Pasien Gualzawlna Bang Na Chi Zah Ei?

Goubieklien Munluo
King’s Way Camp (YWAM), Delhi


Pasien a gualzawlna i donte khu eima adiing mei hilou in mi dangte i gualzawl sawn thei nading a Pasien in a’ng pieh ahi zaw hi. Mite a dinga guolzawltu hi dingin Pasien in a’ng dei hi.

I Khristian gamsung khan theilou na khu eima ading bep buoipi, chawmngaina nei lou I tam zie uh zong hi ding in ka gingta hi. Eite khu Pasien in mite ading a phatuom ngai leh panpitu dingin a’ng deihi. Tu in alungsietna silpieh a’ngpiehte tungtawn in khat-le-khat ki panpi tua ding leh ki huoitua dingin Pasien in a’ng deihi. Pasien in sil pieh tuom tuom a’ng pie hi, nang-le-ke’n silpieh I tante kibang lou, nang thei leh bawl theite ke’n bawl thei lou, nang zong kei bawl thei leh kei thei teng bawl thei samlou, hinanleh tu in tuote Khrist a tahsa ba khat I hina uah Pasien in A thupina dingin a’ng dei hi.

Bible in “I genthei na chingteng uah ei panpi a, tua chi’n gentheina thuote panpi thei a um in Pasien akipat I muu uh panpina pen ma zang in mi dangte I panpi uhi” (2 Kor. 1:4). Tuaban ah, “Tua ziehin hepina zieh a a’ng pieh dung juiin silpieh tuom tuom I neite uh mang va ui.” (Rom 12:6-7). Tua leh “Noute khat pou in nouma lunglutna lam guoh en lou in midangte lunglutna lam zong en kawm un. (Philipian 2:4) “…. ei ma kipaahna guoh bawllou ding ahi.” (1Korinthian 10"24). “Mangpa kipaahna lam bawl ki sin un,” (Ephesian 5:10), tualeh verse 17 na ah “Mangpa’n na bawl ding ua A dei bang a hei sui zaw un” Tuale (Rom 12:6) en kia leuleu le, “ Tua ziehin hepina zieh a a’ng pieh dung zui in silpieh tuom tuom I neite uh mang va ui. Sil pieh I nei khu Pasien thugenna ding (na sepnading, Paahtoi na ding) ahileh I ginna toh kituoh in gen vai in, Tua chin silpieh I nei khu Ama nasepna ding ahileh sem vai ui.”

Pasien in eima kipah na’ng leh eima inn sung chou ki ningching na’ng bawl ding in a’ng siem sih hi. Ama deilam bawl ding a siem leh hatte I hi uhi. Mite a dinga gualzawl tu hiding a a’ng na hat ahi. Tu in Pastor, Missionary, Upate chou Pasien in ahat ahi sih a, michin khu Pasien in ama naa sem ding leh ama deilam bawl dinga ahat hizaw hi (I Korinthian 7:17), tung lam hinna nei ding a a’ng nahatte ihi uhi. Tua ahi man in kei telkha sing I chi thei sih, tualeh ama nasem dinga hat I hi nadawl ah, Mangpa dei lam sui in ama’n bang a hei I bawl ding a adei chi zong ei te’n sui a ngai hi, tu in silpieh (Gift) I nei khu ei te’n thei chien a poimaw hi. Tuo I theina dingin ki etchtna bawl angai hi. I tempeina lang thei angai hi. Mite hasot (encourage) dan siem, ahi lou leh Pasien deina banga kipah sah dan siem mi le, ki zahna tuom tuom leh tem peina tuam ki nei chiet hi, tuate ei te’n thei chien a ngai a tuoleh Pasien thupina dinga zah angai hi. Bible in, “Mangpa kipana bawl ki sin un” chi’n a gen hi. Tu in miite, ahilou leh i pawlpi, i hattuom sungte ading in bang e i bawl thei suivai in bawl ki sin vai. Siem sa pieng lou ma I hi chi Pasien in thei hinanleh kisin un achi zaw hi. Bible in “Mi simaw huoi pen khat na panpi lou chieng un kei ei panpi lou na hi ta uhi.” (Methew 22:45) “Serving Peole Is A Serving God.”

Gingtu hinkhuo khu anuom hi I chi gige thei sih, tuo hamsatnate I tuo chieng un zausi vai Pasien thu toh hing I hi zaw uh. Ama’n “Vanney in noute gimna hing thuo sah ta va, hinanleh zong hangsan un, keima’n vannei ka zouta hi.

Tu in I hatlounate, dam theilounate ziehin Pasien na sem theilou din kingai tuo sivai. Pasien in tuote khu A ma minthupina dingin zang ut zaw hi. “Leitung in mothuoi a ase khu Pasien in a teela, leitung in hatla bang a ase khu Pasien in a tel zouta hi” (Amen). Na haatlouna, na damlounate khu nang ut zieh hilou in Ama silbawltheina leh loupi na I mu thei sem zawh na dinga hing um ahi zaw hi (John 9:3). Paul, in “Hinanleh zong ama ei dawnna pen, ka lung sietna khu nang ding in a hun hii, na hatla lai in zong ka silbawl thei na khu a hat zing hi. Tuoleh “Khrist silbawltheina in ei sel ziehin ka haatlana khu ka ki letsa pi ding ka tha anuam hi. haatlanate, housietnate, gentheinate, bawlsietnate leh hamsatnate zousie Khrist zieh ahi man in ka lung a kim ta hi” Paul, in achi hi ( 2 Korinthian 12:9-10).

