Na Gamtatnate Kathei Hi

Thang Sian Mung Lethil
Manager Ramp
Air India, Delhi.


“Na gamtatnate kathei a, a sa lah hilo in, ,a vot lah na hivet kei hi.
A sa a hih kei leh a vot hivet leteh kong deih hi.” - Kilakna 3: 15.

Laodikia khopi a om Tapidaw pawlpi tungah TOPA Jesu laikhakna kammal pan a kila khia thu makai kammal ahi hi. Laodikia khopi pen a om takpi mah hi a, nidang lai in Asia Minor a kici tuhun in ah Turkey gam tumlam pang ahi gam mun ah om ahi hi.

Lycus phaizang a gam kitawi tungah om khopi ahi a, Rome kumpi khanlai in Phrygia ukna sungah khopi hausa pen pen ahi hi. Ahoih mah mah Zato sang (medical school) anei uh a, a kicing mah mah khaukhek puangatna (textile industry) anei uh hi. Tua bek thamlo in sum leh pai zekna (banking establishment) zong khopi sungah anei uh hi. Hihte khempeuh hangin khopi aminthang mah mah in, mihau ka hi a, ci thei mah mah ka hih man in, bangmah ka kisam kei hi, na ci vial hi(aneu…17na) a ki cihna uh Khazih in agen hi.

Lai siangtho sunga i muh bangin, TOPA Jesu Khazih in a sila pa Johan zangin Laodikia khopi a om Tapidaw pawlpi tungah a laikhak hih bang ahi hi. Kilakna 3: 14, Laodikia khua pawlpi a kempa tungah hih bangin lai khak in. Amen ahi. a muanhuai leh a thuman teci, Pasian piansak nate a pankhia pa in kong gen in ah: 15.Na gamtatnate ka thei a, a sa lah hilo in, a vot lah na hivet kei hi. A sa ahih kei leh a vot hivet leteh kong deih hi. 16. Sa lah sa lo, vot lah vot lo in, a lum lel a na om manin, ka kam sungpan kong sia khia ding hi. 17. Nangmah in: Mi hau ka hi a, ci thei mah mah ka hih manin, bangmah ka kisam kei hi. Na ci vial hi. A gethei, a hehpih huai, a zawng, a mittaw leh guaktang a om na hihlam na kithei kei hi. 18.

Tua ahih manin na hauh theihna dingin, mei sunga kisiang sak sa kham keima tungpan hong lei in. Guaktang in om a na zahmawh a kidawk lohna dingin, na silh ding puanpaak (keima tungpan) hong lei in la, khua na muh theihna dingin na mit zong mitza (keima tungpan) hong nuh in. 19. Keimah in ka itte khempeuh taai in ka khal (thuhilh) thei hi. Na mawhna kisik kik inla, na lungsim tha khauhsak in. 20. En in, kongkhak ah dingin kiu in ka om hi. Mi khatpeuh in ka aw za a kong hong hon leh ama om na ah ka lut ding a, amah tawh ann ka ne khawm ding hi.Amah in zong kei tawh ann a ne khawm ding hi. 21. Keimah gualzo a ka Pa tawh Ama tokhom ah ka tut khawm bangin, a gualzo mi in keimah tawh tokhom ah a tut khawm theihna ding thu ka pia ding hi. 22. Kha siangtho in pawlpite tunga thu agen bil nei mi in za ta hen.

Khazih in Laodikia khua saptuam pawlpi tungah a laikhak in a kempa muh dingin khak hi. Khazih in Amah leh Amah ahihna hong kigenna kammal pen Lai siangtho sung mun dangah kitam muh lo hi. Amen a hi, a muanhuai leh a thuman teci, Pasian piansak nate a pankhia pa, hong ki cihna in sitni (gensak pa, 1 Jn.2:1) ding hilo in, amaute thuk dingin, nang bang kisa na hi hiam? chihna khat a hi hi.

Aneu…15,16na tawh kisai in ah, Khazih kammal in, agam leh amun a thupiangte zangin saptuam pawlpi tungah taihilhna kam a pau hi. Laodikia khopi pen Kolosia khopi leh Hierapolis khopi in a tehtuah na a om khopi ahi hi. Kolosia leh Hierapolis in a min nei thei tui nam nih anei uh hi. Hierapolis khopi sungah zatui a kizang thei tui sa a phul hi. Mi kuamah peuhmah tua tuisa in a kisil uh ciangin, a ci uh dam hi.

Kolosia khopi sungah aciim mah mah tui vot a phul leu leu hi. Tua tui vot phul pen cidamna ding tawh kituak in zong lim mah mah hi. Loadikia khopi a teengte in dawn dingin Km 6 a sau tuilawng tawh a zawl lut uh hi. Hih tui dawn in nuam sa mah mah uh a, ci nat lu nat a tuah uh ciangin Hierapolis khua ah pai in tui sa phul ah a kisil uh ciangin damna a ngah uh hi. Khazih in a saptuam pawlpi hihnate amuh ciangin, a kempa tungah a sa lah hilo in, a vot lah na hivet kei hi, (…15na) a ci hi. A sisan tawh a lei pa in a it mah mah a saptuam pawlpi in a hihna uh kician in a om uh ngiat in, a sa a hih kei leh a vot hi vet leteh kong dei hi , a cih beh lai hi. …16na ah, Sa lah sa lo, vot lah vot lo in, a lum lel a na om manin, ka kam sung pan kong sia khia ding hi. A cihna in, amaute in Tapidaw a hih uh hangin Pasian a kisap luatna neilo uh ahih man un, Khazih in kihei san dingin vauna kam pau zang hi.

