Paulienhang, MA (Socio)
------------------------------------------------------
Khristian sakhuo in hoina tampi a’ngtut ma bang in hoilouna zong tampi ahing tun hi. Vangphathuoi I chi diei vangsiethuoi I chi diei, I nam/I gam a khristian biehna ahing lut apat I khawtang hinkhuo banah I tawndan uh nasatah in a’ng ki lamdangta hi. I pu I pa tawndan thupite I nelsieh panta uo, tuni’n khangthate’n bangma tawndan luite I theita sih uhi. I gam a missionary masate’n Khristian gindan ahing na zuisah uh thamlou in ama’u tawndante tampite zong eima tawndan bang phiela ngaithei khop di’n a’ng na zuisah uhi. Tuni’a Khristian tawndan a I ngaisut tampite khu tumlamte tawndan ana hi khiinkhien hi.
Tampen abangma dang zieh hilou in, missionaryte’n khantanhoi thupha mitvahna ahing puoh uh maimai hilou in, I gam I nam khu ahing na vaihawmkhum ut uhi. Missionary ahing kuon khenkhatte zong tualai a British solkal agente anahi uhi. A thuthu ua hing umsah a, a’ng vaihawm khum theina diing un Pasian thu tungtawn in ama’u tawndante ahing na sinsah ua, ei tawndan pouma Pasian thu toh kikal chi’n ahing na nuolpieh uhi. Missionary masate’n ahing na zawthaw taseng ua, tuni tan in ahingna thuhilnate uh I sumkuong chiengkei denta uhi. Laisiengthou gen leh deidante saangin ama’u hing na thumopte I ngaisang zaw ua, I zui ut zawta uhi.
Lungdampawi (Christmas) sa toh bawllou chiengin thupi salou, zu-le-sa toh tawpidawna kikal mawng mawng ahi chi ngaidan (zukham ahoi kachina hi tuonsam lou) I neita uhi. Pasianni a biehinn kailoute khu vangam kai kilkel lou diing leh Pasian thu hatlou dan a ngaidante, Pupa dan a kiteengte dan pulanga koinate leh adang dangte khu ahing na thumopna uh ahiman in tunitan in I lungsimte uh aluodim siengta hi. Tuote kah apat kikoi khietnate khu tapidaw dihtah dan in ina koi kha leng uhi. Tualou ah, Mother’s Day, Father’s Day, Children’s Day chite I ngai thupi ua, nasa deudeu in I lawm dupdup zawta uhi. Tuote khu Khristian tawndan a zong umkha lou, US apat khat leh ni panlaahna zieh a hing piengte khu zui teitei didan in I koi khata uhi. Tam nite leh I khristian ginna in kizopna bang a nei ahiei le?
Britishte ‘Divide & Rule Policy’ in ilah uah, adieh in Zo suonte sungah nasatah in, tunitan in ma sawn zing in kamu hi. Bangma dang hilou in I ginna uh/I biehna uh tungtawn in eite khat-le-khat I ki gaal et tamawh ua, dahuoi kasa mama hi. Pasien theikha nailoute lah a nasep sang in aneu apat jasate kung ah chiltui pawtjen in igen lailai ua, eima denomination lam a lahlut theina ding ngaisut in ibuai thei nalai uhi. Mitam chiel lut joujou Vangam a nuomman
thupitah sangding chibang ilungtang uah um mawh hi. Tampen bangma dang jieh hilou in Kristian biehna hing lut chil lai a western gam a pawlpi tuomtuom te’n eite amau lam a lahlut ding ahing nakituh uh peijing ahilel hi. I gam a khristian hing lut kipahuoi nanleh kipahhuoi louna zong um thou hi. Bang teng hileh sil zousie ahoina ahoi louna um mawng ahia, a laahdan I siem uh khu khantouna lampi khat ahi jel hi. I zahsiem leh ki pumkhatna leh nam khantouna ahing tut ding hi.
Zo suonte/Zo hnahthlakte’n ngaisut tham chinga ka gel khat ahileh, I pupa tawndante uh atha a I zuipat kia ua, western gamlamte tawndan thupi tah tah leh I nei I lam in chin lou sasa I zui sang un, eima tawndan umte toh tulai vaite suhtuoh sawm in pan lachiet lei hoi kasa hi. I khawtaang hindan lam ah, I sakhuo lam a pupa late sahna leh mun tuom tuom ah I pupa tawndan zui pat dan kisin diing ahita hi. Pupa tawndan chia simmaw lou a khovel a I taahlat theina mun mun ua, talat dan lampi sui diing ahi.Tuabang a i tawndan dihtah Kristian daan tawh jong kikal lou te khovel mite mit a itahlat thei chieng un akhangtou minam te ihipan ding uhi. Tualeh, Pasien phatna late midang atawh kibang ding chi um sese lou hi. I pupa sannem lakai a jong Pasien phatna La bawl thei ahi, tuchieng in eima kiphuosa la tampi ineita ua, lungdam huoi in lungmuon huoi hi.
Alangkhat ah enlei, Kristian biehna ipomna uh Silver Jubilee, Golden Jubilee chitahlou in Centenary tanpha jangthei i um ta ua, hinanleh igam inam sung enlei bang khantouna inei uai? Gending thupi taluo kamusih hi. Kristian Biehna in Laipilna (Literacy) ahing tut a, tuni a i officer tamjaw te uh tua Laipilna Kristian tawh hing lut gasuo ahi uh chilei ichikhiel sih ding hi. Hinanleh tuhun chieng in gasuotha muding a umsih hi. Kristian gam/nam tamjaw te kitungding jouta ua, eite ‘Toupa angaibok’ ihi nalai uhi. Nagaland, Mizoram gam a iunaupite khangtou mama uhi. Eite bangchi ! Ei Pasien bieh atuom adiei leh ! I bieh dan uh dihlou chiding inlah hilou deu, hinanle igam inam sung i et chieng in bang e adihlou khat um gige hi. Migam ah Biehna in Social, Political leh Economic te a control a, eigam ah Politics in silteng a control hi.
Bangteng hileh politics athupipen hilou a Pasien athupipen a lungsim leh kamteng a ikoithei hun chieng un, sil dangteng gen ngai lou in ahing hoi ding hi. Seek ye first the kingdom of God, and the rest assured. Lets not run after money; let money run after us.
No comments:
Post a Comment