ZCF Biakna Leh Nampi Lungsim

H. Kham Khan Suan
-------------------------------------------------

Biakna leh nampi lungsim a tonkhawm den hi a, Zomi Christian Fellowship, Delhi (ZCF, Delhi) zong hih sung pan hong pieng khia ahi hi. Biakna i gen ciangin a bia ding ‘mi’ kisam a, tua mite’n amau tungah a uk, thunei, leh a vanglian Pasien khatpeuh um in a san/pom kim ding uh thupi hi. Tua bang a piantheihna dingin mite sungah kituah-kilemna (kilunghualna), kipawltheihna leh kiukzawhna kisam hi. Biakna in mi kaikhawmin kihotheisak a, kilungtuaksakin kipumkhatna piengsak a, kiit, kilemna mengkhia sak hi. Khristiante sungah hih bang thuphate a om ding pelmawhin kingaihsun hi. Bang hang hiam cih leh Pa, Tapa leh Khasiengtho a kipumkhat bangin ei Thuummite zong kipumkhatin i om ding pen a thupi mahmah ahi hi. India ah zong ZCF kici kipawlna khopi lian tengah i nei thei ta a, lungdam huai hi. ZCF in Zomite sungah kiit, kilemna, kipumkhatna leh nampi lungsim hong piengsak takpi mah hiam cih pen i lungngaih kik ding thu lianpi khat hong suak hi.

ZCF Bang Hangin Ci Sese I Hi Hiam?

1980 pawl i gamlek hun zong hi a, mundang, gamdang ah a zinkhia zo i tam nai kei hi. Shillong, Allahabad, Delhi leh India khopi lian tuamtuam ah laisim, nasem, summetbawl tawmkhat i om thei ta a, giautau kisa in kipawlkhop ding i lunggulh tek hi. Zo ngeina, lai leh minam hihna (identity) a poimawh zia i phawk khiat san hun zong ahi hi. Hih bang a minam kipawlkhopna pen i theihsa bangin Kawlgam ah 1952 in Hakha, Falam leh Tedim biakna makaite’n Zomi Baptist Convention phuanin na pan khia zo uh hi. Zo minam sungah a tangzai zaw in Pasien na semin, biakna bangci hatsak ding cih lunggulhna pan ZBC hong piengkhia hi cih zong i phawk hi. India gamah zong hih bang ngaihsutna mah nei in ZCF i phuan khia hi. Delhi pan a kipankhia kipawlna pen a tungin Zomi Fellowship bek na kici hi. Kum 1988-89 pawlin Zomi Fellowship pan Zomi Christian Fellowship ciin a kilaih ahi hi. A tangthu tawm sut pak leng ZCF pen nam itna leh awlmawhna, kikholhkhopna/kipawlna kician lunggulhna leh Zomi hihna kepbit na dingin kiphuankhia hi cih i mu thei hi.

ZCF, Delhi hanciamna tawh Zo minam sung pau tuamtuam panin la khilkhawmin in ZCF labu i neithei hi. I paukam tuamtuam tawh lungkihualin biakna i nei thei a, manpha hi. Mun tuamtuam pan kipanin, pawltuamtuam ah a om kimlai Zo minamte sungah kimuh, kikholh, kithusan tuahtheihna hong piengsak a, sanggam-laizom i hihzia leh minam khat i hihzia hong phawksak semsem a lungdam huai hi. Khalam bek hilo in salamah zong kipumkhatna hong piengsak hi. I nasep theihna ding gam hong keksak a, i lungsim ngaihsutna hong tangzai sak hi. I pau leh lai, ngeina leh biakna hong kepbitsak in minam lungsim lianpi hong neisak hi. Zomi Christian International kici thukizakna a simkha te in limtak tel ding hi. Ahi zongin khopi tuamtuamah a om ZCF te’n kizopna i nei thei nai kei hi. Biakinn kician zong i nei zo nai kei hi.