Aneu …..17na ah, a tunga mah bangin, Tapidawte om zia Khazih in a neih leh lam thu uh siksan in a gen kik hi. Laodikia khopi a teengte hauhna a kigen ciangin, na khempeuh a kicing piik peek in aneih mateng van leilei leilei uh hi, ki ci hi. A.D. 60 kum pawl in ah Tangkang zinling hangin a khopi cimgawp in kisia dim dem hi. Kuamah huhna sanglo in a teengte in a khopi uh kilam kik hi. Rome kumpi khutnuai a om ahih uh hangin, a huhna uh khempeuh simmawhna tawh kikim in ngaihsun in, sanglo uh hi. Hih hun khit zawh kum 40 khit ciangin Khazih laikhak ngah uh hi. Lawkite tawh a teng khawm uh hangin, Tapidawte in sisan tawh leisa ahihna uh kithei lo uh hi. A lei pa in lah a Eklisiate, kawk banna, vun tonna leh hoihlohna khat beek omlo, a siangtho, mawhsakna ding omlo, a vanglian pawlpi Amah aang sungah a kipiak ding uh a deih hi. (Eph.5:27). Ahih hangin amaute tuabang na hilo in Khazih muhna ah, A genthei, a hehpih huai, a zawng, a mittaw leh a guaktang a om a na hi uh hi.

Aneu…18na ah, Kimanna aneilo pawlpi in kimanna hong neih theih kikna dingin Khazih in lamlahna nei hi. Hehpihna, mihing a kipan piang hilo, Tangkum Pu a kipan a piang mihingte hong hehpihna hangin eite zong Khazih in hong kihei san nailo in, hongsam lai lai hi. Khazih in, na hauh theihna dingin, mei sunga a kisiangsak sa kham keima tungpan hong lei in. a ci hi. Lei tungah hauhna thu a kigen ciangin a tangpi in kham(gold) tawh kisim hi. Lai siangtho ah Pasian thu tawh gentehna in kila hi. Mei sunga kisiangsak sa a cih ngiatna in, niin leh sik dang bangmah tawh kihel lo, sam ek kai theilo, zuau thu kihel lo, a kipel lo kamciam, cihna ahi hi.

Guaktangin om a na zahmawh a kidawk lohna dingin na silh ding puanpaak (keima tung pan) honglei inla, Puanpaak in khialhna niin banglo, vantung kizepna puan genna in kizang hi. Laodikia khopi a teengte in puangat khaukhekna a kicing mah mah a neihna uh pan in, Tuu-mul puan sandanga vom abawl uh hi. Hih tuu-mul puan hangin zong aminthang mah mah uh hi. Midangte puanlum in a tuam uh hangin, Khazih a dingin amaute guaktang tawh kibang ahi uh hi. Tapidawte hong kihei in, a mawhna uh kisik kik in, TOPA lam hong zuankik dingin deih a, Khazih a lungsim kongkhak uh kiu lai lai hi. A gualzo pa kizepna puanpaak silh sak ut in Khazih in sam lai hi. Tua khit ciangin Khazih in khua na muh theihna dingin na mit zong mitza (keima tungpan) hong nuh in a ci lai hi. Laodikia khua a teengte Zato lam ah minthang mah mah leu leu uh hi. Zato sang (medical school) hoih mah mah anei uh hi. Adiak in mit lam tawh kisai siamna sangpi anei uh hi. Tapidawte in Kha-lam nuntakna ah a hihna uh kimu cianlo ahih mah un, Khazih in amah tungpan mitza hong nuh un, ci hi.

Aneu ….19na ah, Khazih in a itte, a thuhilhna thu a gen hi. Tua tawh kikim in Hebia(Hebrew) gelh pa in hih bangin ci hi.12:6,7 ah, Banghang hiam cih leh TOPA in a itte thuhilh a,A saansa a tate a sat hi, a ci hi. Thuhilhna nathuak uh ciangin, tate tunga a kibawl banga Pasian in note tunga hong bawl ahi hi. A pa in thuhilh loh tate om ngei ahi hiam ? Khazih in a itte thuhilhna kammal a zaksak khit ciangin, a sapna aw zasak hi. Mawhna sungah puksa ahih hangin kisik in, lungsim tha khauhsak kik dingin pawlpi tungah thu hilh hi. Aneu …20na ah, En in, kongkhak ah dingin kiu in ka om hi. A ci hi.Leitung nuntakna tawh a lungkim khin pawlpi tungah Khazih in a dawh zawhna kilang sak lai in, kha-lam nuntakna ah ann-kham a ngahlo, a genthei liangvai Laodikia pawl mai ah a kham piik peek a neek dingun Khazih in kipawl khawmna (Fellowship)ann kuang a lui hi.

Khazih in a laikhak khupna dingin a lunggulh huai mah mah kam vaikhakna tawh thukhupna nei hi. Tua in ah, Pa ziatlam ah a tut mah bangin, (Heb.1:3).a gualzo mi tawh van ah a tutkhawm theihna dingin thu apia ding hi. Pawlpi dangte tunga laikhak mah bangin zakna ding bil nei khempeuh zak dingin, Kha siengtho in pawlpite tunga thu a gen bilnei mi in zata hen. (…22) ci in khin hi.

Laodikia saptuam pawlpi om zia in, kum zalom 1722 A.D. pan Khazih hongpai kik hun (rapture) tan sunga om Tapidawte om zia ding lahna hi, ki ci hi.