa zesu mahmah zong leitung ah hong vaklai in miphak meithai siahdongte tawh ki thuah hi. Tua hunlai dingin, miphakte ngial hoh society pan a nawlkhin koihdan tuam a aneihte uh ahi hi. Topa zesu-in ama nung zuite om dingdan lamlahna zong hi pah hi. Mi thupisim ding utna tawh hi lel hi leh hih bangin miniam pente leh mi kihhuai pente tawh ki thuah lo ding hi. Khristian nuntakna pen itna kiniamkhiakna tawh nuntak ding cihna hi pen hi. Nang na ki-it bang in na in veng na pamte itin ci hi. I veng I pam cih ciangin deidan neilo ding azawng a ahau khentuam nei lo ding cih na hipah a a kikim a itna nei khawm ding cihna ahi hi. Pasien na sepna ah milian mithupi teng bek tawh ki thuah ding na ita, mi genthei cih mawhte nakin kei leh Pasien thu pen mi’n ong thupisim ding utna bek tawh azui na hi lel hi.
Pasien gam leh a dikna zong masa lecin tua na khempeuh hong piak thuah ding hi. “TUA NA” Acih in I kisap teng a gen ne ahi hi. Pasien nei masa peuh leng a thupha-in hong zui ding hi.
Kuate’n Thupha Ngah Ding : A tom in gen leng zeisu a neite, Pasien’ deih banga gamtate in thupha ngah ding hi. Nungak khat in tangval hau mahmah khat pasal in nei leh tangvalpa’ neih leh lam teng a ma a hi lel ding hi. Zeisu neite’ thupha ngah mi ahi hi.
Nu-le-Pate A Aahtakte: Leitung nuntak leitung NU-LE-PA pen I muh theih Pasien ahi hi. Nu le pa azah tak akhasiasak lo a thu amangte thupha ngah mi hi ding uh hi: gamh luah ding uh hi, khansau ding uh hi. Tu ciangin leitung pilna a khang mah bangin NU-LE-PA laithei vet lo, tate/mote BA, MA, PhD, sepna lian pi pi a nei ki tam mah mah ta hi. Bang zahta in mawl in pil kei ta leh nu-le-pa ahihna bei tuanloa tate tunga thuneina zongkiam tuan lo hi. Absalom in a pa khasia sak Mun lua ahih manin khansih hi. Ham in Apa (Noah) zukham, tangguak alum, a sel loh man in apan sam sia hi.
Nu-Le-Pa’ Khitui: Tate tungpan lungdamna hangin akhitui uh a luanlehm tate’ a dingin, thupha guahzu tawh ki banga, khasiatna hangin a khitui uh aluan leh tui kholna (dam) kicim bangin tate thupha ngahsa nangawn taimang thei hi. Na nu-le-pa na sim mawh khak leh gun taka nasepsate nu-le-pa zatakten tang kha ding hi.
No comments:
Post a Comment