Thangzamuan Hauzel
GM, RBI, Bangalore
----------------------------------------------
ZCF hi Civil society hiam, philanthropic organization hiam hih kei mahleh, biakna / sakhuo nasep kia hilou nasep phatuam tampi ZCF aomna mun khua/gam tuam tuam te ah muhtheih in om hi. Zogam (pi leh pute tenna) pawlam, I Saptuam bingte uh omlouhna khua leh gam tuam tuam ah Zomi te’n Fellowship hoihtakin ZCF tungtawn in I nei ua, hiai biakna common platform khat I tankhawm uh manpha mah mah ahi hi. Zogam lam ichih deuh uh munte ah eimah telna chiat Saptuam leh pawl nana om ahihman in, Zogam pawlam a om Zomite hong gawm a, hong pumkhat sak tu khat ZCF ahi hi.
1981 kum khawng a, Delhi Zomi Christian Fellowship a kipat chiil in, hiaitan paitou a, masawn zel ding leh, India khawpi tuam tuamte ah ZCF a ki behlap ding chih ngaihsutna kinei pha lou hi. Ahia, hun hongpai zel in, tuni chiengin India gam khawpi lian - Delhi, Mumbai, Kolkata, Bangalore, Pune, Guwahati etc ban ah, khovel gam tuam tuam khawpite ah ZCF mun tampi ah omta ahi, chih I thei uhi. Delhi a ipat dek lai un, “Family Worship” chihbang deuh a kipan hinapi in, Secretary Record Book ah “Zomi Christian Fellowship” chi a gelh pah mai in, rubber stamp leng hiai min mah in ana ki bawl suk pah mai hi. A kipat chiil in Delhi ah Zomi naupang Sunday school kai thei tamlou aom ua, tuate khualna in Sunday school section bang a kinei hi. Delhi 1985 in ka pawtsan a, huai nung sang Delhi ZCF bangchi pai touh hiam, chih akip akawi in ka thei kei a, tagahna bang, haksa tuam tuam a tuak tham ding in ka ummoh kei hi. Tuateng kawmkal ah, Pathian’ hoihna mu a, tukum silver Jubilee mel bang amuh theih manin, “Topa hoih hi!” ichi hi. I biak Pathian in, Amah zahtaak a, abia mite amawkna in akoih ngei kei a, A phungvuh a, vangletna namkim tawh A kemden zel zaw hi!
Kum 25 melmu ihih taak chieng un, bang ngaihsutna I lungsim uah alianpen hiam? Ei omna tek ah ZCF aom khakna te ah lungkim takin biakna I nei thei zel ua, hiai tan ah lungkim mai leng hoih khin mai I sa uhia? ZCF mun tuam tuam, gam tuam khawpi tuam tuam a omte kithuzak a, ki houpih ipat louhna uh sawt lawta hi lou hiam? Ki houpih ngei lou a, ei mun tek a ei paidan chiat a paipai lel ding chih pian ihi zaw uhia? ZCF hi Zomite adia movement, revolution chi khat ahi a, hoihtak in kithuzak in, a Vision leh Mission ding bang phuak sinta (vision casting) leng ahoih diam? chih peuh ka ngaihtuahna ah ahong dawk hi. Ei Zomi khangthak te adia khawvel hiaibanga Topa’n zapi a hon honsak pialpual mawk, nidanga I ngaihtuah batlouhna uh mun leh khawpi tenga Zomite ki thehdalh ta, Pathian in deihna nei a, thiltup nei ahi diam? Tuabang A thiltup sepsuahna dia vanzat khat hi dia ZCF hon na pan sak ahi diam? Amah mah in hiai ZCF aomna peuh a phungvuh a, kem tou zel hi ven! ZCF teng teng ki “Network” thei leng vanzat thahaat (powerful tool) ahih I gingta uhia? Kuamah mimal patsuah hilou a, hiaibang biakna Zomite laka hong pieng mawk pen muhlouh khut a piitu om hi di’n I gingta uhia? Hiai Delhi Silver Jubilee lop sung mamah in hiaibang te Topa’ kiang dong in, maban kum te ah ZCF in Vision leh Mission kichien tak, I vek ua I pomtheih uh zongsuah in, ZCF mun tuam tuama ten I manohna uh kibangsak a, kalsuan kibang sak ding in vaihawm hong kipan leh chih lunggulhhuai kasa mahmah hi. Zomite I omna uh Saptuam Pawlpi kibanglou chiat hitamahleh, saptuam pawlpi paidan leh nasepdan tawh kiphu kha sese lou a, ZCF in aseptheih role poimoh lua omding in ka um hi. Tuabang unique role khat ahon sep khak chieng in, Zomite omna saptuam leh Pawlpi te leng ahon kinaisak in, pankhawmna ding platform hoih tak ZCF in ahon bawlsuah thei ding, chih ka gingta hi. ZCF teng hoihtak in networking ki vaihawm leng Pathian gam nna leh Zogam khantouhna ding I septheih uh tampi om dingin ka gingta. Delhi ZCF member teng teng leh simtute na vek un chibai!
No comments:
Post a Comment