I pawlcin tawh kituakin pawltuam ngaihsutna, a tuamin kitun, kihuaikhopna lungsim zong hong pieng hi. Sum leh pai zekna ah i sanggam lom sung (tribe) ading mah ngaihsutna hong khang a, gamkek in, kigawm in a kipumkhat semsem ding kimlai kikhentamin kiamlam i manawh hi. Pawlkhat ngaihsutna panin hih bang a kikhentamna in nampi lungsim a neitheilo minam khat i hihna hong langsak hi ci thei uh hi. Amau ngaihsutna panin hih bang thu hong om pen dahhuai in limtak a lungngaih phat huai thu ahi hi. India leh leitung kiuli ah biakna kipawlkhop ding, gamkek ding mah a kithupi gen laitakin Zo minamte sungah neucikcik kilemlohna leh kitelkhialna hangin pawltuam phuan in, a kitamkham gawp ding i bang hi. A kigawm thei lo minam hi lim ding i hiam cih hong ngaihsun sak hi.

Pawlkhat leuleu ngaihsutna panin hih bang a mengkhiatna, leh pawltuam phuatna hangin khantohna leh gamkekna, nasep tangzaisakna in ngaihsun thei leuleu uh hi. Hih bang a ngaihsun te’n paubing siksanin pawlsatna, a za huaplualo in kikhenna in pawlpi sungah khat leh khat kiit, kilemna leh kipawlkhawmna hatsakin, pawlpi mite limtakin van zo zaw hi ci uh hi.

A thulai gen le hang: pawlpi (biakna ahihke’h biakna hilo) vai khat peuhpeuh pen thupisakin tangzaitak in na i sepkhiat theih nadingin pawlmi khat leh khat kithei in, tha kipia thei ding hi. Ukpi leh ukneu a hunkhop mah kisam ding a, amaute limtak kiZomin thu kihual thei ding hi. Thutanna leh ngaihsutna/gelkholhna khatpeuh kician takin nei in, limtakin zong semkhia thei ding hi. Mipi lungsim, uk, deih leh lunggulh, haksatna leh thanemna limtak theisiem in a kihualin na a semkhia thei ding kipawlna kisam hi; mipi so a dom thei ding hi. Tua in pawlpi lawhcinna dingin milip leh pawltampi a kikhen poimawh masa pen lo hi cih hong mukhia sak hi. Kiukzia leh kipawlkhopzia tawm laihin limtak vaihawm khawm thei leng na lianpi leh thupi zaw tampi kisem thei ding hi cih hong phawksak hi. United Nations kici leitung kipawlna lianpen nakpitak a lawhcinna in vaihawm siemna leh tavuan limtak hawmsiemna pan hong kipan hi ci leng kikhial lo ding hi. Roman Catholic Biakna leitung kiuli tengah kizelin tangzai takin Rome pan Pope ukna nuoiah a omtheihna zong tuabang uksiemna/vaihawmsiemna pan hong kipan ahi hi. Nasep leh tavuan hawmsiem leng milip then za, then tul i val phial zongin kiukna hamsa tuan lo ding hi cih i mu thei hi. Mosi leh Joshua in Israel te Egypt gam saltanna pan honkhia in, gammang lakah kum 40 sung limtak a makaih theihna dingin Pasien in vaihawmsiem thusim a lak hi: Israel nam 12 sung panin makai ding telkhiasakin tuate tawnin limtak vai a hawmsak hi. Minampi lungsim ngaihsun sakin, kipawlkhawm sak a, a lunggulh tawntung uh ‘khuaizu leh bawngnawi luanna gam’ Kanaan gam lutpih hi (Paikhiatna leh Joshua Laibu limtak sim in).

A tomin gen pak le’ng: kipawl/kizopna in khat leh khat hong kitelsak semsem ding hi. A cingtak minam in minauta sungah a hoih leh a hoihlo, a thulim leh a thulimlo, a hat leh a hatlo te theisiem in lungkihualin na semsak thei ding hi. Si leh sa ah kinaite kaikhawmin ‘kipawlkhop lunggulhna’ (corporate will) pia ding hi. Minampi tawh kisai laigelh minthang mahmah Hans Kohn in hih bangin ‘kipawlkhop lunggulhna’ a om ciang bekin pau leh ham, ngeina leh khangthu, biakna leh nam kibangte tunkhawmin kaikhawm thei ding a, gam leh minampi bawl thei bek ding hi ci hi.

