Mangpa Pasian in Adam hansie a lawkhum lai in thudang toh pan masa lou in ‘Nang zong na zi thu na man ziehin……’ chi kammal toh apan hi. (Genesis 3:17) I Mangpa Pasian leh Adam aki inkhenlawhna uh zong zi thu manzieh ahi. Zi thu mang pasalte kisamsietna pen Adam a kipan ahi tabou hi. Adam in a zi ana manna ziehin ama khang behbeh hilou in, a suon-le-hahte tawdong in samsietna a ngalaw uhi. Tuoziehin, nang zong na ji thu na man zieh a, na ni-le-pa na hasietsah khah lepen, nang khang guoh hilou in, na suonte tanpha in zong samsietna na tang ding hi.
Zite thu manglou ding I chi san vang in, I zite simmaw vai in a gen zousie uh tangniel paipai ding china hisam lou hi. I nu-le-pa toh kisietna diing leh thu hoilou a hing gengente uh manglou ding I china ahi bou hi. Mi khenkhat in a zite uh it taluo uh, it sengseng uh ahiziehin, a thugen zousie uh a kawi aman umlou in a zuisawm tazen uhi. A zi gen ahipou leh adih leh adihlou kan chien vateh lou in a tahsang pai pai uhi. Tuo ahi man in zi khenkhatte’n thudihlou a mop thithe zing uhi. *Nu mei zousie a tuochi I china hisam lou ahi. Hinanleh numei khankhatte’n a inn pi-le-pu tangmu pailou leh tuochi kha chi diig chia thu a gente uh a tang zadah ua, ama ki musitna lam in a la paipai uhi. Tulai numeite ahileh khovel khantou dungzui in ama’u kitoudel thei ngen ahiman un tehsete a simmaw thop paipai uhi. Tuoi bangkal ah pasalte’n pilvangtah a mou-le-tehpi kaal thei siem poimawh mama hi.
Tam bang ahiziehin na nu mitmawna leh na sanggamte ginatlounate ahing pienchieng in ki kuppi sinlen, ngaisah vawtsin, hoi in hoisih nan uleh ka hnu ka pa leh ka sanggamte sanga ka itzaw koima um sih chisan lel in. na’ng na nu, na pa leh na sanggamte na itdan na zi in atheisiem zou nailou leh na zi toh pumkhat suoh nailou china nahi lel uhi. Na it teng a’ng itpi a, na ngai teng a’ng ngaipi thei leh pumkhat ahing suohpi ma sangsie nangpen a phal langkhat shi na hi a, mi na phazou sih ding hi.
Bangkim bawl thei Pasian kung ah thum gige in. Nou innkuon vangsietna diinga Pasian in mou gilou ahinpieh ahisih a, nou inn sung apatsa numei hoi ahing suoha, a giitlouna teng a nuosie ding Pasian in a deizieha nou inn sung a ahing lutsah ahizaw bou hi.
Na zi in ahing ze-et zing hi
Na nu-le-pa na itdan na zi in a thei ding ahi. Na zi to ki it seng senga, thusim, thu lang gen ding leh genlou ding manghil zen a na houlim chiengun, ‘ka nu leh ka pa sang in nang ka hing itzaw hi’ china kamteng mawng mawng nazah kha vawtlou ding ahi. Na zi in naki ten tunglai uh, na mouthah chillai in, na nu leh na pa tunga a hasietnate na kungah ahing genngam sih hi. Tami hun lai tah in na nu leh na pa na itdan na zi kungah houlimpi zelzel in leh, theisiem sah in.
‘Ka nu leh ka pa na hing itsah dante kamu chiengin, ka hingna a lian deudeu hi’ chi zelzel in. Nang toh I ki tenkhah pen kei leh ka innkuonpite vangpha mam ung, chi in nakipahnate thei sah zelzel in. Mihing pen ahing ki gensiet sangin ahing kiphat leh tha kinga in hoilam kinawt zaw zel hi.
Na zi in na lungsim ahing ze-et hi chi thei inlen, Samson banga genlou dingpu na genkhah ding ki veng in. Na zi pen mimaw, mingol ahisamsih leh ‘na nu leh pa muda taluo ing’ hing chi masa ngailou ding hi. “I khuote’n na innpi nu leh pa a ha giitlou va-ia dan uh, thuohat ka’ng san dan, sila lah hisam lou chin a, ahing chizel ua, ke’n vang thuohah sa mama ing” ahing chimasa ngeingui ding hi.
Tam bang thute ahi chi chienga, a thu ala kan chien lou pia, na nu kunga, “Pilvang mam un aw, na hichi uleh pen umkhawm theisih va ui” na chi pheipei mawh leh pen, na zi in ‘Jou na vang e, sol zou mama vang e’ chi in ahing uang semsem ding hi. A chillai a, “Thuoh ha sa mama ing” ahing chisapi, na lungsim athei tah bep chieng a, “U ‘NN’ aw, ken vang thuoh zou nawn mama sing” ahing chita ding hi.
Na theilou kalin na zi in na lungsim ahingzou siengta hi. Tam bang ahizieh in, na zi zahna ah, na nu, na pa leh sanggamte phoh vawt sin, na zi zahlou kal in na nu, na pa leh na sanggamte thu kikuppi zel inlen, a theisiem theina ding un aw nemnou leh kamdam tawh dap hil zel in. Ama un zong na zi mawhna umloupi khat thei khielkha himai thei uhi. Na zi ding in zong thu genzel inlen, a ki theisiemlouna uh, a tuomtuoh ah suh mai sawm in. Zi leh nu/pa/sanggamte kituohlou chipen gehen/hell a umtoh ki bang khat ahi.
No comments:
Post a Comment