Pasien a dinga hamsatna I tuote kiletsahpi zawh ding hi daih hi, Bible in, “Hun hamsate’n genthei thua dan hing sin sah van, ama ma in a thua dii dan hing hilvan in, lampi dihlou lam a na pei le zong a ma’n na nuohlam ah Lampi tami hi bou e hing chi va” (Isai 30:21). Pasien hoina mite musah thei tu khu Pasien nasem khat ahi. “Silhoibawl thada sih va ui, I lung kieh sih nah poule ahun tah a agah at ding I hi ngal ua” (Galatian 6:9). Tualeh (I John 3:8) ma ah, hichi’n a gen kia hi, “Tu’n Pasien in iitna a hing pieh khu eite kamteng kihoulimna maimai hida hen, itna dih tah nasepa hing ki lang khu ahi ding kisam ahi.” Tuaziehin Pasien khu iitna ahi’a eite’n iitna toh a ma na I sepding uh ahi. Tu’n khen khat in Pasien ka iit thei sih I chi mai thei uhi. Hinanleh Pasien thu I mang leh Ama iit ki hi mai hi. I John 14 :15 “We know that we love God by obeying His word.” Tuoleh Pasien khu I silbawlte zie’n akipah hi, I gintaat zieh uh mei hi lou hi. (James 2:4).

Mi khen khat in khiel ki chi khu a zada valong ua, hinanleh mi tawnkhiel, mi hoiloute khu mu peilou zel uhi. Bible in “Jing chienga na neh ding, sil ding leh dawn dingte lungkhampi sih un’’ chi nanleh, ki lung kham veve, tam khu khelna (sin) ka chi ut ahi. Azieh pen ahileh Pasien in lung kham sin a chi hi, hinanleh tam dinmun a dingte adiing in vang a ham sa hi. Va ki lungkham khazel in va ki bawl kha phut zel hi, tuo chieng in Pasien thu mang lou ki hi zel, tua khu khelna ahi. Khielna khu thumang louna a hing kipan ahi ngal a. Bible in mi dih tatte (gingtute) khu puoh va un, thou kia va uh a chi hi. (Pslam 94:18). David in “Khiel kha thei ma hina, hinanleh thou kieh vai in ki sin tei tei va ui. Nanleh thei giehguoh in khel na bawl sin (lungke loua sillhoi bawl tei tei ki sin ding a poimaw hi). I puoh kha ta lezong thou kia vai in mailam nawt zel vai, ei gingtute I lung kieh sih napou leh a huntah a agah at ding I hi ngal ua. Rom 8:28 na ah, “Ama lungsiet mite lah a nasem dinga ahatte pen Pasien in silbang kim ah sil hoi abawl pieh zeel hi.” Hahsatna I tuate theisiem sinanlei zong Pasien in ei ading a sil hoi hing na bawl pieh thou thou ahi chi I thei uhi.

A guolzawlna I tangte, Pasien apat damna I ngahte khu amanbei in zang sihvai, Mathew 8:15 ah, Peter sanggamnu khu suh dam a umphet in atah sa damna tha (new health) toh Pasien na asem ngal hi, eite khu mite panpi ding, su dam leh mite guolzawl thei ding a guolzawlna tangte I hi uhi. Mawh tou tou a Vangam tung ding kaal maw ngah ding in Pasien in hing phallou hi. Tua ding a hing dei hileh Pasien a hutdamna I tang phet phet in na hagau la pai talou ding i? Tuozie’n I bawl ding khat um nalai china hi.

Mangpa’n hing tulmaw hi nang le kei. Khrist in a siemlam dangte ihi uhi, sil bawl theina nei lou in ki koi sin ‘We can do all thing through Jesus Chirst’ (Philipian 4:13) “A thu azieh bep hilou in a sem khete zong hi zaw vai” I ngaituanate heng tha vai, “I hin khuo khu I lung tuot dan dan a pei ahi” (Provb. 4:23). I lung sim aki heng leh I hinkhuo kiheng ahi mai hi. Tuozie’n sil bawltheilou dingin ki ngaitua sin, Pasien a na sil pieh theichien inlen A ma thupi na ding in zang zaw in. Sil na bawl khiel ziehin Pasien na sem theilou dingin ki ngaituo sin. Tuote khu solna hi zaw ahi. Thoukieh vai in silhoi bawl ki sin zaw vai. Pasien tate leh a mite I hi uhi. (Rome 9:24-25) “Aziehpen ama’n eite ei han hii. Judate guoh hilou in Jenteelte lah a patin zong mi ahan hi. Ama’n ka mi nahi kha loute khu ka mipite chi tavang in , ka lung siet lou nam khu ka lung siette chi tavang achi hi. Amen. Bang chituhin sil bawl khiel nanlechin zong Pasien in hing taisan lou ding ahi. A itna khu pom inlen kipah tah leh tha nuam tah in ama na sem va ui. (I John 4:8) “Koi in zong itna anei sih leh Pasien a thei sih, aziehpen Pasien khu itna ahi.”

(I John 3:18) mah ah hi chi’n agen kia hi “Ka tunoute aw, itna I nei uh khu kamteng leh houlimna bep hi dahen. Itna dihtah nasep a hing kilang khu a hi ding a kisam hi. “ Bible tungtawn in I thei siem chiet dingun gintat ahuoi hi. I thu zahte khu kem ching vai in, mailam nawt va ui. Gingtute ihi ua, ginna hing kipat na khu Pasien thu zah zieha hing kipan ahi. I ginna toh kal suon chiet dingin I ki hanthawn uhi. Mangpa’n loupina tang ta hen.