ZCF Babel Tausangpi Suaksak Lieng Ding I Hiam?

Thuciam Lui sungah tausang a tallang mahmah pen Babel tausangpi ahi hi. Noah hunlai Tuiciin tunkhit mite pilna, siemna leh thupina a langsak dinga kibawl hih tausangpi in tuhun tumlam gam nampi lungsim piankhiatna a sut/kan te’n gentehna in zang thei uh hi. Babel tausangpi pen thupi in a etlawm mahmah hangin a cim (collapse) dinga kilam na hi lel tak hi. A tau cip pen a pammaih pen na hi lo zaw a, a lipkhap huai zaw khat in: a cip ma in minampi leh paupi khat a nei Noah’ suante pen tausang a cip zawh ciangin nam tampi, pau tampi in hong kikhen uh a, kithutuah leh kipumkhat ding hong hamsa hi (Piancilna 11). Tua mah bangin ZCF hong piankhiatna a thupi pen, a tawpkhawk i tunna lim (symbol) hisak lieng ding i hiam cih zong i ngaihsun ding hi. Kei ngaihsutna panin ZCF pen Zo minampi ngaihsutna (national consciousness) a om lai teng mang lo ding a, hong kho semsem in hong manpha semsem zaw ding hi.

Biakna leh Nampi Lungsim

I biakna, ngeina leh hihna a tangzaizaw in i kep ut leh ZCF i phungvuh semsem ding hi. ZCF in Zo minampi bawlding tavuan lianpen in nei lo ding a, ahih hangin ZCF tawnin minam dangte’n Zo minamte pen ‘Pasien tel minam, minam hamphate hi’ cih hong muh ding uh thupi pen ding hi. Tua bang hong piantheihna dingin khat-leh-khat kiit in, kikem, kizunin, kipawlkhawm thei ding hi hang. India leh gam tuamtuam ah a om ZCF kipawlkhawmna te kanin, amaute tawh kizom in limtak thu kikumkhawmin i kalsuan ding hi. Sangamlom (tribe) pansanin biak kipawlna a neite tawh thu kisangtuah in, i pangkhawm ding hi. Mizawng, tagah, meigong, pagong leh khangham te i huh ding hi. A nangte huhin, thazawm (sa leh khalam) a kisate tha i pia ding hi.

I gamah Lungdamna Thupha hong tun cil lai in, a Thu bek hong lut lo hi cih zong i tel ding hi. Zomi Baptist Convention phuat ding a ki ngaihsut lai in Lokhawh Sang (Agriculture Institute), Zato (Hospital) leh Laisiengthou Sang (Bible College) tawh phuh ding na limbawl uh hi. Lungdamna Thupha in khalam thu bek tawh kisai lo a, pumpi cidamna, laipilna leh nek leh tak cihtheihna tawh zong kizom hi cih i mangngilh kei ding hi. Laphuah siem khat in ‘Jesuh pen samsiatna a kizelhna dong ah gupkhiatna a pia dingin hong pai hi’ na ci hi. Biakna in gupkhiatna i ngahna, Topa minthanna, itna leh hehpihna i phawkkhiatna ahih ding ahi hi. Khat leh khat kiZomin, i kilem theih nading, kipawlthei in, i kipumkhat theih nading (Johan 15) leh nampi lungsim i neih theih nading i Biakna in hong sinsak hi cih lungai kikkik ni. Zo minampi ading bek hilo in leitung bup mikhempeuh nampi khat hi in, Topa lenggah huanah a om lenggah hiangte hi hang a, i leggah kungpi pen Jesuh hi cih i tel semsem ding hi. Jesuh sungah pumkhat a suak ding hi hang cih i phawk den ding hi.

Laigielpa’n tulaitahin Department of Political Science, Banaras Hindu University, Varanasi ah Lecturer sem hi. Tuoleh ZCF, Delhi ah 2001-2004 sung Youth Department Secretary na sem ngei hi.